Wednesday, January 31, 2007

هل انا سعيد




















بعد لما كتبت البوست الاخير بتاعى جالى ميل من شخصية عزيزة عليا اوى ( ناس كتير بتبعتلى على الميل الشخصى بتخاف لاتكون المدونة متراقبة ) وقعدت تقولى خلى بالك وبلاش كلام فى المواضيع ديه تانى وانا علشان مزعلهاش قررت اكتب البوست ده بعيد عن السياسة ففكرت اكتب عن السعادة هل انا انسان سعيد
انا شاب زى اى واحد فى الدنيا نفسه يعيش كويس وسعيد نفسه يحب ويتحب ويتجوز اتخرجت من الكلية واشتغلت فى شركة كويسة وللاسف خطبت وفسخت الخطوبة اكتر وقت عشت فيه سعيد وقت ما كنت خاطب كنت فى قمة سعادتى ربنا يسامح اللى كان السبب المهم ما علينا بصيت فى يوم حواليا لقيت الناس غايبة عنهم السعادة الكل مشغول بلقمة العيش الكل بيجرى زى الوحوش الحياة بقت صعبة اوى الناس زمان كانت حياتهم صعبة برضة من حرب مع اسرائيل لحرب الوظيفة والشقة لكن بحس ان الحياة كانت جميلة الناس نفسها راضية واى حاجة بترضيها وظيفة عادية مفيش مشاكل والراجل ومراته بيشتغلوا علشان يكبروا بيتهم ويعلموا ولادهم
بص دلوقتى على الناس الواحد يبقى نفسه يتجوز يتصدم بانه مطلوب منه شقة تمليك وعفش وشبكة وطلبات غريبة كأن اهل البنت متقدملهم جمال مبارك وكل واحد فاكر بنته خديجة مع ان البنات على قفا مين يشيل
الشاب مش لاقى وظيفة ولا زوجة كل ده خلا الشعب حزين اوقات قليلة جدا اللى حسيت فيها بالسعادة اكتر وقت اما الاهلى كان بيكسب اى ماتش ( طبعا مفيش واحد يكون مصرى وميكونش اهلاوى ) اما الاهلى كان بيلعب فى كاس العالم فى اليابان الماتشات كانت الصبح بدرى كنت بزوغ من الشغل ساعة الماتش واروح اتفرج فى كافيتريا قريبة اما الاهلى جاب جون لقيت بحضن اللى جانبى من غير ما اعرفه( كان نفسى تكون واحدة هيا اللى جنبى كان طبعا طعم الجون هيكون احلى ) صدقونى الناس بتدور على اى حاجة تخليها سعيدة
انا طبعا مش عايز اكتب فى البوست ده ان من اسباب تعاسة الناس الغلاء اللى احنا عايشين فيه والزحمة فى المواصلات وكل حاجة معتقدش ان مصر فيها حاجة تفرح دلوقتى انا عن نفسى اوقات فرحى قليلة مش عارف العيب فيا ولا فى البلد ديه بص على وجوه الناس فى الشارع مش هتلاقى حد ماشى فى الشارع مبسوط
امبارح كنت راجع من الشغل الساعة 2 باليل وعلى كوبرى اكتوبر لقيت منظر انا عن نفسى شايف انه جميل جدا عربية ماشية جنبى فيها ولد زى القمر ومعاه بنت حلوة اوى شكلهم كانوا راجعين من فرح الولد سايق والبنت جنبه ولقيتها بتحضنه وتبوسه وبتضحك ضحكة جميلة اوى اكتر حاجة عجبتنى ضحكة البنت صدقونى انا اتبسطت جدا اما لقيت حد بيضحك ربنا يديم عليهم السعادة مش حسد ولا قر بس والله انا كان نفسى اكون مكان الولد ده ومعايا مراتى عارف ان فيه ناس كتير هتقول ده قلة ادب وازاى ده يحصل فى الشارع انا بس هقولهم كفايه انهم مبسوطين حرام عليكم سيبوا الناس تضحك فى الشارع فى اى حتة ما علينا انا طبعا لاقيت الولد عمال مركز معايا علشان انا طبعا كنت رخم وماشى بالعربية لازق فيهم مع ان الكوبرى فاضى
موقف تانى ومعتقدش ان حد هيقول عليه حرام ولا غلط لما كنت بعمل عمرة وانا فى الحرم المكى كان جنبى عريس وعروسة لسه متجوزين وكان شهر العسل بتاعهم انهم يروحوا عمرة
اتفرج عليهم وهما قاعدين بعد ما فطرنا وصلينا المغرب قام الزوج ومراته وقعدوا ورا شوية مع بعض وقعدوا ياكلوا صدقونى اقعدت اكتر من ساعة بتفرج عليهم لغاية اما العشاء اذنت كنت ببص عليهم واقول امتى يا ربى اتجوز واقعد مع مراتى وتاكلنى زى ما الزوجة ديه كانت بتعمل مع جوزها والضحك والسعادة مالية وششهم ربنا يديمها عليهم انا قمت من مكانى وسلمت على الراجل وقولتله ان الساعة اللى انا قعدت ابص عليهم فيها يمكن احسن حاجة شفتها من فترة كبيرة وهوا اللى قالى انهم لسه متجوزيين وسبتهم وهيا بتاكله اخر حتة من الساندوتش بأيديها
يارب امتى احس الاحساس ده اما اتجوز يمكن اكون سعيد ويمكن لأ بس هوا الاكيد انى دلوقتى مش سعيد مش هاخبى عليكم انا نفسى الاقى بنت الحلال ويارب اتجوزها قبل نهاية السنة ديه معلش انا قصدت اتكلم عن نفسى وعن السعادة لانه هوا ده اللى انا حاسسه انا دلوقتى بمشى فى الشارع ابص فى وشوش الناس نفسى الاقى حد ماشى بيضحك او سعيد صعب جدا فى البلد ديه انك تلاقى حد سعيد
حتى الاكل متعتى الوحيدة دلوقتى بقيت اكل وانا مش مبسوط اروح اى مطعم كنت باكل منه زمان وكنت باكون فى قمة سعادتى دلوقتى باه حاجة عادية جدا بالنسبة لى
هوا بأه مكتوب على المصريين انهم يبقوا منكوبيين فى الحكومة وبلاوى الحزب الوطنى وكمان السعادة تختفى من حياتهم

ان الحب سيصبح يوماً ...... اجمل وشم للأكفان

ان الموت سيصبح عرساً ..... ينسينا كل الاحزان

من هذا الطين بدأنا الرحلة .... وسوف نعود لنفس الطين

ليطوينا صمت النسيان


انا عارف انك هتقولوا ايه علاقة الموضوع بالصورة اللى فى اول البوست انا هقولكم انا حاسس ان البنت ديه هيا السعادة اللى كانت فى حياتى واللى انا قتلتها وبعد كده شلتها وماشى مش عارف رايح فين بس والله السعادة اللى انا قتلتها كان غصب عنى انا كنت مجبر عليها

اما الولد فهوا انا

نفسى يكون عندى جناحين واطير بيهم بعيد عن اى حاجة بتفكرنى بالماضى

صدقونى انا لما بقعد ابص على اى طفل صغير وهوا بيلعب بيصعب عليا هوا ممكن يكبر ويحلم احلام جميلة بس بعد كده هيتصدم زى ولا لأ نفسى يكون لأ

فى صديقة من مدونة تانية قالتلى مرة فى المدونة بتاعتها لازم تتسامح مع نفسك

صدقونى انا نفسى اعرف اتسامح مع نفسى نفسى اعرف احب تانى واتجوز واكون سعيد

ادعولى








16 comments:

Unknown said...

السعاده اللي بقت مش موجوده في حياتنا, فعلا حاجه غريبه نادر بجد انك تلاقي حد لسه بيعرف يضحك, وعادي انك تلاقي حد يقولك بقالي كذا (مده يقولها يعني ) ماضحكتش.
المهم انك تكون لسه بتعرف تتضحك, انت عارف أنا أحلي حاجه حبها في نفسي دلوقتي اني الحمدلله لسه بعرف أضحك رغم كل حاجه حصلت معايا.
أنا اتبسطت أوي من الزوجين اللي كانو في العمره, حلو أوي انهم يفكرو يقضو شهر العسل بالطريقه الجميله دي.
أنا بجد بتكنالك السعاده, وفعلا بجد لازم تسامح نفسك , ده ربنا بيسامح أي حد يغلط في حقه لما بيجي يقولو سامحني, احنا بقي مش المفروض نسامح , مابالك بقي لو نسامح نفسنا, أكيد الأقربون أولي بالمعروف , ونفسك أقرب حد ليك.
انت اتعلم انك تضحك في وشوش الناس, حتي اللي متعرفهومش منهم, هتلاقيهم بيضحكولك هما كمان, لو بدأنا بنفسنا هنرجع الضحكه تاني لشفايف المصرين.
ربنا معاك ويسعدك ويرزقكم ببنت الحلال اللي تسعدك وترجع تضحكك وتخلي الضحكه ماتفارقش وشك (:
طولت عليك معلش , بس بجد لازم تسامح نفسك .

مصر هى أمى said...

اسراء
انا مبسوط جدا انك اول واحدة تعلقى عندى وكان عندى حق اما قلت عندك فى البوست انك صديقة
طبعا ربنا بيسامح لانه ربنا وده من اسمائه وصفاته وصدقينى انا بحاول اسامح نفسى واعيش حياتى علشان كده نفسى الاقى واحدة احبها واتجوزها ولازم احبها الاول علشان ما اظلمهاش معايا واقعد اقارن بينها وبين اى واحدة تانية
انا حاسس ان سعادة الانسان فى الحب سواء مع مراته مع اهله مع اصحابة مع اولاده فعلا هيكون سعيد لو عرف يحب
ساعتها هيعمل زى ما انتى قولتى هيضحك فى وشوش الناس اللى يعرفهم واللى ميعرفهمش
وشكرا جدا على دعوتك ليا وامين يارب نفسى فعلا ربنا يرزقنى ببنت الحلال بس لو طلعت وحشة هدعى عليكى ماشى وانتى مطولتيش ولا حاجة انتى تشرفى فى اى وقت البيت بيتك

أسوور said...

قرأت البوست مرتين
عجبنى جدا لأنه كلام نابع من احساس وشعور انسانى

انت بتكتب عن نفسك .. ودة نوعى المفضل من الكتابات .. كتابات تحكى عن احساس انسان وشعوره ورغباته وطريقة تفاعله مع ما حوله ومن حوله

انت بتتمنى انك تتجوز ةمتخيل ان السعادة فى الجواز .. على فكرة الجواز حاجة جميلة جدا جدا .. لكن مش هو اللى هيسعدك

اللى هيسعدك انك ترضى بنصيبك من كل شىء .. يعنى لو اتجوزت وقعدت تدور على عيوب مراتك اللى طبعا هتظهر بعد الجواز نتيجة الإحتكاك المباشر والتعايش اللى مش ممكن يحصل الا لما ناس تعيش مع بعض .. واكتشفت عيوبها وقعدت تنقدها وتركز على تغييرها .. هتبقى من أتعس الناس

والعكس برضه لو الست عملت كدة مع جوزها .. هتبقى أتعس الزوجات

المشكلة ان دة اللى دايما بيحصل

يدور الراجل أو الست حواليه ويشوف واحدة من برة .. مجرد قشرة امرأة .. ويتخيل عنها الكثير ويعشق القشور .. ثم يصدم بأنها انسان .. يغضب .. يبكى .. يحزن .. يعترض .. يتشاجر .. يصرخ .. يبوز .. ينقد .. يتطلب .. كائن مستقل له جميع صفات البشر

ثم يبدأ بالإعجاب بقشرة أخرى من قشور البشر ويعتقد انه لو كان اتجوز أو اتجوزت فلان أو فلانة كانت الحياة هتبقى أحلى

لكن الواقع بيقول ان الجواز واحد .. كويس ولا بديل غيره لعلاقة بين رجل وامرأة فى جميع الأديان والمعتقدات والحضارات لكن احنا اللى مش فاهمين وطماعين

الراجل عاوز واحدة على طول على سنجة عشرة زى العروسة باربى .. وهى عاوزة واحد يكون رومانسى طول الوقت وواقع فى هواها على طول ولا عبد الحليم ودة برضه مستحيل

افتكر كلامى دة عشان تقدر تنجح جوازك

الرضا اساس السعادة

ربنا يسعدك ويسعدنا كلنا فى دنيا السعادة فيها زى العنقاء والخل الوفى

مصر هى أمى said...

ياسمين
اول حاجة انتى كلامك جميل اوى واكترحاجة عاجبانى فى المدونات ان الواحد بيلاقى اصدقاء كتير والجميل انهم مبيعرفوش بعض علشان كده ممكن اقولك على حاجة وانا
متاكد ان مفيش حد عارف انا مين
مبدئيا انا راضى بحياتى الحمد لله بس فكرى اما تشتغلى فى شركة كويسة وتكون امكانياتك للجواز كويسة وتلاقى واحدة ومعلش فى التعبير اللى جاى وتلاقى واحدة تقص شريط قلبى بمعنى اول واحدة احبها سيبك من حب بنت الجيران واللى كانوا معايا فى المدرسة كل الكلام ده خايب دايما فى واحدة هى اللى قلب الواحد بيتفتحلها وتقعدوا مع بعض اكتر من 3 سنين كانكوا متجوزيين مابتسبوش بعض غير على النوم يعنى كل واحد حفظ التانى انا عارف طبعا ان بعد الجواز فى حاجات كتير بتتغير بس برده طول ما الحب ماهوا موجود الواحد بيقدر يعدى المشاكل الجواز طبعا مش هوا سعادة الانسان لكن ليه عامل كبير على سعادة الانسان واستقراره هقولك على حاجة انا ممكن اكون اب فاشل لاطفال لكن الاكيد اننا كنت هكون زوج مخلص عمرى ما كنت هافكر ابص لواحدة تانية لانى لازم احترم اللى هتجوزها وده عن تجربة صدقيينى حتى وقت خطوبتى كنت باحترمها جداوعمرى ما فكرت اعمل حاجة غلط عارفة ليه الحب هوا اللى بيخلى الواحد كدهعلشان كده انا قولتليك فى ناس كتير سعادتهم اما يلاقوا الحب
طبعا مفيش حد خالى من العيوب ولا الزوجة هتكون باربى طول الوقت بس المهم ان يكون فى وقت معين لازم تكون الزوجة باربى والعريس عبد الحليم علشان الوقت ده هوا اللى هيديهم دفعة لقدام
support لحياتهم
انا مقتنع ان الرضا اساس السعادة فعلا ومتخافيش هاحط كلامك ادامى اما اشوف عروسة بس اشوفها الاول معندكيش عروسة ولو لعبة مفيش مشاكل اهى اى عروسة والسلام شوفتى رضا اكتر من كدة موافق على عروسة لعبة
انا نفسى اسامح نفسى زى ما اسراء قالتلى ويارب اقدر
وشكرا على ردك انتى شرفتينى وافتكرى اول تعليق ليا عندك قولتلك انا محتاج نبقى اصحاب علشان انتى تعليقاتك حلوة اوى

Anonymous said...

انا عايزة اسال سؤال
انت ليه شايف الدنيا سوداء كدة
انا مش هاقول ان السعادة بترفرف حوالينا و ان احنا لازم ندور عليها لكن برنا بيبعت لنا حاجات فى اليوم تهون علينا شوية
يعنى مثلا انت بتصحى كل يوم الصبح و تقوم تعمل نفس الحاجات اللى انت متعود تعملها و تروح الشغل من نفس الطريق اللى بتروح منه كل يوم و تقعد على نفس المتكب و تكلم نفس الناس فى نفس الكلام و تعمل نفس الشغل
ما هو دى يا سيدى روتين فى حد ذاتة
حتى لو انت بتحب واحدة و ما فيش نصيب معاها حتفضل قدامك طوال اليوم يا فى الحقيقة يا فى خيالك مش هاقول انك هاتفضل تحبها لكن دايما هتفضل قدام عنيك عايز تثب لها انك كمان كويس و انك تستاهل كل خير و مهما وهمت نفسك انك و لا على بالك لكن بردة بتفضل تفكر فى الموضوع
على فكرة انت فى الوقت دة مابتفكرش فى الانسانة نفسها و لكنك بتحاول تسترجع الوقت دة لانك كنت سعيد جدا فيه فنفسك تعيش الاحساس و حالة الحب دى مرة اخرة
و مش انت لوحدك كدة كل الناس كدة نفسها تحب و تتحب لكن التعبير عن الحاجة دى بيختلف من واحد لخر فيه واحد بيحب على طول يخرج من قصة يدخل فى التاينة و هو واهم نفسة انه حب كتير و ممكن يجى فى الأخر يلاقى انه ما حبش فى حياته اصلا و كل دة كان وهم
واحد تانى يفضل يكتم مشاعرة جواه و يظهر رد فعله على انه عصبى المزاج او عدوانى و غير كدة كتير .
انت يا محمد انسان رومانسى و طيب و جواك مشاعر حب و عطاء لكن مش عارف توظف المشاعر دى و تخرجها علشان كدة مش لاقى السعادة لأ طاقة المشاعر دى ما زالت جواك ما فيش باب لها تخرج منه و سوف اعطيك بعد الحلول لعلها تكون مناسبة للوقت الحالى
اولا حاول تجدد من روتين حياتك اليومى مثلا غير تليفون موبايلك او غير استايل لبسك او حتى اتعرف على اصحاب جديدة او حاول تعمل شيئ مختلف مثر الخطوة اللى انت اخدتها انك تعمل موقع و الناس تبعت تعقيبها على كلامك خطوة كويسة جدا لانك طلعت الى جواك حتى و لو مكتوب
ثانيا حاول استغلال طاقة المشاعر والحب و الحنان الى جواك دى فى حاجة ايجابية و ما تسيبهاش تروح فى الهوا و ما تسيبهاش بردة مكبوتة جواك لو عند طفل فى العيلة حاول انك تخرج به و تشتيريله لعب و تشاركة فى اللعب هتلاقى نفسك بتعيش احساس الطفولة الجميل تانى و لو ثوانى و مش قصدى طبعا انك ترجع عيل لكن لما كنا اطفال كنا ما بنفكرش غير فى احلام بسيطة ذى نشترى لعبة معينة او نتفسح فى مكان معين
ثالثا: الابتعاد عن كل ما يثير الاحزان و يبعث على الكآبة فمثلا لو واحد صحبك عايز يخرج معاك و عارف انه هيكلمك فى حاجة تضايقك او يحبطك اعتذر عن الخروج معاه
رابعالما طلبت منك انك تشغل نفسك بالاخرين و انك تحاول تشاركهم حياتهم مش معنى كدة انك تنسى نفسك او تيجى عليها لان دة هيجيب نتيجة عكسية انا عايزاك تلاقى نفسك فى حياة اللى حواليك تاخد منهم حاجة جديدة و تضيف لهم حاجة جديدة مش كل حاجة فى الدنيا هى زوجة جميلة و صالحة يعنى اللى ما اتجوزش دة ما عندوش مشاعر او مش حاسيسباى سعادةممكن يكون هناك صديق يفهمك اكثر من مراتك و ممكن يكون هناك مواضيع ينفع تاخد فيها راى الصديق و مش ممكن تكلم فيها مراتك
لان كل علاقة اجتماعية فى الدنيا ربنا خلقها لسبب معين فالزوجة غير الصديق غير الأخت غير الأخ و غير الأبوين و كذلك صديق العمل غير الصديق الشخصى و هكذا جرب المحاولات دى و مش هاقولك انها هتخلصك من الحالة الى انت فيها تماما و لكن جرب و هتلاقى تحسن كبير بعدها و تغيير فى افكارك و شخصيتك كمان و على فكرة اللى حواليك هيلحظوا كمان

اخر حاجة عايزة اقواها لك انك لازم تسعد نفسك و تهتم بنفسك و تحاول ترضيها زى ما بتحاول ترضى غيرك و انك تؤمن جيدا ان ربنا هيبعت لك بنت الحلال فى الوقت الذى يريدة
و نصيحة تانية كمان كل ما تلاقى نفسك زهقان او تعبان من الدنيا صلى ركعتين و ادعى ( دى حاجة ببلاش كدة ) هتلاقى نفسك احسن و كلم صديق اشكيلة او اكتب اللى يجى على بالك فى الموقع بتاعك و هتلاقى اصدقائك كلهم جنبك بيردوا عليك و يساعدوك .

السلام عليكم و رحمة الله و بركاته
نهى

فؤاده said...

موضوع جميل يا واد ، بص يا سيدي ، واضح جدا من كلامك ان انت مبسوط في حياتك ، بس ناقصك حاجه واحدة ، الحب ، عايزترتبط و تحب وتتحب
في ناس كده ، انا منهم
بس متقلقش مسيرك في يوم تحب وتتحب ، وده لازم عشان تبطل بصبصة على بنات الناس في الشارع

قولي الاهلي اللي انت كاتبه في الموضوع ده ، الاهلي الليبي ؟؟

الرمز

أسوور said...

ربنا يوفقك وينولك اللى تتمناه

ويا بخت اللى هتتجوزها بجد

أنا بأعتبر كل من يزور مدونتى ويترك تعليق .. صديق

يعنى انت من غير ما تقول بأعتبرك صديق

والحكاية اللى حكيتها ما فيهاش حاجة عشان تقول ما حدش عارفنى

خليك واضح دايما حتى لو نظرة الناس ليك مش عاجباك

just be your self

مصر هى أمى said...

ياسمين
شكرا على الدعوة الجميلة ديه وانا عارف طبعا ان اللى هاتجوزها لازم يكون ربنا بيحبها ( بهزر طبعا ) وانا بعتبر ان كل واحد بيعلق عندى برده صديق وشكرا على صداقتك وعلى فكرة انا واضح دايما اما بخصوص الحكاية فوجهات النظر بتخلف فيه ناس تقول ان ديه حكايات شخصية مفروض متتحكيش وناس تانية تقول عادى وخصوصا ان فيه طرف تانى مرتبط بالحكاية وده اللى انا قلته ان ميزة المدونات ان محدش عارف انا مين بس الحمد لله بعد تعلق فؤاده والزميلة العزيزة نهى انا اتفضحت بما فيه الكفاية فى الشغل

مصر هى أمى said...

نائل فؤاده
طبعا علشان احنا الاتنين رجالة زى بعض فا انتا الوحيد اللى فهمتنى طبعا احنا الحمد لله راضيين بحياتنا بس دايما بتكون ان فيه حاجة ناقصة الانسان وفى حالتى وحالتك اللى ناقصنا الحب الحياة دايما بتبئه جافة طول ما فيهاش حب عموما انا مش قلقان انا عندى عشم كبير انى الاقى الحب بس المهم انى الاقيه فى الوقت اللى يكون عندى قدرة فيه على الحب
الاهلى اللى انا كاتبه فى الموضوع ده الاهلى المصرى بطل الدورى والكاس وافريقيا والعرب وتالت العالم
ياعالم افهموا ده الاهلى
ازاى تكون مصرى ورمز ومتكونش اهلاوى

مصر هى أمى said...

نهى
ايه التحليل النفسى العظيم ده دا انا حسيت بعد ما قريت التعليق بتاعك انى مجنون وماشى اققطع فى هدومى
طبعا اللى بيحب واحدة ومبيكملوش مع بعض بيحاول يثبت طول الوقت انفسة وليها انها هيا اللى خسرانة ده شعور طبيعى
وخصوصا لو كان الواحد عاش معاها فى سعادة بيقى نفسه يسترجع خالى بالك حتى لو الانسان كان عارف انها سعادة زائفة مبتفرقش معاه المهم انه يعيش فى سعادة حتى لو كانت اى كلام وبيضحك عليه فيها
نفسى اصدقك ان لسه جوايا مشاعر لان خلى بالك ان المشاعر بتموت لو ما استخدمتش
بخصوص اقتراحاتك جميلة اوى
بخصوص اللبس صب قوى اغيرة لان زى ما انتى عارفة انا بشتغل من 9 الصبح لحد بالليل والشركة لازم بدل وكرافتات يعنى مفيش وقت اغير استايل لبسى
طبعا انا نفسى انا اللى ارجع طفل تانى ومفكرش فى الشغل والحب والجواز كان نفسى الواحد يفضل صغير ومشاعرة بريئة وجميلة
طبعا فيه ناس لسة متجوزوش وعندهم مشاعر جميلة
ثم انتى عايزانى اكتب كل همومى فى الموقع دا انا كتبت بوست واحد طلعتونى مجنون ومش راضى بحياتى
اصدقائى والله العظيم انا راضى بحياتى كده وصابر على الحاجات اللى نقصانى وعندى امل ان ربنا هيعوضنى خير
نهى شكرا جدا على ردك وانا مستنى البلوج بتاعك
بنت النيل

Anonymous said...

يااه فعلا مكتوب باحساس عالي جداا..
ربنا يسعدك و تلاقي ان شاء الله انسانة سعيدة تحبها و تتجوزها و تبقوا سعداء على طول :)

مصر هى أمى said...

ماراويتا
شكرا اوى وربنا يستجيب لكل الدعوات اللى نزلت عليا ديه بس لو طلع الجواز وحش ودينى لابهدلكم وهافضل ادعى عليكم طول الليل وانا بغسل المواعين قبل الهان ماتصحى الصب وتلاقى المطبخ لسه ما اتشطبش

Hannoda said...

أنا مش حارد على موضوع الحب عشان كلامي فيه حايكون متشاءم بدرجة مخالفة للواقع

لكن السعاده اللي بتقول انها ضايعة من قلوب الناس.. هي احساس نسبي
يعني أنا لما كنت فمصر .. كنت كتير بمشي في الشارع مش خوفي للجنان يستفرد بيّ فبيتنا من كتر ضغط الظروف المادية
لاعارفة أدفع مصاريف الكلية و كل شوية البواب يطلعلي بفواتير وأنا ماعيش مليم
ولما كنت أنزل الشارع أشتري رغيفين بس من الفرن عشان بالباقي أعرف أجيب فلافلتين برضه.. كان بتاع الفلافل و الفران بيعاملوني كإني حثاله و حايكرشوني.. في وقت كنت محتاجة حد يطبطب عليّ.. ولــو زبال من الشارع.. مع كل احترامي للزبالين

كنت أيامها فاكرة ان ده أتعس أيامي
بس بعد ما جيت هنا في الغربة بحس ان أجمل أيام عشتها هي اللي كنت فيها فمصر

كنت بتألم بس الشارع كان بيسعني

كنت بدمع من معاملة الفران لكن بعدها بخطوتين كنت ببتسم لمداعبة شاب غلبان بيعاكس معاكسة دمها خفيف و فاكر نفسه كده مقطع السمكة و ديلها


السعادة نسبية

و بتضيع مننا لما حزننا على اللي مش في ادينا يخلينا مش شايفين اللي فايدينا


بتمنالك السعاده و الزوجة اللي تستاهل كمية الحب اللي جواك

وسوري على الاطالة

مصر هى أمى said...

هنودة
شكرا اوى على تعليقك وهوا ده نفس الكلام اللى انا قلته ان السعادة كانت فى ايديا وانا اللى ضيعتها ومحستش انها ضاعت الا لما ملاقتهاش تانى
السعادة نسبية ده صحيح بس احنا دايما اللى بنضيع السعادة من ايدينا
وانتى مطولتيش ولا حاجة
انتى تشرفى فى اى وقت

Mmm! said...

انا كنت هأعيط خلاص من اللى انت كاتبه
ربنا يسعدك .
بالمناسبة - مدونتك جميلة و خلتنى أبتدى أقرا اللى انت كاتبه من الاول

هي said...

متزعلش كل الي بيسيبو حبيبهم كده بيشوفو الدنيا والناس حزينه لكن الحقيقه ان هما الي حزنينن ولحد ميعدي الوقت ده ادعي ربنا انو يوفقك في البنت الي تشدك وتحب وتحبها ويجعلها من نصيبك انشاء الله لن متفكرش في الماضي كتير وحاول تحمد ربنا انك قضيت اوقات جميله وسعيده فيه وانشاء الله الي جي احلي ربنا يرحم قلوبنا الضعيفه ويعرفها الحب والسعاده تاني