Monday, February 5, 2007

حرام عليكم فضحتونى

الزميلة العزيزة بنوتة من وسط البلد صاحبة مدونة كلام خلاصة ضايقها اوى ان حد فضحها على المدونات وقلها تحكى على خمس مواقف محدش يعرفها غيرها ولانها اتفضحت واتجرست وسط المدونييين فقالت تفضح معاها مدونيين تانيين
ماشى يا بنوتة نستفتح ونبدء نقول الفضايح بس الاول كل واحد يعرف ابويا امانة علية ميقولوش حاجة ماشى يا جماعة
مرفيت الشغالة
وانا لسه فى ابتدائى جيت فى يوم وطلبت من بابا انى اشترى هدوم وكنت لسة شارى هدوم من فترة صغيرة بس لقيت واحد صاحبى شارى هدوم شيك اوى اكتر منى قعدت ازن اد كده على على بابا عايز هدوم عايز هدوم بابا قالى انه معاهوش فلوس طبعا ده علشان يخلص من زنى المهم صدقته بعديها بيومين كنت بتفرج على التليفزيون اللى فى اوضة بابا علشان كان عندنا ضيوف فى الصالة لقيت جنب التلفزيون فلوس كتير مكنتش اعرف يعنى ايه المرتب واول الشهر والقبض المهم قعدت اقول اهه معاه فلوس ومش عايز يجيبلى هدوم طب ودينى لاوريهم طلعت البلكونة وقعدت اقطع الفلوس وارميها من البلكونة طبعا بعد ما الضيوف مشيوا وانا رحت اوضتى سمعت زعيق وضرب نار فى البيت وبابا عمال يزعق المرتب راح فين مين اللى خده طبعا انا بكل براءة قولت معرفش مش انا وطبعا صدقونى ما انا لسه صغير معرفش حاجة المهم العملية لبست فى مرفيت الشغالة عندنا وبقيت هيه الحرامية وعلى بيت ابوها روحت فى نفس اليوم وبابا حلف انها ماتبات فى البيت
طبعا اوعى حد يقولهم فى البيت ومش عايز اقولكم انه كان شهر عدى علينا ازاى كل يوم فول وطعمية
مرفت انا اسف
جارنا العزيز
المرة ديه كنت فى اعدادى واحنا فى اجازة الصيف كانت ماما واخواتى مسافرين وانا اللى كنت قاعد مع بابا فى البيت كنت الخدامة بتاعته طول عمرى غلبان ومظلوم فى بيتنا بابا كان فى الشغل وجالى ناس اصحابى قعدوا معايا طول اليوم وجم وهما ماشيين حبيت اعمل معاهم حركة رجولة وقلتلهم لازم اوصلكم بالعربية ماهو لسه بدرى على ما بابا ييجى من الشغل المهم نزلت اوصلهم وطبعا كان لازم اركن العربية فى نفس المكان بالظبط والمصيبة انى كنت بعرف اسوق لكن مكنتش بعرف اركن العربية المهم وانا باركن خبطت عربية واحد جارنا خبطة جامدة بس عربيتنا الحمد لله ماحصلش فيها حاجة المهم وقفت تاكسى كان ماشى فى الشارع وقولت للسواق يركنلى العربية علشان مش عارف اركن المهم ركنلى العربية فى نفس المكان القديم وغطيتها وطلعت بيتنا ولا كان حاجة حصلت بعد شوية سمعت جارنا واقف يزعق ويشتم فى اللى خبط عربيته ونزلت وقفت معاه وقعدت ازعق انا كمان واقول ناس معندهاش دم وشتايم كل اللى ييجى على بال الواحد
جارى العزيز انا اسف
حفلة شواذ
اول ما دخلت ثانوية عامة طبعا كان الواحد بياخد دروس فى كل المواد وكانت المدرسة بالنسبة لينا مكان نخرج فيه من البيت محدش كان بيهتم يحضر اى حصة ومكانش فيه غياب المهم اتعرفت على واحد معايا فى الفصل كان عايد السنة اسمه اسلام الواد ده هوا سبب فشلى فى الثانوية بعد ماكنت من الاوائل فى المدرسةكنت التالت على المدرسة فى تانية ثانوى اسلام ده علمنى التزويغ من المدرسة كنا بنخرج نفطر الاول عند عم محمد بتاع عربية الفول اللى جنب المدرسة وبعدين نروح سينما الحفلة الصباحية بتاعت المزوغين المهم جه اسلام فى يوم وقالنا ان فيه سينما فى وسط البلد اسمها نيوكورسال طبعا المدونيين الصيع اكيد عارفنها وقالنا ان السينما ديه بتعرض خمس افلام من الساعة 9 الى الساعة 2 والتذكرة بــ 2.5 جنيه بس
رحنا السينما طول ما حنا قاعدين حاسس بحركة غريبة واصوات غريبة بعد اول فيلمين ما خلصوا حبيت اروح الحمام دخلت الحمام لقيت ناس استغفر الله العظيم زى عمنا خالد الصاوى فى فيلم عمارة يعقوبيان كده عينى عينك وقفت وانا مش عارف اعمل ايه من اللى انا شايفه وبعدين لقيت اتنين جايين عايزين يتكلموا معايا وبيحاولوا يتفاوضوا معايا يا نهار اسود ومنيل وطبعا اخوكم حليوة وطول وعرض ووزن كنت ساعتها 130 كيلو طلعت اصرخ فى وسط السينما واقول الحقوا فين ناس ................ ( طبعا النقط كانت شتيمة زبالة اوى ) لقيت السينما كلها بتزعق فيا وتقولى امال انتى جاى هنا ليه يعنى مكنتش تعرف
فوجئت ان احنا الشلة الوحيدة المحترمة اللى فى السينما كلها طبعا كلنا جرينا هوا وخرجنا من السينما الحاجة الوحيدة اللى كانت صعبانة عليا انه ضاع عليا 3 افلام من الخمسة منهم فيلم قدارة بتاع فيفى عبده وطبعا مش عايز اقولكم على اللى احنا عملناه فى اسلام
واوعى حد يقول لبابا لحسن هيقول ما انتى لو مكنتش زوغت كان زمانك دكتور ولا مهندس
انا بعت دمى
ايام ما كنت فى الكلية وديه احلى ايامى وانا فى اولى كلية اتعرفت على شلة بنت ستين فى سبعين وكان افقر واحد او واحدة فيها كان عنده عربية نضيفة اوى وكنت انا طالب جديد وعايز اعيش فى الدور واعمل شلة كبيرة وكان معايا فلوس كتيرة من الفلوس اللى جاتلى اما نجحت فى الثانوية العامة الفلوس ديه كلها خلصت مكملتش شهر وطبعا المصروف الشهرى بتاعى كان بيخلص فى طلعة واحدة مع انه كان كويس اوى وكنت كل شوية اخد فلوس من بابا علشان اشترى كتب الجامعة ومكنتش باشترى اى كتب لغاية ما بقى شكلى وحش وزبالة اوى فى البيت
وانا فى يوم فى الكلية جت عربية بتاعة تبرع بالدم وقالوا انهم هيدوا للى هيتبرع بسكوت وعصير وطبعا رحت جرى اصل انا بعز الاكل اوى اكتر من اى حاجة ومحدش يوزه عقلة ويقول ده مفجوع لحسن ودينى لابهدلة وبعد ما اتبرعت اكتشفت انهم مبيدوش بسكوت وعصير بس لا كمان بيدوا ايصال تروح تاخد بيه كتاب من كتب السنة من المكتبة وكمان خمسين جنيه هييييه هييييه اهى فرجت كتاب وخمسين جنيه اجيب بيه كتاب لمادة تانية وارفع راسى فى بيتنا بعد ما كان كل يوم خناقة فى البيت على الكتب
اوعى حد يقول لبابا
الاخت الفاضلة جى جى
المرة ديه برضة فى الجامعة كنت اتعرفت على بنت بس بصراحة طحن وكنا بنقعد مع بعض كتير اوى جينا فى مرة حبينا نخرج مع بعض طبعا ما كنش ينفع نركب تاكسى لاننا كنا هنخرج بالليل اوى وهنرجع متأخر فرحت عندنا فى البيت وقولتلهم انا عندى فرح اخت واحد صاحبى وعايز اخد العربية علشان هتاخر فى الفرح وخت العربية طبعا قبلها اشتريت منوم لجىجى علشان تحطه لمامتها فى كوباية العصير علشان تنام وتعرف جىجى تخرج من غير ما مامتها تحس
رحت خت جىجى من تحت بيتهم طبعا مالوش لازمة اقولكم كانت لابسة ايه اااااااااه دا انا بتنهد لما بفتكر الايام ديه المهم سألتها تحبى تروحى فين جىجى هانم اقترحت المقطم يا نهار اسود المقطم الساعة 11 بالليل بينى وبينكم خفت قولت تبقى مصيبة وبوليس الاداب يمسكنا هناك طبعا انتوا عارفين المقطم واللى بيحصل هناك
قولتلها مينفعش اقترحت طريق المطار نقعد فيه شوية مش عارف ليه كانت اختياراتها منيلة بستين نيلة كده
رسيت فى الاخر ان احنا رحنا فيلم النوم فى العسل حفلة الميد نيت ( يعنى منتصف الليل للى مش عارف ) الفيلم خلص الساعة 2.3 بالليل فاكرين نيكول سابا فى فيلم التجربة الدنماركية فى مشهد المطار اهى السينما كلها كانت عاملة كده علشان خاطر جىجى وعقبال ما روحتها وروحت بيتنا كانت الساعة 4 الفجر لقيت بابا بيصحى علشان يصلى الفجر فى الجامع ماهوا عقبالكم بابا بيصلى كل الصلوات فى الجامع قعدت احكيله على الفرح والمطربيين والاكل اللى كان فى الفرح
مش عايز اقولكم ان بعديها باسبوعين لقيت واحد صاحبى بيسالنى على مكان الصيدلية اللى جيبت منها المنوم لأم جىجى فسالته ليه قالى انه رايح المقطم هوا وجىجى النهاردة بالليل وكانوا عايزين يجيبوا المنوم لمامتها علشان يعرفوا يخرجوا بالليل
بنت ستين فى سبعين فضحتنى فى الكلية كلها والناس كلها عرفت انى خفت اروح المقطم معاها واكتشفت انها شغالة عليا وعلى اصحابى ويا بخته صاحبى راح معاها المقطم
طبعا ربنا يسامحك لتانى مرة يا بنوتة من وسط البلد فضحتينى ولو سمحتوا محدش يجيب سيرة لبابا لحسن يطين عيشتى واسمع كلمتين من
عينة ما لو كنت فالح فى التعليم كان زمانك مهندس ولا دكتور مع انى بقبض دلوقتى مرتب احسن من المهندس او الدكتور
وزى ما انا اتفضحت ومطلوب منى افضح خمسة غيرى فا انا برشح

1 - نائل فؤادة بس ادعوله ان ربنا يفك الحصار المنزلى اللى عليه دلوقتى

2 - نوارة جبهة التهييس الشعبية

3 - ياسمين SKYLIGHT

4 - مروة ماراويتا

5 - واحد من الناس

6 - نهى بنت النيل

7 - زينب شهيدة

33 comments:

ياسمين said...

عجبنى جدا التاج بتاعك

حسيت انه حقيقى وفى فضايح بجد

بجد انت شكلك كدة صريح وهتخلينى اشاور عقلى وأعمل التاج

بس هيبقى كله برضه فضايح من اللى قلبك يحبها

:))))

marawita said...

ماشاء الله ما شاء الله على الفضايح الجامدة :D

انت اللي بيعزك بجد يقابل بباك :D

و على فكرة

كما تدين تداااان ماشي :D

esraa said...

كل دي فضايح (:
بس التاج حلو وصريح, بس مش حرام عليك تقطع عيش الشغاله الغلبانه؟
بس بجد بوست جميل, ادخل عندي خد التاني وحله يابطل مررتهولك (:

واحد من الناس said...

لا يا عم ::: مش هاينع انا
انا طول عمرى انسان كتووووم لاخر عدد من حروف الواو تقدر تحطه فكلمة كتوم
انا حابس نفسى ومشاعرى واسرارى جوا قبرى ..ومستنيها تيجى تفتح القبر دا وتمدلى ايها وتشدنى منه ... بس مش عارف هاقبلها امتى دى ..العمر بيجرى وهى لسة مجاتش ...بس على ماتيجى انا ممكن اقول لحبيبتى دى

شهيدة said...

سلام يا محمد
حرام عليك تفضح نائل بالشكل ده
ما انت اللي بتقول عليه حصار وكل يوم في امن دولة
انت عايز تزيد الحصار عليه ولا تهونها عليه؟
مع اني حابة اقرى الخمس حاجات دي عنو :)
المهم، انت باين عليك عندك مغامرات جامدة جدا، ما شاء الله عليك
انا يمكن لازم أتعب أوي عشان أفتكر حاجات زي دي أو يمكن لأ
يللا يا رب تكون بطلت الحركات دي لما كبرت
بالتوفيق
سلام

marawita said...

مررتلك التاني انا كمان:D

الناس اللي بتعزك كتييير :D

بنوتة من وسط البلد said...

تعيش وتاخد غيرها
وكل جى جى وانت طيب :)
واى خدمة

مصر هى أمى said...

ياسمين
ياباشا انت تأمر
انا عارف انى صريح وطول عمرى مبحبش اللف والدوران وانا مستنى التاج بتاعك والحمد لله ان التاج بتاعى عجبك

والله انا ما بحب الفضايح بس هيا بنوتة من وسط البلد اللى طلبت منى كده وانا مقدرش اكسف واحدة بنت

مصر هى أمى said...

ماراويتا

عجبتك الفضايح سعادتك
والله يا مروة لو بابا عرف لاجلكم طنطا واشردلك هناك
وقصدك على مين كما تدين تدان

ماهى جىجى هانم فضحتنى فى الكلية وخدت حق كل اللى فاتوا

وشكرا على التاج التانى
هارد عليه

مصر هى أمى said...

اسراء
فينك يا بنتى من زمان بقالك فترة مش مشرفانى
الحمد لله ان التاج عجبك واتفضلى عندنا فضايح من كل نوع مع الشغالة والتزويغ من المدارس وجىجى ربنا يحرقها بوظت نص طلبة الكلية

طبعا اللى عملته مع مرفت الشغالة كان غلط بس كنت لسه ساعتها عيل صغير مش فاهم حاجة
ومتخافيش انا دلوقتى كل ما اروح البلد اديها اللى فيه النصيب

وشكرا على التاج التانى
بجد انا بطل هههههههههه
مع ان كل المواقف كنت عيل اوى
اه منك يا لؤم

مصر هى أمى said...

واحد من الناس
اولا من مدونتك انا حاسس انك انسان محترم مدونتك حلوة اوى
بس الفكرة من التاج ده انك تتكلم عن نفسك تحكى والحاجة الحلوة اللى فى التدوين ان محدش يعرف التانى يعنى ممكن تكلم براحتك
هستنى التاج بتاعك
هفضل واقف لغاية اما ترد وحياتك ما همشى الا لما ترد حتى لو جبتلى مين

شكلك كده مهموم اوى اقرا البوست بتاعى هل انا سعيد
وبعد كده تعالى حط همك على همى
وها نمشى حافيين بعد كده فى الشارع

مصر هى أمى said...

شهيدة
يا اهلا بلبنان واهل لبنان انتى فين من زمان مش بشوفلك بوستتات جديدة ليه
متخافيش نائل ده راجل بس انا بفكر انى ابلغ فى ابوة انه حزب وطنى فهتلاقى الناس اللى فى الشوارع اللى حواليهم تنتقم منه على اللى عمله فى نائل هوا طبعا معذور ما هوا اب ولازم يخاف على ابنه
بس نائل وعدنى انه هيرد عليا

الحمد لله عقلت اوى يالا اهوه حسن الختام احنا هنعيش اد اللى احنا عشناه
بس على فكرة حاجة زى سينما الشواذ ديه مكانش ليا ذنب فيها

عموما التاج عندك جاوبى بقى
وسلامى للشخصية العظيمة السيد / حسن نصر الله
وكل المقاوميين فى لبنان

مصر هى أمى said...

ماراويتا
كلاكيت تانى مرة

وصل التاج التانى ونور عندنا حاضر حاضر والله هارد عليه واحله بالراحة عليا انا برده موظف وعندى مدير ولازم اشتغل علشان احلل اللقمة اللى الشركة بتسممهالى
مش كفاية ابويا كل شوية حتى وانا عندى تلاتين سنة كل شوية ما انتى لو فلحت كنت بقيت دكتور
مش عارف هيا كلية تجارة ديه بيعتبروها معهد صرف صحى ولا حاجة
مع انه خريج تجارة وماما خريجة تجارة وكانوا قصة حب كمان فى الكلية
حرام عليكوا اتخنقت


والله شكلكم بتعزونى اوى

مصر هى أمى said...

بنـــــــــوتة
ربنا يسامحك فعلا
مردودالك فى يوم من الايام وكله سلف ودين
يا ستى مستغنى عن خدماتك لو بالفضايح ديه
والله ايام جىجى كانت زى الفل صياعة وسرمحة فى الشوارع والسينمهات
اااااااه يا جىجى فين ايامك دلوقتى
زمان امها ماتت من كتر المنوم اللى كانت بتاخده

بنوتة متبقيش تقطعى الزيارات

جبهة التهييس الشعبية said...

أنا رديت ع التاج بتاعك

ولو انهم مش اسرار

بس يمشوا

يعني اسرار على الاقل على النت

شهيدة said...

yaسلام يا محمد
حرام عليك انا حجبلك قصص زي دي منين؟!
ده سؤال صعب جدا ممكن اطلب تعفيني منو ولا هو زي المواد الاجبارية في الامتحانات؟؟

محمد شمروخ said...

ازيك يا محمد انا متابعك من زمان اخبارك ايه ايه التاج الجميل ده طبعا فى فضايح كنا مع بعض فيها زى السينما بتاعة الشواذ
بس محكتش ليه فضيحة النور اتقطع يا محمد
اه ديه لوحدها بالخمسة اللى انتى كاتبهم عموما محمد قال ياجماعة انه ميقدرش يكسف واحدة بنت فا انا بطلب من اى واحدةانها تطلب من محمد يحكلنا عن القصة ديه
ابقى طمنى عليك يا واد

أماني said...

يا خبر أبيض يا محمد...فضايحك نوع تاني...الحمد لله إن التاج في 5 حاجات بس...دول طبعا إللي محدش يعرفهم...إمال أخبار إللي إتعرفوا إيه؟؟؟؟؟؟؟
:)

مصر هى أمى said...

جبهة التهييس الشعبية
نوارة يا باشا متشكرين على الرد ثم مين قال ديه مش اسرار بقى كان نفسك تكونى رقاصة وتقولى مش اسرار

انتى نورتينى يا فندم

مصر هى أمى said...

شهيدة
لا سعادتك لازم تردى ده زى ما انتى قولتى اسئلة اجبارى يعنى علشان نعرف انتى مين
مع ان كفاية انك من عند السيد / حسن نصر الله وحزب الله
احسن ناس

مصر هى أمى said...

محمد
صديقى اهلا وسهلا بيك محمد ده يا اخوانا فضلت قاعد جنبه فى المدرسة من تالتة ابتدائى الى تالتة ثانوى يعنى اتخنقت منه وكنا كل البلاوى بنعملها مع بعض
جبنا زى بعض فى الثانوية سالته هتدخل ايه قالى حقوق القاهرة قلتله والله لانا داخل تجارة وعين شمس كمان علشان مشفهوش تانى

اما حكاية النور اتقطع يا محمد فديه قصة طويلة ممكن اكتبها البوست الجاى بس الاول ادور على شقة ايجار علشان اكيد بابا هيقاطعنى طول العمر بعديها وممكن يحرمنى من الميراث كمان وانا معنديش استعداد اخسر الميراث

مصر هى أمى said...

امانى
فينك من زمان بقالك كتير معلقتيش عندى الحمد لله فعلا انهم خمسة بس

ومتخافيش يا ستى واحد صاحبى طالب منى احكى على فضيحة زمان عملناها وممكن اتسجن بسببها وربنا يستر
يا بنتى انا كنت طفل هادى ووديع جدا
وعمرى ما عملت مشكلة

karakib said...

سينما كلها ... هاهاهها يا خبر أسود هي بقت عيني عينك كده !

فؤاده said...

ايه يابني ده ، انت مافيش حاجه معملتهاش ، احمد ربنا ان التاج عايز خمس مواقف بس ،يا ريته كان طلب خمسين ستين موقف

وكمان جاي تشردلي انا شخصيا ، يابني حرام عليك خليني ماشي جنب الحيط

على العموم بعد التشريد اللي كتبته عني ، انا عارف اول حاجه هعملها ، خصوصا ان انا عارف عنوان بيتكو

سامحني يا محمد

الأباصيرى said...

بصراحة أحسن فضايح سمعتها فى أى مدونة

يخرب بيت دماغك... دا أنت فضيحة متحركة


كدة أول مرة أدخل المدونة.. ألاقيك ناشر فضايحك على كل المدونين

يابنى أن بليتم فأستتروا
بقى فرحان قوى عشان السينما كلها طلعت شواذ
ولقيت أتنين رجالة..(هما حبوا بعض) لووول

شوف ياباشا كان نفسى ادخل المدونة بتاعتك تانى بس مش هينفع عشان زعلان منك جدا فى موضوع جيجى
يارااااجل يبقى معاك
عربية
وبنت لابسة من غير هدوم
ومامتها واخدة منوم
والبنت على وش انحراف
وبتقولك أطلع بينا على المقطم

تقوم أنت توديها فيلم النوم فى العسل
دة كلام!! أنا لو منك
.
.
.
.

كنت خدتها معرض الكتاب

ياراجل بلاش كلام فارغ
حد يعمل كدة فى الدنيا


معلش تتعوض

تحياتى ياسكر

مصر هى أمى said...

هانى
اهلا بيك الاول
والله عينى عينك كده السينما كلها كانت منيلة واكتر حاجة كنت خايف منها ان بوليس الاداب يدخل يقفشوا كل الموجودين ساعتها ابويا كان مات بحسترة لانه عمره ما كان هيصدقنى انى ماليش دعوة

مصر هى أمى said...

نائل
الحمد لله فعلا ان التاج عايز خمس مواقف بس
يا باشا محدش يقدر يتعرضلك ده احنا رجالتك
وانتى ماشى برده جنب الحيط
ياعم دا انت الرمز
والله يا نائل لو قولت لابويا لافتن عليك واقول انك حزب وطنى ومن رجالة الباشا وابنه
مستنى ردودك يا باشا مش انا لوحدى وشهيدة كمان نفسها تشوف ردودك

مصر هى أمى said...

الاباصيرى
ياه اخيرا شرفت عندى كل يوم كنت بقعد ادعى يارب الاباصيرى يعلق عندى
الحمد لله صبرت ونلت

المصيبة يا باشا انا طيب علشان كده اول ما حد يقولى اقول بقول على طول وخصوصا لو كانت واحدة

بصراحة يا باشا السينما كانت زبالة اوى انا عمرى ما هنسا الموقف المنيل ده ولا منظر الناس اللى كانوا فى الحمام كنت لسه عيل صغير فى ثانوى كان اخرى بتفرج على مجلات لكن كده عينى عينك بصراحة مشفتش

اما بخصوص جى جى
ربنا يحرقها زى ما قولت قبل كده بوظت نص شباب الكلية بس بصراحة كانت طحن موت والله الناس كانت هتضربنى فى السينما وتاخدها منى

اقولك على حاجة هيا كمان اللى اقترحت ان احنا اللى نرروح السينما الظاهر من كتر ما زهقت منى

تصدق يا بنى انتوا فكرتونى بيها والله لادور على نمرتها واحاول اتصل بيها يمكن ترضى الرة ديه تروح معايا كوفى شوب اللى فى اول شارعنا
ثم انهى بنت ديه اللى كانت على وش انحراف
يا ابنى انا اكتشفت انها طلعت المقطم مع نص طلبة الكلية وكمان الدكاترة والمعيدين امل كانت بتجيب امتياز ازاى كل سنة

الحاجة الوحيدة اللى صعبت عليا امها من كتر المنوم اللى كانت بتاخدة

halwasa-masrya said...

بجد ... ضحكتنى من قلبى . بس انا حاسة انه لو التاج كان فى عشرين موقف .. كنت برضه هتكتب عشرين موقف .. شكلك رجل مواقف بجد ..

مصر هى أمى said...

هلوسة مصرية
طب الحمد لله انى عرفت اضحك المدونيين ومفيش مشكلة انى اطرد من البيت علشان خاطركم و انا طول عمرى بضحى

استنى البوست اللى جاى وانتى تضحكى فعلا

NOHA said...

حرام عليك يا محمد انت عايزنى اجيبلك فضايح بالشكل دة منين بس عموما التاج بتاعك حسسنى اننى قدام شخصية بعرفها لأول مرة
اتريك رجل المواقف الصعبة و احنا ما نعرفش
عموما الراجل الحقيقى يبان فى المواقف الصعبة
اما بالنسبة لجىجى فاكتر حد صعبان عليا بجد فى الموضوع هو مامتها دى زمنتها ماتت من كتر الحبوب المنومة

مصر هى أمى said...

noha
يعنى حرام عليا ومش حرام على اللى بعتهولى
عموما انا محمد اللى انتى تعرفيه من زمان كل الكلام ده كان زمان
ومستنى ردودك على التاجين

Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人