اجازة طويلة

صباح الخير

معلش اتاخرت عليكوا اوى وبقالى كتير مدونتش حاجة ولا كنت بعلق عند اى حد بس والله كنت مطحون فى الشغل بطريقة غريبة ولسه لغاية دلوقتى بس بالعافية خدت يوم اجازة بعد ستين يوم شغل متواصل من غير اى اجازة ولا حتى الجمعة لدرجة انى كنت بشتغل كل يوم اكتر من 17 ساعة مكنش عندى حتى اى وقت اشوف اى مدونة او اعمل اى كومنت فمعلش اعذرونى انتوا عارفين القطاع الخاص والشغل فيه عامل ازاى

طبعا مكنش ينفع ارجع من غير ما اهنى كل الاهلوية بالفوز المستحق بكاس مصر ومعلش يا زمالك هوا ده قدركم انكم دايما تاخدوا المركز التانى ممكن بعد خمسين سنة كمان تفوزوا على الاهلى مرة تانية

شكرا لكل الاصدقاء اللى سألوا عليا سواء فى الكومنت او الايميل او فى التليفون ربنا يخليكوا وهوا ده برده العشم والاصحاب اللى الواحد طلع بيهم فعلا من المدونة

مرة اخيرة انا اسف جدا على التاخير فى الرد على الكومنت اللى عندى وهحاول ارد عليها قريب ان شاء الله

ولو اتاخرت تانى فى الكتابة اعذرونى لانى لسه عندى شغل كتير اوى

هاتوا الفلوس اللى عليكوا

خبر او تحقيق صحفى عجيب قريته فى جريدة الدستور من كام يوم عن فلوس التامينات الاجتماعية

اغرب حاجة فى الخبر ان الحكومة العظيمة بتاعتنا خدت او سحبت او استولت قول زى ما انتى عايز على كام بقى يا سيدى

على 270 مليار جنيه مصرى خدتهم الحكومة من فلوس التامينات الاجتماعية بتاعتنا ومحدش عارف هما راحوا فين ولا اتصرفوا فى ايه

وخدوا بالكوا من الرقم 270 مليار مش مليون يعنى للناس اللى مش بتفهم

المليار يعنى الف مليون يعنى 270 وجنبها تسعة اصفار

يعنى انا موظف بيطلع عينى طول الشهر

والدولة بتاخد من مرتبى 40% تامينات اجتماعية علشان اما الواحد يطلع معاش هيرجعوله تانى

الحكومة مصدقتش خبر فلوس بالعبيط عندها مش تستثمرها ولا تعمل بيهم حاجة مفيدة

طب انا هاموت واعرف الفلوس ديه راحت فين هوا احنا مش من حقنا نسأل برده ما هيا فلوسنا وتعبنا وشقينا فيها

انا مثلا عندى تلاتين سنة يعنى هنقول عقبال اما الواحد وعى على الدنيا وفهمها شوية قول ييجى من خمستاشر عشرين سنة انا بقى مش حاسس ان فى حاجة اتغيرت ولا المواصلات اتصلحت ولا المرتبات زادت ولا حتى الاقتصاد بقى عدل ولا حتى كنا بنحارب وقولنا الفلوس اتصرفت فى الحرب ولا مصانع اتبنت بايد الحكومة ولا فى حتى مشروعات عملاقة اتعملت غير اللهم مشروع توشكى اللى محدش عارف اذا كان كويس ولا لأ

يعنى الحكومة خدت الفلوس وجنبها 17 مليار بتوع الشبكة التالتة وجنبها كام مليار بتوع المصانع اللى اتبنت من ايام عبد الناصر وعزيز صدقى ابو الصناعة المصرية اللى برده الحكومة عمالة تبيع فيهم

انا نفسى اعرف الفلوس ديه راحت فين مش معقول ياخدوا مننا فلوس التامينات علشان يبنوا بيها معتقلات نتسجن فيها

ايه الهنا ده بنتسجن بفلوسنا

يعنى التامينات اجبارية على الموظفين طب مش من حقنا نعرف الفلوس ديه بتروح فين

لو حد ناوى يقولى ديه موارد للدولة وبتدفع بيها فلوس للجيش والداخلية والكلام ده هرجع اقوله امال الضرائب بتتعمل بيها ايه وفلوس المياه والكهربا والتليفونات وكل مصلحة لازم تدفع فيها دم قلبك وكمان مبقاش فى اى حاجة مجانية فى الدولة ولا تعليم ولا صحة كل الفلوس ديه بتروح فين ما هيا كل ديه موارد الدولة ليه بقى ياخدوا فلوسنا بتاعت التامينات والخبر الجديد بقى اللى لسه قارية فى مجلة ان الحكومة ناوية من اول السنة اللى جاية انها تخفض المعاشات 15 % كمان شوفتوا الافترا

ياخدوا فلوسنا ويضيعوها وكمان عايزينا احنا اللى نتحمل غلطتهم

احنا من حقنا نعرف الفلوس ديه راحت فين ولا احنا ملناش حق فى البلد ديه اصلا

ليه بقينا نقسى على بعض

ليه بقينا نقسى على بعض ليه القسوة دخلت قلوبنا واول ما الواحد بيقسى بتكون اول ضحية ليه اقرب الناس
بعد ما كتبت البوست اللى فات وقولت فيه انى كرهت الدنيا كلها كنت فعلا حاسس بالمرارة كنت شايف الناس وهيا بيتقسى
مبقتش عارف
المصرى طول عمرنا نسمع انه طيب وحنين طول عمرنا كنا بنقول احنا مصريين الحضن الكبير مهما الناس شتمونا وغلطوا فينا هنفضل الاخ الاكبر كان ده طبع المصريين ممكن نكون شعب مضحوك عليه حكامنا بيذلونا شعب ضعيف مهزوم مبيقاومش اى حاكم لكن كنا زمان شعب طيب خدوم
المصرى اول ما كان يسافر برة مصر كان المصريين اللى عايشيين برة مصر يعملوا كل اللى يقدروا عليه علشان يساعدوه اللى يوفرله سكن واللى يحاول يجيبله شغل كنا شعب اصيل
اتفرج دلوقتى على اى واحد مصرى بيشتغل برة مصر يعمل كل جهدة علشان يضرب فى زميله المصرى علشان ياخد مكانه اول ما صاحبه ياخد اجازة يجرى على المدير السعودى ولا الكويتى ولا حتى الهندى او الفلبينى ويقوله انا ممكن اشتغل شغل زميلى المصرى واخد نص المرتب بس طبعا التانى اما يصدق يرجع المصرى من اجازته يلاقى نفسة مطرود من الشغل طب ليه معلش اصل زميلك هيمسك شغلك وهياخد نص المرتب
اول ما بدا يضرب ضرب ابن بلده اللى كان مفروض يبقوا حنينين على بعض يحموا بعض من اى غدر تانى
حتى فى مصر عمرنا ما سمعنا ان اخين قتلوا بعض علشان خاطر الميراث الا من فترات قريبة اخ يقتل اخوة والتانى يعمل مكيدة لاخوة علشان يستولى على الشقة
مصرى يروح يخطب بنت ويلعب بمشاعرها ويوهمها انه ميت فيها وعايز يتجوزها اهه بيتسلى والسلام وقبل الجد يجرى ويقول انا مش قد الجواز قسوة ما بعدها قسوة
بنت تسيب خطيبها علشان جالها عريس تانى كويس او جاتلها سفرية برة كويسة تبيع خطيبها بالساهل المهم مصلحتى مبقاش فى مشكلة ان الواحد يدوس على التانى و لا حتى بقينا نصعب على بعض
بقينا قاسيين جدا على بعض
البنت بتقسى على خطيبها فى الطلبات
والراجل بيقسى على مراته ويسيبلها مسئولية البيت ويشيل ايده من تربية الاولاد

انا حاولت اسال ناس كتير

المصريين كانوا زمان طيبيين ايه اللى حصلنا
يعنى من اجابات الناس ومن حاجات شوفتها حواليا حسيت ان المصريين بدءوا يتغيروا من بعد حرب اكتوبر 73 الرجالة رجعت من الحرب عايزين يعوضوا زوجاتهم واوالادهم فترة الحرمان اللى عاشوها ايام النكسة مكانش ادامهم غير حل واحد السفر للدول العربية وطبعا ساعتها كانت الدول العربية مفتوحة للمصريين مكانش ادام المصريين منافس زى الهنود والباكستانييين ولا حتى الامريكان كنت تروح اى دولة متلاقيش غير المصريين كلهم جريوا على الدول العربية كان فيهم كتير كبروا فى السن وقضوا فترة كبيرة فى الجيش كان لازم يعوضوا اهاليهم وفى نفس الوقت محتاجين يحوشوا فلوس كتير العمر بيجرى وانا ملحقتش اعمل حاجة بقى اسهل حل انى اضرب فى زميلى علشان اخد مكانه وطبعا زميله ده مصرى زيه وبدات الحكاية كل واحد بيضرب فى زميله واللى معندوش اخلاق بيتصرف كده ييجى واحد محترم يلاقى زميله اغتصب مكانه ايه الحل لازم يدافع عن مكانه ومفيش غير انه يعمل نفس اللى اتعمل فيه
بدأنا نقسى على بعض بقت سمة من سمات حياتنا والمصيبة ان احنا اطبعنا بالطبع ده وكمان ورثناه لاولادنا
طبعا مش كل المصريين عملوا كده
لكن خلينا منطقيين مصريين كتير عملوا كده
الاولاد شربوا من اهاليهم القسوة واول ما بدؤا يقسوا اتعلموا فى اهاليهم وفضلت الدايرة تتقفل تتقفل لغاية ما شفنا ان الاخ بيقسى على اخوة والابن يقسى على امه
نفسى نرجع تانى الشعب الجميل الخدوم الطيب
طبعا مش هننسى الايام السودة اللى احنا عايشينها دلوقتى والظروف الاقتصادية المنيلة بتاعت دلوقتى خلت محدش طايق حد وكل واحد بيقول انا ومن بعدى الطوفان فترة حكم كلها مشاكل وتعذيب وظروف اقتصادية منيلة وشوية حرامية بيتحكموا فى البلد ويرفعوا الاسعار زى ما هما عايزين تجار مخدرات على فواتير تليفونات على دروس خصوصية كله عمال ينهب فى لحم الناس الغلابة واللى يتكلم ولا حتى يفتح بقه امن الدولة مستنيه والمعتقلات والتعذيب هتربيه ولو كنت من الاخوان المحاكم العسكرية فى انتظارك
مبقاش حد رحيم بحد
زمان كانت الشرطة فى خدمة الشعب
وبعديها بقت الشعب والشرطة فى خدمة الوطن
ودلوقتى بقت الشعب والشرطة والوطن فى خدمة الريس وعائلته
يبقى لازم الناس تبقى قاسية اكتر من تلاتين سنة الناس بتعانى قربوا ياكلوا لحم بعض
نفسى نرجع تانى المصريين بتوع زمان الطيبة والخوف من ربنا مراعاة الجار احترام النساء نرجع نقول احنا المصريين نرجع نمشى فى اى دولة فى العالم نقول انا مصرى
تسافر اى حتة برة مصر وتقف فى الشارع تقول انا مصرى عايز اى حد يساعدنى تلاقى ميت ايد تتمدلك وتقولك انا مصرى زيك تعال معايا بات عندى نقسم اللقمة سوا نقسم اللحاف مع بعض اسلفك وانا عارف انك هترجعهم تانى
هوا ده المصرى بتاع زمان
يا ترى راح فين

كرهت الدنيا كلها

كرهت الدنيا كلها
بقالى فترة كبيرة جدا بتعرض لمشاكل كتير اوى نفسى اخرج من اللى انا فيه نفسى اسافر نفسى ابعد
مش عارف كنت عايز ابقى طائر طاير فى السما او سمكة فى البحر المهم مكونش انا دلوقتى مش عارف انا ملخبط جدا
انا تعبت جدا من الحياة ليه يا ربى حرمت علينا الانتحار انا عارف انها حكمة الهية علشان منفقدش الامل ولا نيأس من حياتنا لكن اللى فقد الامل فى بكرة اللى يأس من حياته يعمل ايه نفسى اقف فوق برج عالى وارمى نفسى
نفسى اطير فى السما مش مهم ايه اللى هيحصلى بعد كده مبقتش فارقة معايا اى حاجة

ليه نفسيتنا اتغيرت ناحية بعضنا ليه بقينا نقسى على بعض ليه الظلم بقى سهل
نفسى اموت
اكيد ظلمة القبر احسن ميت مرة من نور الدنيا اللى احنا عايشنها دلوقتى
ربى هل استطيع الحصول على استثناء منك
اريد الانتحار
ربى انى لم اكفر برحمتك بل انى اطمع فى عفوك وكرمك عليا
هل ستاتينى الشجاعة انى انتحر واتخلص من حياتى
كرهت حياتى كلها
مبقتش عايش اى لحظات سعيدة
ربى انى عبدتك قدر استطاعتى امنت بك لم اترك فرض من فروضك صمت وصليت وزكيت
ربى ان اقترفت ذنب فى حقك فسامحنى ربى اتوسل اليك ان لا تعذبنى ان اقترفت ذنبا فى حقك

اللهم انت ربى لا اله الا انت خلقتنى وانا عبدك وانا على عهدك ووعدك ما استطعت اعوذ بك من شر ما صنعت ابوء لك بنعمتك على وابوء بذنبى فاغفر لى فانه لا يغفر الذنوب الا انت

اسراء وتاجها التانى

طبعا التاج ده اتمررلى من فترة كبيرة من اسراء ولاقيتها بعتالى تهديد انها ممكن تعملى ارهاب وتدمر المدونة لو ما جاوبتش على التاج بتعها
فطبعا كان لازم اجاوب
وطبعا لسه فى ذمتى تاجين من عند سمراء النيل

بس سمراء النيل مقدور عليها اصل هيا مش فاضية اليومين دول مشغولة بقى بالماجيستير

هل كنت طالب شاطر فى المدرسة ؟

بصراحة بصراحة لغاية تانية ثانوى كنت دايما من الاوائل على المدرسة بس ربنا ما يوريكوا فى ثانوية عامة اتعرفت على واحد كان عايد السنة قشطة بقى كل اللى معملتوش فى حياتى التعليمية عملته فى ثانوية عامة

ايه كانت احب مادة و اكره مادة ليك فى المدرسة والكليه ؟

فى المدرسة كنت بحب المواد الاجتماعية جدا ومع ذلك دخلت علمى وفى ثانوية عامة حبيت الفيزيا اوى
اكتر مادة كرهتها كانت الكيمياء
فى الجامعة محبتش ولا مادة مع انى فى مواد كنت بجيب فيها امتياز لكن محبتش ولا مادة

كنت عايز تطلع ايه وأنت صغير ؟

مش عايز اى تريقة ماشى

ماشى
والله اللى هيتريق مش هيحصله كويس
سواق تاكسى ومحدش يسألنى ليه والله معرف

هل تسعد عندما يمرر لك أحدهم تاجا؟

يمكن بفرح لما حد بيمررلى تاج لانى بحس انى مهم عند الشخص ده

هل مقدار سعادتك أو شعورك أيا كان - عند تمرير التاج لك يختلف حسب المدون الذي يمرر لك التاج؟

مبيختلفش على حسب المدون لان اكيد اللى مررلى التاج ده مدون علاقتى بيه كويسة وان احنا اصحاب فكده كده انا ببقى مبسوط بمعرفته مش على عشان خاطر التاج

هل تستمتع عند إجابتك عن أسئلة التاج؟
فى اسئلة بستمتع بأجاباتها وخصوصا بتاعت الذكريات

هل ترى للتاج أهمية حقيقية ؟

فى تاجات مهمة جدا لانها عرفتنى بشكل شخصى على بعض المدونيين وديه حاجة فرحتنى جدا
لكن المشكلة ان التاجات زادت جدا والواحد لسه فى ذمته تاجين غير ده

هل فكرت في عمل تاج خاص لك من قبل؟
يعنى انا بقعد ادعى على اللى بيمررلى التاج ومبرضاش امرر التاج لحد علشان ميدعيش عليا اقوم انا اعمل تاج
ليه هوا انا ناقص دعا عليا

هل تفضل قراءة أجوبة التاج عند المدونين الآخرين ؟

أم لا تهتم سوى بالتدوينات الأخرى فقط؟

لا طبعا بهتم انى اقرا اجوبة التاج عند المدونيين علشان اعرفهم اكتر

عندما ترد على التاج ما الذي تراعيه أكثر؟

انى اقول الحقيقة فعلا علشان اللى حابب انه يتعرف على شخصيتى يعرفها من غير تزويق او اى حاجة

إلى من تحرص على تمرير التاج؟

طبعا اصدقائى اللى على المدونات اللى بزورهم كل يوم لكن انا خدت عهد على نفسى انى مش همرر تاج لحد تانى لان فى ناس كتير مررتلها التاجات اللى فاتت ومردتش عليها فقلت مش همرر تاج لحد تانى

هل تحرص على قراءة اجابات من تمرر لهم التاج ؟

و هل تغير إجابتهم للتاج شيئا في ادراكك لهم ؟

طبعا بحب اقرا اجاباتهم على التاج سواء كنت انا اللى ممرره ليهم او لاقيته عندهم طبعا ممكن اجاباتهم تغير من نظرتى ليهم لان الاجابات ديه بتعبر عن الشخصية فلازم كل واحد يكتب الحقيقة فى اجابات التاج بتاعته

هل تلتزم حرفيا بأسئلة التاج ؟

اى نعم

ما هي نوعية التاجات التي تفضلها ؟

هيا التاجات كمان فيها نوعيات لا يا اسراء هانم اى تاج انتى ابعتيهولى وانا هارد عليه على طول اللي اتدبس يدبس, وعشان كده جه بقي الدور علي الناس اللي هندبسهم

طبعا المفروض انى امرر التاج ده لحد
بس بصراحة انا مش هممره اللى عايز يحله بتفضل ياخد التاج ويحله وبالهنا والشفا

البت امكانيات وعمايلها السودة

يوم الجمعة اللى فاتت كنت بشوف جرنال الاهرام وقريت طبعا المناشيتات العظيمة اللى كانت موجودة بمناسبة الخطاب التاريخى للريس علشان عيد العمال وطبعا مش عايزين نقول ان الكلام كله متكرر بقاله 26 سنه

انا ملفتش انتباهى غير حاجة معينة اما الريس قال

لو فى امكانيات هنزود المرتبات خمسين فى المائة كل سنة

كلمة لو فى امكانيات هى اللى لفتت انتباهى
طب هيا الامكانيات ديه راحت فين اختفت فين

طبعا بما ان الكلمة فيها تاء فى اخرها تبقى الكلمة ديه انثى
مين بقى ابن اللذين اللى مخبى البت امكانيات ديه عنده ميطلعها علشان خاطر الشعب يعيش
سعادة الريس يعنى تفتكر ان العمال الغلابة اللى كنت بتكلمهم مخبين الامكانيات ديه مثلا طب ما احنا دولة بوليسية وامن الدولة مالى البلد متخليهم يعسوا كده ويغطسوا غطسة كده ويبقوا بالبت امكانيات اللى العمال الحاقدين مخبينها وطبعا مخبينها علشان يبوظوا سمعة البلد ويهدروا محاولات الحكومة لرفع المرتبات طبعا ماهم فئة حاقدة على الشعب وميتمنوش الخير للناس
انا من على مدونتى ديه بطلب من وزير الداخلية انه يجند كل امكانيات الوزارة للبحث عن البت امكانيات علشان انا وصلتنى معلومات مؤكدة ان العمال بينقلوا البت امكانيات كل يوم من بيت لبيت علشان محدش يعرف مكانها وطبعا ده فى سرية تامة الخوف بقى لحد من العمال يكون لسه عازب ومثلا عنده اربعين سنة ومش لاقى فلوس يتجوز ومهدد ان المصنع اللى هوا شغال فيه يتخصص وبالتالى العامل ده هيطلع معاش مبكر وهوا لسه يا ولداه مدخلش دنيا اصلا ممكن يحاول يغتصب البت امكانيات فسايئ عليكوا النبى يا حكومة تحاولوا تنقذوا البت امكانيات من ايد العمال وترجعوها للريس تانى علشان يزود مرتباتنا
لحسن انتوا عارفين بقالنا ستة وعشرين سنة عمالين نقول الاصلاح والتقدم والاستمرار والمحافظة على العمال وميزان المدفوعات والنمو الاقتصادى والتعمير والنهضة الصناعية وكل الكلام ده مشفناش منه حاجة لغاية دلوقتى يعنى لو كنا فى حالة حرب كنا قلنا مفيش مشكلة اهى كل جهود الدولة موجهة للحرب والمفروض ان احنا نستحمل علشان الحرب لكن الاكادة ان احنا بقالنا ستة وعشرين سنة ومحاربناش ولا نيلة طب فلوس الدولة وكل محاولاتها ديه راحت فين يعنى ولا اتنيلنا حاربنا ولا اتنيلنا عمرنا وبقينا دولة اقتصادية
اتارى كل ده علشان الحكومة مش عارفة تعتر على البت امكانيات
والله الحكومة ديه نيتها حلوة هيا عندها الرغبة انها تزود مرتبات العمال لكن العمال هما اللى مخبيين البت امكانيات ومش عايزين يطلعوها

نداء خاص منى لامكانيات

وحياة ابوكى اظهرى وبانى نفسى مرتبى يزيد الضعف كل سنة
عايز اتنيل واتجوز بقى
بس المصيبة لبعد ده كله تطلع الحكومة تقول ان الزيادات ديه لموظفى الحكومة بس والقطاع الخاص لأ ملناش دعوة بيهم

تاج اميرة البلطجية

تاج تاج تاج انا مش عارف ايه كل التاجات ديه وعلى راى اميرة البلطجية انا شبعت تاجات فقامت بعتالى تاج هيا كمان يعنى هيا جت عليها صحيح المشكلة بقى انى مخدتش بالى ان كل التاجات اللى جاتلى من عند

فيميل ( female )

بلوجرز

هوا مفيش رجالة بتبعت تاجات ولا ايه

المشكلة انى لسه فى ذمتى تاجين من عند اسراء وسمراء النيل

معلش يا اسراء هجاوب على التاج بتاعك بس انتى عارفة التاج ده بتاع اميرة البلطجية ولو مجاوبتش عليه بسرعة ممكن تفجر المدونة كلها او مكن تنتحر علشان مجاوبتش على التاج بتاعها

اما بالنسبة لسمراء النيل فديه مقدور عليها

أحب شخص لقلبك فى الدنيا؟

طبعا بعد ربنا وسيدنا محمد
ومراتى اللى مش عايزة تيجى
احب شخص لقلبى عمتى

انسان مستعد تضحي بحياتك –ركز فى كلمة حياتك- عشانه؟

قرار التضحية بالحياة صعب جدا بس عموما انا ممكن اضحى بحياتى علشان خاطر دينى او بلدى وممكن فى مواقف معينة الواحد ممكن يضحى بحياته عن طيب خاطر علشان ينقذ انسان ضعيف مثلا بس المواقف ديه بتبقى نابعة من لحظتها

.انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

انا نفسى فعلا امسك سكينة واغرزها فى قلبى
لو مكنش الانتحار حرام كنت عملتها من زمان
واى واحد ممكن يفكر يأذى اهلى او بلدى او دينى

ما هو:اسم أجمل كتاب كتبه بشر قرأته ومحتفظ به حتى الان؟

خمس سنوات فى بيت من زجاج - لبطرس غالى الامين السابق للامم المتحدة

اسم كتاب-كتبه بشر برضة- انت متعلق بيه وبتقرأه كل فترة؟

الماسونية العالمية

اهم جهاز منزلى انت متعلق بيه او بتستخدمه كتير؟

البوتاجاز والتلاجة

شىء تحس بالراحة النفسية عندما تنظر اليه؟

السماء او البحر الفراغ عموما
وطبعا الاكل برتاح جدا اما بلاقى اكل ادامى

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

فيلا عمتى فى البلد وانا واقف فى التراس بتاع الفيلا وادامى الارض الزراعية الى ما لا نهاية ساعتها بحس بالحنين الى انى ارجع طفل صغير مفيش حاجة بتشغل باله
بحن دايما للمكان ده معرفش ليه

مكان تحس بالراحة عندما تدخله؟

المسجد النبوى فى المدينة

اجمل مدينة زرتها داخل مصر؟

اسكندرية وبعديها بورسعيد وبعديها مرسى مطروح

أجمل مكان طبيعي رأيته داخل مصر؟

البحر فى مرسى مطروح

شخصية كارتونية بتحبها؟

توم وجيرى

نوع هاتفك المحمول؟

نوكيا

سرعة بروسيسور جهازك؟

والله يا اميرة البلطجية ما اعرف

حجم ذاكرة –هارد- جهازك؟

والله برضه ما اعرف

المساحة التى تشغلها المواد الاسلامية على جهازك؟

على الكمبيوتر معتقدش فى مواد اسلامية كتير بس عندنا سى دى كتيرة اوى مواد اسلامية بابا بيقعد بالساعات يتفرج عليها وخصوصا انه معلوماته فى الكمبيوتر متتعداش انه يحط السى دى ويشغلها بس
فاللاسف لو حطينا مواد اسلامية على الهارد بابا مش هيعرف يوصلها ولا يشغلها

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

اتمنى من الله انه يدينى مساحة كبيرة من قلبى تكون مخصصة للمواد الاسلامية

أهم هدف انت واضعه لحياتك دلوئتى؟

يمكن بقالى فترة كبيرة مفيش حاجة فارقة معايا وبالتالى مليش اى هدف فى الحياة بصحى كل يوم الصبح اروح الشغل افضل فيه لغاية 10 او 11 بالليل وبعديها اروح انام على الساعة2 بالليل وهكذا كل يوم

مواصفات فتاة –أو فتى للبنات- الأحلام بالنسبة لك؟

ايه الغرض من السؤال ده يا اميرة البلطجية
عموما تكون حنينة اوى وبنت ناس ومحترمة بس اهم حاجة تكون حنينة اوى اوى اوى تكون انثى مش عايز اتجوز واحد صاحبى
انثى بمعنى الكلمة
ايه السؤال ده هوا انا هتنك على ايه

اى واحدة والسلام

قطيعة تقطع الحوجة وسنينها

صف ما يأتى:شعورك لما بتسمع كلمة مصر؟

بحبها اوى وبخاف عليها

شعورك لما بتسمع كلام عن اليهود؟

حاجتين الكره الشديد ليهم
واعجاب شديد بيهم
كره ليهم وافتكر معروف ليه بكرهم
اما اعجاب بيهم فلانهم الامة الوحيدة اللى على الارض اللى بتعمل اللى هيا عاوزاه من غير محد يقدر يقولهم حاجة بيذلوا فينا وفى حكامنا واحنا مبنقدرش نتكلم قوة اقتصادية مهولة العرب كمان عندهم فلوس كتير جدا بس للاسف بيصرفوها فى الهلس

شعورك لما بتشوف ظابط شرطة؟

نفسى اقوله احنا بنى ادمين زيكوا وعندنا اهل ومشاعر وبنحس بالتعذيب وان احنا بنحب البلد ديه جدا
نفسى اقوله اتقى ربنا وخاف الله

شعورك لما بتشوف الكناس العجوز فى الطريق؟

بقول فين الشهامة والمروءة بتاعة ولاد البلد

لون البطانية اللى بتتغطى بيها فى الشتاء؟

بطانية خفيفة جدا لونها احمر ( النادى الاهلى طبعا ).ومبتغطاش غير لما يبقى الجو شتاء بجد

لون الجورب-الشراب- المفضل لديك؟

الكحلى

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

ايه السؤال المقرف ده
انا مش هتفرق معايا اوى ممكن تسألوا ماما لانها هيا اللى بتساوى البيت

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

لو فعلا ملتزم فى سلوكه وبيحافظ ويصون اللحية اللى فى وشه والمصحف اللى فى جيبه هدعيلة ان ربنا يكرمه وهدعى ان احنا كلنا نكون زيه
بس عموما الاسلام عمره ما كان بالمظهر مش لازم جلابية بيضاء قصيرة وعمامة علشان يبقى الشخص ده كويس او وحش الاسلام بالاعمال وليس بالمظهر


احساس يراودك فى اشارة مرور مغلقة بسبب مسئول كبير؟

بصراحة بشتم المسئول الكبير ومبفتكرش غبر حاجة واحدة عن سيدنا عمر ابن الخطاب اما كان نائم تحت شجرة ومر عليه حاكم فارسى ووجده نائم فقال له حكمت فعدلت فامنت فنمت يا عمر

التاج ده أمرره للاتية أسماؤهم

طبعا طارق واحد من الناس وسمراء النيل
نائل فؤادة
اسراء
الزعيمة
شهيدة
حلم عادى

يعنى ايه مصر

اما كتبت البوست الاخير بتاعى نسيب مصر ونرحل كلنا

جاتلى تعليقات كتير ما بين احنا لازم نفضل ونحارب علشان البلد ديه جميلة وتستاهل

وتعليقات تانية ان الواحد مفروض فى اول فرصة انه يرحل من مصر ويهاجر

سألت نفسى سؤال تسمحولى اسئلهولكوا

يعنى ايه مصر ؟

هيا مصر ديه الارض والتراب والسما ولا هيا الاخلاق والشهامة والطيبة والجدعنة بتاعة ولاد البلد ولا هيا النيل وسمار بشرتنا

هيا مصر ديه الناس والشعب اللى عايشيين على ارض مهما كانت هيا فين الارض ديه ولا مصر ديه الارض اللى الناس عايشة عليها مهما كان مين اللى عايش على الارض

احنا بنحب البلد ديه علشان اتولدنا فيها واتربينا فيها يعنى حب بالامر الواقع علشان مفيش غيرها

احنا بنحب ايه فى مصر

ايه اللى خلانا نكره مصر

الحكومة والتوريث والتعديلات الدستورية والسرقة والفساد والرشوة وحادثة العبارة واللبن المجنس واحتكار الحديد وسرقة الاثار ومنافقين الحزب الوطنى والضعف والهوان والذل اللى الشعب شايفه على ايد

الحكام وتحكم امريكا فين

ايه اللى خلانا نحب مصر

وايه اللى خلانا نكره مصر

يعنى ايه مصر

الشعب ولا الارض

مين اللى عمل عظمة مصر وربا جوانا حبها

الناس ولا الارض

نسيب مصر ونهاجر كلنا

حوار صحفى جميل جدا كان منشور فى جريدة الدستور يوم 2/4 مع الدكتور المستشار يحيى الجمل

الحوار كان حول التعديلات الدستورية

طبعا الاستاذ الكبير يحيى الجمل اللى انا بحبه وبحترمه جدا كان واضح وصريح فى اجاباته الخاصة بالتعديلات وبأن كل اللى شاركوا فيها هيتحاسبوا امام الله يوم القيامة على اللى عملوه فى الشعب المصرى وكبت حريته بالتعديلات الدستورية. الراجل قال جملة جميلة جدا ان الريس اول ما مسك الحكم قال انه عايش فى سجن كبير ونفسه ولاده ميعيشوش فى السجن ده لكن الواضح ان الريس عجبه السجن الكبير وقرر ان ولاده يعيشوا فى السجن الكبير

سيبك من كلام الدكتور يحيى الجمل واللى انتقد فيه التعديلات الدستورية وحمل اللى عملوها عبء كبير جدا عليهم

اما قالهم ان ربنا هيحاسبهم عليها

الحاجة اللى لفتت انتباهى جملة قالها الدكتور الكبير

انه قال لو ابنه جه يطلب انه يهاجر بره مصر هيوافق لابنه على طول لان المستقبل مظلم فى مصر

ده اللى قاله الدكتور يحيى الجمل طب عايز اسال سؤال

لو كل شرفاء مصر سابوها هيفضل ايه لمصر لو واحد زى يحيى الجمل او محمد حسنين هيكل او ابراهيم عيسى مش كفاية كل العماء الكويسين طفشوا من البلد طب الناس ديه لو مشيت وسابوا الساحة للمنافقين بتوع الحكومة هتبقى البلد ديه بتاعتنا ولا لأ

اما الناس ديه خافت من التعديلات الدستورية وخافوا ان ييجى يوم يلاقوا ظابط صغير كل يوم ساحلهم على القسم او امن الدولة وكله بالقانون طب احنا الشعب العادى هيتعمل فيه ايه هنرجع تانى لعهد زوار الليل وان الواحد يخاف ينتقد حتى رغيف العيش لحسن الحكومة تعتبره ارهابى وتطبق عليه تعديلات الدستور

يا شرفاء مصر استحملوا علشان خاطر الشعب الغلبان ده الشعب ده محتاج حد يقف جنبه يتكلم بأسمه يصرخ فى وش الظلم يتكلم مع القيادات العليا يقولهم على مطالب الشعب يعرف يكون سياسى ويتعامل مع الحكومة لمصلحة الشعب مش لمصلحة الحزب الوطنى اللى انفصل تماما عن الناس ومبقاش واقف غير مع كل حرف يقوله الريس وهما من وراه يقولوا امين

دكتور يحيى الجمل لو انت سبت البلد وكل شرفاء مصر سابوها تفتكر انسحابكم هوا الحل طب مين اللى هيقف مع الناس الغلابة فى وش الظلم اللى هيتعرضوله مع بدء تطبيق التعديلات الدستورية

الحب

الحب ده الاحساس او الشعور الطبيعى اللى الواحد بيحس بيه تجاه حاجة معينة زى ما ولد ممكن يحب واحدة او يحب اكلة معينة او يحب بلده او يحب رياضة معينة او اى حاجة

ناس كتير بيقولوا عليها الكيميا . يعنى الكيميا بتاعة الواحد بتتقابل مع الكيميا مع واحدة معينة
الحب ده بييجى مرة واحدة فى العمر يعنى الواحد لازم يتمسك بالمرة ديه ميتنازلش عنها ابدا

حبيبتى لم احب غيرك ولن احب غيرك
حبيبتى حاولت كثيرا ان انساكى
لم استطع

معرفش ايه اللى خلانى اكتب الكلام اللى فات يمكن مش عارف أعيش مش عارف احب واحدة تانية
يمكن مش عارف انسى حبى الاول
يمكن علشان كل يوم بالليل بحس بوحدتى القاتلة
يمكن علشان كل يوم بالليل بعيط كتير جدا
يمكن علشان كل يوم بالليل بلاقى حضنى فاضى
مبلقيش فى حضنى غير حزنى اللى محدش عارفه ولا شايفه ولا حاسه غيرى
مبلقيش فى حضنى غير الامى ووحدتى
كل يوم بالليل بحضن وحدتى واشكيلها همى وحزنى
ياربى انا معدش ليا غير الحزن ليه
ياربى انا مش قوى زى ما الناس فاكرانى
ياربى انا بتقطع من جوايا
ياربى هل اقترفت ذنبا كبيرا لتعذبنى هكذا
ياربى ارفع مقتك وغضبك عنى
يارب فك اسرى
ياربى ارحمنى وارحم ضعفى
ياربى الوحدة صعبة لا مش صعبة ديه قاتلة

معايا اصحاب كتير لكن محدش فيهم اقدر اترمى فى حضنه محدش فيهم ممكن اشكيله همى

انا محتاج لمسة ايديكى
انا محتاج ابتسامتك
انا محتاج حنيتك وطيبة قلبك
انا محتاجك كمصباح اهتدى به
انا محتاج اتكلم معاكى
انا محتاج نظرة عينيكى
انا محتاج تحطى ايديك على شعرى تانى
انا محتاج تطبطبى عليا تانى
انا محتاج تلمى قلبى اللى انكسر

عندى مشاعر كتيرة اوى اد اللى انا ادتهاليك واكتر كمان
نفسى اخرجها
خايف تموت جوايا
خايف اموت وتموت مشاعرى معايا

مش عايز اتجوز زوجة لأ
انا عايز زوجة صديقة حبيبة عشيقة ام اب اخ اخت تكون كل دنيايا واكون كل دنيتها واقدر اترمى فى حضنها اشكلها همى افرحها وتفرحنى ايدها فى ايدى منتكلمش لأ نهمس لبعض نوشوش بعض
عينيا تحفظ ملامحها حتى وهيا مش معايا ابتسامتها متفارقنيش

يارب الوحدة صعبة جدا

هل انتهى زمن الحب والعشق بالنسبة لى

لا ادرى

ثمن الحرية

الشاب المصرى اللى بينضرب بيدفع تمن مطالبته بالحرية

نظرة لطفل اقصى مطالبه انه يبص من تحت رجلين العساكر

كل العساكر ديه علشان خاطر واحد قال لا للظلم

الشرطة ومعاملتها الادمية للمواطنيين

ثمن الحرية اللى عنده ذاكرة سينمائية هيفتكر الفيلم ده على طول واللى معندوش انا اقوله الفيلم ده بيحكى عن بطل مصرى كان بيعمل عمليات فدائية ضد الاحتلال الانجليزى البطل ده فى الفيلم كان اسمه احمد عبد الحفيظ بعد احدى العمليات راح استخبى عند اسرة مصرية خبته وحميته عندها
لحد ما اتكشف امره فهرب فقبضوا على الاسرة ديه وعذبوها
انا اول مرة اشوف الفيلم ده فى حياتى وانا بتفرج على الفيلم شوفت مشهد التعذيب اللى حصل للاسرة علشان تعترف لدرجة ان رب الاسرة مات من كتر التعذيب واللى كانوا بيعذبوه فى سجن القلعة المحتلين الانجليز الراجل كان بيتعذب وبيضرب بالكرباج ادام مراته وابنه الطفل الصغير ومحدش ضعف ولا حاجة ولا اعترف على البطل المصرى لانه كان بالنسبة ليهم الحلم اللى هينقذهم من الاحتلال فكان لازم يدافعوا عنه بارواحهم فضلوا يستحملوا التعذيب لحد ما رب الاسرة مات
وانا بتفرج على المشهد ده مجاش فى بالى غير حاجة واحدة هما عملوا كده ليه هما ضحوا بارواحهم ليه علشان مين علشانا احنا
طب سؤال هما لو كانوا يعرفوا ان المستقبل بتاعنا هيبقى منيل كده كانوا ضحوا بحياتهم ولا لأ

اتفرجت على المشهد ده وأنا كنت لسه الصبح بشوف اخبار الاعتصام بتاع كفاية والابطال اللى اتقبض عيهم وطبعا ما ادراك عن القبض على ناس ضد النظام وفى الحالتين ده النظام الحاكم ايام الاحتلال الانجليزى ودلوقتى والتعذيب هوا هوا برده
الابطال زمان لويعرفوا ان الوضع متغيرش من زمان عن دلوقتى بس الاحتلال اتغير من الاحتلال الانجليزى الى الاحتلال البوليسى ومن ملكية معلنة الى ملكية مستترة تفتكروا كانوا ضحوا بحياتهم من اجل المستقبل المنيل اللى احنا عايشينه
الشعب كله رفض التعديلات الدستورية ما عدا بتوع الحزب الوطنى اللى انا بقيت اعتبرهم الخونة المصريين اللى مش حاسيين بالام الشعب ولا مشاكله
بتوع الحزب الوطنى كل ما يتكلموا يقولوا احنا لازم نضحى علشان الاجيال القادمة هيا الاجيال القادمة ديه مش ناوية تيجى ليه بقالنا خمسة وعشرين سنة بنضحى علشانهم وهما مش عايزين ييجوا طب نضحى باكتر من كده ايه افتكر ان احنا اخر جيل ممكن يضحى لان بعد كده مش هنلاقى ناكل او نتجوز علشان خاطر تكون فى اجيال تيجى من اصله
ثمن الحرية تفتكروا الراجل العظيم اللى ضحى بحياته علشان يحمى البطل المصرى فى الفيلم لو كان يعرف ان تضحيته ضاعت بلوشى وان احنا رجعنا محتلين تانى بس المرة ديه من حكامنا تفتكروا كان ضحى بحياته
ثمن الحرية غالى جدا بس الاغلى ان الاجيال اللى بعدها تقدر تمن الحرية ديه وتحافظ عليها بس للاسف احنا مقدرنهاش ولا حافظنا عليها فضيعنا مجهود وتعب وتضحية اجدادنا هباء
للاسف كل اللى بيحصل من حكامنا وجلادينهم بيضيع كل امل بيتولد جوا صدر اى مصرى بيقتل فينا روح الكرامة والشعور بعزة النفس وحب البلد ديه
يا سادة سيبونا نحب البلد ديه انتوا مش اوصياء علينا احنا بنحب وبنمجد البلد ديه مش حكام البلد ديه
البلد ديه جميلة اوى ياريت نحبها الحب اللى البلد ديه تستاهله مننا
تمن الحرية غالى اوى اجدادنا ضحوا بحياتهم علشان خاطرنا

ماتوا حباً فى البلد ديه
ياترى احنا قد المسئولية اللى سابوهلنا

اسراء وتاجاتها اللى مبتخلصش

اسراء مش عايزة ترحمنى من التاجات
كل ما يتبعتلها تاج تقوم مدبسانى فيه ماشى كلامك يا اسراء هانم طبعا الرجالة لازم تسمع كلام البنات وخصوصا الحلوين

قمت اتغديت للمرة التالتة النهاردة وقعدت على الكمبيوتر واستعديت للاسئلة بتاعة اسراء هانم ونبدأ الاجابة


اسم مدونتك ايه
مصر هى امى

لماذا اخترته.. ماذا تقصد به؟
اخترته واقصد بيه انى بحب مصر اوى فى مثل زمان كنت بسمعه الام تعشش والاب يطفش
المثل ده معناه ان الام هيا اللى بتلم اولادها حواليها ولو اى حد بص على مصر هيلاقيها كده المسلم عايش جنب المسيحى والسنى عايش مع الشيعى واللى من الصعيد عايش جنب اللى جاى من اسيا وبتاع اوروبا عايش جنب واحد امريكى كل دول مصر هيا اللى جمعتهم حواليها فا انا اعتبرتها انها ام لكل دول لانها بتتعامل انها الام
وانا كمان اعتبرتها انها امى

هل فكرت في إغلاق المدونة.. والسبب؟
عمرى ما فكرت اقفل المدونة خصوصا انى اتصاحبت على ناس كتير اوى حلوة بسببها انا اعتقد انى هافضل ادون لغاية يوم ما اموت

صورتك فى المدونة ..رمزيتها ؟
خريطة مصر معتقدش ان فى رمز اكتر من كده

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
سياسة على انسانيات على تجارب شخصية

لماذا تدون أصلا ؟
بحتول افرغ اللى جوايا على المدونة احنا كنا زمان بنكتب مذكراتنا فى كشكول ونفضل محتفظين بيه فى مكان امن
دلوقتى انا بعمل نفس الشىء بحاول افرغ اللى جوايا ويمكن حد يستفيد بيه

أحلى جملة قيلت لك فى وصف مدونتك ؟
كل واحد دخل عندى ترك تعليق مهما كان بعتبره جملة جميلة فى وصف المدونة

التعليقات بالنسبة لك ..أهميتها ؟
بهتم بيها جدا وبتحسسنى ان فى ناس مهتمية بيا وافتكر انها مهمة لاى مدون لانى بتكشف قيمة الشخص والموضوع اللى هوا كاتبه
وكمان فى تعليقات بتنمى شخصيتى وبتوضحلى حاجات كتير ممكن اكون مش واخد بالى منها
وبهتم جدا انى اما ادخل على حد واعلق عنده انى ادخل مرة تانية واشوف هوا رد على الكومنت بتاعى ولا لأ

أحلى بوست كتبته ..ضع اللينك ..ثم اذكر لماذا ؟
احلى بوست مفيش حد يقدر يقيم البوست بتاعه بس عموما البوست اللى قريب منى هوا
هل انا سعيد
وفى بوست تانى انا كتبته بس خايف انزله على المدونة لانه طويل اوى وكئيب جدا وسميته
هل هوا عقاب من الله
يمكن انزله قريب على المدونة
سبب انهم قريبين منى انا بتكلم فيهم عن تجربة شخصية مريت بيها ولغاية دلوقتى مش قادر اتخلص من اثارها

أفضل مدونة قرأتها ..يمكن اختيار عدة مدونات ؟
طبعا فى مدونات كتير اوى انا لفيت على مدونات كتير ورسيت فى الاخر ان كل المدونات اللى بعلق فيها هيا افضل مدونة شوفتها

أفضل بوست قرأته ..يمكن اختيار اكتر من لينك ؟
اى بوست بقراه والاقيه كويس بعتبره افضل بوست
بس عموما البوست اللى عمرى ما هنساه طول عمرى اللى قريته عند شارم مع اننا مش اصحاب ولا حاجة ونادرا اما حد فينا يعلق عند التانى بس هوا عنده بوست حلو اوى اسمه
جيش مصر مطلعش ساكن فى مدينة نصر
البوست ده وهم جدا جامد اوى

هل خسرت صديق بسبب كتابة هنا؟
معتقدش انى ممكن اخسر صديق بسبب كتابة هنا ولو حصل معتقدش انه كان صديق

حد قل ادبه فى التعليق ..ايه رد فعلك ؟
الحمد لله محصلش ممكن يكون حصل خلاف بين الناس اللى بتعلق عندى لكن كنت بحاول اهدى رتم الحوار بينهم بس لكن محصلش ان حد قل ادبه عندى
المرة الوحيدة اللى انا مسحت كومنت عندى ان لقيت واحدة من المثليات علقت عندى وطبع مكنتش متوقع انى الاقى اصلا ناس زى ديه عاملة مدونة من اصله ففوجئت بيها وكمان بتعلق عندى فطبعا مسحت الكومنت وهيا فهمت اكيد انى مش عايزها عندى من اصله

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
كل المدونات بتاعة الشواذ سواء اولاد او بنات
كل المدونات اللى بتهاجم الاديان بدون اى لازمة بدعوى الحرية
مدونة واحد اسمه ابو لهب شوفتها مرة ودخلت شتمته وخرجت تانى لانه كان كاتب قران هوا اللى مؤلفه وعمال يشتم فى الانبياء

أسوأ بوست ؟
اى بوست بيدافع عن كريم عامر فى تهمة ازدراء الاديان اما التهمة التانية فمفيش مشكلة انى ادافع فيها عن كريم عامر
البوست المشهور بتاع منال اللى فى مدونة منال وعلاء

أسوأ مدون ..مهو هتجاوب هتجاوب ؟
ابو لهب اللى اتكلمت عليه قبل كده
واحدة اسمها زبيدة عندها مدونة اسمها الحرملك
اى مدون شاذ

المطلوب منى ادبس اى حد فى التاج ده
ماشى ماهوا لازم تتدبسوا زى ما انا اتدبست واللى مضايق من التدبيسة دى يدعى على اسراء اللى هيا بتدبس اى مدون فى التاجات ديه

عموما رحمة باسراء من الدعاء عليها
كفاية عليها الدعاء بتاعى
اللى عايز ياخد التاج ده ياخدة ويحله ويورينا شطارته

مدونيييييين للمرة التانية

اصدقائى المدونييين للمرة التانية نتقابل المرة ديه رحنا الاوبرا وكان اجتماع جميل جدا طبعا كنت رايح وانا طمعان انى الاقى عدد اكبر من المرة اللى فاتت لكن اتخضيت انى لقيت العدد زاد لحد ما وصل الى 56 مدون ومدونة وان شاء الله دايما فى ازدياد طبعا كان لازم اروح انا وبيشوى اليان فقابلته امام الاوبرا ودخلنا مع بعض وقابلت ابراهيم معايا واستاذنا الكبير حسنى سليمان افنان الفنون وطبعا كان لازم نقابل ايمن راسبوتين وكان هناك شادى فايد وبعد شوية جه صديقى العزيز طارق واحد من الناس وتوالى وصول المدونيين الاخريين والميزة الكبيرة هوا الحضور النسائى الكبير اوى من المدونات

طبعا العدد ده كان عايز سيطرة كبيرة اوى من ياسمين سكاى لايت اللى كانت اكتر واحدة متحدثة وطرحت افكار ومواضيع كتيرة جدا وكانت هناك الانسة الرائعة انجى سمراء النيل اللى طرحت فكرة ان احنا لازم نوجه جهودنا وطاقاتنا ناحية الملاجأ ودور المسنيين ونحاول نعمل زيارات اسبوعية ليهم

وطبعا كان لازم يستعينوا بيا فى السيطرة على المدونيين طبعا باعتبار انى ارفع مدون كان موجود 145 كيلو بس فكنت بقوم انظم المدونيين وترتيب المدونيين اللى عايزين يطرحوا رؤيتهم للاجتماع ده وبعد كده جه الاستاذ القدير احمد شقير حكاوى اخر الليل واصدقائى المدونيين اللى حبيتهم من اللقاء السابق فروزن لاف وعمرو اريدكى انثى واحمد حداد احمد اتش وايلارى حد فاهم حاجة وميكليتو والمدون الاسماعيلاوى اسامة الدبور اللى مش عايز يكون اهلاوى وايجل المدون الرائع اللى تعب جدا علشان ياخد الحضور بتاع المدونيين

وطبعا كان لازم فى النهاية انى اقول كلمة للمدونيين واشكرهم على حضورهم الكريم واستجابتهم للدعوة بتاعتنا بالحضور واطلب منهم ان كل المدونيين ييجوا فى حفلة محمد حامد فروزن لاف اللى عاملها فى ساقية الصاوى يوم الثلاثاء 8 مساء وان شاء الله الحفلة هتكون حلوة جدا

وشكرا لكل المدونيين الجدد اللى شرفونا بالزيارة واللى مقدرتش اتواصل معاهم بسبب العدد الكبير اللى كان حاضر

الوحيد اللى كان نفسى اشوفه من كتر كلام المدونيين عنه ومن قرايتى للمدونة بتاعته هو

محمد عبد الغفار صاحب مدونة فى العمق مكان

للحرية ياريت نشوفة المرة اللى جايه

الناس اللى جات اهى

اى حاجة بقى::انجى

::http://anooojy.blogspot.com/

منغبرة شوية ::سالمة صلاح

::http://ssalah.blogspot.com/

Bogus :: white seagull::

http://whiteseagull.blogspot.com/
moorgen:: shereen::

http://moorgen.blogspot.com/
tota

http://tota-tota.blogspot.com/
من الآخر::دوللى::

http://looly-looly.blogspot.com/
سهر الليالى::amany::

http://amdonia.blogspot.com/

بيكيا … روبابيكي::هانى جورج::

http://bikya.blogspot.com/
واحد من الناس::طارق::

http://1ofthepeople.blogsome.com/
مصر هى امى::محمد عادل::

http://misr-hya-omi.blogspot.com/
احدهم::محمد مصطفى::

http://a7ad.blogspot.com/
مش عارف::عبد الرحمن مجدى::

http://mesharef.blogspot.com/
وجــهــة نــظــــــــــر:: MoHaMeD HoSSaM::

http://waghtnazr.blogspot.com/
No Fear:: Mohamed::

http://newmido26.blogspot.com/
اريدكى انثى::عمرو احمد::

http://oredoky-ontha.blogspot.com/
طرطشة افكار::سفاح كرموز::

http://meshmesh5000.blogspot.com/
افنان الفنون::استاذ حسنى سليمان::

http://hosny45.blogspot.com/
ahmEd_H::احمد الحداد::

http://ahmedhelmasry.blogspot.com/
TheAlien::بيشوى::

http://alien-besho.blogspot.com/
نظارتي السوداء::شادى فايد::

http://shidwik.blogspot.com/
NonSense:: Ramy Emil::

http://ramyemil.blogspot.com/
حاجه صغنونه.. من غير فذلكه::وينكى::

http://pinsywinsy.blogspot.com/
نجمه فى السما::وينكى::

http://astronomystar.blogspot.com/
daylight::مريم::

http://day-light.blogspot.com/
انا وانا::ابراهيم ..معايا::

http://anaweana.blogspot.com/
حد فاهم حاجه؟::ايلارى ::

http://yme1.blogspot.com/

اصغر مدون - وتحدي::عــيل شــقي

http://3yl-shaky.blogspot.com/

ياقوت

http://yakooot.blogspot.com/
tona5000:: tona::

http://tona5000.blogspot.com/
frozen love::محمد حامد::

http://m-rashed.blogspot.com/
لسعة دبور::اسامة::

http://dabbor.blogspot.com/
مصـ( الخير )ـعب ::مصعب::

http://mos3abof.blogspot.com/
kelma::كلمة::

http://kelmetfagoumy.blogspot.com/
لا تنتظر احدا .. فلن ياتي احد::LAMIA MAHMOUD::

http://lamiaamahmoad4810.blogspot.com/
i a dead man talkin to u from my grave::الهوارى:

http://fromgrave.blogspot.com/
أهلا بك في كوكب الأرض::shady::

http://shadytommy.blogspot.com/
انظر حولك في غضب::إبراهيم::

http://hearttrainer.blogspot.com/
بنت سعد::ايمان سعد::

http://bent-sa3d.blogspot.com/
في عمــــــــق الحيـــــــاه::ادم المصرى::

http://3mkelhyah.blogspot.com/
أنا إللي بالأمر المحال أغتوى::Amira Hassan::

http://amirahass.blogspot.com/
مش فارقة نتكلم::احمد فؤاد::

http://ahmedfouadeldin.blogspot.com/
ليـــــه يا بنفـســـــــــج ..؟::Bassma::

http://bassama.blogspot.com/
يا صبر ايــــــــوب::ايوب::

http://ayoubelmasry.blogspot.com/
Tahyees ..::ايهاب على::

http://ihapology.blogspot.com/
مداراتى::bassem el shazly::

http://madarati.blogspot.com/
أميرة

http://just-amira.blogspot.com/
michealitoo::مايكل::

http://strugglingmichealitoo.blogspot.com/
tigress-diaries

http://tigress-diaries.blogspot.com/
حكاوى اخر الليل:: استاذ احمد شقير::

http://shokeir.blogspot.com/
skylight ::ياسمين::

http://amyasser.blogspot.com/
راسبوتين::ايمن فاروق::

http://raspoutine1.blogspot.com/
The eagles::ايهاب::

http://hoba28.blogspot.com/
NaDoOoOoOoO::نادين::

http://cestmoi-nadine.blogspot.com/

يارب دايما نجتمع على خير على طول

وشكرا مرة تانية للى شرفونا فى هذا اللقاء

انا واخد اسماء المدونيين ومدوناتهم من عند طارق واحد من الناس فليه كل الشكر وكمان ايهاب ايجل اللى عمل المستحيل علشان يجنع اسماء المدونيين

جربت مرة تكون أعمى

معرفش ليه التفكير ده سيطر عليا هل حد فينا فكر مرة انه يغمى عينيه ويقضى يوم كامل وهوا مغمى عينيه

اغلبية الناس هتسأل ليه التفكير ده

هقولكم

فى يوم وانا رايح الشغل قررت اروح بالمترو المهم ركبت من المحطة بتاعتى ووقفت بين الكراسى ووسط الناس لقيت ادامى طفل صغير عمره بتاع 8 سنيين وكان اعمى وكان معاه والده بيوصله للمدرسة لان الطفل ده كان لابس لبس المدرسة بعد كام محطة واحد قاعد ادامهم قام وانا قعدت مكانه اقعدت ابصله وافكر ايه شعورى لاقدر الله لو كنت اتولدت اعمى كنت هاحس بأيه كنت هاحس بالدنيا واتمتع بيها ولا لأ

اقعدت اتكلم مع الطفل ولكرم ربنا بالطفل ده كان ظريف جدا

كل الناس اللى فى المترو قعدت تضحك وتهزر معاه بس كل واحد تيجى محطته يقوم يسلم على الطفل ده وينزل ويسيب الطفل ووالده

انا كمان جت محطتى بس قررت ما انزلش واكمل مع الطفل معرفش ليه حبيت افضل معاه يمكن علشان عمرى ما فكرت ايه شعور الاطفال ديه

يمكن اللى بيتولد ما بيسمعش هنقوا اهه اسمه شايف واللى عايزين نقولهوله هنكتبه وهوا يقراه

واللى مابيكلمش اهوا شايف وبيسمع لكن فعلا اصعب حاجة انك متشوفش

متقدرش تتخيل حتى شكل الشحرة لانه عمره ما شافها حتى العربية او حتى السرير اللى هوا نايم عليه شكل الساندوتش اللى هوا بياكله حتى لو كبر واتجوز ميقدرش يتخيل شكل مراته ايه

حتى ابسط حاجة فى حياته انه يحلم وهوا نايم ميقدرش يحلم لانه ميعرفش شكل اى حاجة

سألت والده هوا بيروح مدرسة ليه

قالى هوا بيتعلم بطريقة برايل وبيحفظ قرأن طبعا والده كان صعبان عليا اوى بيبقى صعب جدا ان يكون عندك ابن ليه نفس الحالة

معندهمش غير هذا الطفل ديه الجملة اللى قالهالى الاب وهوا كان خايف جدا لو مات هوا والام مين اللى هيراعى الطفل ده

مفيش حد

وما أعتقدش ان الجيران ولا حتى الاقارب اليومين دول لسه عندهم الشهامة انها تراعى طفل فى هذه الحالة

اقعدت افكر فعلا نعم ربنا علينا لاتعد ولا تحصى اهمها نعمة النظر

هوا الواحد بيشوف بيها الدنيا بيستمتع بيها يعرف يمشى لواحده مش هيحتاج لحد يعديه الشارع

فضلت افكر فى نعمة النظر وقعدت اشكر ربنا على انه محرمنيش من النعمة ديه

جت المحطة اللى الطفل هينزل فيها قمت معاه ومسكت ايده ونزلت من المترو ووصلته مع باباه لحد المدرسة

اقعدت اتخيل طفل زى ده محروم حتى من اللعب فى الشارع محروم حتى من انه يمشى لوحدة انه يختار هدومه بنفسه انه ينقى اى حاجة يحبها

طول طريق رجوعى من المدرسة للشغل بتاعى قعدت اشكر ربنا على نعمة النظر

ياريت كل اللى يقرا البوست ده يشكر ربنا على نعمة الكثيرة التى انعم بها علينا

رب اعنى على ذكرك وشكرك وحسن عبادتك
امين يارب العالمين

مدونيييين

23/02/2007
هذا التاريخ من احسن الايام فى حياتى اتقابلت مع اصدقائى المدونيين كنا هناك فى قهوة البورصة فى وسط البلد طبعا شكر كبير وتصفيق كبير جدا لياسمين صاحبة مدونة سكاى لايت لان ده اقتراحها وهيا اللى كانت بتنظمه
وبقول لياسمين مين عارف ممكن كمان كام شهر يبقى مؤتمر كبير وتكونى انتى رئيسة المؤتمر
وطبعا اتشرفت بمعرفة ناس كتير جدا ومختلف الاعمار كنت مبسوط جدا ان شرفنا
الاستاذ / حسنى سليمان صاحب مدونة افنان وفنون
استاذ / حسنى فنان عظيم وعنده معلومات كتيرة اوى يعتبر موسوعة متحركة ومحسسناش ان فى فرق سن كبير بينا
وكمان شرفنا استاذ / احمد شقير صاحب مدونة حكاوى اخر الليل وكنا مستمتعين بحديثه معانا وانه بيشجع الشباب الصغير علشان يكتب ويحكى عن نفسه
واخيرا شوفت انجى صاحبة مدونة سمراء النيل اللى لقيتها عارفة كل المدونيين وكل المدونيين بيعزوها جدا
وبعدين شوفت بيشوى صاحب مدونة اليان وبيشوى صاحب فكر عالى اوى يمكن اختلفنا معاه فى شوية نقط بخصوص الحريات لكن يفضل احترامنا ليه على تفكيرة الجميل
ايلارى صاحب مدونة حد فاهم حاجة اللى حكلنا سبب تسمية مدونته بهذا الاسم وهوا شخصية محترمة جدا وهيكون مهندس ناجح ان شاء الله
وايمن راسبوتين المدون اللى اسم مدونته طاغى عليه شوية
واسامة صاحب مدونة الدبور الدكتور اللى جه من الاسماعيلة مخصوص وهوا من الشخصيات الكويسة اوى عيبه الوحيد انه مش بيشجع الاهلى
محمد حامد صاحب مدونة فروزن لاف ده بقى حكاية من الحكايات مهندس وشاعر كبير وعنده فرقة بتغنى اغانيها من تاليفة حاجة كده كبيرة اوى
عمرو احمد صاحب مدونة اريدك انثى مع انه كان اصغر واحد فينا الا انه مثقف جدا وكفايه انه اول واحد صور احداث المجزرة فى كلية تربية عين شمس
مايكل محسن صاحب مدونة ميكليتو اللى يستحق تحية كبيرة علشان قعد ساعة ونصف بيلف علينا فى وسط البلد ومزهقش كل ده علشان يقابلنا
ابراهيم صاحب مدونة انا وانا المؤلف الكبير اللى فرجنا على احدث اصداراته من الكتب وتشرفت بمقابلته
احمد الحداد صاحب مدونة احمد اتش اللى كنت مبسوط بيه جدا على البوست بتاعه بتاع قصر البارون وكانت مفاجأة ليه انى اشوفه والاقيه شاب كويس اوى
وايهاب صاحب مدونة ايجل بردهشاب كويس اوى وكان اكتر واحد مصر على انه ياخد اسماء المدونين كلهمواسماء مدوناتهم

استاذ / حسنى افنان وفنون - ايلارى حد فاهم حاجة

محمد حامد فروزن لاف - خالد صاحب محمد حامد - محمد عادل مصر هى امى - بيشوى اليان
ايهاب ايجل - استاذ / حسنى - ابراهيم انا وانا

ايمن راسبوتين

بجد انا فرحت جدا بكل المدونيين اللى انا شفتهم وكان يوم جميل جدا

ان شاء الله دايما

الاخوان المسلمون 2

اتفقنا فى البوست اللى فات ان الاخوان من حقهم انهم يترشحوا للرئاسة

نيجى للحاجة التانية اللى صحيفة الفجر نشرتها ان الاخوان عندهم شركات وملايين من الجنيهات كانه حرام على اعضاء الاخوان انهم يكون عندهم فلوس او شركات او مشاريع يعنى حلال لرجال الحزب الوطنى واعضاء مجلس الشعب انهم يكون عندهم فلوس وشركات ينهبوا بيها البلد ويتعاملوا مع المصالح الحكومية بالمخالفة للدستور وحرام على الاخوان انهم يعملوا شركات ده حتى الظريف ان جريدة الفجر وهيا بتهاجم الاخوان واوجه انفاق اموالهم انها بتصرفها على الفقرا ومساعدتهم والطلبة المغتربة وتوفير سكن لهم والملازم والكتب الجامعية ومساعدة الفلسطنيين
ايه التهريج ده هوا ده يبقى عيب اليومين دول ده حتى مفروض ان الحكومة تتكسف على دمها مفروض هيا اللى كانت تقوم بالدور ده يعنى حكومتنا لا بترحم ولا بتسيب رحمة ربنا تنزل يعنى لا الحكومة بتساعد الفقرا واما تيجى جماعة الاخوان تساعدهم يقبضوا عليهم والتهمة مساعدة الفقرا
يا اعضاء الحكومة الافاضل
اما الفقر بيدق باب الواحد اول حاجة بيعملها انه يبيع ابنه وبعدين بيبيع لحمة والست بتبيع شرفها عارفين ليه علشان معندهمش حاجة تانية يبيعوها كل ده علشان لقمة العيش اما الجوع بيقرص الواحد وهوا مش لاقى العيش الحاف وبياكل من الزبالة ويلاقى الحكومة مش معبراه وبتدى قروض بالمليارات للحرامية علشان ينهبوها ويلاقى الناحية التانية ناس بتعاملهم كويس وتعطف عليهم وتساعدهم هيعمل ايه هيقول لا دول جماعة محظورة يا عم محظورة مين المهم اكل واعيش
انا بحثت كتير جدا وسالت كتير جدا هل جماعة الاخوان
اتهمت قبل كده انها عملت عمليات ارهابية ضد سياح
اتهمت قبل كده انها كانت سبب فى فتنة طائفية فى اى مكان
اتهمت قبل كده انها حاولت قلب نظام الحكم
اتهمت قبل كده بالرشوة واستغلال النفوذ وسرقة اموال الشعب
كل ده اجابته لا
العمليات الارهابية جماعات اخرى غير الاخوان واعتقد ان الاخوان ادانوا هذه العمليات
الفتنة الطائفية لا برضه محصلش انهم اتهموا باشعال الفتنة الطائفية

قلب نظام الحكم محصلش كل تهمتهم انهم بيعدوا نفسهم لتكوين حزب للترشيح للانتخابات

انا عايز اقول للحكومة انتوا مش اوصياء على الشعب سيبوا الشعب يختار بلاش كلام ان الاخوان خطر على مصر وانهم ضد المسيحين وعايزين يقتلوهم ويدفعوهم الجزية انا الكلام ده عمرى ما سمعتوه الا فى الصحف الحكومية اللى عايزة تشوه صورة الاخوان

عموما لو الاخوان حاولوا يأذوا اى حد من المسيحيين اول ناس هتقف ليهم المصريين المسلميين لان المسيحيين وقفوا كتير جدا يدافعوا عن المسلمين

انا بقول للحكومة حاجة حسنوا صورتكم الاول

وصدقونى الناس هتقف جنبكم

نضفوا الحزب الاول

اللى كل سنة بيخرجلنا حرامى جديد ينهب البلد

وبعدها هاننتخب مرشحيكم خلوا الانتخابات حرة وخلوا مرشحيكم يلتحموا بالناس مش من وراء زجاج العربية اللى هوا جواها ومش حاسس بالناس ولا بمشاكلهم وبعد ما الانتخابات تتزور لمصلحته محدش يشوفه تانى ولا ينفذ اللى وعد بيه

انا قلت فى الاول ان البوست ده مش دفاع عن الاخوان

طبعا الاخوان ليهم اخطاء كتيرة زى الاستعراض العجيب اللى هما عملوة فى جامعة الازهر مع ان الاخوان اعتذروا عنه اهم احسن شوية بيغلطوا وبيعتذروا مع ان الصحف كبرت الموضوع بشكل كبير علشان تكون فرصة للحكومة انها تضرب الاخوان

وزى تصريحات المرشد العام اللى قال انه هيضرب المعارضة بالجزمة

وزى ان الاخوان مش بيحاولوا يقووا علاقتهم بالاقباط صحيح ان كل كلام الاخوان عن الاقباط انهم لهم ما لنا وعليهم ما علينا لكن مبيعملوش خطوات جدية تزيل الشك من قلب اى مصرى سواء كان مسلم او مسيحى مع رفضى للتفرقة بين المسلمين والمسيحيين لان كلنا مصريين

الاخوان ملهمش اى رؤية مستقبلية للاوضاع فى مصر ولا خطط للتنمية وملهمش سبل اقامة علاقات خارجية مع الدول والحكومات ولا كيفية التعامل مع المشاكل الخارجية بسياسة حكيمة يعنى من غير نرفزة ولا نعرات قومية ولا قرارات فجائية غبية تضر بالبلد

مشكلة الاخوان انهم متسرعون وكلنا شفنا ده فى كتير من تصريحاتهم

انا مش من جماعة الاخوان ولكن بحاول اطرح رؤيتى للموقف كشاب

ممكن اكون غلط وممكن اكون صح

لكن التعذيب والسجن والاعتقالات اللى الواحد شايفها بتحصل لافراد الجماعة خلوا الواحد يتعاطف معاهم وسيبكوا من الصحفى اللى كل مهمته انه يشتم فيهم بدون طرح اى رؤية حيادية للموقف

حتى كلام الصحفى ده عن الاخوان مفيهاش اى حاجة تعيبهم محاولة حكم مصر افتكر ان كل واحد فينا وهوا صغير كان نفسه يكون رئيس جمهورية عندهم شركات ومشاريع مش عيب ولا غلط بيرشحوا نفسهم للانتخابات فى مجلس الشعب والنقابات والنوادى ايه المشكلة لو هما وحشين محدش هينتخبهم

انا عايز اقول حاجة اخيرة الناس حبت الاخوان من كتر كرههم فى الحكومة والحزب الوطنى

علشان كده اغلبية الشباب بدءوا يروحوا للاخوان لقوا نفسهم مع الجماعة لان الحزب الوطنى مقفول على ناس معينة واغلب قياداته مش حسنة السمعة

لكن الاخوان عمرنا ما سمعنا ان حد فيهم خد قرض وهرب ولا اغرق عبارة عليها 1500 مصرى وهرب

ولا رفع سعر الحديد واحتكرة ومحدش بيمتلكه غيرة فى مصر ولا هرب اثار البلد برة مصر ولا باع اكياس دم فاسدة ولا سرق اراضى الدولة

بالعكس مكتوب فى صحيفة الفجر ان من ضمن التهم الموجهة للاخوان مساعدة الفقراء

ما هيا بقت تهمة فى مصر دلوقتى

ياريت تفيدونى برايكم ونتناقش فيه

حوار محترم من غير اى تعصب او محاولة فرض راى بالقوة

الاخوان المسلمون 1

هذا البوست ليس هجوما على الاخوان ولا دفاعا عنهم
ولكنه محاولة لطرح وجهة نظر حول الاخوان وياريت تفيدونى برايكم
مبدئيا انا من زمان وانا نفسى اكتب عن جماعة الاخوان المسلمون وزادت رغبتى فى الكتابة بسبب مقال قريتة فى مدونة الزعيمة عن الاخوان ومقال قريته فى جريدة الفجر لكاتب صحفى محبش اكتب اسمه فى مدونتى لانى بكرهه جدا الكاتب ده سخر كتاباته للهجوم على الاخوان وسماهم بروتوكولات الاخوان تشبها ببروتوكولات صهيون
المهم المقالة كانت بتتكلم عن محاولة الاخوان لحكم مصر
انا عايز اقول حاجة
من صغرى وانا كنت بحلم انى اكون رئيس جمهورية مفيش حد مكنش بيحلم انه يكون رئيس جمهورية
يعنى حلم الاخوان فى الحكم حاجة مشروعة بيكفلها الدستور والقانون يعنى من حق اى حد مؤهل وقادر انه يتقدم لحكم الدولة ويدخل الترشيح على الرئاسة يعنى الاخوان معملوش حاجة غلط ولا حاولوا يعملوا انقلاب برغم ان الجيش عمل قبل كده انقلاب يوم 23 يوليو والشعب كله سانده فيها
معنى ان الاخوان بيحاولوا يطوروا نفسهم ويقووا جبهتهم مش عيب لانهم زى اى حد من الاحزاب الوفد او الغد اى حزب نزل فى انتخابات الرئاسة اللى فاتت محدش قال انهم عايزين يستولوا على السلطة
سيبك من كلمة الجماعة المحظورة مش معقولة تبقى جماعة فيها العدد ده كله وكلهم اساتذة جامعة ودكاترة ومهندسين وهيئة عليا ومرشد عام ومساعدين ورجال اعمال وكلهم معروفين بالاسم ونقول فى الاخر انهم جماعة محظورة امال لو كانوا جماعة علنية كانوا هيبقوا ايه
يعنى احنا اتفقنا ان محاولة الاخوان لحكم مصر حق مشروع
زيهم زى اى حد ممكن يترشح للرئاسة وبيئهل نفسه للترشيح وبيقوى جبهته الداخلية ويدعم صفوفة زى ما بيعمل الحزب الوطنى دلوقتى انه بيجمع الشباب ويحاول يضمهم ليه علشان شاف ان الاخوان اغلبيته من الشباب المثقف والحزب الوطنى اغلبيته من العواجيز وطبعا مش مجاله ان احنا نتكلم عن الحزب الوطنى وطهارة ايديهم المعروفة زى ممدوح اسماعيل وهانى سرور واحمد عز وطارق السويسى يعنى بسم الله ما شاء الله كل حرامية البلد فى الحزب الوطنى
بالعكس هتشوف ان الاخوان بيمثلوا شريحة كبيرة فى المجتمع زى رجال اعمال محترمين وده اللى خلا الحكومة فى الفترة الحالية بتحاول تضربهم لانهم اصبحوا قوة اقتصادية كبيرة اوى والناس بتثق فى المعاملة معاهم وهناك ايضا رجال اقتصاد واساتذة جامعة منهم علماء كبار جدا فى كل المجالات
كل ده خلا فئة كبيرة من المجتمع متعاطفة مع الاخوان
يمكن فى ناس كتير تتعاطف معاهم كرها فى الحكومة ( مكتب نظيف لخدمات رجال الاعمال ) الحكومة اللى الواحد مشفش منها اى حاجة كويسة سواء فى التعليم او الصحة حتى الانتخابات الناس كانت بتنتخب مرشح الاخوان كرها فى الحكومة ونكاية فيها
الظلم اللى تعرضلة مرشحين الاخوان فى الانتخابات خصوصا المرحلة الاولى خلا الناس تتعاطف معاهم وطبعا كلنا عارفين شهادة المستشارة نهى الزينى التى شهدت شهادة حق ان الانتخابات فى دمنهور اتزورت لصالح مرشح الحزب الوطنى وكذلك لجنة الدقى اللى نجحت فيها الوزيرة امال عثمان ضد مرشح الاخوان
المهم عايزين نقف وقفة امام ليه الاخوان متغلغلون فى وجدان الناس برغم محاولة الحكومة والصحافة الحكومية لجعلنا نكره الاخوان زى ما صحيفة الفجر نشرت ان لدى الاخوان ملايين وشركات ومشاريع ضخمة

البوست القادم الاخوان المسلمون الجزء الثانى

التاج علينا حق

مساء الخير عليكم جميعا
طبعا بعد التاج الاولانى اللى جالى من بنوتة وسط البلد لقيت تاج تانى بيتحدف عليا من اسراء وماراويتا بقيت مش عارف ايه القصة قولت الاولانى يمكن اهالينا هما اللى عاملينه علشان يعرفوا كل حاجة احنا كنا مخبينها
طب التانى الحكومة هيا اللى عاملاه علشان تعرف شخصيتنا بس بعد كده قولت ايه الغباء ده ما هيا الحكومة عارفانا واحد واحد
ماعلينا متشكرين اوى يا اسراء انتى وماراويتا على الهدية الحلوة ديه مردودالكم فى الافراح ان شاء الله
نبدء نجاوب على الاسئلة اللى كلها اجبارى ولا كأننا فى الثانوية العامة

الاول - ايه اللى هيحصل لايميلك اما تموت

اولا بعد الشر عليا طب الناس تعيش ازاى من غيرى
تانى حاجة اقصدكم انهى ايميل ما انا لامؤاخذة عندى 8 ايميل
عموما هيفضلوا شوية قيمة عشرين سنة وبعدين هيتقفلوا اتوماتك

التانى - اديت الباسوورد لحد قبل كده

لسه متهبلتش للدرجة ديه عمرها ماهتحصل حتى لمراتى بعينها انها تشوف الباسوورد حتى انا مش كاتبهم لان سبعة منهم نفس الباسوورد والتامن الايميل بتاعى فى الشغل
الشركة كلها عارفة الباسوورد بتاعت الكمبيوتر والايميل

التالت - اسمك ايه

محمد بن عادل بن عبد الكريم باشا بن السيد بن سلامة بن تارا بيه والباقى احتار فيه علماء الحفريات والمؤرخييين

الرابع - اسم الدلع المشهور وسط اصحابك

اصحابى مكنوش بيدلعونى
على طول كانوا بيندهولى عادل انتوا عارفيين نص الشعب المصرى اسمه محمد
بنت الجيران الوحيدة اللى كانت بتقولى يا مودى
واللى معايا فى الشركة بيقوللولى يا دودى على اساس دودى الفايد فاكرينه بتاع ديانا ومحدش يقولى اشمعنى دودى لان ده دلع عادل علشان برده كل الشركة بتقولى يا عادل

الخامس - عمرك

تلاتين سنة وشهر و3 ايام

السادس - برجك

بصوا انا مش مؤمن بالابراج خالص بس عموما هما بيقولولى انا انا برج الجدى معرفش حتى كويس ولا وحش

السابع - مجال دراستك

خريج كلية تجارة جامعة عين شمس دفعة 98
دراسات عليا فى الاستثمار والتمويل دفعة 2002
يبقى بشتغل ايه اكيد مش مهندس ولا دكتور
محاااااااااااااااااااااااااااسب فى شركة ملاحة بحرية

التامن - شخصيتك نوعها ايه

انا انسان مش سعيد بطبعى يعنى من زمان وانا انطوائى شوية وبحب العزلة وبحب جدا امشى ابص فى وشوش الناس اللى فى الشارع وبحب امشى على النيل بالليل اوى وابص للنيل ونفسى ارمى نفسى فيه
كنت زمان بتمنى اكون اتولدت عصفورة طايرة طول الوقت بس طبعا مفيش عصفورة وزنها 145 كيلو
بس عموما على حسب المود اللى انا فيه يعنى النهاردة عفاريت الدنيا بتتنطط ادامى علشان روحت لقيت ماما عاملة سمك وانا بكره السمك واحنا عقبالكم بناكل سمك تلات مرات فى الاسبوع زى الدوا كده
بس انا من النوع اللى بيتمنى الخير للناس كلها وممكن ييجى على نفسه كتير علشان خاطر ناس تانيين
الناس بترتحلى بسرعة وبتتكلم معايا فى مواضيع كتيرة وبتاخد رايى فى مشاكلها الشخصية لكن انا للاسف مبعرفش اخد راى حد فى مشاكلى دايما رايى من دماغى بس
وانا عنيد جدا مش بسهولة اعترف ان انا غلطان او انى اغير رايى لكن ادام اهلى وتحكماتهم مبقتنعش بكلامهم فى حاجات كتير لكن غصب عنى كلامهم بيمشى

التاسع - السفر بالنسبة لك

بحبه جدا انا سافرت كتير اوى بس وانا صغير بقالى فترة ما سافرتش بره مصرغير للعمرة فبعوض ده بالسفر لاماكن كتيرة جوه مصر
بس للامانة اكتر حتة سافرتلها ونفسى اروحها كل سنة مكة المكرمة والمدينة المنورة وبالذات المدينة ربنا يكتب للواحد ان يعيش هنالك على طول

العاشر - المود بتاعك

على حسب الحالة اللى عندى يعنى لو الاهلى كسبان ببقى مبسوط جدا ولو روحت مطعم ببقى مبسوط اوى عموما انا كائن حزين وانطوائى سعادتى اما الاقى كتاب جديد أقعد قراه

الحادى عشر - وقت فراغك بتعمل فيه ايه

كنت الاول بقعد اكل وبعد شوية حبيت القراءة اوى اما اشتغلت الحمد لله الشركة مش سايبالى وقت فراغ من اصله
لكن فى الاوقات النادرة انا بقعد على النت واشوف المدونات اللى خدت كل وقتى القليل اللى انا فاضى فيه
وطبعا ما ننساش الاكل الاكل الاكل اهم حاجة عندى فى حياتى

الثانى عشر - الاكلة المفضلة

اى نوع من الاكل انا بحبه انا بعشق حاجة اسمها الاكل بس اكتر حاجة بحبها اكلة اسمها
الكسكسى بس بالطريقة الليبية
المبكبكة ديه اكلة ليبية برده
وبحب جدا كنتاكى

اكتر حاجة بكرهها السمك مبحبوش خالص والمسقعة يعنى لو اتقدمت لواحدة من المدونات تبقى عارفة مش عايزين مشاكل

الثالث عشر - الصفات اللى خدتها من بابا

هوا لو كنت خدت صفات من بابا كنتوا قريتوا الخمس مواقف بتوعى اللى فاتوا
المهم
خدت من بابا
احترام المواعيد
حب القراءة بابا موسوعة متحركة
العند
العصبية
حب الشغل والعمل
ان الراجل يكون متعاون مع مراته فى البيت
احترام الزوجة

الرابع عشر - الصفات اللى خدتها من ماما

الطيبة
الحنية
حب المطبخ والطبيخ على فكرة انا بعرف اطبخ حلو اوى
بتئقمص بسرعة زيها لكن برده بصفى بسرعة زيها
الكلام القليل
حب الناس وحب مساعدتهم

فيه بأه صفة مشتركة خدتها من الاتنين

ان الواحد لازم يحترم البيت والزوج يحترم زوجتة والعكس ومراعاة شعور الاخر
بابا وماما اجمل قصة حب ممكن الواحد يشوفها من ايام الكلية وهما مع بعض حتى الان ربنا يستر عليهم من قركم وحسدكم
اقولكم على حاجة بابا جه فى سنة وسقط فى الكلية وماما نجحت تانى سنة ماما مدخلتش الامتحان علشان تعيد السنة وتبقى معاة اما بابا ينجح
الخامس عشر - اكتر 6 حاجات بحبها

ربنا وسيدنا محمد

اهلى واصحابى والشغل
الاكل الاكل الاكل
النادى الاهلى
المدونة بتاعتى
السيد / حسن نصر الله وحزب الله
النظام والدقة واحترام المواعيد
مساعدة الغير
الجواز مع انى لسة مجربتوش
اكتر من ستة مش كده برده

السادس عشر - اكتر 6 حاجات بكرهها

امريكا واسرائيل
الحكام العرب الخونة والنظام المصرى الرئاسى والتوريث
الخيانة انى ادى ثقتى لحد واكتشف انه ما يستاهلهاش
عدم احترام المواعيد
الظلم والكدب والنفاق
انى اروح عند الميكانيكى الاقى عيل صغير بلية بيشتغل ومش مستمتع بطفولته
حلم كنت بحلمه زمان كل يوم ان ثعبان بيعضنى
السمك السمك

السابع عشر - الشغل بالنسبة لك

كنت زمان بقول امتى اتخرج علشان اشتغل دلوقتى بعد ما اشتغلت بقول نفسى ارجع صغير تانى
اظن الاجابة واضحة بس عموما انا بحب الشغل اوى

الثامن عشر - ايه الكمبيوتر والانترنت بالنسبة ليك

انا من زمان عندى كمبيوتر بس كنت مجرد مستخدم للكمبيوتر مبعرفش فيه كل حياتى عليه العاب وافلام بس ودلوقتى باقعد علية علشان الشغل
اما النت بعد ما عملت المدونة ديه بقى حاجة كبيرة فى حياتى

التاسع عشر - تحب تمرر التاج لمين بعدك

يعنى قصدكم ادبس مين بعدى
ماشى
طبعا صديقى نائل فؤادة اللى قلتلكم ادعوله وانا الكلمة ديه بوجها لباباه صدقنى يا عمى المدونات ديه مش مؤذية خالص ده مكان كل واحد ممكن يطلع اللى جواه ويحكى عن نفسه
زينب شهيدة
نهى بنت النيل
واحد من الناس
هلوسة مصرية

حرام عليكم فضحتونى

الزميلة العزيزة بنوتة من وسط البلد صاحبة مدونة كلام خلاصة ضايقها اوى ان حد فضحها على المدونات وقلها تحكى على خمس مواقف محدش يعرفها غيرها ولانها اتفضحت واتجرست وسط المدونييين فقالت تفضح معاها مدونيين تانيين

ماشى يا بنوتة نستفتح ونبدء نقول الفضايح بس الاول كل واحد يعرف ابويا امانة علية ميقولوش حاجة ماشى يا جماعة

مرفيت الشغالة

وانا لسه فى ابتدائى جيت فى يوم وطلبت من بابا انى اشترى هدوم وكنت لسة شارى هدوم من فترة صغيرة بس لقيت واحد صاحبى شارى هدوم شيك اوى اكتر منى قعدت ازن اد كده على على بابا عايز هدوم عايز هدوم بابا قالى انه معاهوش فلوس طبعا ده علشان يخلص من زنى المهم صدقته بعديها بيومين كنت بتفرج على التليفزيون اللى فى اوضة بابا علشان كان عندنا ضيوف فى الصالة لقيت جنب التلفزيون فلوس كتير مكنتش اعرف يعنى ايه المرتب واول الشهر والقبض المهم قعدت اقول اهه معاه فلوس ومش عايز يجيبلى هدوم طب ودينى لاوريهم طلعت البلكونة وقعدت اقطع الفلوس وارميها من البلكونة طبعا بعد ما الضيوف مشيوا وانا رحت اوضتى سمعت زعيق وضرب نار فى البيت وبابا عمال يزعق المرتب راح فين مين اللى خده طبعا انا بكل براءة قولت معرفش مش انا وطبعا صدقونى ما انا لسه صغير معرفش حاجة المهم العملية لبست فى مرفيت الشغالة عندنا وبقيت هيه الحرامية وعلى بيت ابوها روحت فى نفس اليوم وبابا حلف انها ماتبات فى البيت

طبعا اوعى حد يقولهم فى البيت ومش عايز اقولكم انه كان شهر عدى علينا ازاى كل يوم فول وطعمية

مرفت انا اسف

جارنا العزيز

المرة ديه كنت فى اعدادى واحنا فى اجازة الصيف كانت ماما واخواتى مسافرين وانا اللى كنت قاعد مع بابا فى البيت كنت الخدامة بتاعته طول عمرى غلبان ومظلوم فى بيتنا بابا كان فى الشغل وجالى ناس اصحابى قعدوا معايا طول اليوم وجم وهما ماشيين حبيت اعمل معاهم حركة رجولة وقلتلهم لازم اوصلكم بالعربية ماهو لسه بدرى على ما بابا ييجى من الشغل المهم نزلت اوصلهم وطبعا كان لازم اركن العربية فى نفس المكان بالظبط والمصيبة انى كنت بعرف اسوق لكن مكنتش بعرف اركن العربية المهم وانا باركن خبطت عربية واحد جارنا خبطة جامدة بس عربيتنا الحمد لله ماحصلش فيها حاجة المهم وقفت تاكسى كان ماشى فى الشارع وقولت للسواق يركنلى العربية علشان مش عارف اركن المهم ركنلى العربية فى نفس المكان القديم وغطيتها وطلعت بيتنا ولا كان حاجة حصلت بعد شوية سمعت جارنا واقف يزعق ويشتم فى اللى خبط عربيته ونزلت وقفت معاه وقعدت ازعق انا كمان واقول ناس معندهاش دم وشتايم كل اللى ييجى على بال الواحد

جارى العزيز انا اسف

حفلة شواذ

اول ما دخلت ثانوية عامة طبعا كان الواحد بياخد دروس فى كل المواد وكانت المدرسة بالنسبة لينا مكان نخرج فيه من البيت محدش كان بيهتم يحضر اى حصة ومكانش فيه غياب المهم اتعرفت على واحد معايا فى الفصل كان عايد السنة اسمه اسلام الواد ده هوا سبب فشلى فى الثانوية بعد ماكنت من الاوائل فى المدرسةكنت التالت على المدرسة فى تانية ثانوى اسلام ده علمنى التزويغ من المدرسة كنا بنخرج نفطر الاول عند عم محمد بتاع عربية الفول اللى جنب المدرسة وبعدين نروح سينما الحفلة الصباحية بتاعت المزوغين المهم جه اسلام فى يوم وقالنا ان فيه سينما فى وسط البلد اسمها نيوكورسال طبعا المدونيين الصيع اكيد عارفنها وقالنا ان السينما ديه بتعرض خمس افلام من الساعة 9 الى الساعة 2 والتذكرة بــ 2.5 جنيه بس

رحنا السينما طول ما حنا قاعدين حاسس بحركة غريبة واصوات غريبة بعد اول فيلمين ما خلصوا حبيت اروح الحمام دخلت الحمام لقيت ناس استغفر الله العظيم زى عمنا خالد الصاوى فى فيلم عمارة يعقوبيان كده عينى عينك وقفت وانا مش عارف اعمل ايه من اللى انا شايفه وبعدين لقيت اتنين جايين عايزين يتكلموا معايا وبيحاولوا يتفاوضوا معايا يا نهار اسود ومنيل وطبعا اخوكم حليوة وطول وعرض ووزن كنت ساعتها 130 كيلو طلعت اصرخ فى وسط السينما واقول الحقوا فين ناس ................ ( طبعا النقط كانت شتيمة زبالة اوى ) لقيت السينما كلها بتزعق فيا وتقولى امال انتى جاى هنا ليه يعنى مكنتش تعرف

فوجئت ان احنا الشلة الوحيدة المحترمة اللى فى السينما كلها طبعا كلنا جرينا هوا وخرجنا من السينما الحاجة الوحيدة اللى كانت صعبانة عليا انه ضاع عليا 3 افلام من الخمسة منهم فيلم قدارة بتاع فيفى عبده وطبعا مش عايز اقولكم على اللى احنا عملناه فى اسلام

واوعى حد يقول لبابا لحسن هيقول ما انتى لو مكنتش زوغت كان زمانك دكتور ولا مهندس

انا بعت دمى

ايام ما كنت فى الكلية وديه احلى ايامى وانا فى اولى كلية اتعرفت على شلة بنت ستين فى سبعين وكان افقر واحد او واحدة فيها كان عنده عربية نضيفة اوى وكنت انا طالب جديد وعايز اعيش فى الدور واعمل شلة كبيرة وكان معايا فلوس كتيرة من الفلوس اللى جاتلى اما نجحت فى الثانوية العامة الفلوس ديه كلها خلصت مكملتش شهر وطبعا المصروف الشهرى بتاعى كان بيخلص فى طلعة واحدة مع انه كان كويس اوى وكنت كل شوية اخد فلوس من بابا علشان اشترى كتب الجامعة ومكنتش باشترى اى كتب لغاية ما بقى شكلى وحش وزبالة اوى فى البيت

وانا فى يوم فى الكلية جت عربية بتاعة تبرع بالدم وقالوا انهم هيدوا للى هيتبرع بسكوت وعصير وطبعا رحت جرى اصل انا بعز الاكل اوى اكتر من اى حاجة ومحدش يوزه عقلة ويقول ده مفجوع لحسن ودينى لابهدلة وبعد ما اتبرعت اكتشفت انهم مبيدوش بسكوت وعصير بس لا كمان بيدوا ايصال تروح تاخد بيه كتاب من كتب السنة من المكتبة وكمان خمسين جنيه هييييه هييييه اهى فرجت كتاب وخمسين جنيه اجيب بيه كتاب لمادة تانية وارفع راسى فى بيتنا بعد ما كان كل يوم خناقة فى البيت على الكتب

اوعى حد يقول لبابا

الاخت الفاضلة جى جى

المرة ديه برضة فى الجامعة كنت اتعرفت على بنت بس بصراحة طحن وكنا بنقعد مع بعض كتير اوى جينا فى مرة حبينا نخرج مع بعض طبعا ما كنش ينفع نركب تاكسى لاننا كنا هنخرج بالليل اوى وهنرجع متأخر فرحت عندنا فى البيت وقولتلهم انا عندى فرح اخت واحد صاحبى وعايز اخد العربية علشان هتاخر فى الفرح وخت العربية طبعا قبلها اشتريت منوم لجىجى علشان تحطه لمامتها فى كوباية العصير علشان تنام وتعرف جىجى تخرج من غير ما مامتها تحس

رحت خت جىجى من تحت بيتهم طبعا مالوش لازمة اقولكم كانت لابسة ايه اااااااااه دا انا بتنهد لما بفتكر الايام ديه المهم سألتها تحبى تروحى فين جىجى هانم اقترحت المقطم يا نهار اسود المقطم الساعة 11 بالليل بينى وبينكم خفت قولت تبقى مصيبة وبوليس الاداب يمسكنا هناك طبعا انتوا عارفين المقطم واللى بيحصل هناك

قولتلها مينفعش اقترحت طريق المطار نقعد فيه شوية مش عارف ليه كانت اختياراتها منيلة بستين نيلة كده

رسيت فى الاخر ان احنا رحنا فيلم النوم فى العسل حفلة الميد نيت ( يعنى منتصف الليل للى مش عارف ) الفيلم خلص الساعة 2.3 بالليل فاكرين نيكول سابا فى فيلم التجربة الدنماركية فى مشهد المطار اهى السينما كلها كانت عاملة كده علشان خاطر جىجى وعقبال ما روحتها وروحت بيتنا كانت الساعة 4 الفجر لقيت بابا بيصحى علشان يصلى الفجر فى الجامع ماهوا عقبالكم بابا بيصلى كل الصلوات فى الجامع قعدت احكيله على الفرح والمطربيين والاكل اللى كان فى الفرح

مش عايز اقولكم ان بعديها باسبوعين لقيت واحد صاحبى بيسالنى على مكان الصيدلية اللى جيبت منها المنوم لأم جىجى فسالته ليه قالى انه رايح المقطم هوا وجىجى النهاردة بالليل وكانوا عايزين يجيبوا المنوم لمامتها علشان يعرفوا يخرجوا بالليل

بنت ستين فى سبعين فضحتنى فى الكلية كلها والناس كلها عرفت انى خفت اروح المقطم معاها واكتشفت انها شغالة عليا وعلى اصحابى ويا بخته صاحبى راح معاها المقطم

طبعا ربنا يسامحك لتانى مرة يا بنوتة من وسط البلد فضحتينى ولو سمحتوا محدش يجيب سيرة لبابا لحسن يطين عيشتى واسمع كلمتين من

عينة ما لو كنت فالح فى التعليم كان زمانك مهندس ولا دكتور مع انى بقبض دلوقتى مرتب احسن من المهندس او الدكتور

وزى ما انا اتفضحت ومطلوب منى افضح خمسة غيرى فا انا برشح

1 - نائل فؤادة بس ادعوله ان ربنا يفك الحصار المنزلى اللى عليه دلوقتى

2 - نوارة جبهة التهييس الشعبية

3 - ياسمين SKYLIGHT

4 - مروة ماراويتا

5 - واحد من الناس

6 - نهى بنت النيل

7 - زينب شهيدة