Sunday, April 29, 2007

البت امكانيات وعمايلها السودة

يوم الجمعة اللى فاتت كنت بشوف جرنال الاهرام وقريت طبعا المناشيتات العظيمة اللى كانت موجودة بمناسبة الخطاب التاريخى للريس علشان عيد العمال وطبعا مش عايزين نقول ان الكلام كله متكرر بقاله 26 سنه

انا ملفتش انتباهى غير حاجة معينة اما الريس قال

لو فى امكانيات هنزود المرتبات خمسين فى المائة كل سنة

كلمة لو فى امكانيات هى اللى لفتت انتباهى
طب هيا الامكانيات ديه راحت فين اختفت فين

طبعا بما ان الكلمة فيها تاء فى اخرها تبقى الكلمة ديه انثى
مين بقى ابن اللذين اللى مخبى البت امكانيات ديه عنده ميطلعها علشان خاطر الشعب يعيش
سعادة الريس يعنى تفتكر ان العمال الغلابة اللى كنت بتكلمهم مخبين الامكانيات ديه مثلا طب ما احنا دولة بوليسية وامن الدولة مالى البلد متخليهم يعسوا كده ويغطسوا غطسة كده ويبقوا بالبت امكانيات اللى العمال الحاقدين مخبينها وطبعا مخبينها علشان يبوظوا سمعة البلد ويهدروا محاولات الحكومة لرفع المرتبات طبعا ماهم فئة حاقدة على الشعب وميتمنوش الخير للناس
انا من على مدونتى ديه بطلب من وزير الداخلية انه يجند كل امكانيات الوزارة للبحث عن البت امكانيات علشان انا وصلتنى معلومات مؤكدة ان العمال بينقلوا البت امكانيات كل يوم من بيت لبيت علشان محدش يعرف مكانها وطبعا ده فى سرية تامة الخوف بقى لحد من العمال يكون لسه عازب ومثلا عنده اربعين سنة ومش لاقى فلوس يتجوز ومهدد ان المصنع اللى هوا شغال فيه يتخصص وبالتالى العامل ده هيطلع معاش مبكر وهوا لسه يا ولداه مدخلش دنيا اصلا ممكن يحاول يغتصب البت امكانيات فسايئ عليكوا النبى يا حكومة تحاولوا تنقذوا البت امكانيات من ايد العمال وترجعوها للريس تانى علشان يزود مرتباتنا
لحسن انتوا عارفين بقالنا ستة وعشرين سنة عمالين نقول الاصلاح والتقدم والاستمرار والمحافظة على العمال وميزان المدفوعات والنمو الاقتصادى والتعمير والنهضة الصناعية وكل الكلام ده مشفناش منه حاجة لغاية دلوقتى يعنى لو كنا فى حالة حرب كنا قلنا مفيش مشكلة اهى كل جهود الدولة موجهة للحرب والمفروض ان احنا نستحمل علشان الحرب لكن الاكادة ان احنا بقالنا ستة وعشرين سنة ومحاربناش ولا نيلة طب فلوس الدولة وكل محاولاتها ديه راحت فين يعنى ولا اتنيلنا حاربنا ولا اتنيلنا عمرنا وبقينا دولة اقتصادية
اتارى كل ده علشان الحكومة مش عارفة تعتر على البت امكانيات
والله الحكومة ديه نيتها حلوة هيا عندها الرغبة انها تزود مرتبات العمال لكن العمال هما اللى مخبيين البت امكانيات ومش عايزين يطلعوها

نداء خاص منى لامكانيات

وحياة ابوكى اظهرى وبانى نفسى مرتبى يزيد الضعف كل سنة
عايز اتنيل واتجوز بقى
بس المصيبة لبعد ده كله تطلع الحكومة تقول ان الزيادات ديه لموظفى الحكومة بس والقطاع الخاص لأ ملناش دعوة بيهم

Monday, April 23, 2007

تاج اميرة البلطجية

تاج تاج تاج انا مش عارف ايه كل التاجات ديه وعلى راى اميرة البلطجية انا شبعت تاجات فقامت بعتالى تاج هيا كمان يعنى هيا جت عليها صحيح المشكلة بقى انى مخدتش بالى ان كل التاجات اللى جاتلى من عند
فيميل ( female )
بلوجرز
هوا مفيش رجالة بتبعت تاجات ولا ايه
المشكلة انى لسه فى ذمتى تاجين من عند اسراء وسمراء النيل
معلش يا اسراء هجاوب على التاج بتاعك بس انتى عارفة التاج ده بتاع اميرة البلطجية ولو مجاوبتش عليه بسرعة ممكن تفجر المدونة كلها او مكن تنتحر علشان مجاوبتش على التاج بتاعها
اما بالنسبة لسمراء النيل فديه مقدور عليها
أحب شخص لقلبك فى الدنيا؟

طبعا بعد ربنا وسيدنا محمد
ومراتى اللى مش عايزة تيجى
احب شخص لقلبى عمتى

انسان مستعد تضحي بحياتك –ركز فى كلمة حياتك- عشانه؟

قرار التضحية بالحياة صعب جدا بس عموما انا ممكن اضحى بحياتى علشان خاطر دينى او بلدى وممكن فى مواقف معينة الواحد ممكن يضحى بحياته عن طيب خاطر علشان ينقذ انسان ضعيف مثلا بس المواقف ديه بتبقى نابعة من لحظتها

.انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

انا نفسى فعلا امسك سكينة واغرزها فى قلبى
لو مكنش الانتحار حرام كنت عملتها من زمان
واى واحد ممكن يفكر يأذى اهلى او بلدى او دينى

ما هو:اسم أجمل كتاب كتبه بشر قرأته ومحتفظ به حتى الان؟

خمس سنوات فى بيت من زجاج - لبطرس غالى الامين السابق للامم المتحدة

اسم كتاب-كتبه بشر برضة- انت متعلق بيه وبتقرأه كل فترة؟

الماسونية العالمية

اهم جهاز منزلى انت متعلق بيه او بتستخدمه كتير؟

البوتاجاز والتلاجة

شىء تحس بالراحة النفسية عندما تنظر اليه؟

السماء او البحر الفراغ عموما
وطبعا الاكل برتاح جدا اما بلاقى اكل ادامى

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

فيلا عمتى فى البلد وانا واقف فى التراس بتاع الفيلا وادامى الارض الزراعية الى ما لا نهاية ساعتها بحس بالحنين الى انى ارجع طفل صغير مفيش حاجة بتشغل باله
بحن دايما للمكان ده معرفش ليه

مكان تحس بالراحة عندما تدخله؟

المسجد النبوى فى المدينة

اجمل مدينة زرتها داخل مصر؟

اسكندرية وبعديها بورسعيد وبعديها مرسى مطروح

أجمل مكان طبيعي رأيته داخل مصر؟

البحر فى مرسى مطروح

شخصية كارتونية بتحبها؟
توم وجيرى

نوع هاتفك المحمول؟

نوكيا

سرعة بروسيسور جهازك؟

والله يا اميرة البلطجية ما اعرف

حجم ذاكرة –هارد- جهازك؟

والله برضه ما اعرف

المساحة التى تشغلها المواد الاسلامية على جهازك؟
على الكمبيوتر معتقدش فى مواد اسلامية كتير بس عندنا سى دى كتيرة اوى مواد اسلامية بابا بيقعد بالساعات يتفرج عليها وخصوصا انه معلوماته فى الكمبيوتر متتعداش انه يحط السى دى ويشغلها بس
فاللاسف لو حطينا مواد اسلامية على الهارد بابا مش هيعرف يوصلها ولا يشغلها

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

اتمنى من الله انه يدينى مساحة كبيرة من قلبى تكون مخصصة للمواد الاسلامية

أهم هدف انت واضعه لحياتك دلوئتى؟

يمكن بقالى فترة كبيرة مفيش حاجة فارقة معايا وبالتالى مليش اى هدف فى الحياة بصحى كل يوم الصبح اروح الشغل افضل فيه لغاية 10 او 11 بالليل وبعديها اروح انام على الساعة2 بالليل وهكذا كل يوم

مواصفات فتاة –أو فتى للبنات- الأحلام بالنسبة لك؟

ايه الغرض من السؤال ده يا اميرة البلطجية
عموما تكون حنينة اوى وبنت ناس ومحترمة بس اهم حاجة تكون حنينة اوى اوى اوى تكون انثى مش عايز اتجوز واحد صاحبى
انثى بمعنى الكلمة
ايه السؤال ده هوا انا هتنك على ايه
اى واحدة والسلام
قطيعة تقطع الحوجة وسنينها

صف ما يأتى:شعورك لما بتسمع كلمة مصر؟

بحبها اوى وبخاف عليها

شعورك لما بتسمع كلام عن اليهود؟

حاجتين الكره الشديد ليهم
واعجاب شديد بيهم
كره ليهم وافتكر معروف ليه بكرهم
اما اعجاب بيهم فلانهم الامة الوحيدة اللى على الارض اللى بتعمل اللى هيا عاوزاه من غير محد يقدر يقولهم حاجة بيذلوا فينا وفى حكامنا واحنا مبنقدرش نتكلم قوة اقتصادية مهولة العرب كمان عندهم فلوس كتير جدا بس للاسف بيصرفوها فى الهلس

شعورك لما بتشوف ظابط شرطة؟

نفسى اقوله احنا بنى ادمين زيكوا وعندنا اهل ومشاعر وبنحس بالتعذيب وان احنا بنحب البلد ديه جدا
نفسى اقوله اتقى ربنا وخاف الله

شعورك لما بتشوف الكناس العجوز فى الطريق؟

بقول فين الشهامة والمروءة بتاعة ولاد البلد

لون البطانية اللى بتتغطى بيها فى الشتاء؟

بطانية خفيفة جدا لونها احمر ( النادى الاهلى طبعا ).ومبتغطاش غير لما يبقى الجو شتاء بجد

لون الجورب-الشراب- المفضل لديك؟

الكحلى

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

ايه السؤال المقرف ده
انا مش هتفرق معايا اوى ممكن تسألوا ماما لانها هيا اللى بتساوى البيت

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

لو فعلا ملتزم فى سلوكه وبيحافظ ويصون اللحية اللى فى وشه والمصحف اللى فى جيبه هدعيلة ان ربنا يكرمه وهدعى ان احنا كلنا نكون زيه
بس عموما الاسلام عمره ما كان بالمظهر مش لازم جلابية بيضاء قصيرة وعمامة علشان يبقى الشخص ده كويس او وحش الاسلام بالاعمال وليس بالمظهر


احساس يراودك فى اشارة مرور مغلقة بسبب مسئول كبير؟

بصراحة بشتم المسئول الكبير ومبفتكرش غبر حاجة واحدة عن سيدنا عمر ابن الخطاب اما كان نائم تحت شجرة ومر عليه حاكم فارسى ووجده نائم فقال له حكمت فعدلت فامنت فنمت يا عمر

التاج ده أمرره للاتية أسماؤهم

Monday, April 16, 2007

يعنى ايه مصر

اما كتبت البوست الاخير بتاعى نسيب مصر ونرحل كلنا
جاتلى تعليقات كتير ما بين احنا لازم نفضل ونحارب علشان البلد ديه جميلة وتستاهل
وتعليقات تانية ان الواحد مفروض فى اول فرصة انه يرحل من مصر ويهاجر
سألت نفسى سؤال تسمحولى اسئلهولكوا
يعنى ايه مصر ؟
هيا مصر ديه الارض والتراب والسما ولا هيا الاخلاق والشهامة والطيبة والجدعنة بتاعة ولاد البلد ولا هيا النيل وسمار بشرتنا
هيا مصر ديه الناس والشعب اللى عايشيين على ارض مهما كانت هيا فين الارض ديه ولا مصر ديه الارض اللى الناس عايشة عليها مهما كان مين اللى عايش على الارض
احنا بنحب البلد ديه علشان اتولدنا فيها واتربينا فيها يعنى حب بالامر الواقع علشان مفيش غيرها
احنا بنحب ايه فى مصر
ايه اللى خلانا نكره مصر
الحكومة والتوريث والتعديلات الدستورية والسرقة والفساد والرشوة وحادثة العبارة واللبن المجنس واحتكار الحديد وسرقة الاثار ومنافقين الحزب الوطنى والضعف والهوان والذل اللى الشعب شايفه على ايد
الحكام وتحكم امريكا فين
ايه اللى خلانا نحب مصر
وايه اللى خلانا نكره مصر
يعنى ايه مصر
الشعب ولا الارض
مين اللى عمل عظمة مصر وربا جوانا حبها
الناس ولا الارض

Wednesday, April 4, 2007

نسيب مصر ونهاجر كلنا

حوار صحفى جميل جدا كان منشور فى جريدة الدستور يوم 2/4 مع الدكتور المستشار يحيى الجمل
الحوار كان حول التعديلات الدستورية
طبعا الاستاذ الكبير يحيى الجمل اللى انا بحبه وبحترمه جدا كان واضح وصريح فى اجاباته الخاصة بالتعديلات وبأن كل اللى شاركوا فيها هيتحاسبوا امام الله يوم القيامة على اللى عملوه فى الشعب المصرى وكبت حريته بالتعديلات الدستورية. الراجل قال جملة جميلة جدا ان الريس اول ما مسك الحكم قال انه عايش فى سجن كبير ونفسه ولاده ميعيشوش فى السجن ده لكن الواضح ان الريس عجبه السجن الكبير وقرر ان ولاده يعيشوا فى السجن الكبير
سيبك من كلام الدكتور يحيى الجمل واللى انتقد فيه التعديلات الدستورية وحمل اللى عملوها عبء كبير جدا عليهم
اما قالهم ان ربنا هيحاسبهم عليها
الحاجة اللى لفتت انتباهى جملة قالها الدكتور الكبير
انه قال لو ابنه جه يطلب انه يهاجر بره مصر هيوافق لابنه على طول لان المستقبل مظلم فى مصر
ده اللى قاله الدكتور يحيى الجمل طب عايز اسال سؤال
لو كل شرفاء مصر سابوها هيفضل ايه لمصر لو واحد زى يحيى الجمل او محمد حسنين هيكل او ابراهيم عيسى مش كفاية كل العماء الكويسين طفشوا من البلد طب الناس ديه لو مشيت وسابوا الساحة للمنافقين بتوع الحكومة هتبقى البلد ديه بتاعتنا ولا لأ
اما الناس ديه خافت من التعديلات الدستورية وخافوا ان ييجى يوم يلاقوا ظابط صغير كل يوم ساحلهم على القسم او امن الدولة وكله بالقانون طب احنا الشعب العادى هيتعمل فيه ايه هنرجع تانى لعهد زوار الليل وان الواحد يخاف ينتقد حتى رغيف العيش لحسن الحكومة تعتبره ارهابى وتطبق عليه تعديلات الدستور
يا شرفاء مصر استحملوا علشان خاطر الشعب الغلبان ده الشعب ده محتاج حد يقف جنبه يتكلم بأسمه يصرخ فى وش الظلم يتكلم مع القيادات العليا يقولهم على مطالب الشعب يعرف يكون سياسى ويتعامل مع الحكومة لمصلحة الشعب مش لمصلحة الحزب الوطنى اللى انفصل تماما عن الناس ومبقاش واقف غير مع كل حرف يقوله الريس وهما من وراه يقولوا امين
دكتور يحيى الجمل لو انت سبت البلد وكل شرفاء مصر سابوها تفتكر انسحابكم هوا الحل طب مين اللى هيقف مع الناس الغلابة فى وش الظلم اللى هيتعرضوله مع بدء تطبيق التعديلات الدستورية