Thursday, May 31, 2007

هاتوا الفلوس اللى عليكوا

خبر او تحقيق صحفى عجيب قريته فى جريدة الدستور من كام يوم عن فلوس التامينات الاجتماعية

اغرب حاجة فى الخبر ان الحكومة العظيمة بتاعتنا خدت او سحبت او استولت قول زى ما انتى عايز على كام بقى يا سيدى

على 270 مليار جنيه مصرى خدتهم الحكومة من فلوس التامينات الاجتماعية بتاعتنا ومحدش عارف هما راحوا فين ولا اتصرفوا فى ايه

وخدوا بالكوا من الرقم 270 مليار مش مليون يعنى للناس اللى مش بتفهم

المليار يعنى الف مليون يعنى 270 وجنبها تسعة اصفار

يعنى انا موظف بيطلع عينى طول الشهر

والدولة بتاخد من مرتبى 40% تامينات اجتماعية علشان اما الواحد يطلع معاش هيرجعوله تانى

الحكومة مصدقتش خبر فلوس بالعبيط عندها مش تستثمرها ولا تعمل بيهم حاجة مفيدة

طب انا هاموت واعرف الفلوس ديه راحت فين هوا احنا مش من حقنا نسأل برده ما هيا فلوسنا وتعبنا وشقينا فيها

انا مثلا عندى تلاتين سنة يعنى هنقول عقبال اما الواحد وعى على الدنيا وفهمها شوية قول ييجى من خمستاشر عشرين سنة انا بقى مش حاسس ان فى حاجة اتغيرت ولا المواصلات اتصلحت ولا المرتبات زادت ولا حتى الاقتصاد بقى عدل ولا حتى كنا بنحارب وقولنا الفلوس اتصرفت فى الحرب ولا مصانع اتبنت بايد الحكومة ولا فى حتى مشروعات عملاقة اتعملت غير اللهم مشروع توشكى اللى محدش عارف اذا كان كويس ولا لأ


يعنى الحكومة خدت الفلوس وجنبها 17 مليار بتوع الشبكة التالتة وجنبها كام مليار بتوع المصانع اللى اتبنت من ايام عبد الناصر وعزيز صدقى ابو الصناعة المصرية اللى برده الحكومة عمالة تبيع فيهم

انا نفسى اعرف الفلوس ديه راحت فين مش معقول ياخدوا مننا فلوس التامينات علشان يبنوا بيها معتقلات نتسجن فيها

ايه الهنا ده بنتسجن بفلوسنا

يعنى التامينات اجبارية على الموظفين طب مش من حقنا نعرف الفلوس ديه بتروح فين

لو حد ناوى يقولى ديه موارد للدولة وبتدفع بيها فلوس للجيش والداخلية والكلام ده هرجع اقوله امال الضرائب بتتعمل بيها ايه وفلوس المياه والكهربا والتليفونات وكل مصلحة لازم تدفع فيها دم قلبك وكمان مبقاش فى اى حاجة مجانية فى الدولة ولا تعليم ولا صحة كل الفلوس ديه بتروح فين ما هيا كل ديه موارد الدولة ليه بقى ياخدوا فلوسنا بتاعت التامينات والخبر الجديد بقى اللى لسه قارية فى مجلة ان الحكومة ناوية من اول السنة اللى جاية انها تخفض المعاشات 15 % كمان شوفتوا الافترا

ياخدوا فلوسنا ويضيعوها وكمان عايزينا احنا اللى نتحمل غلطتهم


احنا من حقنا نعرف الفلوس ديه راحت فين ولا احنا ملناش حق فى البلد ديه اصلا

78 comments:

esraa said...

انت كمان عايز تعرف الفلوس بتروح فين
ايه الشعب الغريب ده
تسمع عن حاجه اسمها بنزك سويسرا؟
الحكومه بتستثمر الفلوس هناك

فؤاده said...

يا محمد انت كتبت اسم الاغنية غلط
احنا بنغني للحكومة الاغنية كده

خدو الفلوس اللي عليكو

Amr Ahmed said...

شعب حقودي

مش كفاية سايبينكم قاعدين في البلد

وبعدين هنجهز النجل منين

انت بهزر ياعم ياانت

شعب ثرثار

وديني لاقطع عنكم المصروف

ammola said...

يا بنى الف سلامة عليك
ماهى الافكار الوحشة دى اللى جابتلك اكتئاب وكنت عايز تنتحر وكاره الناس
قوم فرفش كده واتبرفن وانزل شم هوا ملوث واتلطع فى كام اشارة مرور وعديلك على كام لجنة من الحلوين وما تنساش تاخد بالك من المطبات وربنا يبعد عنك اكوام الزبالة وما يوقفكش فى طابور حكومى .ليه بس التشاؤم ده ما كل حاجه حلوة اهى وماتنساش وانت راجع تجيبلك كام كيلو خوخ مسرطن وكيلو لحمه ام حمى قلاعية والله انا مش عارفة الشباب جراله ايه بس على طول مش عاجبه حاجة عن اذنك الا بتاع النور والغاز والميه مستنيين اسلمهم المرتب يقسموه على بعض ..طيبين والله

Mohamed A. Ghaffar said...

صح النوم ده موضوع قديم اوى اوى

dyin_soul said...

شفتوا أد ايه في عندنا ديموقراطية
نظيف بيقول ان المدونين بيكتبوا بحرية و مفيش اي قمع فكري خالص و عصر مبارك هو اكتر عصر الناس اخدت فيه حرية فكرية
و اهو واحد بيتطاول و بيسأل الحكومة بتودي الفلوس فين

طيب نعمل ايه في الطبقة الحاقدة من الشعب دي

reri said...

وإنت مالك يا محمد
من تدخل في ما لا يعنيه سمع ما لا يرضيه
يا عم كل واحد حر في فلوسه
وبعدين إنت عايز كمان الحكومه تبني المعتقلات من قلبها
ما هي لازم تبنيها من قلب الناس
هي الحكومه هي اللي هتتهني بيها وفيها
مش إحنا اللي بنستفيد يبقي إحنا اللي ندفع
أما ناس عجيبه
وبتسأل في حاجات عجيبه صحيح

شعب زباله ومش مقدر النعمه

مفيش سلاماااااااااااات
مادام بتسأل في حاجات ما تخصكش
:))))

ياسر سليم said...

نتشرف بدعوة سيادتكم والأسرة الكريمة لحضور إفتتاح المدونة الصاعدة بإذن الله .. كلماتى .. والعاقبة عندكم فى المسرات ..
حضروكم يسرنا ..
ودخانكم يضرنا ..

The Alien said...

إنت بتسأل وبتجاوب ف نفس ذات الوقت
الفلوس اللي بتتاخد منك
بيتبني بيها سجون ومعتقالات لينا ولولادنا
إنت عارف إن عدد السكان بيزيد
والسجون بعد كام سنة مش هتكفينا
دا مشروع كبير ومحتاج مصاريف كتيرة
ولازم أنا وإنت اللي ندفع
أمال يعني عايزهم يبنولك معتقل ببلاش

أنا كل أول شهر أفتكر الموضوع دا
لما ألاقي المرتب ناقص
ضرايب علي تأمينات

تحياتي

Hannoda said...

لا يا محمد
إحنا مابقاش لينا أي حق في البلد ده و ده شيء واضح جدا و باين للأعمى

إحنا محطوطين في زواية اللي مش عاجبه يخبط راسه في الحيط

حتى لو قلنا حانعمل مظاهرات.. إضراب.. مع نفسناااا خالص

بيسوو said...

لا متحاولش...تسمع الناس دايما تقلك الداخل عنده مفقود والخارج منه مولود..هي دي بقى حكومتنا الرشيدة..بس اوعى تقول لحد اني قلت لحسن اروح كلابوش ويبقى ذنبي في رقبتك

تعرف بقى انا حاسة بأيه..ان الفلوس دي تمن نسبة الديمئراطية الرهيبة وحرية الرأي الي مالية البلد..ولا يمكن هيدوها لضحايا العبارة بس بيحوشوها ليهم علشان مش يصرفوها على حاجات تافهة...تقدر تقول كدة ان الحكومة بتلعب دور الام الناصحة
انا رغيت كتير..مش كدة
بس نصيحة مني متسألش ومتستغربش لحسن تتعب ولا حاجة لاسمح الله

شهيدة said...

سلام يا محمد

لما كنت بحاول أجاوب على أسئلتك الاستفهامية

فكرتني بمقطع من فيلم "ظرف طارق؟ لأحمد حلمي لما بيروح عند سارة البيت وبيحاول يكلمها

وبيستناها طول النهار

وفي الآخر بيوصل لنتيجة ان في حفرة بالأوضة عند سارة بلعت سارة وأمها

عارفة ان تشبيهي بايخ

لكن فكر معاي شوية مش يمكن عندكم في البلد حفرة عجيبو بتاخد الفلوس وما بترجعهاش تاني؟؟

الظاهر الحفرة دي موجودة في كل بلد عربي

هههههه


يللا كلو الى زوال

تحياتي

micheal said...

خالتي سويسرا بتسلم عليك
تحياتي لك

whyme said...

للاسف الكلام ده صح بالاضافه الى 23 مليار ديون خارجيه

البلد خلاص على حافه الهاويه و شويه تانى و تبتدى تتكشف لما الناس متلقيش تقبض معاشها
احنا بجد يا صديقى فى كارثه كبيره و مش حاسيين بيها و محدش عارف الايام الى جايه مخبيه ايه

تحياتى و عايز اشوفك قريب يا كبير و شكراً على ايملاتك الرائعه و شكراً على سؤالك عليا
تحياتى
واحد مديون من غير ذنب
غير انه عايش فى مصر

zoro said...

الاخ الغالى
تحية طيبة . بخصوص موضوع التأمينات الاجتماعية احب اعرف سيادتكم ان هذا وضع طبيعى فى ظل وجود الحكومة المهلبية وده نوع من انواع الحكومات التى استحدثن فى مصر بعد ما جربنا الاشتراكية والديمقراطية واثبتت الايام فشل هذين النظامين فأستطاع رئيسنا الحبيب ان ينشأ نظاما جديدا اسمه حكومة المهلبية الذى من اهم دعائمه هلب وقلب واديها طناش وظبط المسائل واستطاعت حكومة المهلبية ان تثبت نجاحها طوال ستة وعشرون عاما
يا شعب اهبل وبريالة ساكتين ومش عاجبين مسروقين ومسجونين وبرده ساكتين اتفوو

sokoothansawat said...

هتزعل الحكومة منك لييييه يا محمد...انت يا حبيبي لسة خارج من اكتئاب...و جاي تتكلم عن حقك...حق ايه يا بو حق...الحق ده انت ضيعتة من زمان..فاكر لما الشعب لعب فورة كونكان مع الحكومة...وبعدين حد خبيث نميس..حط في الشاي بتاع الشعب...قرص فوار..خلاة ميركزش في الماتش..وخسر الفورة...طيب لما انتو مالكوش في اللعب بتلعبوا ليه..خلاص بقى...الدول خلص..واللعب دلوقتي بقى مع الحكومة..روح يا شاطر اغسل وشك كده...واتفرجلك على فيلم اجنبي على ام بي سي تو...ولا كليب لطيف للاخت الفاضلة هيفا على قناة مولودي المحترمة...وانسا الأفكار الشريرة دي خالص

bastokka طهقانة said...

مسروق يا ولدي مسروق

راحت فين؟؟
راحت مرينا حتصيف و ترجع



اوروفوار

Anonymous said...

والله ضحكت لما قريت الكلام ده عارف ليه لان ده نفس التفكير الي فكرته بس في حاجة تانية خالص
الرئيس في مؤتمر شرم الشيخ اتنازل عن 800 مليون دولار للعراق بما يوزاي 11.1 مليون دولار لكل مواطن بأعتبار ان تعداد مصر هو 72 مليون المبالغ لحد دلوقتي بالدولار وقبل ما حد يرد عليه يقولي القومية العربية والكلام الي مش بحبه لان الي يحتاجه البيت يحرم علي الجامع الفلوس دي هي ديون الجيش الامريكي نتيجة استلام صواريخ مضادة للصواريخ ارض ارض تدعي فيكتوريا بالاضافة لرسوم مرور ناقلات الجنود والقطع الحربية من قناة السويس يعني دي ديون علي امريكا مش العراق نرجع بقا لفلوسنا اه فلوسنا لان الحكومة واخدة الفلوس دي من الضرايب الي هي مال الشعب
لو حولنا ال 11.1 مليون جنيه لما يوازيها بالمصري بسعر الدولار الحالي 5.71 يكون نصيب كل فرد هو وببساطة 63 مليون و 800 الف جنيه يعني لافقر ولا جوع ولا مرض وخدمات في دول الخليج ولا شحاته قدام السيدة ولا بطالة ولا تلوث ولا امراض ولا اي حاجة تقريبا 90 في المية من مشاكل البلد

كبير المتشردين said...

والله ضحكت لما قريت الكلام ده عارف ليه لان ده نفس التفكير الي فكرته بس في حاجة تانية خالص
الرئيس في مؤتمر شرم الشيخ اتنازل عن 800 مليون دولار للعراق بما يوزاي 11.1 مليون دولار لكل مواطن بأعتبار ان تعداد مصر هو 72 مليون المبالغ لحد دلوقتي بالدولار وقبل ما حد يرد عليه يقولي القومية العربية والكلام الي مش بحبه لان الي يحتاجه البيت يحرم علي الجامع الفلوس دي هي ديون الجيش الامريكي نتيجة استلام صواريخ مضادة للصواريخ ارض ارض تدعي فيكتوريا بالاضافة لرسوم مرور ناقلات الجنود والقطع الحربية من قناة السويس يعني دي ديون علي امريكا مش العراق نرجع بقا لفلوسنا اه فلوسنا لان الحكومة واخدة الفلوس دي من الضرايب الي هي مال الشعب
لو حولنا ال 11.1 مليون جنيه لما يوازيها بالمصري بسعر الدولار الحالي 5.71 يكون نصيب كل فرد هو وببساطة 63 مليون و 800 الف جنيه يعني لافقر ولا جوع ولا مرض وخدمات في دول الخليج ولا شحاته قدام السيدة ولا بطالة ولا تلوث ولا امراض ولا اي حاجة تقريبا 90 في المية من مشاكل الب

الزعيـمة said...

محمد صباح الخير

مش مكسوف وانت بتسال الحكومة خدت الفلوس ووديتها فين ؟

شوف الشعب الناكر للجميل ياساتر
يا عم مش بتشرب مية اهه ببلاش؟
حتقولى بدفع تمنها اقولك لا ياعم
انت بتدفع تمن المية لكن الحكومة بتضيفلك ملوثات واتربة وعوادم ومخلفات
دفعت تمنها؟ اوعي تقول اه .. ازعل كدا

طب انت مش بتتنفس هوا ؟
اوعي تقول بدفع تمنة دا كمان
انت بتتنفس هوا مليان حديد ورصاص وتراب وخلافة .. شوف باة يسوا كام

مش بتاكل عيش مدعم ؟
حتقولى لا يا ستي انا باكل عيش ابو ربع جنية حقولك ومالة بس الحكومة دعمتلك عيش انت مش بتكلة مش مشكلة الحكومة باه هي عملت العليها وخلاص

عيبكم يا شعب بتنسوا افضال الحكومة
وبعدين متنساش انك بتمشي فى شوارع الحكومة محسبتكش عليها صح ولا لاء؟

ومتنساش كمان ان الشمس البتطلع تنشفلك الغسيل والقمر البيطلع ينورلك الليل والنجوم البتعد تتسلي وتعدها الحكومة موفرهالك مجانا

صحيح شعب مفتري

بقولك اية يا محمد
والنبي لو عرفت التامينات البتتخصم من مرتبك بتروح فين ولية ابقي قولى

اصل انا استويت خصومات من تامينات لكسب عمل لمعرفش شريحة اية


تحياتي لك

جبهة التهييس الشعبية said...

اه ياما اه واه يابا

ده عيلة واطية ونصابة

والليلة جينا نهنيكوا


هاتوا الفلوس اللي عليكوااااااااا

بص احنا نعمله النشيد الوطني

احسن من بلادي بلادي بكتير

أميرة البلطجية said...

لا مش حقك تسأل الفلوس بتروح فين...لأن اولا فيه ناس احق مني ومنك بيخدوا جزء من الفلوس نظير مجوداتهم الجبارة للبلد...يعني كتر خيرهم بيديروا البلد حتى وهم في مارينا -لأ مارينه ايه- مش مهم يعني..ايا ما كانوا...فا...دي ناس بتتعب عشان البلد ودول ال
top management
اسيادك واسيادنا كلنا من حقهم ياخدوا الفلوس ويقسموها بنهم..امال يا بني هي السيادة دي ببلاش
وبعد متناسش ان احنا بلد اعلامي كبيييير..يعني لازم نصرف على المدينة الاعلامية والاقمار الصناعية وحفلة جان ميشيل جار وخلافه...انما بقي تقولي مستشفيات ومدارس.. حاجة سوفاج خالص..يا ابني البلد لازم تنضف شوية ومش حتنضف من غير اعلام "متميز" وانت عارف بقي اعلامنا متميز ازاي
شفت بقي ان الفلوس فعلا فعلا بتروح في حتت كويس وان انت اللي مواطن مش عارف مصلحته؟
صحيح..اللي ميعرفش يقول عدس

Egypt Rose said...

احلى حاجة في البلوج هو اسمه .. مصر .. وانا من عشاق مصر ومن سكانها الاصليين بحبها جداً وشايفة ان فيه ناس مبتحبهاش علشان هم مش من سكانها الاصليين .. بمعني فيه ناس نازحة من الخليج و ناس جاية من ايران وناس من افغانستان و ناس و ناس .. وهم المشوهين لمصر .. اما نحن السكان الاصلبين نحمل كل الحب لمصر وبنتوجع على احوالها و عيزنها تتغير وترجع مصر ولن يحدث ذلك اللى كما يقول اللبنانيين .. حلو عنا بدنا نعيش احنا مش تعيشولنا انتم.. اللى ما بيحبش مصر وشايفها مش كويسة ومعندهوش رغبة يحل عنا ويسبنا نصلحها بمعرفتنا احنا احبائها .. مصر احلى بلد في الدنا بس البشر الذي يعيش بها و يطلق على نفسه مصريين لانها على ارضها ليسو مصريين بالمرة .. المصريين الاصليين هم اللى عملوا ثورة 19 وعدلو الدستور كما يريدون هم مش يمر مرور الكرام ومحدش فاهم ما هم مش مصريين علشان يفهموا .. مصر هي البنات اللى بتتعلم في احسن جامعات امريكا و روسيا واوروبا مثقفات ومتحررات .. الشباب الثورجي المثقف .. المسائلة هى اول الطريق وكدة انت مصر من السكان الاصليين مش الوافدين .. والتغيير لازم يكون من القاعدة وليس من القمة مثل جميع حركات التحرير و التغيير

ibn nasser - ابن ناصر said...

ههههههههه فلووس ..يعني ايه فلوس
تحياتي

مصر هى أمى said...

اسراء

اه بعد اذنك انا ايز اعرف الفلوس بتروح فين
بس مش كل الفلوس انا عايز اعرف اللى بتتخصم منى بتروح فين لو بتروح بنوك سويسرا عايز الفوايد لو سمحتوا

حقى بقى

مصر هى أمى said...

فؤادة

ما هيا الحكومة واخدانا واخدة فلوسنا معاها

مش مستنيانا نغنيها خالص

ماشى يا عم الرمز

مصر هى أمى said...

يا نهار اسود
انتوا ناويين تجهزوا النجل ب270 مليار
ليه هوا هيتجوز كل بنات العالم ولا ايه

مصر هى أمى said...

امولة


تصدقى كل اللى انتى قولتيه فعلا انا مش واخد بالى منه
اتارى الحكومة مهنيانا واحنا مش حاسيين
ربنا يخليكى نورتيلى طريقى وعرفتى النعم اللى الحكومة مديهالنا

مصر هى أمى said...

محمد عبد الفغار

والله انا لسه قاريه قبل ما اكتب البوست بيومين بس
مكنتش اعرف انه قديم اولا كده

مصر هى أمى said...

قلب يحترق


تصدقى اول مرة اعرف انى علشان سألت سؤال اكون طبقة حاقدة

امال لو كنت طلعت فى مظاهرة هاكون ايه عايز اقلب نظام الحكم

ربنا يخليلا نظيف انا برده شفت التصريح ده وضحكت جدا اما قريته هوا قاله فى مؤتمر فى اسكندرية الظاهر ان هوا اسكندرية كان حلو اوى

مصر هى أمى said...

ريرى

انا مالى
ليه هيا الهانم مش بيتخصم منها برده تامينات ولا انتى عاملة واسطة مع الحكومة

اما بخصوص الفنادق والمنتجعات السياحية اللى الحكومة بتبنيها بفلوسنا
يا ستى انا مش عايز اصيف عند الحكومة يدونى فلوسى وانا اصيف واشتى بمعرفتى
اصل بصراحة بينى وبينك مش متعود على نضافة السجون المصرية
هتقولى ايه بقى وش فقر هنعمل ايه

مصر هى أمى said...

ياسر سليم

متشكرين على الدعوة الكريمة ديه

جهز انت بس البوفيه واحنا جايين كلنا ومعانا الاخزة بتوع امن الدولة كمان لزوم التعارف المبدئى

مصر هى أمى said...

اليان

انتى بتحسسنى انه مشروع قومى لازم كلنا نساهم فيه زى حفر قناة السويس كده الشعب كله ساهم فيه
كمان بناء المعتقلات لينا ولولادنا مشروع قومى لازم كلنا ندفع تمنه

طب ما امريكا تساهم معانا مش هيا بتبعت المعتقلين بتوعها يتعذبوا عندنا يبقى لازم تدفع الايجار وكمان بالدولار اه مش معتقلين اجانب بقى

اول كل شهر بس بتزعل على الخصومات طيب مقدرو عليها هنقبضك بعد كده يوم عشرة فى الشهر وانت مش هتحس باول الشهر خالص

مصر هى أمى said...

هنودة

انتى فعلا عندك حق احنا بقينا مواطنيين درجة عاشرة
الظاهر ان الحكومة هتتعامل معانا بعد كده بصفة احمدوا ربنا ان احنا سايبنكواتعيشوا

مصر هى أمى said...

بيسووو

متخافيش مش هقول لحد انك شتمتى الحكومة وقولتى عليها حرامية وبتاخد فلوسنا ومبترجعهاش
السر ده بينى وبينك بس


بس حلوة اوى الحكومة بتحوشها لضحايا العبارة علشان ميصرفوهاش فى حاجات تافهة الميزة فى مصر ان الحكومة بتتعامل معانا على اساس ان هيا الوحيدة اللى بتفهم والشعب كله غبى

مش عارف مصلحته فين

انتى ترغى براحتك يا ست هانم البيت بيتك

مصر هى أمى said...

شهيدة

طبعا انا مفهمتش الكومنت فى الاول لكن بعد كده اما كملته للاخر فهمته والله ممكن فعلا تكون الحكومة عاملة حفرة بتاخد الفلوس بتاعتنا

بس تفتكرى الحفرة ديه بتوصل على انهر بدروم

هوا ده السؤال

مصر هى أمى said...

مايكل

طب ممكن خالتك سويسرا تتبنانى لو ينفع

مصر هى أمى said...

whyme

شوف بقى يا صديقى 23 مليار دولار ديون خارجية يعنى بتاع 120 مليار جنيه
وكمان 270 مليار فلوس تامينات وغير الحاجات التانية
الفلوس ديه تعمل بلد من اول وجديد
والله العظيم اللى بيتعمل فينا ده حرام فعلا

احنا فعلا على حافة كارثة وربنا يستر


وانا كمان والله نفسى اشوفك حدد انت يوم بس ونتقابل يا صديقى العزيز

ahmEd_H said...

حبيب قلبى

واحشنى والله
أعذرنى فى التأخير على الرد على موضوعاتك بس والله مكنش عندى وقت علشان افكر انى أهرش اساسا


بالنسبة للموضوع المطروح امامنا اليوم انا شايف او اعتقد ان الحكومة بتثتمر اموالنا فى تجارة المخدرات و ربنا يجعلة عامر

فبركة said...

عيب يا ولد اللى انت بتقوله ده
مستقبلنا فى أيد أمينة
وعليك استغفار الله والصلاة ليلا ونهارا على هذه الغلطة الرهيبة فى حق كبار البلد
أنت مش بتقرى قرآن واللا أيه
وأطيعوا الله والرسول وأولى الأمر منكم

كان ما سبق نقلا عن الشيخ الموقر دكتور طنطاوى شيخ الأزهر
ههههههههههههههههه

Rania said...

شعارنا يا محمد
لا ارى لا اسمع لا اتكلم
و ادم انت اتكلمت يبقى لازم يقام عليك الحد
تحياتى
سيبك يا محمد و متسالش

مصر هى أمى said...

zoro

فتحيا حكومة المهلبية

كلامك كله فعلا صح
بس انا مش مواقثك على اتفوو اللى فى الاخر ديه
احنا مبقناش نقدر نتكلم السجون اتملت معتقلين والحكومة ناوية تبنى سجون جديدة فكل واحد خايف انه يبقى من نزلاء السجون الجديدة

مصر هى أمى said...

سكوت هنصوت

تصدقى الحكومة ديه تجيب اكتئاب وتخلى الواحد فعلا عايز ينتحر

سعادتك ديه كانت حاجة صفرا اللى شربوها للشعب ولسه شاربنها لغايو دلوقتى

هوا حد يقدر يلعب مع الحكومة برده

مصر هى أمى said...

طهقانة

طب ممكن تاخدنا معاها مارينا حتى بفلوسنا اللى هيا رايحة بيها

مصر هى أمى said...

انونومنس

اولا انا مش موافق على كلامك لان مش ممكن امريكا تكون عليها فلوس لان البلد بلدها يعنى تعدى من القناة محدش يقدر يتكلم انت لو معدى من اوضة لاوضة فى بيتكوا بتدفع رسوم لحد
لا طبعا بردة امريكا هيا رايحة من ولاية امريكا الى ولاية تانية اسمها العراق مرورا بولاية مصر
عادى يعنى

ثم انت بتقسم الفلوس ليه
هيا كانت بتاعتنا اصلا احنا مجرد ضيوف فى البلد ديه

مصر هى أمى said...

كبير المتشردين

معلش يا كبير رديت عليك با انونومنس والله مكنتش عارف ان سعادتك اللى كاتب الكومنت الاولانى

مصر هى أمى said...

الزعيمة

تصدقى انا بعد ما قريت الكومنت بتاعك قولت دا انا عيل قليل الادب فعلا حد يسال الحكومة برده
دا انا فى بيتنا مقدرش اسال ابويا بيودى المرتب فين اقوم اسال الحكومة نفسها
بس ابويا عهرم ما خد منى فلوس ولا حتى قالى هات تمن اكلك وشربك ونومتك ولا هات 40 % من المرتب بتاعك

اما بالنسبة للهوا الملوث والمية الملوثة والاكل المسرطن وكل حاجة زى الفل فديه خطة حكومية علشان نتعذب فى الدنيا فمنتعذبش فى الاخرة لان احنا هناخد ثواب كبير اوى
مش الثواب على قدر المشقة
وهوا فى مشقة اكبر من اللى احنا فيها

صدقينى لو عرفت الفلوس بتروح فيه هقولك على طول
بس حد يعبرنى ويقولى

مصر هى أمى said...

جبهة التهييس الشعبية

ديه عيلة واطية ونصابة
يبقى النشيد الوطنى للشعب المطحون

ومالة انا موافق بس مين الجدع اللى هيشلنى وانا بغنى النشيد ده


ملحوطة صغيرة للى عنده النية انه يشلنى انا وزنى 145 كيلو

مصر هى أمى said...

اميرة البلطجية

ياااااااه كل الحتت النضيفة ديه والتوب منجمنت كل دول بياخدوا فلوسنا علشان يديروا البلد
طب تصدقى ان 270 مليار جنيه قليل عليهم
المفروض ياخدوا اكتر
كتر خيرهم والله بيتعبوا علشان يسرقوا البلد المفروض ان احنا اللى نديهم الفلوس جاهزة

مصر هى أمى said...

Egypt Rose

والله البد ديه حلوة اوى بسكانها بارضها بشعبها بكل حاجة فيها

نفسى فعلا التغيير يحصل ربنا يسهل ان شاء الله

مصر هى أمى said...

ابن ناصر

الفلوس يعنى
money

ولا الاستاذ مش بياخد مصروف اليومين دول خلاص يا سيدى اما تكبر وتشتغل وتلاقيهم بيخصموا بتاع نص مرتبك هتعرف يعنى ايه فلوس

مصر هى أمى said...

احمد حداد

انت كمان واحشنى جدا والله

الحكومة بتسثمر فى تجارة المخدرات
طب المخدرات بتكسب المكسب راح فين بقى

frozen love said...

2alak bntsgn bflosna..tsd2 m3ak 72 ya m7md wlahy...ll2sf m3ak 72

shklha kda hanet ya abo 7med...we htboz khals 2orayb 3shan tt3dl b2a

we bmnasbt bnok swiss shoft 7war ragl el23mal bta3 750000000 $ we elmhzla ely e7na feha

w7ashny gdan 3la fkra we ashofak 3la kher isa

أمـــاني said...

يابني أنا كل ما آجي ألاقيك قاعد تحرق في دمك و تتخانق مع نفسك...إهدى شويه...لحسن تتقطع أخبارك عنا...بفلوسك برضه
;)

هــيـبـاتـيـا said...

لاسباب تقنية تغير عنوان المدونة
من الغد تواصل هيباتيا الكتابة في موضوع : الله .. النص ... البشر
http://hypatia-theu.blogspot.com

شـــــهــــروزة said...

معقول انت متعرفش فلوس المعاشات والتأمينات الاجتماعية راحت فين؟؟؟

لو تابعت عاتشيف عبيد لما كان ماسك الحكومة قبل ما يجيب ضورفها عالجنط
فى جلسات مجلس الشعب
كنت عرفت الفلوس راحت فين يا ولدى

فلوس التأمينات والمعاشات كمانت هى المنقذ الأخير للمضاربة بيهم فى البورصة وانعاش السوق الاقتصادى فى مصر

والله العظيم زى ما بأقولك

وكان نواب المعارضة والاخوان رغم قلتهم فى المجلس وقتها فى قمة المعارضة والشراسة فى مواجهة الخطة الحقيرة بتاعته دى

لكن للأسف
كالعادة فى طبخ القوانين والاستجوابات
قام قراله كلمتين فى المايك

وسرور كان عنده الأوامر بالتمرير
واللى حصل حصل

تمت المضاربة بفلوس المعاشات والتأمينات وأموال الأرامل واليتامى والشيوخ والعاجزين فى يد الحكومة وتتلاعب بها فى بورصتها

وبعدها بشهر


البورصة حصل لها انهيار تام

أدت الى النزول بأسهم الشركة المصرية للاتصالات لرفع قيمتها فى التداولات والتعاملات المالية

وبرضة فشلت الخطة



واقرا الفاتحة على روح فلوس التأمينات والمعاشات

واهو اللى بيقبض معاش بيبقا مقصوص من مكان تانى
وأهو من دقنه وأفتل له

مش بتاخد بالك من هوجة الغرامات ومخالفات السير على الميكروباصات والملاكى وكل وساءل النقل سواء عملوا مخالفة أو معملوش؟؟؟
ولاّ المحضر أبو 7آلاف جنية لأى مخبز آلى حتى لو كانت بالبلا ومش حقيقية؟؟؟

دى أحد أفرع القص واللزق
لما الخزنة بتفضا يا ابنى

يملوها من دمنا ولحمنا الحى تانى

تحياتى

М€ŝЋМΣŞĦ said...

اصل انت مش واخد بالك من حاجه .. المعاش اتلف الشعب .. وخلي المحالين للمعاش يعيشو في ترف و نعمه ..وده غلط علي الناس .. كده ايمانهم يضيع من الترف

وزي مانت عارف الرسول امرنا باننا نخشوشن .. فالحكومه للاسباب السابقه .. والعديد من الاسباب الاخري اللي امثالنا(انا وانت يعني ) مش حنفهمها , عشان احنا من اكلي الفول عالصبح في حين ان الحكومه قامت بعزل الصفوه بعيدا عن هذه الافه ليفكرو لنا جيدا وبصفاء وبدون دخول اي مواد سامه للعقل تفسد عليه تفكيره... وتفكيرهم بقي جابهم لان حل المعضله دي .. في انهم يزيدو قليلا من جرعه الابتلاء عشان الناس تفتكر دايما ربنا .. وتنسي خالص الترف

تحياتي

Sharm said...

الله يحرقهم .. ما كفاية ظلم بقى

omas said...

لو عندنا مجلس عدل كانت الحكومة اتسألت بجد....و لو عندنا رقابة و محاسبة كان الموضوع أثير بجد....و لو كان الشعب مصحصح أكتر كان الموضوع معداش كدة لو كان صح......بس كل ده لو.....!!!ا

The Eagles said...

يا اهلالالالالالالالالالا
ازيك عامل ايه
ايه اخبارك
معلش بقى يا مان على كل التاخير دة اصل كان عندى امتشحانات
اتمنى انك تكون بخير على طول
هنشوف بعض امتى عايزين نتقابل كلنا


والسلام.........

Anonymous said...

هاى محمد
حلوة اوى المدونه بتاعتك
وحلو اوى الموضوع اللى انت بتتكلم فية بس تفتكر انت فى بلد تقدر تسئل فيها سؤال زى اللى انت سألتة ده؟



على فكرة انا ملاحظة انك بقالك فترة مش بتدخل على المدونة ومش بلاقى تعليقاتك عند حد تانى يارب يكون المانع خير
bondoka

نفسنا said...

ندعوكم لمشاهدة العدد الثانى من مجلة نفسنا

وجع دماغ said...

لا ملناش حق واللى يقول لينا حق يقولى بأمارة أيه؟
عملنا أيه عشان ننقذ بلدنا من اللى خاطفينها ؟أمتى أعترضنا على أى ظلم واقع علينا أعتراض مسموع؟
ليه سايبن بلدنا كده؟
ومدام ما أحناش حاسيين يبقى ملناش حق

خليك فى البيت said...

ندعوكم لزيارة مدونة خليك فى البيت والمشاركة فى الحملة

بيجاسوس المصرى said...

بلد ليها سبعة الاف سنة بتتسرق و لسه شعبها لاقى اكل و خير فيها

و لسه يا بلد

نفسنا said...

ندعوكم لزيارة العدد الثانى من مجلة نفسنا

esraa said...

محمد انت مختفي فين؟
ياريت تكون كويس, ويكون سبب اختفائك خير

whyme said...

ايه يا عم وحشتنا مش كده تبقى تدخل حتى تمسى و تمشى



ربنا معاك

تحياتى

Hannoda said...

محمد إنت فينك من زمان؟؟

سمعت أخبار جميلة عند ياسمين.. ربنا معاكوا

و الله أنا في شده إنبهاري باللي بشوفه بينّا ده

يشرّفني قوي أتعلّم منكم عشان ما تبقاش بلدنا مجرد بس إحساس قوي في القلب

لأ لا زم تكون روح بتحرّكنا للي يرفعها بينا
إنشاء الله

أنا متفااااائلة

تحياتي

ما تغيبش كده

خليك فى البيت said...

ندعوكم لزيارة منتدى خليك فى البيت والمشاركة فى الحملة

خليك فى البيت said...

ندعوكم لزيارة منتدى خليك فى البيت والمشاركة فى الحملة

عمرو غريب said...

يا لهوي كل دة فلوس

micheal said...

ألووووووووووووو

وشوشني said...

اه والله يبقا كده الواحد ممكن يبقا مليونير وهو مش عارف طبعا انا مش بتكلم على نفسي لاني لسه مادخلتش عالم الشقا والشغل
بس ان شاء الله لما ادخل هشوف

soosa el-mafroosa said...

عن تجربة بعد المعاش أو لا قدر الله الوفاة

لا يصرف الا أقل من 10%من التأمينات المستقطعة

منهم لله

كشفت راسي و دعيت عليهم لا يرتاحوا لا دنيا ولا آخرة

"فلكلور شعبي على خفيف"

Rania said...

يا جماعة محدش يعرف صاحب المدونه دى فين؟
شكله اتخطف
خطفوك يا محمد؟؟؟؟؟؟؟؟؟؟
علشان قلتلك متسئلش الاسئله دى تانى
:(((

قومى الى الابد said...

على فرة للاخ اللى بيقول ان الموضوع دا قديم الموضوع دا متكرر وعلى مستوى كتير من الوزارات يا والفلوس دى معروف انها بتروح للانفاق على وعلى حاجة تانية طالما هنتكلم على فلوس الوزارات والواجبات اللى على الحكومة مش شايفين ان وزارة الدفاع اللى بيتكلموا وبيسرقوا باسمها المفروض يتناقش ميزانيتها فى المجلس على الاقل نعرف احنا اشترينا ايه وبعنا ايه

أميرة البلطجية said...

هو كلنا بطلنا تدوين وله ايه؟ انا حاسة الناس كلها اختفت..اخبارك ايه؟