Tuesday, March 4, 2008
قاعدين ليه
فلسطين لبنان طوابير العيش سعر الحديد
ازازة الزيت وحاجات تانية كتير اوى
انا عايز اسأل الحكومة ديه قاعدة ليه
من يومين كنت بشوف جرنال الاهرام فى الصفحة الاولى اتنين ماتوا فى خناقة على طابور العيش وفى جرنال الدستور سعر طن الحديد وصل لستة الاف جنيه وكنت خارج مع ناس اصحابى من العالم اللى اتجننت واتجوزت طول القعدة مكنش ليهم غير كلام عن ازازة الزيت والفاصوليا اللى وصلت تمانية جنيه وكيلو الفول اللى بقى بسبعة جنيه
طبعا مكنش فى وقت نهائى نتكلم عن غزة واللى بيحصل فيها مش عارف ديه خطة من الحكومة ان الواحد يتلهى فى العيشة فى مصر والاسعار اللى بقت مولعة وكلنا شفنا ان المظاهرات قلت جدا فى البلد بسبب غزة وحملة التبرعات مبقتش زى الاول طبعا الحكومة واحمد نظيف واحمد عز فضوا جيوب الشعب تماما الواحد هيتبرع منين ما كل واحد خايف من بكرة وخايف ان مرتبه ممكن بعد كده ميجبش عيش حاف
الناس كلها اتكلمت عن قضية الحضرى اكتر ما اتكلمت عن غزة
الريس قاعد يكرم الناس ويديهم وسام الجمهورية والاعبين بيضحكوا واخواتنا فى غزة بيموتوا
امير دبى يدفع تلاتين مليون جنيه مكافأت ومسمعناش انه دفع حتى ربع جنيه لاطفال غزة
امريكا بتبعت المدمرة كول ادام السواحل اللبنانية علشان تهدد اللبنانين كلهم ومعاهم طبعا سوريا
وبعديها بيوم على طول القوات الاسرائيلية تدك غزة يعنى عملية مدبرة تماما طبعا وقفة المدمرة ادام سواحلنا هتخلى اى واحد يفكر مليون مرة قبل ما يعمل حاجة دا اصلا لو كانوا بيفكروا او عندهم حتى النية انهم يعملوا حاجة
مبقاش عندنا غير ان احنا ندعى لغزة ولينا احنا كمان ان ربنا يرفع عنا البلاء من حكامنا ومن الاسرائليين الاتنيين مع بعض
سامحونا يا اهل غزة
من يومين فى العاشرة مساء كانوا مستضيفيين واحد وكان بيتكلم عن حال العرب قعد طول القعدة بيترحم على ايام عبد الناصر وايام ما كان العرب ليهم عزة وكرامة طبعا انا عارف ان ايام عبد الناصر كان فيها مشاكل كتير ومعتقلات لكن ديه مش قضيتنا الاهم ان المصرى كان محترم فى اى حتة فى العالم
الله يرحمك يا عبد الناصر
الله يرحمك يا صلاح الدين
الله يرحمك يا كل حاكم عربى محترم كان موجود
ربنا يخليك للعرب يا حسن نصر الله
نبيجى بقى للاسعار فى مصر اللى وصلت لمعدلات غريبة عمرنا ما سمعناها وعمرنا ما سمعنا ان حد بيموت فى طابور العيش وعمرنا ما سمعنا ان ازازة الزيت بقت بعشرة جنيه ونصف حرام عليكوا الناس هتعيش منين
الشقق بقت غالية طب الشباب هتجيب شقق منين ويتجوزا ازاى
انا عايز اسأل الحكومة ديه ايه هيا وظيفتها مش انها تعمل لمصلحة الشعب
وزارة زى التضامن الاجتماعى ايه مهمتها اذا كان رغيف العيش مش عارفة توفره
وزارة زى الاستثمار بتعمل ايه غير انها بتبيع البلد والمصيبة ان محدش عارف الفلوس بتروح فين
ممكن اى حد يقولى على اى وزارة وناجحة فى مصر
من الداخلية للخارجية للتجارة للزراعة يا قلبى لا تحزن
مش ناقص غير ان الشعب يطلع فى مظاهرة بيهتف للحكومة
قاعدين ليه ما تقوموا تروحوا
وحياة النبى تحلوا عنا
Subscribe to:
Post Comments (Atom)
19 comments:
اسعار ايه ياراجل وكلام فارغ ايه
دة الراجل الكبير بنفسه اصدر اوامره بحل ازمة الحضري
ارقص يا حضري
ارقص يا مصري
يعني إنت عايز الناس تتظاهر عشان العيش ولا عشان غزة؟
عايز نلم تبرعات للمصريين ولا لغزة وفلسطين؟
إحنا حالنا دلوقتي مبقاش يسمح إننا نساعد حد
أنا رأيي إننا لما نبقي قادرين نعمل حاجة لبلدنا نبقي نفكر ف التانيين
أنا هقول رأيي ف موضوع حسن نصر الله
أنا رأيي إن دا راجل خاين
واحد بيشتغل مع جهات أجنبية ومش فارقة معاه مصلحة بلده وأهلها
لبنان داخل علي حرب أهلية وهو اللي مولع الدنيا
عايز يبقي هو رئيس الجمهورية ولا إيه يعني
البلد بتخرب وهو واقف مبسوط بيتفرج
إحنا إتكلمنا ف موضوع اﻷسعار
ومتهيألي إننا رايحيين فداهية وبسرعة
تحياتي
سلام يا محمد
ازيك
والله انا بضم صوتي لصوتك وبسأل قاعدين ليه
وكإن الموضوع بقى حاجة محببة للناس
الناس حابة كل اللي بيحصل ده فعشان كدة هي ساكتة عليه
ماهو ما فيش تفسير تاني ادامي غير ده
المشكلة ان الحكام العرب بيستعملوا اسلوب التجويع ده من زمان أوي عشان يلهوا الناس عن أي قضية مهمة تانية
يعني بيحموا ضهر أمريكا واسرائيل وأي معتدي بطريقة ممتازة
الله يرحمنا ويسامحنا
وبالنسبة للأخ
the alien
الظاهر هو مش عارف حاجة عن اللي بيحصل هنا فلبنان فياريت ما يتكلمش عن حاجات ما يعرفهاش.. الراجل الخاين اللي بيتكلم عنو هو الراجل الوحيد اللي قدر يرفع راس لاعرب بعد ما مرغت اسرائيل وأمريكا رؤوس كل القادة والزعماء العرب بالتراب وعيشت الشعوب العربية بالخوف والعار
الخاين ده اللي مولع الدنيا مولعها عشان الأطفال اللي بتموت من غير ذنب
ياريت الأخ ما يتكلمش بنفس أسلوب الصهاينة القتلة أو أسلوب أدواتهم وعملاءهم
ده طلبي الوحيد منو
شكرا لانك تحملتني يا محمد
تحياتي
كنت مرة بادى درس لولد كده صغير .. الواد بيقلى احنا بناكل يا ابلة بالدور
يعنى اكل انا النهردة واخويا بكرة وكده يعنى
تفتكر ليه؟؟
انا بضم صوتى لسمير
ارقص يا حضررررى
واتمرقعى واتبهدلى يا مصر كمان وكمان
ويا عادلى سيب كلابك على كلالمصريين
ويا ريس .. ات ريس لشعب من الجعانين
ويا نظيف .. يا كبير حكومة كلها من الساكتيين
ويا وزير التموين .. قلى طريق العيش الحاف منين ...
وبس ...... لا تعليق
اولا الاجابة سهلة مووووت عن السؤال بتاعك ، قاعدين ليه ؟ طبعا عشان احنا سابينهم قاعدين ، بكل بساطة
ثانيا مجرد الجمله اللي انت كاتبها ده ده بتدل على ان عندنا حاجه مش مزبوطه
_________________
عارف ان ايام عبد الناصر كان فيها مشاكل كتير ومعتقلات لكن ديه مش قضيتنا الاهم ان المصرى كان محترم فى اى حتة فى العالم
الله يرحمك يا عبد الناصر
__________________________
ازاي معتقلات وذل وتعذيب وقهر في بلدك وازاي محترمين في اي حتة في العالم
ويعدين جامع عبدالناصر مع صلاح الدين
مش بقولك احنا كشعب عندنا حاجه مش مزبوطه
يعني واحد بيدعي لعبدالناصر وواحد بيقول على نصرالله عميل
وعجبي
انت عارف قاعدين ليه
لان كل حاجه فى مصر عريقه
من اول الفراعنه لنهر النيل
للرئيس
بس الوضع ده مش حيستمر
كفايه ان فى شباب دلوقتى عارف القضيه
واللهى اهلينا ساكتين عنه احنا فى يوم حندافع عنه
ولو مقدرناش دلوقتى لازم نغرز فأجيال جايه قضيتهم
لان جيلنا الحقيقه المحترم فيه طلع بالفطره
و غزه احسن مننا الف مره
على الاقل هما عارفين عدوهم
مش احنا لا نعرف عدو ولا حبيب
احمد سمير
وانت ايه اللى مزعلك ان الراجل الكبير بنفسه تدخل فى ازمة الحضرى مش كل مشاكلنا اتحلت وكل مشاكل العرب اتحلت فمفضلش غير مشكلة الحضرى والراجل لازم يحلها
انت عارف ان الحضرى دلوقتى من ضمن الامن القومى لمصر
اليان
انا مش عايز الناس تتظاهر وخلاص
انا عايز الناس ترجع تانى تشتكى بصوت عالى نحاول نوصل للحكومة ان فى شعب مطحون ان فى امة عربية لازم نقف جنبها
معلش انا مش معاك فى حكاية ان حالنا مبيسمحش نلم نتبرعات لغيرنا لان فى الاساس امن فلسطين واستقرارها من امن مصر فلازم تكون فلسطين فى امن وامان علشان هيا ديه البوابة الشرقية بتاعتنا
وحتى ولو فرضنا ان احنا معندناش امكانيات تبرعات لفلسطين على الاقل نغضب انسانيا من المجازر اللى بتحصل ليهم دا اسرائيل قومت الدنيا كلها علشان حتة عسكرى ملوش اى لازمة عندهم كلب ميسواش حاجة ومع ذلك عملت حرب علشانه واحنا اخواتنا فى فلسطين بيموتوا ومحدش اتحرك نهائى معلش ديه مهزلة من حكامنا
بالنسبة لحسن نصر الله
انا مش معاك خالص الراجل ده بيحب بلده المشكلة ان الحكام العرب بقوا خايفين تماما وبيحاولوا يهدوا اى صورة انسان كويس ممكن يقف ضد طموحاتهم وطبعا امريكا واعلامهما واقتصادها بيحارب حزب الله علشان ده اكبر شوكة فى طريق اسرائيل لكن حكاية انه خاين والكلام ده معلش اعذرنى الكلام ده غلط اما حكاية انه السبب فى حرب اهلية فمعتقدش ان واحد زى السنيورة راجل وطنى وهوا طول الوقت ماشى ورا امريكا وخاضع ليها مش حسن نصر هوا اللى راح جاب المدمرة الامريكية ووقفها ادام السواحل علشان تزود المشاكل اللى فى البلد اما حكاية انه عايز يبقى رئيس جمهورية فا القانون اللبنانى بيدى منصب الرئيس لشخص مسيحى ورئيس الوزراء لشخص مسلم
وهوا لو كان عايز حكم البلد معتقدش ان فى اى قوة فى لبنان ممكن تقف ادامه
تحياتى ليك يا صديقى
شهيدة
هيا مبقتش حاجة محببة للناس بس المشكلة ان السجون عندنا اتملت كتير اوى فبقى كل واحد خايف
طبعا الحكام بيلهوا الناس بطرية غريبة بلقمة العيش واللى يعوزه البيت يحرم على الجامع الكلام الفارغ اللى كنا بنسمعه زمان
بالنسبة لاليان
دا وجهة نظره وعلى حسب ما هوا شايف الموضوع بتاع حسن نصر الله
لكن اعذرينى ان اليان مش عجبه كلام الصهاينة ولاتصرفاتهم لكن يمكن صعبان عليه كمية المشاكل اللى فيها لبنان وان الاعلام بيصور ان حسن نصر الله وحزب الله بيبقى طرف كبير فيها
انا عارف اليان من فترة كبيرة وهوا من الشخصيات اللى لو قعدتى معاها هتحبيها جدا
شهيدة انتى تنورى فى اى وقت واكتبى كل اللى انتى عايزاه
احلام عادية
بالنسبة للاطفال اللى بياكلوا بالدور انا فعلا شوفت اسر الاب والام بيشتغلوا واولادهم بيفطروا بالدور ويمكن كمان مبيشفوش اللحمة الا كل كام شهر مرة
المشكلة ان الريس والحكومة مش فالحين غير فى التصريحات
وزير التجارة كل يومين يطلع بتصريح زى الفل ان معدل النمو زاد والدخل زاد وكلام خايب كتير اوى
المهم انا حاسس بايه المهم انا عارف اوصل لرغيف العيش ولا لأ
هوا دا اللى يفرق معايا مش التصريحات اللى ملهاش لازمة
طب تضحكى على وزير الزراعة اللى رفع اسعار الاسمدة الزراعية 100% طب ليه
علشان تبقى زى السعر العالمى
طب هوا انا بقبض مرتبى زى السعر العالمى
مش عارف الواحد يعمل ايه بجد
فؤادة
احنا مش سايبنهم يقعدوا وكمان يورثوا الحكم ده بمزاجنا
افتكر ان اللى بيتكلم بيروح سويسرا طبعا عارف فين هيا سويسرا
بالنسبة لجمال عبد الناصر
كفاية ان كان فى رمز كفاية ان كان فى واحد العال بيحترمة وبيخافة بيعمله حساب مش زى دلوقتى
تفتكر لو البنت ولا العساكر اللى اتقتلوا على الحدود المصرية الاسرائيلية ايام زمان كان الموضوع هيعدى زى دلوقتى
بعد ما يقتلوا العساكر المصرية تانى يوم من بجاحتهم ييجى رئيس الوزرا بتاعهم واحنا نستقله استقبال الفاتحين وكمان نقول عليه راجل طيب
تفتكر كان يقدروا يعملوها ولو قدروا تفتكر ايام زمان كنا هنسكت
كان عندنا امل
عبد الناصر مات محدش سمع عنه انه سرق فلوس محدش سمع ان اولاده خدوا عمولات ولا رشاوى
مع اعتذارى ليك
الله يرحمك فعلا يا عبد الناصر
رطلين مخ
اول حاجة انتى منورانى
كل حاجة فى مصر عريقة ماشى انا معاكى لكن عريقة بنيلها بأثارها بطيبة اهلها والعرق حافر فى وشوشنا مجرى ليه من كتر الكفاح والشقى
مش معقولة نساوى بين العرق الطيب واللى بيحصل فينا دلوقتى ونقول على الاتنين عريقة
ربنا يسهل والاجيال اللى جاية تكون احسن مننا
الاخ مصر هي امك
اهديج البيت التالي ليعبر عن موظوعك الرائع
نرويكي من دمنا ... تسقينا من سمك
اخر كلام عندنا ... يا مصر كس امك
على فكرة انا ما قصدت اوجه اي اهانة لشخصج الكريم و لكن حبيت اوضح ان مصر لا تشرف اي انسان لتصبح امه
لان المصاروة بعير نبيع و نشتري فيهم
شوف يا محمد
أنا متعاطف مع أهالي غزه بس في الوقت نفسه متغاظ أن الناس تطلع في مظاهرات عشان غزه و لا تتظاهر من أجل البلاوي اللي عندنا...منطق غريب جدا
بالنسبه لحسن نصر الله فده اخر الرجال المحترمين+أحمدي نجاد+هوجو تشافيز
أما الحضري فمش حتكلم عنه تاني لاني لو فتحت حنفيه بيتنا ممكن ألاقي حد نازللي منها بيتكلم عن الحضري
تحياتي لك و واحشني بجد
يا جدعان شوفوا يوم نتلم فيه
اذيك يا محمد ليك وحشة والله
ومع اني كنت داخلة اعلق تعليق هزلي علي الموضوع الحلو ده الا ان في تعليق مستفز عند نرفزني طيب يعني هي الناس هتستفاد ايه من الشتيمة يعني
قلة ادب
المهم مجيلكش في حاجة وحشة تاني ابدا و الله يرحمنا بقي
قاعدين ليه ماتقوموا تروحوا
انا نفسي بجد نعمل حل نطلع في مسيرة كده نبقي فيها بالملاين ماحنا 80 مليون يعني
او نعمل اعتصام كلنا كده في الشارع ومحدش يروح غير لما الحكومه تستقيل او يحلونا مشاكلنا ويبعتوا يجيبوا الفلوس من سويسرا
السلام عليكم
انا باضم صوتي لصوت حضرتك
استقيموا او استقيلوا يرحمكم الله
وربنا على الظالم والمفتري
اتمنى ان نتواصل دائما
الشاعر بن هلال
لنا الله
اكيد هيجى يوم نتحرر فيه يا محمد اكيد
تحياتى
أنت حكيت عن الزيت وكأنو الزيت ثمنو بخيس أحنا البلد ألي بتصدر الزيت وعندنا الزيت بنتمناه الزين الإزازة ب10 دولار
والقلن الكبير 120 ينار
غالي أوي كل كم سنة لما نشوف إزازة من فلسطين طبعا
الأسعار هلا غالية أوي وعندينا مفش حاجة نشتريها حصار زي منتا عارف
أستاذ the alien معك حق الناس مش لازم تعمل شي أحنا الفلسطينية بنعرف ندير أمورنا بنفسينا الحمد الله مش عاوزين مساعدة من حد مش عاوزين إلا فك الحصار ولو ما بدهم يفكوه بنفكو بعزيمتنا وبصبرنا
أستاذthe alienمعك حق
محدش قادر يساعد حالو لما تقدرو تساعدو شعب بيموت همنا الوحيد مش لقمة العيش همنا الوحيد رفع راية لا إله إلا الله ورفع الظلم عنا وعنكم
وألي بيتحكم بغلاء الأسعار أمريكا عملت كدا كرمال تهتمو بالعيش وبس وتنسو أشي أسمو فلسطين وقظية فلسطينية
متقلقوش الفلسطينية معتمدين على حالهم وبس وبنشكركم على كل حال
أها الله وأكبر هلا لسا طلع صاروخين من غزة على أسرائيل وعمال بسمعهم أهو النصر ألي أحنا عايزينو نظل نظرب في أسرائيل مش راح نيأس ولا راح نمل
محمد ألك كل أحترام لكن بجد أحنا محتاجين دعائكم بس
مش أكتر
أخت شهيدة والله والله ألي سبوع ما رحت الجامعة ما في مواصلات وما في كهرب لأنو ما في بنزين يعني ما في وقود يعني نظل من غير تعليم بدي أدور على وسبلة أوصل فيها الجامعة وصلني مسج من الجامعة أنو التعليم راح يستمر رغم الأزمة إلي بنمر فيها
لكن بسيطة أستاذ the alien
بندبر حالنا ولا نطلب مساعدة من حد
كفيت ووفيت
Post a Comment