Sunday, May 13, 2007

كرهت الدنيا كلها

كرهت الدنيا كلها
بقالى فترة كبيرة جدا بتعرض لمشاكل كتير اوى نفسى اخرج من اللى انا فيه نفسى اسافر نفسى ابعد
مش عارف كنت عايز ابقى طائر طاير فى السما او سمكة فى البحر المهم مكونش انا دلوقتى مش عارف انا ملخبط جدا
انا تعبت جدا من الحياة ليه يا ربى حرمت علينا الانتحار انا عارف انها حكمة الهية علشان منفقدش الامل ولا نيأس من حياتنا لكن اللى فقد الامل فى بكرة اللى يأس من حياته يعمل ايه نفسى اقف فوق برج عالى وارمى نفسى
نفسى اطير فى السما مش مهم ايه اللى هيحصلى بعد كده مبقتش فارقة معايا اى حاجة
ليه نفسيتنا اتغيرت ناحية بعضنا ليه بقينا نقسى على بعض ليه الظلم بقى سهل
نفسى اموت
اكيد ظلمة القبر احسن ميت مرة من نور الدنيا اللى احنا عايشنها دلوقتى
ربى هل استطيع الحصول على استثناء منك
اريد الانتحار
ربى انى لم اكفر برحمتك بل انى اطمع فى عفوك وكرمك عليا
هل ستاتينى الشجاعة انى انتحر واتخلص من حياتى
كرهت حياتى كلها
مبقتش عايش اى لحظات سعيدة
ربى انى عبدتك قدر استطاعتى امنت بك لم اترك فرض من فروضك صمت وصليت وزكيت
ربى ان اقترفت ذنب فى حقك فسامحنى ربى اتوسل اليك ان لا تعذبنى ان اقترفت ذنبا فى حقك
اللهم انت ربى لا اله الا انت خلقتنى وانا عبدك وانا على عهدك ووعدك ما استطعت اعوذ بك من شر ما صنعت ابوء لك بنعمتك على وابوء بذنبى فاغفر لى فانه لا يغفر الذنوب الا انت

92 comments:

a7lam 3adya said...

استهدى بالله يا محمد .. الظلم والقسوة موجودين من زمان فى كل حتة .. وانت اكيد لو دورت حواليك هتلاقى ناس بتحبك وهتتعب اوى لو انت عملت كده

انا محمد اللى اعرفه عمره ما ينتحر .ز عشان هو اجمد من كل حاجة .. تعال نبص حوالينا ونشوفالحاجات الحلوة بس على بيتك شوف مامتك واخواتك ..احمد ربنا انهم بصحتهم محدش منهم سابك ومشى .. بص على اصحابك .. اكيد حد فيهم بيحبك وبيخاف عليك

بص على صحتك ..
يا محمد .. صدقينى .. انت مخنوء وزعلان بس وبجد لازم تقول ( قدر الله وماشاء فعل ) ورب ضارة نافعة .. متزعلش نفسك بجد ..

(( مبقتش عايش اى لحظات سعيدة ))؟؟ دور جايز تلاقى حاجات تفرحك كتير

شد حيلك ... كلم ربنا كتير وانت ساجد .. صدقنى هترتاح

خللى بالك من نفسك

الزعيـمة said...

الاخ العزيز محمد

يمكن كل كلمة قولتها مرت عليا اوقات وقولتها وطلبت غفران ربنا من الانتحار وحسيت ان ترك الدنيا مريح والبعد عنها فى حد ذاتة نعيم


لكن صدقني بعد شوية كل شئ بيهدأ والاحساس بان الدنيا مظلمة بيتلاشي وترجع الامور لوضعها المش حقولك افضل ما يكون ولكن على الاقل مقبول ويتعاش

الدنيا اسمها دنيا من تدنيها ومشقة الانسان فى الحياة والقسوة وكل الانت قولتة دا موجود وسنة الله

الملائكة نفسها قالت لربنا اتجعل فيها من يفسد فيها ويسفك الدماء
ولكن قدرنا نحياها لحد ما يحين معادنا وان النفس والروح بتاعه ربنا هو اليتحكم فيها ويقبضها متي يشاء

محمد انا عارفة انك مش فى مود يسمح لك بسماع مقولات ماثورة مني ولا تطويل كعادتي لكن بجد انا برضة مضايقة وقرفانة وغيري وغيرك كتير

لكن مش بس بنفكر فى عذاب ربنا للمنتحر
والله اعلم برضة هو ربنا قال ولا تقتلوا انفسكم ان الله كان بكم رحيما

لكن فكر فى اهلك ومامتك والناس القريبين منك وحيتجرعوا الالم لغيابك

يا ريت قبل ما تنام النهاردة تصلي وتقرأ في سورة الرحمن لانها بتهدي النفس اوي وبتشرح الصدر وبتذكر بقدرة الله

وحاول تسترخي خالص ومش تفكر باى شئ
نام يا محمد وانت لسانك بيذكر الله
وان شاء الله حتصحي تكون فى افضل حال

وربنا يوفقك ويفرج كل همومك
وقول دعاء الكرب والله ييسر لك الحال

لا الة الا الله
رب العرش العظيم
لا الة الا الله
الحليم الكريم
سبحان رب السماوات
ورب العرش العظيم
الحمد لله رب العالمين

dyin_soul said...

مش عارفة أقولك ايه

كل انسان بتمر عليه لحظات بيحس فيها انه رافض الحياة تماما
والكلام ده بيكون لحظة ضيق او خنقة او غضب بس أول ما بتهدي كل شئ بيرجع طبيعي
والواحد بيتخنق كتير بس بتيجي لحظات جميلة بعد كدة بتنسينا اللحظات الوحشة اللي مرينا بيها
انت بس استهدي بالله كدة و ان شاء الله اللي جاي خير و مش تدايق نفسك خليك مع ربنا و اخرج مع اصحابك و حاول تخرج من الجو ده وان شاء الله خير
أهم حاجة متسبش نفسك للحالة دي انها تسيطر عليك
ربنا يكرمك و يسعدك و يفك خنقتك دي

حسن محمود said...

ياخبررررررررررررررررررر أبيضضضضض

ايه اللى انا بشوفه ده
أيه اللى حصل لكل ده يا أبنى؟

ده انا لسه جاى من بعد غيبه أشكرك على انك فاكرنى وبتسأل عليه
- والله بجد أصيل يعنى كتر الف خيرك -
مش عارف أشكرك أزاى

أنت يا ابنى
الدنيا ماتستحقش كل ده
مافيش حاجه فى الدنيا خالص تستاهل انك تزعل عليها أو علشانها

يا ابنى انا عايز اقولك انت عملت ايه
بسببك خليت ماما تغير فكرتها عن الناصريين وغيرت فكرتى انا كمان
انا فى البيت فهمونى ان الناصريين وحوش ضارية وناس جباره
قلتلهم عندكم اهه الولد اللى اسمه محمد عادل
وعندكم حضرة الزعيمه اللى
كلامها على الرغم من اختلافى مع بعض الحاجات انما كلام هادى ورقيق
وبعدين انا قريت الكلام اللى هى كاتباه ليك
ماشاء الله الله أكبر
كده ياعمى انت أثبت ليه ان الستات بقت احسن من الرجاله خلاص

انتحار ايه بس ؟
يااخى العزيز لا يأس مع الحياة
"ولا تيأسوا من روح الله إنه لا ييأس من روح الله إلا القوم الكافرون"
سورة يوسف - الآية 87

اخى العزيز محمد
التفكير أصلا فى الانتحار مش شجاعه ده جبن
وأسال الله الذى جمعنا فى دنيا فانيه - لاتستحق البكاء عليها ابدا-
ان يجمعنا فى جنة عالية

ودمت بكل خير وحب وتقدير
سلام

The Alien said...

هي الدنيا كدا
شوية فوق وشوية تحت

أنا وإنت وكلنا بنمر بحالات مشابهة
بس بجد أنا عمري ما فكرت ف الإنتحار
عشان أنا متأكد إن هطلع مع الدنيا لفوق تاني
ولازم إنت اللي تقرر تطلع فوق

دور علي الحاجات اللي بتبسطك وإعملها
شوف الناس اللي بتحبها
روح اﻷماكن اللي بتريحك
ساعد نفسك يامحمد

تحياتي وأمنياتي

Amr Ahmed said...

لا حول ولا قوة الا بالله

ايه ياعم الحاج

طب اللي بيمتحنوا وقلنا الامتحانات كابتهم
انت ربنا تاب عليك
وبعدين يا محمد بك مفيش حاجة تستاهل
مش هقولك الانتحار
دمعة حتي من دموع الانسان اغلي من اي حاجة

وكل ممكن يتعوض
ومحدش يعرف الخير فين

وانت عارف انا قصدي ايه
وعسي ان تكرهوا شيئا

ربنا يفك عنك

وانت بس متحطش نفسك في مود الكابة ده

صباحو فل يا حمادة

أميرة البلطجية said...

صدقني صدقني صدقني
حالة وحتعدي
انا حاسة بيك
وبعد ما حتعدي مش حقولك حتبقي فرحان بقي ومزأطط
لا ابدا حتبقي عادي..نفس قلقك..نفسك وحدتك..نفس كل حاجة
لكن مش حتوصل للانتحار
صدقني
انا قلتلك يا؟ هو ابتلاء..مفيش غير الدعاء والاستغفار
والله
اه وحاجة كمان
حسن الظن بالله
مش عارفة اقولك ايه..بس اتمني انك ..اتمني اعرف انك لسه عايش
حدعيلك
اه!
انا بدأت ادعيلك فعلا من ساعة الكومنت ايه
:)

reri said...

لا إله إلا الله
دنيا يا محمد ... هي دنيا مفيش حاجه فيها إسمها راحه ... صدقني بص حوليك .. دقق .. هتلاقي كل واحد جواه كتير ... أنا شخصيا مش قادره أنصحك بحاجه ... جايز لأني بمر بأقوي حالات يأسي ...بقرب جدا من ربنا وبعدين تييجي خبطه تحسسني إن ده عقاب من ربنا .. ساعتها بيبقي جوايا صراع فظيع ... أقول يا ربي هو أنا بس عملت إيه غلط ... بسأل نفسي .. عندي ذنوب صحيح .. بس بحس إنه كتير اللي بيحصل معايا
في الآخر بهدا وبقول الحمد لله ورغم كل شئ أنا أحسن من غيري بكتير
حاول تبص للنصف المملؤ من الكوب .. كلام بقوله لنفسي قبلك .. ربنا يفرج كربك ويشرح صدرك
معلش لو كنت ما قدرتش أقولك كلام يقويك
آسفه لو كنت ضايقتك زياده
أصل ما ينفعش واحده مخنوقه تنصح واحد مخنوق ... كل حاجه بتعدي يا محمد

سلامي ليك

فؤاده said...

محمد ممكن تقولي ايه اللي حصلك عشان تكتب موضوع زي ده
عشان تطلب من ربنا استثناء عشان تنتحر
اي حد هيقرا الموضوع هيفتكر ان عندك خمس ست امراض وعيلتك كلها حصلهم حاجه في حادثه وخسرت كل فلوسك في مشروع ومراتك سايتك وراحت مع واحد تاني

فكر كده ايه حصلك عشان تكتب اللي انت كاتبه ده
نسيت موضوع الطفل الاعمى اللي انت نفسك كنت كاتبه والناس اللي عايشه في نعم مش حاسه بيها
ايه عندك ، مشاكل في الشغل ، مش لاقي الحب اللي بتحلم بيه ، زهقان
فين المشاكل
انا عارفك وبتكلم معاك وعارف ان انت مش في حاله كويسه ، بس مش للدرجه ده

انا اسف ان انا قسيت عليك ، بس حسيت ان انا مش عارف اعمل غير كده
عايز نصيحتي بص على الناس اللي عندها مشاكل ومحن بجد هتعرف قد ايه انت عايش في نعم
عندك شغل واصحاب وعيله ومدونه ونعم كتير

انا اسف تاني

الرمز

شادي فايد said...

أنا مررتلك تاج
:)

احمد الجيزاوى &الشهيد الحى said...

والله انا بقراء مقالك حسيت انك بتكلم بلسانى حسيت انك بتكلم عنى حسين انى انا الذى كتب هذا المقال نفس الافكار نفس الكلام الذى فى عقلى
ونفس النتيجه
عموما انا خيف تكون ظاهرة فى شباب مصر متبقاش انا وانت وبس

أميرة البلطجية said...

انت يا عم
انا كمان عملتلك تاج مخصوصصصصصصصصصص عن الجنة (وسيحتلك عندي في البلوج..اشرب بقي) وكمان بعتلك ايميل على عنوان الياهو اللي انت حاطه منظرة وشكلك لا بتفتحوه ولا بتعمله
محمد؟ انت لسه عايش؟
طب ابقي عدي لو عايش بليييز

شادي فايد said...

ياراجل

هو انت كنت طول الوقت ده بتحب الدنيا

:P

Mohamed A. Ghaffar said...

هون عليك اخى ولا تفشل فى الأختبار

بِسْمِ اللّهِ الرَّحْمنِ الرَّحِيمِ
الم * أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ * وَلَقَدْ فَتَنَّا الَّذِينَ مِن قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ * أَمْ حَسِبَ الَّذِينَ يَعْمَلُونَ السَّيِّئَاتِ أَن يَسْبِقُونَا سَاء مَا يَحْكُمُونَ * مَن كَانَ يَرْجُو لِقَاء اللَّهِ فَإِنَّ أَجَلَ اللَّهِ لَآتٍ وَهُوَ السَّمِيعُ الْعَلِيمُ * وَمَن جَاهَدَ فَإِنَّمَا يُجَاهِدُ لِنَفْسِهِ إِنَّ اللَّهَ لَغَنِيٌّ عَنِ الْعَالَمِينَ * وَالَّذِينَ آمَنُوا وَعَمِلُوا الصَّالِحَاتِ لَنُكَفِّرَنَّ عَنْهُمْ سَيِّئَاتِهِمْ وَلَنَجْزِيَنَّهُمْ أَحْسَنَ الَّذِي كَانُوا يَعْمَلُونَ
صدق الله العظيم
الجزء 20 سورة العنكبوت اية 1 - 7 صفحه 396 - 397 مصحف المدينة

اخر من الاخرين said...

الانتحار دي استسلام
و الاستسلام خسارة
و ليه تخسر .. حصل ايه علشان تخسر . حتي لو المكسب مش مهم . عدم الخسارة مهم
ولا انت ولا حد فينا ضعيف
ولا حد فينا بيتكسر
عدد الابواب اللي في الحياة لا نهائي .. اقفل باب او اكسرة . افتح باب تاني .. اقعد استريح .. استخبي يومين بس تكون عارف انهم يومين . روح لاي حد شيلة حبة من همومك . هيكون سعيد علشان ساعتها بس هتهون علية بلوته :)
الحياة تستاهل انك تكسبها علي الاقل علشان تشعر بنشوة النصر . مش مهم الغنائم لان ملهاش قيمة . المهم انك تكون قوي علشان تحافظ علي عقلك علي روحك علي ايمانك .
اعتقد ان انا كمان محتاج انتصر
و هشوفك منتصر

Anonymous said...

انتحر بقا وريحنا دة انت ممل فى حد الناس دى كلها بتحبة وعاوز ينتحر؟

شهيدة said...

محمد

انا عارفة ان يمكن مش من حقي أتطفل
لكن بما انك كتبت موضوع بالخطورة دي على مدونتك يعني انك عايز آراءنا

أكيد يا محمد ان اللي بتمر بيه قاسي جدا ومتعب
لكن ما تسمحش للياس يدخل قلبك وأبدا ما تسمحش لفكرة الانتحار دي تسيطر عليك

تعرف يا محمد يمكن أنا اكتر انسانة أو من أكتر الناس اللي بيحصل معي فترات اكتئاب وحزن شديد

لكن بحاول دايما بمساعدة ناس كتير واكترهم ماما اني أفتكر ان الله اذا أحب عبدا ابتلاه يا محمد

افتكر ده دايما
واسكر ربك على البلاء واصبر عليه
انا بقلك الكلام ده وبحاول أسمعو انا كمان وأطبقوا كمان

ما تفكرش كدة تاني يا محمد اتفقنا

ويارب يفك كربك قريبا

سلام

Anonymous said...

ربنا يفرجها عليك يا محمد
ربك كريم

Rania said...

ايه يا محمد
ربك رحيم
كل واحد بتعدى عليه لحظات بيكون كاره فيه نفسة
استعيذ بالله
و ربنا هيفرجها باذن الله
و بالنسبة بقى انك كنت عايز تبقى طائر او سمكة
افرض يا عم انت واحد نشك رصاصة و انت بتطير
و لا حتى صياد معندوش ضمير اصطادك و اكلك
ينفع كدة معقوله عايز تحرمنا من كتاباتك يا عم انت
ربنا هيفرجها يا محمد
تحياتى

frozen love said...

eh ya 3m da bs

ده انا جاي اقولك واحشني والله...بس انا لسة طالع من حالة كابة برضه..صدقني كله بيعدي..وان شاء الله ترجعلنا ببسمتك الحلوة دي قريب

ونفسي اشوفك والله ..تصدق بقى؟

انا راجع تاني بيننا كلام كتير

A.SAMIR said...

على فكرة:
غد يوم اخر

big big girl...in a big big world said...

كلنا بنمر بالمرحله دى يا محمد

نبص حوالينا منلقيش شىء جميل

نيأس و يملانا الحزن

بس عارف

احنا ممكن نعمل الحاجه الجميله بايدينا

لو مكنتش الدنيا ملونه حواليك هات انت علبة الوان و لونها

و الله يا محمد كلامى مش تصبير او حركه

انا فعلا بعمل كده

ما الحياه لازم هتستمر

باحزنها بكل ما فيها

مش لينا خيار تانى

يبقى نلون دنيتنا بايدينا

:)

david santos said...

It places fhoto of Madeleine in your bloggue


Missing Madeleine!
Madeleine, MeCann was abduted from Praia da Luz, Portugal on 03/03/07.

If you have any information about her whereabouts, please contact Crimestoppers on 0800555111 Please Help

عبقرينو said...

السلام عليكم
أيه ياعمنا براحة شويه وهدى أخلاقك كده
مافيش حاجة تستاهل ده كله خالص, ياعم قووول الحمد لله
بس ياصديقى هيا الدنيا كده لابد فيها من المعاناة ولكن الجزاء لمن يصبر ويتقى
صبرا بالله هوالمقدم وهو المؤخر وهو على كل شىء قدير
ربنا يفك ماعندك من كروب ويهديك لما فيه الخير والثواب

micheal said...

مش عارف أقولك ايه بصراحه
يمكن لاني قرفان أكتر منك
:)
تحياتي لك

مصر هى أمى said...

احلام عادية

شكرا ليكى جدا على الكومنت ده فعلا زى ما انتى قولتى انى لقيت ناس حواليا كتير وقفوا جنبى
فعلا انا كنت مخنوق جدا والحمد لله زى ما انتى قولتى قدر الله وما شاء فعل

انتى عارفة انا فعلا دورت حواليا ولقيت حاجات سعيدة هيا مش كتير بس الحمد لله لاقيت حاجات

مصر هى أمى said...

الزعيمة

بصى يا ستى انا الحمد لله كويس دلوقتى يمكن فعلا عدت عليا اوقات كانت صعبة جدا كنت زمان بستحملها لكن للاسف مبقتش مستحمل ان الواحد يقسى على واحد زيه ويغدر بيه والاصعب ان المشكلة ديه مكنتش معايا اوى لكن لحد بحبه جدا
بس الحمد لله الايام بتعدى وتنسى الواحد المشاكل كلها

انتى بتقوليلى افكر فى اهلى
اما حصلت المشكلة ديه ولاقيت اهلى منهاريين اد ايه ولقيت نفسى مش عارف اعمل حاجة ليهم علشان كده فكرت انى عايز ابعد سواء بالسفر او الانتحار
وشكرا جدا على الدعاء بتاعك

وانتى تطولى براحتك

مصر هى أمى said...

dyin_soul

طبعا الواحد بتيجى عليه لحظات زعل كتير اوى بس هوا المشكلة معايا انها بقت كتير اوى ليا ولناس عزيزة عليا اوى
الحمد لله انى معنديش الشجاعة انى انتحر وعندى امل ان الايام والظروف تتغير وتبقى احسن ان شاء الله

مصر هى أمى said...

حسن محمود

ياااااه اخيرا ظهرت وايه كل الغيبة ديه كنت فين يا ابنى
بس ادخل عندى فى البروفيل بتاعى هتلاقى الميل ابعتلى الميل بتاعك علشان نبقى نطمن عليك كل شوية
ومش عارف ترجع غير على البوست ده

انا عارف كويس ان التفكير فى الانتحار مش شجاعة وفقدان الامل فى رحمة ربنا لكن انا كنت فى وقت معين مخنوق اوى ونفسى ابعد باى شكل
لكن الحمد لله دلوقتى يعنى احسن شوية
بس انا من انصار عبد الناصر فى سياسته الخارجية فى سياسة التعمير اللى عملها جوا مصر فى طهارة ايده لكن طبعا محبتش التعذيب اللى كان منتشر فى عهده

عموما الحمد لله ان صوتى واصل للبيت عندك

مصر هى أمى said...

اليان

كلامك صح يا صديقى ان الحياة يوم فوق ويوم تحت
لكن المشكلة انى بقالى فترة تحت خالص مش عارف اطلع فوق

بس عموما الحمد لله على كل شىء
شكرا ليك جدا على السؤال
وانت مش عارف اتصالك فرحنى جدا

مصر هى أمى said...

عمرو احمد

صدقنى والله ساعات كتير جدا بيبقى نفسى ارجع تانى لايام الكلية حتى مع قرف الامتحانات لكن والله ايام الكلية الواحد مكنش بيشغل باله بحاجة واما تتخرج كده ان شاء الله وتبقى مدرس هتكتشف اد ايه ان الكلية وامتحاناتها كانت احسن بكتير

فى حاجات يا صديقى بتبقى دمعة الانسان متساويش جنبها حاجة اما تلاقى حد بتحبه جدا ومش عارف تعمله اى حاجة ولا قادر تقف جنبه

مصر هى أمى said...

اميرة البلطجية

شكرا ليكى اوى على الدعاء وعلى الكومنت ده
الحمد لله هيا كانت ظروف والايام مسيرها تنسى الواحد كل حاجة
احنا اسمنا انسان لانها جاية من النسيان وانا بعتبرها نعمة من ربنا ان الواحد ممكن ينسى اى حاجة
شكرا على سؤالك جدا

مصر هى أمى said...

ريرى

مش عارف ليه البوست ده جه على جرح لناس كتير اوى يمكن علشان كلنا عندنا مشاكل وحاسيين ان الظروف والحياة بقت صعبة جدا

صدقينى انا عمرى ما فكرت انى اموت نفسى الحكاية كلها انى كان نفسى ابعد نفسى اسافر ممكن حد يعتبره هروب ممكن قلة حيلة لكن الحقيقة هيا زهق وطهقان من كتر المشاكل

لكن الحمد لله الامور بتعدى والواحد بدء ينسى

المهم حاولى انتى تبدئى تشغلى حياتك باى حاجة مفيدة متسمحيش للياس انه يدخل جواكى متعمليش زايي
حاولى تشغلى حياتك
بصى احنا ممكن منعملش حاجة غلط لكن هوا بيبقى امتحان من ربنا وبيكون عايز يشوف قدرتنا على الاحتمال والصبر


ادينى اهه يا ستى واحد مخنوق بينصح واحدة مخنوقة

مصر هى أمى said...

فؤادة

مش شرط يا صديقى لازم الواحد يكون عنده امراض علشان يبقى تعبان ومش ضايق حاجة

الحمد لله اسرتى كويسة وربنا يخليهم

انت طبعا مكنتش تعرف السبب لكن اما كلمتنى وعرفت الظروف اكيد طبعا قدرت السبب
انت عارفنى وعارف انى بقالى فترة مش كويس اوى لكن اما جه الظرف الخير مبقتش مستحمل حاجة بقى

يالا الحمد لله
وشكرا على اهتمامك يا رمز

مصر هى أمى said...

شادى فايد

انا جاوبت على اتاج ده من قبل يا صديقى

انت اللى مبتجيش كتير بس

مصر هى أمى said...

احمد الجيزاوى

والله انا كمان حسيت ان ناس كتير كرهت الدنيا الخوف فعلا تكون حالة سخط نتيجة ان احنا اتغيرنا مع بعض بيقينا نظلم بسهولة اوى

معلش يا صديقى لو كان كلامى جه معاك على الجرح اعذرنى

مصر هى أمى said...

اميرة البلطجية


شوفت التاج يا ستى وايه التسييح اللى انتى عاملاه ده حرام عليكى

انا جاوبت على التاج بتاعك عندك فى الكومنت
الحمد لله لسه عايش

مصر هى أمى said...

شادى فايد

لا طيعا بس على الاقل اهه كانت ماشية لكن اما تلاقى مشاكل كتير اوى بتبدء تزهق جامد اوى

مصر هى أمى said...

محمد عبد الغفار

الاية ديه رائعة جدا
والحمد لله ربنا يقدرنا على الصبر انا وانت وجميع الناس ان شاء الله
شكرا ليك جدا

whyme said...

محمد باشا حبيب قلبى و صديقى العزيز

واحشنى بجد جداً و نفسى اوى اقعد معاك و اسمع ضحكتك
انا معاك ان الانسانيه بجد دلوقتى بتمر بازمه بس اكيد فيه حتى لو نقطه بيضه صغيره لازم نكبرها و لازم نركز عليها لازم نعيش و لازم نتعلم ازاى نعيش عمر مكان القبر حل
برغم كل الصعاب لازم نبتدى نساعد بعض و نتعلم مع بعض ازاى نعيش لازم نحاول نساعد المسكينه الى اسمها الانسانيه الى مبقاش ليها مكان فى وسطينا

تحياتى بجد يا صديقى و عايز اشوفك بجد علشان نحاول نلاقيلها مكان فى وسطينا

بجد يا محمد انت من اكتر النماذج الى بتعجبنى و بتتحسسنى ان فيه امل فى الحياه و علشان كده هعمل كأنى مشفتش البوست ده بس عايز اشوفك انت

Hannoda said...

محمد.. و الله العظيم عارفة إحساسك كويس

عارفة لما تكون مش يائس من رحمة ربنا.. ومؤمن والثوابت جواك ماتهزتش ولا حاجة

لك قدرة الصبر جواك نفذت.. بكل بساطة نفذت

عارفة لما تتحاصر بكل مشاكلك.. ولما مشاكلك و همومك تعاندك و تقولك ياأنا يا إنت... فتقولها "إنتِ" و تتمنى ما تبقاش إنت و تنتهي حياتك بقى و تخلص

عارفة كويس قوي كل ده

لكن اللي حاقولهولك دلوقت حاجة خنيقة جدا لأي حد في المود اللي إنت فيه.. وخصوصا لما ما يكونش مجرد مود إنما حصار حقيقي لمشاعر و ظروف صعبة

لكن مضطرة إني أقولهولك لإنه الحقيقة بعينها

الحقيقة هي إن الحياه جواها مفاتيح الفرج.. والإنسان عليه البحث عنها

حتى لو تعب.. ولو زهق.. ولو الأحزان جابت داغه

لازم يفتش في قلب الحياه

إعلن الحرب على يومك يا محمد

قول مش حاشوف حد لمده تلات أيام

ماليش صحاب و لا أهل و لا زمايل و لاجيران

وحاول اللي على بالك إعمله

إنزل إتمشى في الفجر

ولو رجلك خدتك للجامع تصلي الفجر طاوعها

ولو شيطانك وزك.. لأ ماتروحش يا عم ده إنت طهقان و قرفان.. إستئذن ربنا وطاوعه

أصل ربك أعلم بيك مني و منك و من خلقه كلهم

عارف إننا بشر و لينا لحظات بنحتاج نطاوع وجدانا و نسيبه يحركنا زي ما هو عاوز لحد ما يهدى ويسيبنا نعيش

دور فقلب الحياه على روحك يا محمد.. خذ أجازة من الساقية اللي بنتربط بيها.. بأي طريقة حاول تاخد أجازة


وربنا يهونها عليك .. أما الإنتحار.. متأكده إنك نسيته دلوقت خلاص

sokoothansawat said...

كان الله في عونك يا اخي...الله يصبر قلبك على اي مصاب يصيبك...وبجد الحمد لله انك لخير..انا كل يوم اخش عندك عشان اطمن عليك من ساعة ما قريت البوست المنيل ده...الحمد لله انك مازلت حي ترزق و ماعملتش العملة السودة دي...
محمد لما تركب طيارة و تقف قدامك المذيعة الحلوة ام وش سمح...( لو مش من مصر للطيران) و تديك تعليمات الأمان على الطيارة...هتلاقيها بتقول في حالة وجود اطفال...يجب على الأم ان تضع قناع الوجه الخاص بها اولا...قبل طفلها..ما تتصورش الكلمة دي علقت في دماغي قد ايه...دي مش انانية يا محمد...لكن عشان تقدر يكون عندك وقت و مجهود تنقد الي حواليك...لازم تنقذ نفسك الأول...النصاحة ان الكل يعيش...مش واحد يموت عشان غيرة يعيش...مش عارفة انت فاهم الي عايزه اقولة ولا لأ...بس بصرف النظر سعيدة جدا لمعرفتك...و مستنية التدوينة الي جاية

فرجه قريب said...

"إن بعد العسر يسرا"...."إذا أحب الله عبدا ابتلاه"...."أمر المؤمن كله خير إذا أصابته سراء شكر وإذا أصابته ضراء صبر"...
أحيانا ربنا بيحب إننا نقرب له أكتر أو يسمع صوتنا بالدعاء...ربنا رحيم وفرجه قريب إن شاء الله.

esraa said...

ليه كده بس يامحمد
وحد الله كده واهدي
دي ان شاء الله فتره وهتعدي
وربنا بيختبر قوتك
وان شاء الله هيعوضك أحسن وأكتر من الأول
وبكره تقول اسراء قالت
والله يامحمد افتكر كده
ياما ظروف كانت أصعب من كده وعدت
وبص حواليك كويس , هتلاقي حاجات حلوه كتير تعيش عشانها, احنا مش مكفينك ولا ايه, احنا مش بقينا اخوات؟
ماتنساش تدعيلي بقي, امتحناتي قربت مش تدعي عليا عشان دبستك في التاجات

واحد من الناس::طارق:: said...

كدة برضو يا محمد اغيب عن النت شوية وهو يفصل عنى شويتين ارجع الاقيك كدة .. امال انا هاتسند على مين ؟ واشتكى لمين ؟ ومين اللى هلاقيه طلعلى من تحت الارض يقف جنبى لما احتاجه؟

محمد ..انت طول عمرك مؤمن وتعرف ربنا وعارف اد ايه هو رحيم حتى لما بيبتلينا ونصبر على البلاء دة بيجازينا على الصبر دة
الدنيا بقت وحشة اووووووووى انا عارف وبقت قذرة وزبالة وغابة .. فصبراً جميلاً يا محمد وان شاء الله ظرف ويعدى ونطلع منه اقوى من الاول .

انت عارف او مش عارف انا بحبك اد ايه يا محمد ..بس بجد مش مستحمل نبرة الحزن الجامدة دى فى صوتك وفى روحك.. انت ماتشتهالش لحظة حزن واحد والله يا محمد يا اطيب واحن واطهر قلب عرفته.

لا اله الا انت سبحانك انى كنت من الظالمين
لا اله الا انت سبحانك انى كنت من الظالمين
لا اله الا انت سبحانك انى كنت من الظالمين

Ahmed Moghazy said...

صلى على النبى يا عم محمد مش كده

كلنا بتجيلنا لحظات نكره فيها الحياة واللى فيها
بس بجد لو انت عندك شىء او حد تحبه هتحب الحياه علشانه
والبعدين هتنتحر وتسيب مصر لمين ؟
معندكش ام تعيش علشانها؟
مفيش اب تعبان؟
مفيش اخت حنونة؟
مفيش صاحب مخلص؟
مفيش حبيبة تخاف عليها؟

اكيد فى مليون سبب للتمسك بالحياة

nirfana said...

عليك بالاستغفار وقراءة القرآن

ولا تيأس


الايام تدور

وبكره احلى ان شاء الله

ضد الظلم said...

لا ياباشا انا اول مرة ادخل المدونه بتعتك القيك محبط كدة استغفر ربنا ياعم وكلنا بنمر بالحظات ذى دى وبتعدى ودور على الحلو فى الدنيا وسيبك من الوحش
وهتسيب مصر لمين وحتى لو طرت فى السما هتلاقى صقر غلس وهيغلس عليك ولا غراب بارد هيطهقك ويقرفك
وهتسيب مصر لمين ياعم
تحياتى

مصر هى أمى said...

اخر من الاخرين

الانتحار فعلا استسلام والمشكلة انى كنت وصلت لمرحلة من الياس اللى هيا خلاص مفيش بعدها حاجة تانى

بس الحمد لله الامور بتعدى صحيح المشاكل متحلتش لكن اهه الايام بتلهى الواحد وافتكر ان كل يوم بيعدى كانه باب جديد اتفتح

مصر هى أمى said...

Anonymous

تصدق بالله الكومنت ده خلانى اضحك جدا

والله انا مش ممل ولا حاجة يمكن انا كنت خايف ان ربنا يحاسبنى على الانتحار فمعملتهاش

الحمد لله ان فى ناس كتير بتحبنى

مصر هى أمى said...

شهيدة

لا يا ستى انتى مش بتتطفلى ولا حاجة انت تقولى رايك فى اى وقت
فعلا لازم الواحد يصبر على البلاء جامد جدا
لكن انتى عارفة اصعب حاجة اما تلاقى البلاء ده بيصيبك ويصيب ناس قريبيين منك صدقينى لو كانت علينا انا لوحدى كانت هانت يمكن شوية لكن على الناس اللى بحبهم بتبقى صعبة جدا

الحمد لله الامور دلوقتى معقولة

وشكرا لسؤالك جدا

مصر هى أمى said...

Anonymous

امين يارب
وربنا كريم ويفرجها ان شاء الله

مصر هى أمى said...

رانيا

الحمد لله ان ربنا رحيم بينا
ويا ستى لو صياد اصطادنى وكلنى اهه اسمى بقيت مفيد وعملت حاجة كويسة

شكرا ليكى على اهتمامك

مصر هى أمى said...

frozen love
محمد حامد

اول حاجة حمد الله على السلامة
خير كنت فى حالة كأبة ليه انا كنت فاكرك بتمتحن
المهم انا الحمد لله الامور بقت تمشى كويس يعنى كله خير ان شاء الله

مستنى كلامنا الكتير يا صديقى

مصر هى أمى said...

احمد سمير

الحمد لله كل يوم بيعدى بيكون احسن من اللى قبله

مصر هى أمى said...

big big girl...in a big big world

المشكلة ان الواحد مبقاش عنده الوان خالص كلها لون واحد اسود
يبقى هنلون ايه هنسود اكتر من كده

بس طبعا انا كان عندى امل فى بنا انه يفرجها والحمد لله يعنى بدء اللون الاسود يروح بالتدريج

مصر هى أمى said...

عبقرينو
وعليكم السلام

صحيح هيا الدنيا كده لازم تكون فيها معاناة لكن المشكلة انى فجاءة لقيت كمية مشاكل كتير اوى حواليا فضلت تتراكم تتراكم لحد اما بقى صعب حلها

لكن الحمد لله الامور بدات تمشى وبحلها واحدة واحدة
شكرا على اهتمامك وسؤالك

مصر هى أمى said...

مايكل

اعمل زييى وقول الحمد لله صدقنى انا كنت وصلت لمرحلة من الياس والقرف لاتوصف لكن الحمد لله على كل شىء

مصر هى أمى said...

whyme

صديقى العزيز

اخبارك ايه
فعلا احنا بقينا وحشيين جدا مع بعض بقينا نقسى ونعامل بعض بمنتهى القسوة نفسى الانسانية ترجع تانى لروح الشعب المصرى

وانا كمان نفسى اشوفك والله بس اما تخلص المعارك اللى عندك الاول
ابقى طمنى عليك

مصر هى أمى said...

هنودة
انتى فعلا حسيتى بيا
قدرتى على الصبر خلصت

بس انا فعلا عملت زيى ما انتى قولتى سبت نفسى عملت اللى انتى قولتى عليه نزلت اتمشيت فى الفجر رحت صليت مشيت بالساعات فى الشارع الحاجة اللى معرفتش اعملها انى اخد اجازة من الشغل لان بصراحة الشغل كان بيلهينى ويخلينى مفكرش فى حاجة

عموما الحمد لله دلوقتى

مصر هى أمى said...

سكوت هنصوت

شكرا ليكى جدا
الحمد لله فعلا انى معملتش العملة السودة ديه

زى ما بتقولى ان النصاحة ان الواحد ينقذ نفسه واللى حواليه بس هيا المشكلة انها جت فى وقت مش عارف اعمل حاجة خالص وانتى عارفة كان المشاكل اما بتصدق كلها تيجى مرة واحدة

الحمد لله على كل شىء

مصر للطيران مبتشغلش مضيفات وشهم سمح انا سافرت وعارف كويس

مصر هى أمى said...

فرجه قريب

الدعوة ديه جميلة اوى
والحمد لله بدات تفرج وعندى امل فى بكرة ان شاء الله

مصر هى أمى said...

اسراء

بكره هقول اسراء قالت
نفسى بكرة ييجى بقى انا مستنيه من زمان

طبعا انا بحبكوا زى اخواتى والله انا فعلا لاقيت ليا اخوات جداد من المدونة ديه
بصى هدعيلك لغاية اما تخلصى امتحاناتك
لكن بعديها هدعى عليكى بسبب التاجات ديه

انتى عارفة انا جالى ميل بيقولى حد ينتحر وهوا علية تاجات فى ذمته

مصر هى أمى said...

طارق

حمد الله على سلامة النت عندك

شكرا جدا على كلامك الحلو ده وانا كمان والله بحبك جدا وعمرى ما كنت هتمنى اخ ليا غيرك

فعلا يا طارق الدنيا بقت زبالة اوى والمشكلة ان الناس الزبالة ديه بقت تتحكم وتقسى على الناس التانية

شكرا جدا على اهتمامك يا صديقى العزيز

مصر هى أمى said...

احمد مغازى

عندى اب وام واخ واخت واصدقاء الحمد لله لكن للاسف معنديش حبيبة

الحمد لله انا اكتشفت اسباب كتيرة اوى تخلى الواحد متمسك بالحياة

مصر هى أمى said...

نيرفانا

ان شاء الله فعلا يكون بكرة احلى باذن الله

مصر هى أمى said...

ضد الظلم

معلش يا صديقى اول مرة تدخل عندى تلاقينى كده

بس تصدق فعلا كانت هتبقى مشكلة لو طرت فى السما ولاقيت فعلا صقر غلس يغلس عليا
يعنى هيا هتبقى على الارض وفى السما كمان

الحمد لله اللحظات السيئة ديه بدات تروح الحمد لله

esraa said...

خلينا في انك تدعيلي دلوقتي
وصح حد ينتحر وهو عليه تاجات
طب هتقول ايه لربنا؟

Sharm said...

اللهم ابعد عن عبدك الهم و الكرب و الحزن و الضيق

reri said...

الحمد لله إنك خرجت من المود ده ... ردودك بتقول إنك أحسن ... اليأس نبرته إنخفضت ... الحمد لله ... شكرا عالنصيحه اللي جت من واحد مخنوق

سلامااااااااااااات

reri said...

أه صحيح
نزل بوست جديد بقي .. قول حبيت الدنيا كلها
ههههههه... ياللا سلااااااااااااام

مصر هى أمى said...

اسراء

بدعيلك والله ربنا يوفقك

هوا انا لو ماجاوبتش التاجات هبقى اثم قلبى ولا حاجة

مصر هى أمى said...

شارم

امين يارب العالمين
يبعد عنى وعن كل المسلمين الهم والكرب

مصر هى أمى said...

ريرى

الحمد لله هوا طبعا مخرجتش من الخناة اوى
لكن الحمد لله عموما

ياريتك تسمعى النصيحة اللى من واحد مخنوق

سلام وتيك كير

مصر هى أمى said...

ريرى
ان شاء الله هنزل بوست جديد بس والله مطحون فى الشغل

توتة توتة said...

ربنا يفك ضيقك

صاحب البوابــة said...

احببت كلامك رغم ما فيه من الحزن

اتدري لماذا ؟؟؟

لإنه ان شاء الله بعد العسر يسر

استبشر خيراً

تحياتي لك عزيزي

safa7_karmooz said...

ليه بس كده
استغفر ربنا يا محمد....انتحار مين بس

والله الواحد كل يوم بيشوف بلاوى كتيرة ...
بس اللى بيصبرنا اننا بنحمد ربنا عاللى بنشوفه

سواء حلو او وحش...ودى فى حد ذاتها نعمة انك تبقى راضى عن اللى ربنا قسمهولك وادهوولك سواء حلو او وحش

انا جه عليا فترة 2 من اصحابى كانوا بيموتوا

منهم واحد كان بيموت على حجرى والدم ماليه ...وقتها مكنتش كملت 15 او 14 سنة ...كنت ااعمل ايه وقتها ...كنت عاوز اانتحر واتمنى ان ربنا يدينى نفس الاستثناء المستحيل ده

بس ما ينفعش اننا نستسلم للحزن ده او اليأس

خدلك اجازة

اطلع على اى مكان اسبوع...وارجعلنا تانى محمد بتاع زمان...:)

مصر هى أمى said...

توتة توتة


امين يا رب
ربنا يسمع منك

مصر هى أمى said...

صاحب البوابة

ان شاء الله ان بعد العسر يسر

معلش يا صديقى ان كلامى وجعك

مصر هى أمى said...

سفاح كرموز


طبعا البقاء لله فى وفاة اصدقائك بتبقى حاجة صعبة ان الواحد صاحبة يموت وهوا بين ايدك


الحمد لله ان الواحد مستسلمش للياس اللى حصله


الحمد لله على نعمة ربنا فعلا

بنوتة من وسط البلد said...

عارف مشكلة الانتحار ايه يا محمد
ان الناس الى ظلموك فى الدنيا هتروح تلاقيهم معاك فى جهنم بعيد عنك
وده لان دى اخرتك عد الانتحار طبعا

فا مايبقاش دنيا واخرة يا اخويا
فمعلش احتسب وربنا هيرحمك دنيا واخرة وينصرك على مين يعايدك
هاي هيئ
:)

ياسمين said...

محمد .. انا حاسة بيكرغم انى مش عارفة اسباب تعاستك
لكن اعتبرنى شريكة فى الأحزان
صديقة فى التعاسة
رفيقة فى الألم

تعرف ايه احلى حاجة تخرجنا من الألم؟؟
اننا نمد ايدينا لحد تانى بيتألم
اننا نساعد حد تانى مجروح
اننا نقف جنب حد تانى مفجوع من مصيبة اصابته

ايه بس يا محمد
احكيلى
ابعتلى ايميل واحكيلى يمكن نلاقى مخرج
اتصل بية فى اى وقت انت عارف غلاوتك عندى
مالكش نفس تساعدنى؟؟ .. انا عندى احزان كتير ملازمة لحياتى .. ولا يخرجنى من بين أحزانى الا ان اخفف عن شخص يتالم
هأستنى تليفونك

وينكى said...

ايه ده ايه ده؟؟؟
اول مره اجى فيها كده ألاقيك بالحاله دى؟
استهدا بالله يامحمد
مافيش حاجه فى الكون كله تستاهل انك تهرب من حياتك عشانها
ايوه الانتحار هروب وجبن من مواجهة اى موقف انت ممكن تكون فاكر انه صعب ومستحيل
لكن لما تعدى الأزمه دى هاتقول ازاى انا فكرت فى يوم من الأيام انى اهرب عشان حاجه هايفه زى دى؟
انت انسان مؤمن وعارف ربنا وكفايه عليك انك تتوجهله بقلبك وكل جوارحك
وهو الوحيد اللى فى ايده انه يخلصك من همك
تحياتى ليك واتمنى لما اجيلك تانى تكون حالتك افضل
تحياتى

esraa said...

اها طبعا
أثم قلبك ونفسك وكل حاجه

مصر هى أمى said...

بنوتة من وسط البلد

فينك من زمان بقالك كتير مبتجيش عندى

تصدقى فعلا انا مفكرتش فى النقطة ديه انى هاروح الاقيهم فى النار
الحمد لله ربنا يبعدنا عن النار ان شاء الله

ربنا يرحمنا جميعا دنيا واخرة

مصر هى أمى said...

ياسمين

المكالمة حصلت حتى من قبل ما اشوف الكومنت ده

وانتى عارفة غلاوتك عندى اد ايه

بس انتى مش شايفة ان صعب حد مجروح ينصح حد تانى مجروح

مصر هى أمى said...

وينكى

معلش ان اول مرة تيجى عندى تلاقينى كده الحمد لله انا هديت دلوقتى هيا طبعا مش حاجة هايفة اللى خلتنى مش طايق الدنيا

عموما شكرا جدا على سؤالك وان شاء الله هكون احسن ادعيلى انتى بس

مصر هى أمى said...

اسراء

خلاص يا ستى

يمكن علشان كده ما انتحرتش علشان لسه عليا تاجات

اول مرة اعرف ان التاج بتاعك ممكن يدخلنى النار

klmat said...

واضح ان فى موقف مش ولابد حصل لك وسبب لك جرح .معلش كلنا بنمر بظروف مش تمام واحيانا الجرح يكون من اقرب الناس لك فيعلم اوى
خد بالك من صحتك وحاول تغير جو وربنا يهدي لك نفسك ويفرجها علينا كلنا
وحاول تفكر فى اى موقف ايجابى او اسرح فى حاجه حلوه حصلت قبل كده غير الملف

klmat said...

واضح ان فى موقف مش ولابد حصل لك وسبب لك جرح .معلش كلنا بنمر بظروف مش تمام واحيانا الجرح يكون من اقرب الناس لك فيعلم اوى
خد بالك من صحتك وحاول تغير جو وربنا يهدي لك نفسك ويفرجها علينا كلنا
وحاول تفكر فى اى موقف ايجابى او اسرح فى حاجه حلوه حصلت قبل كده غير الملف

Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人