Wednesday, May 23, 2007

ليه بقينا نقسى على بعض


ليه بقينا نقسى على بعض ليه القسوة دخلت قلوبنا واول ما الواحد بيقسى بتكون اول ضحية ليه اقرب الناس
بعد ما كتبت البوست اللى فات وقولت فيه انى كرهت الدنيا كلها كنت فعلا حاسس بالمرارة كنت شايف الناس وهيا بيتقسى
مبقتش عارف
المصرى طول عمرنا نسمع انه طيب وحنين طول عمرنا كنا بنقول احنا مصريين الحضن الكبير مهما الناس شتمونا وغلطوا فينا هنفضل الاخ الاكبر كان ده طبع المصريين ممكن نكون شعب مضحوك عليه حكامنا بيذلونا شعب ضعيف مهزوم مبيقاومش اى حاكم لكن كنا زمان شعب طيب خدوم
المصرى اول ما كان يسافر برة مصر كان المصريين اللى عايشيين برة مصر يعملوا كل اللى يقدروا عليه علشان يساعدوه اللى يوفرله سكن واللى يحاول يجيبله شغل كنا شعب اصيل
اتفرج دلوقتى على اى واحد مصرى بيشتغل برة مصر يعمل كل جهدة علشان يضرب فى زميله المصرى علشان ياخد مكانه اول ما صاحبه ياخد اجازة يجرى على المدير السعودى ولا الكويتى ولا حتى الهندى او الفلبينى ويقوله انا ممكن اشتغل شغل زميلى المصرى واخد نص المرتب بس طبعا التانى اما يصدق يرجع المصرى من اجازته يلاقى نفسة مطرود من الشغل طب ليه معلش اصل زميلك هيمسك شغلك وهياخد نص المرتب
اول ما بدا يضرب ضرب ابن بلده اللى كان مفروض يبقوا حنينين على بعض يحموا بعض من اى غدر تانى
حتى فى مصر عمرنا ما سمعنا ان اخين قتلوا بعض علشان خاطر الميراث الا من فترات قريبة اخ يقتل اخوة والتانى يعمل مكيدة لاخوة علشان يستولى على الشقة
مصرى يروح يخطب بنت ويلعب بمشاعرها ويوهمها انه ميت فيها وعايز يتجوزها اهه بيتسلى والسلام وقبل الجد يجرى ويقول انا مش قد الجواز قسوة ما بعدها قسوة
بنت تسيب خطيبها علشان جالها عريس تانى كويس او جاتلها سفرية برة كويسة تبيع خطيبها بالساهل المهم مصلحتى مبقاش فى مشكلة ان الواحد يدوس على التانى و لا حتى بقينا نصعب على بعض
بقينا قاسيين جدا على بعض
البنت بتقسى على خطيبها فى الطلبات
والراجل بيقسى على مراته ويسيبلها مسئولية البيت ويشيل ايده من تربية الاولاد

انا حاولت اسال ناس كتير
المصريين كانوا زمان طيبيين ايه اللى حصلنا
يعنى من اجابات الناس ومن حاجات شوفتها حواليا حسيت ان المصريين بدءوا يتغيروا من بعد حرب اكتوبر 73 الرجالة رجعت من الحرب عايزين يعوضوا زوجاتهم واوالادهم فترة الحرمان اللى عاشوها ايام النكسة مكانش ادامهم غير حل واحد السفر للدول العربية وطبعا ساعتها كانت الدول العربية مفتوحة للمصريين مكانش ادام المصريين منافس زى الهنود والباكستانييين ولا حتى الامريكان كنت تروح اى دولة متلاقيش غير المصريين كلهم جريوا على الدول العربية كان فيهم كتير كبروا فى السن وقضوا فترة كبيرة فى الجيش كان لازم يعوضوا اهاليهم وفى نفس الوقت محتاجين يحوشوا فلوس كتير العمر بيجرى وانا ملحقتش اعمل حاجة بقى اسهل حل انى اضرب فى زميلى علشان اخد مكانه وطبعا زميله ده مصرى زيه وبدات الحكاية كل واحد بيضرب فى زميله واللى معندوش اخلاق بيتصرف كده ييجى واحد محترم يلاقى زميله اغتصب مكانه ايه الحل لازم يدافع عن مكانه ومفيش غير انه يعمل نفس اللى اتعمل فيه
بدأنا نقسى على بعض بقت سمة من سمات حياتنا والمصيبة ان احنا اطبعنا بالطبع ده وكمان ورثناه لاولادنا
طبعا مش كل المصريين عملوا كده
لكن خلينا منطقيين مصريين كتير عملوا كده
الاولاد شربوا من اهاليهم القسوة واول ما بدؤا يقسوا اتعلموا فى اهاليهم وفضلت الدايرة تتقفل تتقفل لغاية ما شفنا ان الاخ بيقسى على اخوة والابن يقسى على امه
نفسى نرجع تانى الشعب الجميل الخدوم الطيب
طبعا مش هننسى الايام السودة اللى احنا عايشينها دلوقتى والظروف الاقتصادية المنيلة بتاعت دلوقتى خلت محدش طايق حد وكل واحد بيقول انا ومن بعدى الطوفان فترة حكم كلها مشاكل وتعذيب وظروف اقتصادية منيلة وشوية حرامية بيتحكموا فى البلد ويرفعوا الاسعار زى ما هما عايزين تجار مخدرات على فواتير تليفونات على دروس خصوصية كله عمال ينهب فى لحم الناس الغلابة واللى يتكلم ولا حتى يفتح بقه امن الدولة مستنيه والمعتقلات والتعذيب هتربيه ولو كنت من الاخوان المحاكم العسكرية فى انتظارك
مبقاش حد رحيم بحد
زمان كانت الشرطة فى خدمة الشعب
وبعديها بقت الشعب والشرطة فى خدمة الوطن
ودلوقتى بقت الشعب والشرطة والوطن فى خدمة الريس وعائلته
يبقى لازم الناس تبقى قاسية اكتر من تلاتين سنة الناس بتعانى قربوا ياكلوا لحم بعض
نفسى نرجع تانى المصريين بتوع زمان الطيبة والخوف من ربنا مراعاة الجار احترام النساء نرجع نقول احنا المصريين نرجع نمشى فى اى دولة فى العالم نقول انا مصرى
تسافر اى حتة برة مصر وتقف فى الشارع تقول انا مصرى عايز اى حد يساعدنى تلاقى ميت ايد تتمدلك وتقولك انا مصرى زيك تعال معايا بات عندى نقسم اللقمة سوا نقسم اللحاف مع بعض اسلفك وانا عارف انك هترجعهم تانى
هوا ده المصرى بتاع زمان
يا ترى راح فين

47 comments:

Unknown said...

أنا أول واحده ((:
انت عارف يامحمد فكرتني بكلمه بقيت بقولها كتير في الفتره اللي فاتت
هي الناس بقت وحشه أوي كده ليه, ولا هم كانو وحشين أصلا واحنا مكناش أخدين بالنا؟


أنا كمان نفسي بجد نرجع ناس طيبين وبنحب بعض ونخاف علي بعض وأهم حاجه تهمنا مصلحة بعض
بس انت عارف لو احنا عايزين ده بجد ان شاء الله هنعرف نحققه

تحياتي

أميرة البلطجية said...

في ناس زيك يا محمد

The Alien said...

مبدأيا كويس إنك كتبت حاجة جديدة
رغم إنه لسه الحزن والغضب موجودين
بس علي الأقل أرحم من بوست كرهت الدنيا
وعموما أنا مقدر كم الحزن والغضب اللي جواك
وصدقني كلنا مليانين

ليه بقينا نقسي علي بعض دا سؤال كبير
والإجابة هي كل حاجة إحنا عايشنها
واللي إنت إتكلمت عن أغلبها
فقر جهل مرض قهر تعذيب سجن .........
اللي إحنا وصلناله دا نتيجة طبيعية
يعني دا التطور الطبيعي للحاجة الساقعة
مع كل الخنقة اللي إحنا فيها دي
مش منطقي تلاقي الناس لسه زوق ومحترمين

أنا مش بجيب أعذار لحد
كلنا مسؤلين عن اللي بيحصل
كله مسؤل ... ناس وحكام

أنا مخنوق وتقريبا بقيت بكره الناس
اللي كنت بقول عليهم طيبين
دلوقتي بقول عليهم جهله ومعفنين
الناس وصلت لمرحلة صعبة
أنا معتقدش إن الوضع ممكن يتعدل
ثقافة التخلف المنتشرة محتاجة سنين عشان تتغير
ومحتاجة مجهود وإحنا مش بنعمل حاجة

تحياتي

ammola said...

كلنا من الناس الطيبين اللى مش وحشين
نداااااء ممكن حد من الوحشين يرد علينا؟

جبهة التهييس الشعبية said...

انت فين يا مقروص

Anonymous said...

انا اعرف ناس بتقسى على ناس عشان ناس تانيى قست عليها ... واعرف ناس بتقسى عشان بتخاف اللى قدامها يبدأ فى قسوته الاول

وناس بتقسى وتمسك شماعة كده احسن وناس بتقسى وهى ماسكة شماعة هو ده الصح

وناس .. وناس

بس اكيد لسه فى ناس طيبين بس مش عارفة بلدهم فين :(

قلب يحترق said...

مع انك أهلاوي بس يلا هرد عليك وخلاص

أنا عارفة ان البوست مش مستاهل أي

تهريج والله بس أهو الواحد بيحاول يخرج

من الجو الصورة القاتمة اللي الواحد

عاش فيها مع البوست

هو ده الواقع مع الأسف وتغييره مش سهل

بس في فرصة انه يتغير والنتيجة لازم لها

وقت كمان . يعني تغير جيل بحاله

فاكر في قصة سيدنا موسي و بني اسرائيل

لما ربنا قالهم ان الارض محرمة عليهم

اربعين سنة لما هما قالوا لسيدنا موسي

اذهب انت وربك فقاتلا انا ها هنا

قاعدون

الأربعين سنة دول مكنش رقم كدة والسلام

مع الأسف الصفات السيئة انزرعت في قلوب

الناس دي فلازم جيل جديد نزرع فيه الخير

عشان التغيير بس المهم نقدر احنا نربي

نفسنا صح و نغير من صفاتنا السلبية

عشان لما نيجي نطلع جيل نعرف نطلعه

بأسلوب صح

ربنا يارب يسعدك و يكون بعد عنك كل

هم وضيق في حياتك

Amr Ahmed said...

لونك حزايني كده ليه يا فسواني

ايه ياعم محمد
مالك

انت بتمتحن انت كمان ولا ايه

ممكن تقول ظروف المجتمع

ربنا يفك كربك

you know who said...

اولا موضوع جميل و حساس بالاضافه الى طريقه سرد مميزه.
سالت اين هم المصريين
فين الشهامه ووووو
اذا اردت فالحال البعد عن المدينه مش القاهره و بس و لكن اى مدينه ستجد ما تبقى من المصريين الاطهار
اما عن سردك عما حدث للمصريين فاوافقك الرائ مع انه يرى المسئله من زاويه واحده فقط


و شكرا

micheal said...

تحليلك لنقطه التحول في السلوك أكثر من رائعه و اسمح لي يا محمد أضف نقطه أثر الانفتاح و النمط الانفتاحي علي المجتمع المصري لما كان له من دور بير في التغييير الطبقي في مصر و من ثم بروز طبقات جديده بسلوكيات مختلفه عما اعتدناها من قبل
تحياتي لك

SomeOne said...

لما احنا بنقسى على نفسنا مش حنقسى على بعض

ربنا يهدينا جميعا
:)

KOKKO said...

الظروف فعلا بقت وحشه لكن ماتبررش اللى الناس بتعمله وده معناه انهم كده اصلا
وده ياكد كلام رسولنا لما قال ان الله سبحانه وتعالى جعل باسنا بيننا
يعنى احنا اللى بندمر نفسنا
وسلملى على الزمن الجميل اللى كنت فيه لما تمشى وتلاقى واحد بيعاكس واحده الناس يدافعوا عنها مش يقولوا تستاهل
سلام

سكوت هنصوت said...

كان نفسي اقولك كلام يهون عليك...واضح انك شايل و معبي...بس معلش يا صحبي...انا شايلة اكتر منك...القسوة حوالينا ليه؟؟؟ عادي يعني...ازاي ما نقساش و حوالينا كل الكم ده من الجوع والفقر والألم و الموت...احنا عايشين على كف عفريت...الي بيتجوز النهاردة....جايز ما يلقيش شغل يفتح بيه بيت بكرة...والي بيخلف..جايز ما يعرفش يربيهم ولا يعلمهم...كل حاجة بقت نار...البلد كلها على كف عفريت...عايزنا منين نرجع شهمة و دمنا حار..؟؟؟ الناس في الخليج بتقطع بعض على الافات...بدل ما يموتوا بعض في مصر على ملاليم...واهو كلة مرمطة و بهدلة...لا عاد لينا كرامة...ولا بقى عندنا اصل...بقينا مجموعة من المهجنين...و اي حادث عشوائي على طريق...ممكن يشرد عيله بحالها...يا محمد...اطلع بقى من الموود ده..لحسن غرقتني فيه

Rania Lelah said...

هاى محمد
ازيك فينك؟
عارف انا انهاردة فتحت البلوج بتاعك بالصدفة لقيتنى كاتبه عن نفس الموضوع دة فى بوست ليه و بستعجب بردة
اكيد ادم لقينا اكتر من واحد بيتكلم فى نفس الموضوع تبقى مكنتش تهيؤات؟
مش كدة بردة ؟
ايوة المصرى معتش هو بقى فى حاجات غريبة بتحصل بقى فى كمية من الغش و النداله و الضرب من تحت لتحت
بقينتا وحشين قوى قوى مع بعضنا
تحياتى

صاحب البوابــة said...

نفسى نرجع تانى المصريين بتوع زمان

-----------------

وأنا أيضاً اتمنى ذلك

استمتعت للغاية بقراءة ذلك المقال القيم

تحياتي اخي الغالي

ابو العربى said...

الظروف والضغوط الى بقى بيقبلها المصرى غيرت طبعه
بس الخير موجود فيه بردو

لا تياس

تحياتى

Anonymous said...

محمد

كان نفسى اكتب كلام يسعدك عن تصرفات المصريين فى الخارج لكن يظهر ان الموضوع بقى اكبر مما تتصور وبقى محتاج وقفة من كل المصريين تجاة تصرفات القلة الفاسدة

اللنك دة بيقول شئ مش مقبول لبدا

هذا اسوء ما

قراءت

smraa alnil said...

محمد
القسوة موجودة من البداية بس جايز احنا مش اخدين بالنا انها موجودة
يمكن نتعملد انها مش تشكل حياتنا

يمكن ظهرت في الفترة الاخيرة فعلا زي مانت قلت
بس دة شئ طبيعي للي احنا فيه
ايه في حياتنا هيخلينا نحن علي بعض وكل واحدفينا باصص علي اللي في ايد غيره
ربنا يهدينا كلنا يارب

Unknown said...

الى حصل ده نتيجه كبت و سياسه تعتيم و تخلف و خلط السياسه بالدين لخدمة اغراض معينه


ده كله حصيله 50 سنه من السياسه الغلط الى خلت المصريين عباره عن مجرد كلمات فى اغنيه او فيلم عربى قديم

للاسف .......... بجد نفسى اشوف مصر زى الى سمعت عنها .... ولا يمكن كمان الى سمعت عنه كان كدب و مصر طول عمرها كده


بس بجد انا اليومين دول و عن طريق التدوين شفت نماذج رائعه لمصر بجد خلتنى احس ان فيه امل

تحياتى يا صديقى العزيززززززززز

Hannoda said...

يااه يا محمد

جيت ع الجرح

العيب في بيوتنا

في أسرنا

ولا النظام.. ولا الفقر.. ولا الجوع

العيب في الناس

فين البيت اللي الأولاد بيخافوا من أبوهم.. خوف إحترام مش من ضرب الحزام

فين الأب اللي برتّل الأخلاقيات بلسانه و عمله

فين الأم اللي بتعلم أولادها اللي مارضاهوش لغيري ما رضاهوش لنفسي

فين المدرس اللي بيعلم الطلاب إن الإيثار من الدين و من أخلاق الرسول


مين أساسا مهتم إنه يقلد الرسول

مين عنده مثل أعلى

ياااه يا محمد .. الحكاية مشبّكة و متكعبلة

سيبك من الفقر و الضغط

إتكلم عن الإحساس بالمسئولية وجدية الحياه و معني الزواج و تكوين أسرة وتربية الإنسان

مين في دماغه الحاجات ده؟؟

ربنا يعين مصر على شعبها اللي واخد في وشه وولا همه ايه اللي بيجرالها و لاّ هي رايحة على فين

مصر هى أمى said...

اسراء

اعتقد ان الناس هيا اللى بقت وحشة
لو تفتكرى احنا حبينا مصر من كلام اهالينا وجدودنا من افلام الستينات والسبعينات
احنا اللى بقينا وحشين اوى
نفسى فعلا نعمل اللى انتى بتقولى عليه

مصر هى أمى said...

اميرة البلطجية

افهم من كده ان ديه حاجة كويسة ولا وحشة ان فى ناس زيي

عموما همشيها انها حاجة كويسة وبقولك ربنا يخليكى

مصر هى أمى said...

اليان

الحمد لله انى هديت شوية وطبعا شكرا جدا على اهتمامك وسؤالك عليا

بس انت مش شايف ان زمان كان برده عندهم جهل وتخلف واحتلال ومقاومة وحروب وبعد كده تهجير من مدن القناة واللى فى المحافظات التانية فتحوا بيوتهم للمهجرين
مش كل ده كان موجود زمان وكانت اخلاقهم كويسة بدليل تلاحم الناس وقت التهجير

لكن دلوقتى المفروض ان الحياة بقت اسهل لكن الاخلاق انحدرت

انت عارف احنا محتاجين سنيين طويلة نعلم فيها الجيل القادم كل المعانى الكويسة ونفضل مستحملين لحد الجيل الكويس ده ما يكبر ويبقوا هوا ونسله اللى موجودين فى البلد

مصر هى أمى said...

امولا

طبعا فى ناس كويسسين لكن افتكر انك صعب جدا تتطلعيهم من وسط الوحشيين كل فترة الكويسيين هيكونوا عملة نادرة

مصر هى أمى said...

جبهة التهييس الشعبية

انا موجود معلش مقصر معاكى انا عارف معلش سماح الفترة ديه

مصر هى أمى said...

حلم عادى

طبعا اللى انتى قولتيه موجود منه نماذج كتير اوى فعلا

وفى ناس بتقسى لانها تربت على القسوة
لكن هرجع اقول ان احنا لازم نفهم الناس على حقيقتها ممكن نكون فاهمين القسوة غلط
ممكن متكونش قسوة اصلا

طبعا فى ناس طيبين وبلدهم موجودة المهم نفتش عنهم هما فين
انتى واحدة من الناس الطيبة واديكى عارفة مكانك وهتلاقى حواليكى ناس تانية طيبة زيك

الخير فى وفى امتى الى يوم الدين

مصر هى أمى said...

dyin_soul

نعم يا ستى ايوه انا اهلاوى

طبعا اللى انتى قولتيه مظبوط فى حكاية سيدنا موسى فعلا الفترة الزمنية ديه ممكن تخرج جيل كويس ويكون قادر انه يمشى امورة

احنا فعلا عايزين نطلع جيل جديد يمسح الصورة المنيلة اللى احنا عايشينها

مصر هى أمى said...

عمرو احمد

اه يا سيدى بمتحن فى مدرسة الحياة علشان الظاهر انى مدرستش فيها خالص

مصر هى أمى said...

you know who

ممكن يكون رايك صح ان الرحمة المودة لسه موجودة خارج المدن الخوف من ان القسوة ترحف على الناس ديه ويبدءوا يتغيروا تبقى حتى النقطة البيضاء اللى فى حياتنا تتغير هتبقى صعبة جدا

ممكن فى تلخيص لسبب المشكلة اكون فعلا بصيت لزاوية واحدة بس انا حسيت ان شغل المصريين فى الخارج عيوبه اكتر بكتير من مميزاته

مصر هى أمى said...

مايكل

نقطة جديدة فعلا الانفتاح اثر على حياتنا ورفع اسعاركل حاجة فى مصر وخلا الناس كلها تجرى ناحية الفلوس وتدوس على اقرب الناس ليها

مصر هى أمى said...

شادى فايد

احنا فعلا بنقسى على نفسنا جامد وبنظلم نفسنا اوى

ربنا يهدينا جميعا
امين

مصر هى أمى said...

كوكو

الناس فى زمنا ده بتبرر اى حاجة تعملها ومحدش حاسس انه ماشى غلط
حتى الحرامى اما بيسرق بيبرر السرقة لنفسة
الظابط اما بيعذب واحد برى وهوا عارف انه برى بيبررها لنفسه انه كده بيحمى البلد

الزمن الجميل ده احنا سمعناه من اهالينا لكن مشفناهوش

مصر هى أمى said...

سكوت هنصوت

احنا كلنا غرقانين من التعب بسبب قسوة المصريين

زودى على اللى انتى قولتيه ان حتى وزارة القوى العاملة قست على البنات المصريا وبتشتغلهم مخدماتية
هتورد 140 الف بنت تشتغل خدامة فى بيوت السعوديين شفتى الهنا
والله انا نفسى اطلع من المود اللى انا فيه ده بس مش عارف

reri said...

سمعة المصريين بره ذباله ومشهورين بكرههم لبعض ... ,غنت وضحت فعلا الذنب اللي بيدوها في بعض ... بقوا حاجه تكسف
ساعات بحس زي ما إنت قلت إن ده كله رد فعل لوضع غبي وأيام سودا عايشها كل مصري ... كله بيلحق يدوس علي غيره قبل ما حد يدوسه .. ثقافه رسخها النظام القائم

أمنيه جميله إن المصري يرجع زي زمان
بس علي رأي الست
عايزنا نرجع زي زمان قول للزمان إرجع يا زمان
تفتكر ممكن ؟؟؟

سلامااااااااااااات

الزعيـمة said...

ازيك يا محمد واخبارك اية دلوقتي؟

بصراحه احساس المصريين كلة بنفس القولتة وخصوصا فى السفر بتلاقي المصريين بالذات عايزين ياكلوا بعض

الناس اتغيرت لان نفوسها اتغيرت
زمان كنت بشوف جدتي وجيرانها مع بعض يطبخوا سوا وياكلوا سوا كنت تحس ان الدور الفية كم شقة كانهم شقة واحده مفتوحه على بعضها

دا فى مسالة الجيران دلوقتي الاهل والاقارب وصلة الدم اصبحت مية

شفت احنا وصلنا لاية ؟

ان الله لا يغير ما بقوم
حتي يغيروا ما بانفسهم

صدق الله العظيم

الشعب محتاج ثورة اخلاق
لكن برضة التمس لة العذر

مهي البطالة والكساد والفساد حولنا وحوش كل واحد عارف لو مكلش اللقمة دي حيتحرم منها وغيرة حياكلها

فبيتسعر وبيتوحش وبتشوف النماذج
اللا ادمية و اللا انسانية المليانة قسوة .. ربنا يهدي ويصلح الحال


تقبل ارق التحيه

مصر هى أمى said...

رانيا

ازيك اخبارك ايه
طبعا انا مبسوط جدا انى لاقيت حد بيفكر زيي وحاسس ان المصرى اتغير ومبقاش زى الاول للاسف احنا بقينا حاسيين ان مبقاش فى امل
ومبقاش لينا غير الدعاء لربنا انه يلطف بينا

نورتينى يا فندم

مصر هى أمى said...

صاحب البوابة

وانا نفسى نرجع فعلا زى زمان ناخد من العصر الحالى اللى احنا عايزينه من تقدم وتكنولوجيا وتطور لكن منسيبش هويتنا وطيبتنا والكرامة منسيبش اى حاجة كويسة بقينا نسيبها دلوقتى

مصر هى أمى said...

ضد الظلم

طب ما احنا كنا زمان عندنا ضغوط وكنا فى حالة حروب مستمرة ومع ذلك على حسب الكلام اللى احنا سمعناها كان الشعب خدوم وطيب ومتسامح مع بعضه

عموما رنبا قادر انه يصلح احوالنا جميعا لكن لازم نسعى احنا الاول وربنا هيساعدنا

مصر هى أمى said...

Anonymous

فعلا المصريين بالخارج بقوا صعاب جدا مع بعض كان ومان اللى بيسافر بره بيعمل كل جهدة انه يجيب اقربائه معاه ويساعدهم ويوفرلهم سكن وشغل اما دلوقتى لو قدر انه يضرب اخوة وياخد مكانه هيعملها

مصر هى أمى said...

سمراء النيل

القسوة موجودة من ايام سيدنا ادم وقابيل اما قتل هابيل علشان كان باصص لزوجة هابيل يعنى منذ بدء الخليقة والاخ بيبص للى فى ايد اخوة

لكن عمرنا ما كنا وحشيين اوى زى دلوقتى عمر الحنية ما ضاعت من المصريين زى دلوقتى

يمكن زمان كان فيه ناس وحشة لكن مكانوش هما الفئة الطاغية زى ما احنا بنشوف دلوقتى

مصر هى أمى said...

whyme

صديقى العزيز

اخبارك ايه الاول
فعلا عن طريق التدوين انا كمان شفت ناس كتير جدا كويسة ومنهم طبعا حضرتك
يعنى اتمنى فعلا يكون فيه امل
كلامك صحيح ان احنا
بقالنا 50 سنة فى تخلف وانهيار بسبب ان الطبقة الحاكمة عايزانا كده علشان تبقى سهل جدا انها تتحكم فينا
شعب كله كلره بعضة اهم حاجة تشغله لقمة العيش مش هيفكر فى اى حاجة مهمة تانية
مش هيفكر حتى فى اخواته

مصر هى أمى said...

هنودة

تصدقى انتى جبتى حاجات كتير اوى فعلا الواحد مكنش واخد باله منها
مين فينا بيقول ان قدوتة سيدنا محمد

انهى اسرة فى مصر بتربى ابنها انه يكون على قد المسئولية

زمان اما الواحد كان بيغلط والمدرس بيعاقبه ويروح يشتكيلهم فى البيت كلنوا بيعاقبونا احنا ويروحوا للمدرس يشكروه انه بيربينا كويس

دلوقتى اما الواحد يعمل مصيبة لو مدرس محترمة بيعاقب الطالب ييجوا اهله يتخانقوا مع المدرس ويطبطبوا على الولد ويقولوله معلش

اما لو المدرس مش محترم فبيفوت للولد علشان بياخد عنده درس

فعلا احا واخدين فى وشنا ومش عارفيين انا رايحيين فين

مصر هى أمى said...

ريرى

نفسى فعلا الزمان يرجع مرة تانية

الوضع الماساوى اللى احنا عايشين فعلا اثر علينا كل واحد خايف على لقمة العيش الحكومة بقت مهددة الناس فى رزقها فطبعا كله بقى خايف واهم حاجة عنده انه يدوس على غيرة علشان ميخدش اللقمة بتاعتة

مع ان لو كلنا عرفنا ان ربنا هوا الرزاق

كان ارتاح بالنا
نقص ايمان بالله مننا

مصر هى أمى said...

الزعيمة

اخبارك ايه انا الحمد لله كويس

بخصوص ذكريات جدتك انتى عندك حق وزودى عليها حاجة تانية انه مكنش فى فرق نهائى بي المسلمين والمسيحيين كلهم كانوا اسرة واحدة بيت واحد مكنش يفرق انا بات عند انهى جار مسلم ولا مسيحى
شوفتى الحياة كانت زمان حلوة ازاى

مشكلة الفقر والبطالة انتى معاكى حق فيها لكن مش موافقانى ان زمان برده كان فى فقر وبطالة لكن الناس كانت كويسة
ربنا يصلح احوالنا جميعا

شرفتينى وبتشرفينى دايما بزيارتك

أميرة البلطجية said...

انت ختمت البوست بسؤال..فين المصرى القديم المحترم اللي كان وكان..فبقولك في ناس زيك..حلوة والله مش شتومة
هههه
:)

مصر هى أمى said...

اميرة البطجية

ربنا يخليكى كده فهمت

Anonymous said...

فعلا اغلب الناس مش تمام زادت القسوه والأحقاد متهيألى السبب ان الناس اللى ناجحه دلوقتى او اللى معاهم فلوس اغلبهم عندهم خسه وصلوا بالغيش والرشوه كل يوم نسمع عن فضيحه وفساد بطلها كان قريب من نجوم المجتمع
القدوه والمثل الأعلى سيء والكل بيقلد حاليا عايز تطلع لازم تنزل اخلاقيا للأسف
مدونتك واسلوبك جدميل ربنا يفرجها علينا قول يارب