Wednesday, January 16, 2008

كلكوا عليا ولا ايه


وحشتونى اوى والله العظيم معلش انا عارف انى اتأخرت كتير فى الكتابة والردود على البوست اللى فات بس والله انا مطحون فى الشغل
بطريقة غريبة اوى لدرجة انى بشتغل اكتر من 17 ساعة فى اليوم مش عارف النوم بقى يوحشنى اوى مبقتش اشوفة خالص

المهم

المهم بعد دا كله مش عارف السنة ديه شكلها زى الفل من اولها

طبعا انا من مواليد برج الجدى يعنى مواليد اول السنة والحمد لله وصلت 31 سنة ولسه زى ما انا مفيش اى حاجة جديدة فى حياتى ولا خطبت ولا اتجوزت وشكلها مش باين كمان انها هتحصل السنة دى وبابا طبعا من اول السنة وانا عمال اسمع كلام كل شوية شد حيلك انت ناوى تقعد معانا لحد امتى وكلام من اللى يحرق دم الواحد

نيجى بقى للاهم بعد الطحنة اللى انا فيها من الشغل وطبعا عمال امنى نفسى بقى ان صاحب الشغل هيتعامل معايا بقى معاملة مميزة وهيهتم بيا فى الزيادات السنوية ويمكن بقى المرتب هيتضاعف وخصوصا انى دلوقتى انا بشتغل فى 3 اقسام مختلفة فى وقت واحد يعنى توفير للموظفين فى الشركة ومحدش يقولى ازاى بتشتغل فى 3 اقسام والله ديه الحقيقة فعلا انا بجد بشتغل فى 3 اقسام ملهمش دعوة ببعض لدرجة انى والله وانا نايم ساعات بحلم بالشغل وانى عندى مثلا شغل متاخر عليا يعنى كنت معشم نفسى بالزيادة الكبيرة اللى هاخدها اول السنة وخصوصا انى كل ما اتكلم مع الادارة العليا فى الزيادة لانهم موفرين اتنين موظفين تانيين علشان انا بعمل شغلهم ويبقى الرد الجاهز ان شاء الله اول السنة مرتبك هيتعدل ويزيد زيادة كبيرة متقلقش خالص

وطبعا واحنا شايفين الاسعار عمالة تزيد زيادة غريبة كل يوم





المهم نزلت الزيادات امبارح وانا بكل براءة والضحكة مالية وشى رايح اسأل المدير المالى ها المرتب اضاعف ولا اكتر شوية من الضعف وكانت الصدمة

الزيادة خمسين جنيه

مش بكذب عليكوا خمسين جنيه



مكنش ناقص غير انى اقول كلمة ابيحة ومعتقدش ان القانون كان هيعاقبنى عليها لو قلتها



طبعا جرى على الدور التالت اللى فيه الادارة العليا ورئيس مجلس الادارة والنواب بتوعه ايه يا اخوانا ايه الزيادة ديه لقيت تلات تربع موظفين الشركة واقفين مستنيين دورهم يدخلوا يشتكوا هما كمان



وطبعا دخلت وانا هولع بعد كل الشغل ده والطحن اللى انا فيه وقلة النوم كل ده علشان خاطر الشركة على الاقل احس ان الشركة مقدرة اللى انا بعمله وقعدت اكلمه ان الاسعار بقت غالية جدا فى كل حاجة وان المرتب مبقاش يكفى اى التزامات على الواحد وقلتله الحمد لله انى لسه متجوزتش ولا خلفت

امال يعنى لو كنت متجوز ومخلف كنت هصرف عليهم منين يعنى مش كفاية انى مكنتش بروح بيتنا وكمان مفيش فلوس وطبعا الكلام كان خارج من بقى زى الطلقة مكنتش عارف بقول ايه دا حتى السايس اللى فى الشارع اللى بيركن لينا العربيات ويتصرف يجبلنا اماكن علشان العربية رفع اليومية بتاعته لخمسة جنيه فى اليوم من اول السنة



قلت كل الكلام ده وبالصدفة كنت من يومين رحت اشترى طلبات لماما من السوبرماركت رجعت قولتلها ان الفلوس اللى هيا ادتهالى خلصت ودفعت من معايا كمان طبعا كل الاسعار بقت نار

وكان رده اللى الشركة كلها عرفته
يعنى الحكومة تقلب الدنيا ومطلوب منى انى انا اللى اعدلها
يعنى الحكومة تزود اسعار الحاجة ومطلوب منى انى ازودلكم مرتباتكم بنفس زيادة الاسعار
وانا مالى خلى الحكومة هيا اللى تزود مرتباتكم
يعنى هيا الحكومة كل ما تحب تسرق شوية ترفع الاسعار وبعد كده المطلوب منى انى ارفع المرتبات علشان الحكومة عايزة تسرق

طبعا انا اتخرست ومعرفتش ارد باى حاجة
قطاع خاص ومن حقة انه يتحكم فينا ويعمل اللى هوا عايزة
اما هوا قطاع خاص وبيتحكم فى ماله
امال الحكومة اللى هيا جاية تخدمنا وجاية بفلوسنا بتعمل فينا كده ليه


كلكوا عليا ولا ايه
ابويا وكل شوية عمال يقولى على الجواز
والحكومة والشركة وسايس الجراج والمرتبات والاسعار


انا عايز اسيب البلد ديه واطفش

17 comments:

الساحرة said...

حد يسيب امه ويطفش لما كلنا نمشي امال هما هيضيقوة مين ويسرقوة مين

Amr Ahmed said...

حمد الله علي السلامة يا صديقييييييييييي


نووووووووووووووووووووورت

ياعم ولا يهمك

قدها وقدود

بس انا من رأي الحاج بقي

كفاية عليك كده

عاوزين نحضر فرحك

متغبيش تاني يا باشا

بنوتة من وسط البلد said...

يااااا عييينى يا ضنايا
شايل كل ده فى قلبك وساكت

انا لو مكانك .. ادخل للمدير واقوله اتفضل الخمسين لحلوح بتوعك .. تروح تجيب بيهم بسكويت للعيال فى اديك وانت مروح
ولو مش هيكفوا اكملك انا عليهم


ياراجل دى عالم واطية

انا مرة حصل فيا نفس الموقف .. دخلت لمديري بعدها قولتله ده المشوار من مكتبي لحد الخزنة وقف عليا اغلى من الى اخدته

ما كنتش اخدتهم كان اكرملى .. بدل ما تبقى خى دى قيمتى فى نظركوا

وكانت اخر مرة اكلم مديري .. وبعديها غيرت الشغل على طول
عقباللللللللللللللك

Unknown said...

اهدي بس ياعم

هتطفش وتسيبنا وتروح فين؟

حمدالله علي السلامه بجد

ليك وحشه كبييييييييييييييييره

قومى الى الابد said...

دى من اولها حصار غزة واخرها احتلال مصر باذن الله خلى الناس تفوق من الوهم اللى هيه عايشاه بقى انا عن نفسى ما عنديش مانع لو هو دا الحل

بنوتة من وسط البلد said...

ابقى شوف الرد الى كتبتهولك عندى فى المدونة

انت فين .؟
اوعى تكون دخلت الانعاش .. مالناش واسطة هناك :))

فؤاده said...

بسيطة خالص انا عندي حل لكل اللي انت فيه ده
ميل صغير لكل الناس في الشركة مكتوب فيه
dear all
kindly note below link
واحط اللينك بتاعت الموضوع
وبس الموضوع هيخلص
اوعى تكون فاكرني بهددك ولا حاجه

الرمز

شهيدة said...

سلام

ازيك يا محمد

واخيرا بعد كل الغيبة الطويلة... كنت بدخل عندك المدونة مستنية تكون كاتب حاجة جديدة بس بزعل لما بلاقي الاجازة لسة ما خلصتش

بس بجد حاجة مزعجة جدا ان بعد كل التعب يكون ما فيش تقدير وان الانسان ما ياخدش حقو

ربنا يكون في عونك... بس اهم حاجة انك تفضل في البلد وما تطفش... لازم تكون قدوة :)

وبالنسبة لكلام نائل... ما تاخدش فبالك انا حاسة انو هو بقى لئيم شوية اليومين دول... الظاهر الدنيا معاكسة معاه شوية وعايز يفش خلقو :) بس هو قلبو طيب اكيد مش حيعمل اللي بيقول عليه

المهم دلوقت انك تفضل متواجد وما تغيبش كتير ماشي

وربنا يصبرك بقى


آآآآه صحيح نسيت اقلك... مبروك لمصر :)

تحياتي

Anonymous said...

أخييييييييييرا
حمدلله على سلامتك يا جميل و عود أحمد
قصدى محمد :)

المهم, ما قلنا نكت من زمان
قلتوا: مصر هى أمى
استحمل بقى يا سيدى
انت قدها و قدود
بس بجد يا محمد فكر جديا تشتغل مع ناس تعرف قيمة الناس اللى بتشتغل معاها
علشان احنا كدة بنشجعهم بطريقة غير مباشرة بالتمادى فى استغلالنا
ما ينفعش نتعامل بسمو مع الواطيين
دة يبقى الغباء بعينه

ممكن ما تغيبش تانى من فضلك
ربنا يعينك :))

micheal said...

واحشني جدا جدا يا محمد بد
جمله واحده اللي ممكن أعلق بيها ع البوست ده
ملعون أبو الشغل في البلد دي
تحياتي

إبـراهيم ... said...

الجميل ..محمد

وااااحشن يا رااااجل ، إيه اللي بيحصل ف الدنيا ده كللله

على فكـرة 50 جنيه، أحسن من ما تنقص من مرتبك 100 جنيه، وحد غيرك يفكر إنه يطفـش

تحياتي، وع فكـرة آآآآآسفين ع الغيبة


ي

Ahmad Hegab said...

لا يا راجل !! كنت استخبى كمان 6 او 7 شهور كمان

واحشنى اخر حاجة يا كبير

raspoutine said...

وانا كمان والله يا محمد عايز اطفش واسيبها لكن اعمل ايه بحبها وبموت فيها ومقدرتش ابعد عنها اكتر من كام شهر وكنت هتخنق

Hannoda said...

سيبلنا فرصة نقولك حمد الله ع السلامة بي الأول

ربنا يكون في عون الشباب فعلا
الوضع مش عارفة رايح بينا على فين

و ا لعجيب انك تلاقي ان ماحدش قابل بجوازة في شقة على قدها
ولا حد يوافق لو الارض مش كلها سيراميك و الستاير مش عارفة ايه
ما ينفعش الولاد يدخلوا و قوضة ناقصة لسة ما اتفرشتش

وكان عمر الشباب اتخلق للراحة و الرفاهية مش للتحمل و الصبر

وكإن الراجل أما بيبدأ حياته بيتفتح عليه مال قارون

حاجة غريبة
مش عارفة ليه رغم ان التعليم و الثقافة في بلدنا بتزيد

لكن عقولنا بتعاند


ربنا معاك
هونها تهون

ووكل سنة و انت كطيب

Rania Lelah said...

ما انت بردة غريب حد فى و قطاع خاص يشتغل فى 3 اقسام ؟
و فاكر انهم هيكفوءك بقى
اصحاب الاعمال مش هقول جشعين بس عنهدهم انك حتى لو اشتغلت اليوم بطوله و لا الهوا
لو شلت اكتر من 5 اقسام
برافو عليك هايل
مش هتاخد غير كلام و بس
انما الزيادات اديك شفت
انت موفر عليهم موظفين و لا الهوا فى الاخر
براحة على نفسك
مش معقوله هتعجز بدرى علشان خمسين جنيه
و بالنسبة للطفشان
خليك قاعد هنا
اهو بهدله هنا و لا بهدله بره

تحياتى
و الف مليون حمدلله على السلامة

سيكولوبيا *حكايات من العيادة النفسية said...

البلد دى احسن من غيرها

التميز المثالي للخدمات المنزلية said...




شركة تاج لكشف تسربات المياه بالدمام والخبر 0551844053والقطيف
شركة كشف تسربات المياه بالقطيف
شركة عزل اسطح بالخبر
شركة كشف تسربات المياه بالخبر
شركة كشف تسربات المياه ببقيق
شركة كشف تسربات المياه بالدمام
شركة مكافحة حشرات بسيهات
شركة تنظيف مساجد بالدمام والخبر
شركة كشف تسربات المياه براس تنورة
شركة مكافحة حشرات بتبوك