Saturday, March 17, 2007

ثمن الحرية


الشاب المصرى اللى بينضرب بيدفع تمن مطالبته بالحرية


نظرة لطفل اقصى مطالبه انه يبص من تحت رجلين العساكر

كل العساكر ديه علشان خاطر واحد قال لا للظلم

الشرطة ومعاملتها الادمية للمواطنيين







ثمن الحرية اللى عنده ذاكرة سينمائية هيفتكر الفيلم ده على طول واللى معندوش انا اقوله الفيلم ده بيحكى عن بطل مصرى كان بيعمل عمليات فدائية ضد الاحتلال الانجليزى البطل ده فى الفيلم كان اسمه احمد عبد الحفيظ بعد احدى العمليات راح استخبى عند اسرة مصرية خبته وحميته عندها
لحد ما اتكشف امره فهرب فقبضوا على الاسرة ديه وعذبوها
انا اول مرة اشوف الفيلم ده فى حياتى وانا بتفرج على الفيلم شوفت مشهد التعذيب اللى حصل للاسرة علشان تعترف لدرجة ان رب الاسرة مات من كتر التعذيب واللى كانوا بيعذبوه فى سجن القلعة المحتلين الانجليز الراجل كان بيتعذب وبيضرب بالكرباج ادام مراته وابنه الطفل الصغير ومحدش ضعف ولا حاجة ولا اعترف على البطل المصرى لانه كان بالنسبة ليهم الحلم اللى هينقذهم من الاحتلال فكان لازم يدافعوا عنه بارواحهم فضلوا يستحملوا التعذيب لحد ما رب الاسرة مات
وانا بتفرج على المشهد ده مجاش فى بالى غير حاجة واحدة هما عملوا كده ليه هما ضحوا بارواحهم ليه علشان مين علشانا احنا
طب سؤال هما لو كانوا يعرفوا ان المستقبل بتاعنا هيبقى منيل كده كانوا ضحوا بحياتهم ولا لأ

اتفرجت على المشهد ده وأنا كنت لسه الصبح بشوف اخبار الاعتصام بتاع كفاية والابطال اللى اتقبض عيهم وطبعا ما ادراك عن القبض على ناس ضد النظام وفى الحالتين ده النظام الحاكم ايام الاحتلال الانجليزى ودلوقتى والتعذيب هوا هوا برده
الابطال زمان لويعرفوا ان الوضع متغيرش من زمان عن دلوقتى بس الاحتلال اتغير من الاحتلال الانجليزى الى الاحتلال البوليسى ومن ملكية معلنة الى ملكية مستترة تفتكروا كانوا ضحوا بحياتهم من اجل المستقبل المنيل اللى احنا عايشينه
الشعب كله رفض التعديلات الدستورية ما عدا بتوع الحزب الوطنى اللى انا بقيت اعتبرهم الخونة المصريين اللى مش حاسيين بالام الشعب ولا مشاكله
بتوع الحزب الوطنى كل ما يتكلموا يقولوا احنا لازم نضحى علشان الاجيال القادمة هيا الاجيال القادمة ديه مش ناوية تيجى ليه بقالنا خمسة وعشرين سنة بنضحى علشانهم وهما مش عايزين ييجوا طب نضحى باكتر من كده ايه افتكر ان احنا اخر جيل ممكن يضحى لان بعد كده مش هنلاقى ناكل او نتجوز علشان خاطر تكون فى اجيال تيجى من اصله
ثمن الحرية تفتكروا الراجل العظيم اللى ضحى بحياته علشان يحمى البطل المصرى فى الفيلم لو كان يعرف ان تضحيته ضاعت بلوشى وان احنا رجعنا محتلين تانى بس المرة ديه من حكامنا تفتكروا كان ضحى بحياته
ثمن الحرية غالى جدا بس الاغلى ان الاجيال اللى بعدها تقدر تمن الحرية ديه وتحافظ عليها بس للاسف احنا مقدرنهاش ولا حافظنا عليها فضيعنا مجهود وتعب وتضحية اجدادنا هباء
للاسف كل اللى بيحصل من حكامنا وجلادينهم بيضيع كل امل بيتولد جوا صدر اى مصرى بيقتل فينا روح الكرامة والشعور بعزة النفس وحب البلد ديه
يا سادة سيبونا نحب البلد ديه انتوا مش اوصياء علينا احنا بنحب وبنمجد البلد ديه مش حكام البلد ديه
البلد ديه جميلة اوى ياريت نحبها الحب اللى البلد ديه تستاهله مننا
تمن الحرية غالى اوى اجدادنا ضحوا بحياتهم علشان خاطرنا

ماتوا حباً فى البلد ديه
ياترى احنا قد المسئولية اللى سابوهلنا

91 comments:

Anonymous said...

تمن الحرية غالى اوى يا محمد .. بس المشكلة ان احنا بقانى عاوزين ندفع التمن بالفيزا .. يعنى مانغرمش حاجة دلوقتى ولما البضاعة توصل اللى هى الحرية نبقى نشوف علينا كام .. دة لو منصابناش على البنك كمان
انت حاطيت ايدك على اصل المشكلة فعلا ... هل احنا انا وانت وهم وهن مستعدين ندفع التمن دة ولا .. ولا فيزا برضو؟

Black Cat said...

The Price Of Freedom

ثمن الحرية ... انك تتلوث سمعتك
ثمن الحرية ... انك تعيش فى غربتك وانت مطاطى راسك عشان فى ناس بتعايرك باللى بيجرى لمصر
ثمن الحرية ... انك تنداس تحت الجزم الميرى

ثمن الحرية .. انك تعيش باقى حياتك مختل من جراء التعذيب النفسى اللى قابلته فى المعتقل

ثمن الحرية ... انك مش هتطاطى غير لما حد يدوس على رقبتك
واللى بيدوسوا كتير اوى

Ahmad Hegab said...

لا اجد اجابة على سؤالك

بس الناس دى طلعوا رجالة

Anonymous said...

شوف يامحمد أهم حاجه الأمل
لازم يبقى لسه عندك أمل ان البلد دى ممكن تتصلح
مش بحب أفقد الأمل ابدا
حتى لو فاضل ثانيه واحده هالعب عليها
من غير أمل يبقى مالاناش اى لازمه

سيبك من المظاهرات علشان انا قريت من مدونات تانيه انها كانت اى كلام

هموا أثبتوا موقف وخلاص
مش ده المهم
المهم وقت الاستفتاء بقى
-------------------------------
مش عايز أقولك انا هابطل أقرى الأهرام علشان يوم الاحد -امبارح- على الصفحة الأولى قالوا خبر غريب قوى قوى قوى قوى قوى قوى قوى قوى قوى قوى قوى قوى قوى قال ايه ياسيدى 89% من الشعب راضى عن اداء الحكومة و11% بس اللى معترضيين
واغلب المعترضيين نساء
انا بس كان نفسى يقولوا أنهى بلد وأنهى حكومه اللى بيتكلموا عنها دى؟
ده امربكا اللى هى امريكا بجلالة قدرها لا يمكن يكون الشعب راضى عن اداء الحكومه بالنسبة دى
انا مش عارف جابوا الناس دى منين

على كل حال لما يجىء الاستفتاء على تعديل الدستور نبقى نقول لا
بس ياخوفى الحكومه تطلع تقول 99% قالوا نعم للتعديل

شوف هو احنا بقينا فى زمن كل شىء فيه جايز
مابقاش فيه مستحيل
وربنا يستر

ودمت بخير
سلام

MoHaMeD HoSSaM said...

المشكلة الحقيقية انهم مش شايفين اساسا اننا من حقنا اننا نطالب باى حاجة خالص والمفروض انهم اصحاب البلد واهنا الى شغالين عندهم وهى دى الكارثة انهم مبقوش يعتبروا الشعب شعب بل مجموعة من الرعاع يجب تائدبها حتى لا تخرج عن النظام
نظام اى دا بقى اكيد نظام كل لما تتكلم اكتر تنضرب اكتر

Unknown said...

أها هو تمن الحريه غالي, بس لازم يكون كده, لأنها حاجه غاليه, فمينفعش ان تمنها يكون رخيص, بس اللي يقدرها, ويقدر انه يدافع عنها.

محمد عبد الغفار said...

لأ

The Alien said...

الحرية تنتزع ولا تطلب
يعني مينفعش نقعد نطالب بالحرية
عشان ببساطة محدش بيتنازل عن سلطاته
اللي ف إيده السلطة من مصلحته إن الوضع يبقي علي ما هو عليه
والشعب من مصلحته يحارب عشان حريته
هنا بقي ييجي تمن الحرية
المشكلة إن الشعب مش عارف فين مصلحته
والي عارف مش بيعمل حاجة غير إنه بيدعي ويرفع إيديه لفوق ويستني الحرية تجيله من عندهم وده مش هيحصل

اللي بيحصل اليومين دول أكبر دليل علي إن الحرب صعبة
وكل ما بنسكت بتصعب أكتر ومجهود اللي سبقونا بيضيع
يعني إحنا عملنا إيه ف اللي بيحصل دلوقتي
فيه حالة إستسلام غريبة وغير مفهومة
وإذا إستمرت يبقي إنسوا

اللي بيحصل ده مليني غيظ ومش مخليني أركز
تحياتي

شخبطة ملوكى said...

اخى العزيز
فيلم ثمن الحرية من اروع القصص اللى شوفتها فى حياتى
الرائع عبد الله غيث و الرائع محمود مرسي و المعلم الكبير المتمكن صلاح منصور و كريمة مختار ومحود الحدينى و غيرهم كثيرون ممن ابدعوا فى هذا العمل المطرب و الراجل الغلبان و خلافة
بجد الناس دى ضحت بحياتها و لما ضعف صديق الثائر هما اللى ثبتوه
حتى البيه الظابط ضميره صحى و قتل الحكمدار الانجليزى
لما نفوق كده اكيد هانتحرر تانى
اشكرك على البوست الجميل

Tamer Nabil Moussa said...

الحرية جميلة بس مسئولية فى نفس الوقت ولازم يكون الانسان عندة وعى وقبول للحرية لكن دون خروج عن الاداب العامة والثوابت التى تربينا عليها

انا شايف اننا محتاجين كتير يامحمد عشان نعرف ونفهم معنى الحرية صح

تحياتى

micheal said...

بوست جميل زييك يا محمد و الفيلم اللي أنت متكلم عنه شفته لاول مره من سنتين و جه في بالي نفس اللي جه في بالك بالضبط ...بص أنا عن نفسي مش متفائل خالص المرحله الجايه لان كل شسء متلخبط و مفيش رؤيه واضحه الواحد ممكن يتوقع من خلالها..علي العموم ربنا يستر من اللي جاي
تحياتي لك و أرجو أني مكنش جيبتلك اكتئاب

الزعيمة said...
This comment has been removed by the author.
الزعيمة said...

بوست جميل جدا يا محمد

بس زمان كان اجدادنا عارفين مين عدوهم
وعارفين بيحاربوا وبيناضلوا فين وضد مين الوقتي الفساد معشش جوا البلد وسارح وضارب بجذورة فى كل مكان

لونة نفس لونا وبيتكلم نفس لهجتنا
حتعرفة منين وتكافحة ازاى وكل اليتكلم يتحاكم بتهمه اثارة الشغب ومحاولة قلب نظام الحكم وشوية تهم كدا محفوظة وقوالب جاهزة تودي المعتقل!!

زمان اجدادنا لما كانوا بيناضلوا الكل كان بيحترمهم ويساعدهم ويتحمل التعذيب عشان يحميهم ومش يقول عليهم

الوقتي اليدخل فى مظاهرة ولا يعمل احتجاج يقولولك الناس شوية شباب بيخربوا فى البلد وهي مش ناقصة

زمان اليتكلم كان اسمة مناضل
الوقتي اليتكلم اسمة عاطل

يا ريتنا نرجع لايام الاحتلال الاجنبي
الناس كلها كانت عارفة مين العدو البتحاربة ومين الصاحب ومين العميل

الكل تاه فى بعضة يا محمد
ومحدش باه عارف مين المعانا ومين الضدنا

وزي ما قولت بلدنا حلوه
بس هي فين بلدنا دي؟
محكومة ومتقيده ومخطوفة يا محمد
يا ريت نعرف اية ثمن حريتها ومتاكده ان كلنا حندفعه حتي لو كان من دمنا ومستقبلنا وحياتنا

بس المتاكدة منة برضة ان لو حبينا نعمل حاجة احنا الحنضيع بس وبلدنا حتفضل زي ماهي مخطوفة ومقيده

تقبل ارق تحياتي وخالص تقديري لك
وبعتذر عن الاطالة

ibn nasser - ابن ناصر said...

اه هو ه ثمن الحريه فعلا , واا اما شفت صور اللي ناشرها عندي بتاعت الراجل العجوز قات لنفسي يعني الرجل المسن راح واحنا لأ ..مش عارف اعمل ايه غير الاعتراض ويا جماعه افرحوا ابشروا هذ طريق الثوره وأنا مؤمن ان الماضي يتكرر وكل المؤشرات تدل علي هذا
تعالي شوف التحديث اللي عندي .
وعايز نصيحه منك اروح مظاهره ولا ؟؟
تحياتي علي المقال الرائع

soosa el-mafroosa said...

سيذكر التاريخ دوما المكتشف المصري العظيم
محمد حسني مبارك

حيث أنه أول شخص إكتشف طريقة تحويل البشر إلى فراخ بيضا

تحياتي من عشة الفراخ
كاااااااااااك

Hannoda said...

اللي ضحوا عشان البلد كانت هي (البلد) همهم... ضحوا عشانهاهي

بحط نفسي مكانهم و أسأل نفسي لو عرفوا أيامها ان اللي حايحكمنا واحد مننا مش واحد تركي و لا انجليزي... بس اللي مننا ده هايضيع حقوقنا و نبقى احنا اللي سارقين نفسنا.... تصدق صح؟؟؟؟

كان ايه اللي حايجبرهم يضحوا؟؟

كنت ناوية أخالف رأيك.. بس لما تخيلتها طلعت انت صح

AbdElRaHmaN Ayyash said...

http://al-ghareeb.blogspot.com/2007/03/blog-post_1866.html

-------------
لنضع من هنا التصاميم التي نعبر بها عن رفضنا للتعديلات الدستورية
شاركونا

FATMA said...

احنا كمان لازم نضحي بس قبلها لازم نتأكد من قيمة الحاجة اللي هنحصل عليها ثمن هذه التضحية و هل فعلا هنحصل عليها

الحارس said...

أستاذ محمد
طبعا كل كتاباتك رائعة وجريئة وواضحة وصريحة ودايما بتقول كل اللى نفسنا نقوله
ولكن ردك على التاج
زادنى أعجابى بك لسبب وحيد انك متدين
ربنا يوفقك

مصر هى أمى said...

طارق
لا فى ناس مستعدة تدفع التمن زى ما كان فى زمان ناس مستعدة تدفع التمن فى دلوقتى برده ناس مستعدة تدفع التمن لانها بتحب البلد وخايفة عليها وطبعا فى ناس زى ما انت قولت نفسها تدفع بالفيزا وتجلها الحرية لحد عندها وده عمره ما هيحصل

مصر هى أمى said...

black cat
فى ناس كتير دفعوا التمن ده ودلوقتى احنا بنفتكرهم بكل خير
سعد زغلول احمد عرابى مصطفى كامل محمد نجيب عبد الناصر
طبعا علاء وابوه مش منهم

كل عصر ولازم يكون فيه ضحايا المهم ان التضحية تكون بفايدة متروحش هدر

مصر هى أمى said...

احمد حداد
اخويا الصغير

ولا انا كمان لقيت اجابة على سؤالى الناس ديه ضحت بحياتها علشانا واحنا صونا تضحيتهم ولا لأ
مش عارف بس افتكر ان احنا ضيعنا مجهودهم فى الهوا

مصر هى أمى said...

حسن محمود
انت لسه عندك امل انت بتحلم يا ابنى ولا ايه مجلس الشعب وافق خلاص على التعديلات الدستورية وطبعا النواب الخونة بتوع الحزب الوطنى اعتبورا ان اللى عملوه يتفق مع مصلحة الوطن والمواطنيين مش عارف انهى مواطنيين بيتكلموا عليهم يمكن احنا مش عايشيين فى البلد ديه

انا مش عارف بتوع الحزب الوطنى ناويين يقابلوا ربنا ازاى ولا هما فاكرين ان علاء وابوه هما اللى هيحاسبوهم يوم القيامة
الاهرام يا سيدى النهاردة بتقوا ان الاغلبية وافقت على التعديلات علشان خاطر مصلحة البلد وان بتوع الاخوان حاولوا يبوظوا الصورة العظيمة للتعديلات
والله العظيم العالم ديه بتهرج بجد وبيستخفوا بعقولنا

مصر هى أمى said...

حسام
كلامك صح فعلا هما مش شايفين ان من حقنا اننا نطالب باى حاجة علشان كده انا قولت لو سمحتوا انتم مش اوصياء علينا احنا بنحب البلد ديه واكتر منكم كمان فعايزنها تكون احسن

مصر هى أمى said...

اسراء العزيزة

صح تمن الحرية غالى واجدادنا دفعوه واحنا جينا ضيعنا مجهودهم يبقى هما استفادوا ايه
بس احنا دلوقتى عايزين نرجع حريتنا تانى تفتكرى هيسيبونا نرجع الحرية للشعب تانى

مصر هى أمى said...

محمد عبد الغفار

لا
ليه كده الاحباط ده بس تصدق انت عندك حق احنا مقدرناش تمن الحرية ولا حافظنا عليها فبالتالى منستهلهاش

مصر هى أمى said...

بيشوى

صدقنى فى ناس كتير مش ساكتة لكن المشكلة ان التعذيب بقاه اصعب زمان كانوا التعذيب من الانجليز واحنا كنا عارفين الحرب مع مين لكن دلوقتى التعذيب من اخواتك مصريين زيك والمصيبة انك بتدافع عن كرامتهم وكرامه اهلهم وهما يعذبوك منطق غريب من الشرطة
اللى فى ايده السلطة عمره ما هيتنازل عن الحكم
كلامك فعلا صحيح بس المشكلة ان الكلام ده فى الدول العربية المتخلفة بس زينا لكن بص مثلا على فرنسا شيراك ساب الحكم بس ما دى مهمته كا هوا الحكم لازم يكون عمل تطوعى والريس يخدم البلد مش زى عندنا

مصر هى أمى said...

شخبطة ملوكى
المهم احنا هنفوق امتى المصيبة لنفوق بعد فوات الاوان

مصر هى أمى said...

تامر
كلامك صح احنا محتاجين كتير علشان نعرف معنى الحرية فى ظل احترام الاخرين والعادات والتقاليد الخاصة بينا
لكن المصيبة انهم مش عايزين يدونا اى حرية ولا حتى بداية حرية يبقى هنتعلمها امتى

مصر هى أمى said...

ميكليتو
انت تجيبى اكتئاب دا اول حاجة حبيتها فيك ابتسامتك الجميلة

الاوضاع اصبحت غريبة جدا ومفيش حد عارف الصح من الغلط وللاسف حتى الصحافة عندنا القومية منها بتهلل للتعديلات وتصفها بالعظيمة اما المعارضة فبتشتم فيها يعنى حتى مثقفين البلد مش متفقين على حاجة

أسوور said...

كلام كبير قوى يا محمد
وعمر الظلم ما بيدوم ابدا
مسير الظالم يبقى عبرة
أو يموت وبرضه فى الآخرة يبقى عبرة

تحية من قلب مجروح

إبراهيم محسن said...

انا لسه جاي من عند بيشوي وشكلكوا كده هتودونا في داهية

عاوز حرية اقلع هدومك واجري في الشارع
عاوز حرية نط من البلكونة
عاوز حرية ارمي نفسك في البحر
اخبط دماغك في الحيط

دي مبادئ الحرية بتاعت بلدك.. ليست للحرية اي معاني غير تلك المعاني

أمريكا لما بدأت كقوة عظمى وقالت يا حرية كانت بتحاول تلم شعوب العالم التالت حواليها

ودلوقتي أمريكا أم الحرية عاملة قانون اسمه الاشتباه.. يعني ممكن تتراقب في اوضة نومك وفي حمامك لمجرد الاشتباه.. مثلاً يشتبهو فيك انك بتشتم بوش في سرك

الذي يملك هو من يحكم.. دي حكمة قديمة المالك هو الحاكم الرئيسي
اللي ماسك البلد ناس لو مصالحهم مع الحرية هيدوك حرية لما تزهق
بس المصالح مش مع الحرية.. يبقى ايه.. هيوقفوا مصالحهم علشانك.. لأ طبعاً اللي هيمد ايده على اكلهم هيدوسوه بجزمهم

بس دي فلسفة الحرية
يا ترى نقدر نغير معاني الحرية؟
يا ترى من أول سقراط لحد ايمن نور.. نقدر ناخد حقوقهم.. نقدر نرد اعتبارهم؟؟؟
مش عارف بس ربنا يوفقنا

سلام يا محمد

ibn nasser - ابن ناصر said...

...>دعوه الي كل مصري حقيقي<
سيكون الاستفتاء علي التعديلات الدستوري يوم الاثنين الموافق 26-3-2007 والباب مفتوح من الساعه الساعه السابعه صباحا الي السابعه او السادسه مساء وسيكون الاستفتاء بالبطاقه الشخصيه اذا كان في الشخص سيذهب لدائرته اما اذا كان المواطن يريد ان يذهب للاستفتاء في مكان أخر فهذا يتطلب البطاقه الانتخابيه ..يا جماعه يالا نروح يالا خليهم يسمعوا صوتنا ..المقاطعه معني السلبيه هنروح ونقول لأ كلنا ..هتروح؟

david santos said...

Hello!
have good day
InsyaAllah

بيتنا القديم said...

واحد زي سموك

كان بيعرف يأذن للحرية

خمس مرات في اليوم ينادي بالحرية

محدش إستجاب وإترن علقة محترمة

دخل سجن القلعة شاف جوه حسن الهلالي

وشاف كمان احمد عبد الحفيظ وغيرهم

بس اللي لفت نظره هو لافته كانت علي

باب السجن مكتوب فيها مرحباً بك في

مالطا !!!

مصر هى أمى said...

الزعيمة
شكرا لاضافتك اللى بتسعدنى دائما

كلامك فيه شىء من الصحة ان المحتل لونه نفس لونا وبيتكلم نفس لهجتنا وان اللى بيحارب المحتل دلوقتى بيبقى مخرب
كن فى حاجة ان احنا كلنا عارفين مين المحتل دلوقتى سيبك من بتوع الحزب الوطنى لان دول زى قلتهم لو الريس قال يمين يقولوا يمين ولو قال شمال يقولوا شمال
المحتل الحقيقى ساكن هناك اللى فى القصر ده الاداة اللى بيحركها المحتل اللى فى امريكا
يبقى احنا نعمل اللى علينا ونقاوم الاداة اللى موجودة عندنا زى اجدادنا مرحوش يقاوموا ولا يحاربوا انجلترا بالعكس حاربوا العساكر الانجليز اللى هنا فى مصر
احنا كمان نعمل اللى علينا علشان حتى يوم القيامة اما ربنا يسألنا عملنا ايه فى دنيتنا هنقول على الاقل رفضنا التعديلات اللى فرضها علينا الحاكم صرخنا بعلو حسنا وقولنا لأ

معلش يا زعيمة من طريقتى فى التعليق لكن انا بصراحة مولع جدا كل ما بشوف الجرائد القومية وهيا بتنافق وتقول ان الشعب كله موافق على التعديلات

مصر هى أمى said...

ابن ناصر
شوفت طبعا التحديث اللى انت عامله بس مظاهرة ايه اللى انت بتقول عليها
لو بتسال على الاستفتاء
طبعا لازم تروح وتقول لا لا لا لالو قصدك ثورة الشعب دلوقتى ياريت يكون ده فعلا طريق نهضة الشعب ومطالبته بحقوهه

الأباصيرى said...

لأ .. أحنا مش قد المسئولية

والأبطال اللى ماتوا فى الحرب
ماتوا للأسف على الفاضى

أسف دة رأيي الشخصى

مصر هى أمى said...

سوسة المفروسة

حول الشعب المصرى لفراخ بيضا والله العظيم ضحكت على الجملة ديه جدا
بس يا سوسة الريس تفتكرى هياكل الفراخ البيضا وهيا فيها انفلوانزا لان الريس اكل البلد كلها ومهموش حاجة

مصر هى أمى said...

هنودة شرفتينى تانى فينك من زمان
الحمد لله انك اتفقتى معايا
فعلا لو عرفوا ان المصرى هيحكم بالحديد والنار زى ما كان الانجليز بيعملوا بعد ما ضحوا بحياتهم علشانا وفى الاخر احنا سيبنا البلد لمصرى زينا يتحكم فينا ويذل الشعب ومعتقدش كانوا ضحوا بحياتهم

مصر هى أمى said...

عبد الرحمن قولت ميت مرة مش بعرف احط التصاميم ديه ونائل فؤادة الله يسامحه اللى علمنى ازاى اعمل مدونة بيذل اهلى علشان يقولى على حاجة
اى حد يعرف ياريت يقولى وانا اعملها على طول

مصر هى أمى said...

توتةتوتة
اللى عايز يضحى لا يمكن يفكر فى قيمة تضحيته وهل تستاهل ولا لأ
اللى بيضحى بحياته علشان البلد العساكر والظباط فى الحرب عمرهم ما بيفكروا هيا الحرب تستاهل تضحيتهم ولا لأ
بتاع الدفاع المدنى اللى بيدخل فى وسط حريقة عمره ما بيفكر اللى هينقذهم يستاهلوا ولا لا
الحبيب اللى بيضحى علشان حبيبته مبيفكرش هيا تستاهل ولا لا
واسالينى انا فى النقطة الاخيرة
انا ضحيت علشانها كتير وهيا متستاهلش لكن عمرى ما فكرت عيا تستاهل ولا لا

البلد ديه تستاهل ان الناس كلها تضحى بحياتها وكل ما نملك علشان خاطرها

مصر هى أمى said...

mafyozo
شكرا ليك وربنا يخليك
انا الحمد لله مش متعصب ولا صايع اهم حاجة الوسط

لقد جعلناكم امة وسطى

هذا ما قالة الرسول الكريم

شكرا ليك على زيارتك

مصر هى أمى said...

ياسمين

فعلا مسير الظلم يكون عبرة للتاريخ والتاريخ عمره ما هيذكرهم الا بكل سوء حتى المنافقين اللى بيمجدوا فيهم دلوقتى اول ناس هتشتم فى الحكام ديه وتلعن ايامهم

التاريخ بيذكر بكل خير مصطفى كامل سعد زغلول احمد عرابى الشهيد عبد المنعم رياض كل ابطال مصر اللى ضحوا بحياتهم فى سبيل بلادهم وبيذكر بكل لعنة الاحتلال وعملاءه زى امين عثمان والملك والخونة

زى بالظبط ما هيذكر العهد الحالى بكل سوء من تعديلات لقمع الحريات ولبهدلة المصريين فى المعتقلات للدواء الفاسد للغذاء المسرطن لاحتكار الحديد لنواب القروض ونهب اراضى الدولة

مصر هى أمى said...

ابراهيم
ليه نوديك فى داهية يا ابنى الشعب كله مولع
معنى ذلك انهم هيعتقلوا الشعب المصرى كله
قانون الاشتباه بتاع امريكا بيطبق بعد اذن المحكمة احنا معندناش مانع انهم يتجسسوا على مكالمتنا طالما ما فيها مصلحة البلد لكن من غير اذن المحكمة مينفعش لانهم كده هتغضع للاهواء الشخصية ولو انت متخانق مع ظابط لاى مشكلة هيروح يقبض عليك كل شوية ولا هتفرق معاه اذن نيابة ولا حاجة
ليه لازم اللى بيحك لازم يتحكم فى الشعب ويبقى ديكتاتور
الحكم ده يا اخوانا عمل تطوعى
البلد ديه مش نهيبة لازم كل واحد من الحكومة والمسءولين ينهبوا فيها زى ما هما عايزين

مصر هى أمى said...

ابن ناصر اقتنعت برايى
لازم فعلا كلنا نروح ونقول لا

المصيبة بعد ده تطلع النتيجة 100% تبقى فضيحة والله العظيم

مصر هى أمى said...

david santos

يا اخوانا الراجل ده تبع مين حد يقولى انا مش فاهم

مصر هى أمى said...

سمسم

صح الناس ديه كلها دخلت السجن لكن التاريخ لسه فاكر اسم احمد عبد الحفيظ بعد 50 سنة وفاكره بكل خير
لكن الحرامية التاريخ بيلعنهم كل يوم

مصر هى أمى said...

الاباصيرى

انت شايف ان الابطال دول تضحيتهم طلعت على الفاضى
طب العيب فيهم ولا فينا

7ntklm said...

إذا الشعب يوما أراد الحياة فلابد أن يستجيب القدر و لابد لليل أن ينجلى و لابد للقيد أن ينكسر

Anonymous said...

هنقول ايه بس

لا حول و لا قوة الا بالله

الحرية اغلى من اى شئ فى الدنيا و لازم عشان نوصلها هندفع كتير اوى
بس اكيد الطريق له اخر و الضلمة اكيد هتروح و نشوف النور

smraa alnil said...

احنا مش اد المسئولية يا محمد
ولا قاديرن علي تمن الحرية
اصل تمنها بقي خيالي اوي
لا عارف
اصلا مش في تمن للحرية
لانها مش بقت موجودة
والناس اللي فدت بروحها وحاربت
لو رجع بيهم الزمن كانوا تفوا علينا وعلي اللي حاكمنا

الناس دي دمهم راح هدر

Bossy said...

اكيد نحب مصر اكيد
دي حتي البلد دي الوحيده اللي من ايام الفراعنه وحكامها بينهبوها ولسه ليها وجود
احنا ممكن نضحي معتقدش ان كلنا ممكن نضحي
ودا لان الكل بيفكر في نفسه ومفيش عندنا اننا نضحي علشان اللي جااي يكون احسن
اما الحريه فتمنها غالي اوووووي وميستهلهاش غير اللي يضحوا من اجلها
لو قدرنا نوعي الناس ونوعي نفسنا ونخليهم مؤمنين ان الوضع دا مش الافضل

Anonymous said...

محمد ازيك هقوللك حاجه واحده اذا اردت الحريه لابد ان تدفع الثمن وانا ناوي اعمل كده بس خايف يكون التمن حياتي تحياتي لك

شهيدة said...

معاك حق يا محمد

الحرية تمنها غالي جدا

ولازملها تضحيات كبيرة

بس اللي ضحوا تضحياتهم ما راحتش هدر
التاريخ بيمجدهم وبيذكرهم والدليل انك بتكتب عنهم وبتطالب بان الناس تعمل زيهم وتضحي وتدافع عن الحرية

بس اللي التاريخ حينساه ويرميه في الزبالة مع قذارة الدنيا هم دول اللي بيبيعو وطنهم وشعبهم لقاء المال أو المنصب أو لأنهم متعودين على العبودية والارتهان


ربنا معاكم يا محمد
ومع كل مطالب بالحرية

مصر هى أمى said...

7ntklm
اتمنى يكون شعبنا فعلا يريد الحياة وان ينكسر قيده

مصر هى أمى said...

om@r

يارب يسمع منك ربنا ان احنا نشوف اخر الطريق
احنا مستعدين ندفع التمن لكن لازم اخر الطريق يكون فيه نور

مصر هى أمى said...

انجى

انتى حسيتى بيا فعلا انا كنت بحس بكده فعلا ان احنا ضيعنا دمهم هدر لكن يعنى كان عندى امل صغير ان الاحوال تتصلح
احنا مبقيناش نملك حاجة ندفع بيها تمن حريتنا

مصر هى أمى said...

بوسى

البلد ديه فيها خير كبير اوى فعلا احنا بنتسرق من ايام الفراعنة والناس لسه عايشة صدقينى مصر ديه اسطورة كبيرة

مشكلة الشعب ده انه محتاج ثورة علشان يفوق تانى ويطالب بحقوقه

مصر هى أمى said...

فارس

انت ناوى تعمل ايه اصلا
لو قصدك على الانتخابات والاستفتاء افتكر ان مصر كلها هتروح وتقول لا
يارب نتيجة مجهود الناس متضيعش هدر

مصر هى أمى said...

شهيدة
كلامك صح ان اللى ضحوا بحياتهم التاريخ بيذكرهم وان الخونة التاريخ هيرميهم فى الزبالة
بس المشكلة فى الاجيال اللى بعدهم هل هيقدروا تمن تضحياتهم ولا لا
هل هيتمسكوا بالحرية اللى جدودهم حاربوا علشانها ولا لا

Unknown said...

هم مش هيسيبونا, اللي عايز يعمل حاجه يعملها من غير مايستني حد يسمحله.

جبهة التهييس الشعبية said...

المناظر دي ما بتحصلش في اسرائيل

عمار يا مصر

raspoutine said...

فعلا يا محمد تمن الحريه غالى اوى ومن كتر الظلم اللى بنشوفو مبيقناش قادرين على تمنه
موضوعك جميل يا محمد
بس كنت عايز اسأل سوأل محيرنى
يا ترى ايه الفرق ما بين الوقت اللى احنا عايشينو دلوقتى والوقت اللى كان موجود فيه الانجليز وبيعذبو اهل البلد
انا مش شايف اى فرق انا شايف ان الانجليز مشيو من البلد لكن سابو افكارهم وتعاليمهم فى فنون التعذيب والقهر اللى دلوقتى بيستخدموها حكام البلد الوالى وصبيانه

Memo said...

طيب انا حضرت العيش و الحلاوه ولو منزلتش بوست لحد التلات الجاي هاطلع بيهم على لومنان طره
و الله انت كنت طيب و ابن حلال
يا خساره يا محمد
البقاء لله

-_- said...

احنا اللى عملنا كده في نفسنا

مصر هى أمى said...

اسراء
ايه الكلام الكبير ده اللى عايز يعمل حاجة يعملها طب وعساكر امن الدولة دا انا فى مظاهرة كفاية كان ادام كل متظاهر بتاع خمسة ظباط غير بتاع عشرين عسكرى امن مركزى انتى بتهرجى ولا ايه دا الانجليز كانوا ارحم شوية

مصر هى أمى said...

جبهة التهييس الشعبية

عمار فعلا يا مصر بس احنا عمرنا ما شفنا العمار علشان نعرف هوا كويس ولا وحش

مصر هى أمى said...

راسبوتين
ازيك الاول

اول حاجة اانجليز عمرنا ما سمعنا انهم عذبوا المصريين زى ما احنا بنعمل دلوقتى عمرنا ما سمعنا انهم هتكوا عرض واحد عمرهم ما طلعوا عساكر الامن المركزى بالمنظر المستفز ده

الفرق الكبير ان الانجليز دول محتلين يعنى مش من لحمنا ولا جلدنا يعنى اما يضربونا يبقى اسمهم بيدافعوا عن مصلحتهم
لكن دلوقتى الناس ديه مننا من لحمنا ودمنا والمفروض ان مصلحتنا تبقى مصلحتهم المفروض انهم يقتنعوا ان احنا بندافع عن كرامتهم وحريتهم عن كرامة امهاتهم واولادهم زوجاتهم المفروض يتعاطفوا معانا مش يصربونا هما مش بيحبوا البلد واحنا لا احنا بنحب البلد ديه جدا

مصر هى أمى said...

ميمو

عيش وحلاوة ماشى يا ستى هوا لا مؤاخذة حضرتك ما سمعتيش عن اختراع اسمه اللحمة الفراخ المكرونة بالبشاميل المحشى ليه كل ما حد يكلمنى يقولى عيش وحلاوة هوا انا مليش نفس اكل الحاجات التانية ديه ولا جوا السجن ولا براه

ربنا يستر واقدر انزل بوست قبل التلات علشان متعبكيش بس وتدبى مشوار لحد السجن ويمكن تتضربى هنالك برده ما هوا انتى كل ما تروحى حتة لازم تتضربى

انا طيب ربنا يكرمك يا جميلة

مصر هى أمى said...

شارم
صح احنا اللى عملنا كده فى نفسنا ونستاهل كل اللى بيجرى لينا بس كفاية 25 سنة عذاب دا عقاب جامد اوى

كلبوزة لكن سمباتيك said...

الفيلم ده كان لسة معروض قريب فعلا مؤثر و الفكرة قوية و تصلح لكل عصر

عجبني مشهد المطرب اللي غنى
انا المصري


احنا مش اد المسئولية

الدبور said...

الاسمعلاوي الكبير عاد وبقوة
هههههههههههه
ازيك يا ريس كيف الحال؟
الشرطه في خدمه الشعب !
سلامات ياحكومه

تحياتي
الدبور

ياقوت الأزهري said...

ثمن الحرية هى التضحية
هكذا تعلمنا
والقول لا يجدى ولو كان كثيرا
والفعل يؤثر ولوكان قليل
الشاهد
ماذا فعلت من أجل الوطن

micheal said...

تلقيت دعوه من يومين من زميل مدون عزيز ..محمد التهامي لحضور ندوه عن المدونيين في مصر بمجله كلمتنا و تم تحديد الميعاد يوم 4-4 الساعه الواحده و النصف...الللي ناوي يجي يا ريت يسيبلي تعليق عشان أبقي عارف و عامل حسابي و أقول لمحمد
متخافوش مفيش حد مننا متراقب

الأباصيرى said...

العيب فينا طبعاً

أحنا بقينا أجبن خلق الله
ودة اللى مخلى فرعون اقصد مبارك والبلطجية بتوعة أقصد الحزب الوطنى يركبونا ويدلدلوا رجليهم

أحنا السبب... احنا بقينا ماشيين جوة الحيط مش جنب الحيط

Anonymous said...

احييك علي المدونه العظيمه وادعوك لرؤية موقعي
www.nourhetler2006.jeeran.com

نور العظماء

ody911 said...

محمد

مدونة رائعة

أحييك عليها بجد

آه إنته عرفت تنام إمبارح ؟؟؟


ههههههههههههه

عادى بقة
أودى

Anonymous said...

الحزب الوطنى معمول علشان شعب مصر

بس مصر تانية
فى كوكب تانى
فى زمن تانى
فى مجرة تانية

والشعب المصرى بيحبه
بس شعب تانى
فى نفس الكوكب التانى
ونفس الزمن التانى
وبالمرة فى نفس المجرة التانية

الشعب بتاع الكوكب دة طلع على الفضائيات بيقول
خلونا نربى عيالنا
احنا بنجرى ورا رزقنا

Music Gates said...

ثمن الحرية ايه ولا ايه
احنا شعب نايييييييييييييم علي نفسسه
و مش هيفوق الا لما يتقرص من ودنه
و اذا كان القليل هو الي حاسس علشان شايف المهانه لكن تعلم ثمن الحرية واحد بيدور علي لقمة ياكلها واحد رايح ديسكو و التاني رايح كافيه وواحد رايح كباريه و التاني بيعاكس بنت في الشارع لسسسسسسسسسسه ادامنا كتير علشان ندوق تمن الحرية

مصر هى أمى said...

سمباتيك

فعلا الفيلم ده كان معروض قريب اللى عجبنى اكتر المصرى اللى اتعذب علشان يعترف على احمد عبد الحفيظ وفى الاخر مات من غير ما يعترف انا اللى كان قصدى من البوست ان المصرى ده مات واحنا ضيعنا دمه هدر

مصر هى أمى said...

الدبور

الاسمعيلاوى الكبير هههههههههههههه
حلوة اوى الله يرحم ايام زمان

الشرطة فى خدمة الشعب الشعار ده اتغير بقى دلوقتى
الشرطة والشعب قى خدمة الجزب الوطنى

مصر هى أمى said...

ياقوت

لم نفعل اى شىء لهذا الوطن معرفش هل هوا كسل او خيبة مننا او خوف من الحكومة لكن الواضح ان احنا خنا اجدادنا

مصر هى أمى said...

مايكل

البركة فيك يا جميل
الساعة واحدة ونص ليه يا ابنى مورناش شغل ولا ايه

مصر هى أمى said...

الاباصيرى
فعلا احنا اجبن ناس الحكومة نجحت فعلا فى انها تخلى كل واحد كل همه فى لقمة العيش ويخاف انه يتكلم فى اى حاجة لحسن يتبهدل هوا وعائلته

مصر هى أمى said...

نور العظماء
شكرا جدا واكيد هروح اشوف المدونة

مصر هى أمى said...

اودى
شكرا ليك اوى
اه عرفت انام ابارح

عادى بقه

مصر هى أمى said...

شهروزة
تصدقى انا كتير كنت بفكر فى كده اما تشوف التصريحات الوردية بتاعة الحزب والحكومة
بحس انهم بيتكلموا عن ناس تانية غيرنا الظاهر ان احنا مش وش نعمة احنا شعب فقرى ونحس
بقولك ايه متقولى للحكومة بتاعتنا ان احنا شعب وحش فيروحوا يدوروا على شعب كويس يحكموه

مصر هى أمى said...

COPA
احنا شعب نايم على نفسه بس انا عندى امل ان احنا نفوق فى يوم من الايام

Anonymous said...

إخوانى ،

من يسعى لشراء سلعة زائفة فهو مجنون.
,اذا وصفنا الحرية فى بلدنا بالزائفة فإننا نجاملها.
لقد فات الأوان ..... Time out
لقد تمكن داء السرطان من جسد المحروسة (التى كانوا يسموها سابقا بلدنا مصر) وأوصلها لدرجه الإحتضار.

يقول الله تعالى :
"فلولا اذا بلغت الحلقوم"

نعم لقد وصلت الروح فى جسد بلدنا الى الحلقوم.
هل يستطيع أحدكم أن يتحدى الله ويرجعها مرة أخرى ؟؟

كذلك الحال ببلدهم (أقصد تلك الرقعة على الخريطة التى يصفونها بمصر).
لم أخطئ فى الحرف، أننى بالفعل أقصد الهاء فى (بلدهم) وليس الكاف (بدلكم.
ذلك لأنى لا أقدر أن اصفها ببلدى، بل اسمحوا لى أن أقول بلدهم.
لأنى لو وصفتها ببلدى فإنى (من منطلق مسئولة الإنسان تجاه وطنه) أحمل نفسى مسئولية احياء الموتى.

إخوانى ، لا أملك إلا أن أكرر قوله سبحانه وتعالى :

بسم الله الرحمن الرحيم
ربنا أخرجنا من هذه القرية الظالم أهلها.
صدق الله العظيم.

مصر هى أمى said...

انونومنس

لا ديه بلدنا وهتفضل بلدنا طول عمرنا وان نشاء الله هنحاول ان احنا نرجعها حلوة وجميلة لو كل واحد هرب منها يبقى هنسيبها للحرامية اللى هيهتكوا عرضها لا لازم ندافع عن بلدنا وعن شرفنا لازم نفضل نحب البلد ديه ونكبرها