Monday, March 26, 2007

الحب



الحب ده الاحساس او الشعور الطبيعى اللى الواحد بيحس بيه تجاه حاجة معينة زى ما ولد ممكن يحب واحدة او يحب اكلة معينة او يحب بلده او يحب رياضة معينة او اى حاجة

ناس كتير بيقولوا عليها الكيميا . يعنى الكيميا بتاعة الواحد بتتقابل مع الكيميا مع واحدة معينة
الحب ده بييجى مرة واحدة فى العمر يعنى الواحد لازم يتمسك بالمرة ديه ميتنازلش عنها ابدا

حبيبتى لم احب غيرك ولن احب غيرك
حبيبتى حاولت كثيرا ان انساكى
لم استطع

معرفش ايه اللى خلانى اكتب الكلام اللى فات يمكن مش عارف أعيش مش عارف احب واحدة تانية
يمكن مش عارف انسى حبى الاول
يمكن علشان كل يوم بالليل بحس بوحدتى القاتلة
يمكن علشان كل يوم بالليل بعيط كتير جدا
يمكن علشان كل يوم بالليل بلاقى حضنى فاضى
مبلقيش فى حضنى غير حزنى اللى محدش عارفه ولا شايفه ولا حاسه غيرى
مبلقيش فى حضنى غير الامى ووحدتى
كل يوم بالليل بحضن وحدتى واشكيلها همى وحزنى
ياربى انا معدش ليا غير الحزن ليه
ياربى انا مش قوى زى ما الناس فاكرانى
ياربى انا بتقطع من جوايا
ياربى هل اقترفت ذنبا كبيرا لتعذبنى هكذا
ياربى ارفع مقتك وغضبك عنى
يارب فك اسرى
ياربى ارحمنى وارحم ضعفى
ياربى الوحدة صعبة لا مش صعبة ديه قاتلة

معايا اصحاب كتير لكن محدش فيهم اقدر اترمى فى حضنه محدش فيهم ممكن اشكيله همى

انا محتاج لمسة ايديكى
انا محتاج ابتسامتك
انا محتاج حنيتك وطيبة قلبك
انا محتاجك كمصباح اهتدى به
انا محتاج اتكلم معاكى
انا محتاج نظرة عينيكى
انا محتاج تحطى ايديك على شعرى تانى
انا محتاج تطبطبى عليا تانى
انا محتاج تلمى قلبى اللى انكسر

عندى مشاعر كتيرة اوى اد اللى انا ادتهاليك واكتر كمان
نفسى اخرجها
خايف تموت جوايا
خايف اموت وتموت مشاعرى معايا



مش عايز اتجوز زوجة لأ
انا عايز زوجة صديقة حبيبة عشيقة ام اب اخ اخت تكون كل دنيايا واكون كل دنيتها واقدر اترمى فى حضنها اشكلها همى افرحها وتفرحنى ايدها فى ايدى منتكلمش لأ نهمس لبعض نوشوش بعض
عينيا تحفظ ملامحها حتى وهيا مش معايا ابتسامتها متفارقنيش

يارب الوحدة صعبة جدا

هل انتهى زمن الحب والعشق بالنسبة لى

لا ادرى



91 comments:

Abd El Rahman Magdy said...

مش عارف أقولك إيه
كلماتك لخصت كل حاجة
يمكن أنا حاسس بيك لأن الإحساس ده أنا حاسه دلوقتي
مش هاقدر أعمل فيها حكيم وأقولك اعمل واعمل واعمل لأني تقريبا باكتب حاجات قريبة من اللي انت كاتبه
ربنا يرزقك بيها
..................
على العموم
"اسمع كلامه"

خمسة فضفضة said...

السلام عليكم

ربنا يرزقك قريب ببنت الحلال اللي تسعدك
وما تقلقش زمن الحب الحقيقي لسه موجود
ربنا يوفقك وتلاقيه

Anonymous said...

ياااه ..جميل اوى يا محمد
انت كل مرة بتقولى انى كأنى بكتب اللى انت حاسه .. المرة دى انا بقولك انت كتبت كل اللى انا حاسس بيه ومش عاف اكتبه .. بالظبط كدة
"يمكن علشان كل يوم بالليل بحس بوحدتى القاتلة
يمكن علشان كل يوم بالليل بعيط كتير جدا
يمكن علشان كل يوم بالليل بلاقى حضنى فاضى
مبلقيش فى حضنى غير حزنى اللى محدش عارفه ولا شايفه ولا حاسه غيرى"

محمد عبد الغفار said...

ربنا يسعدك وينولك مرادك ويكتب لك فيه الخير

Amany Y. El-Saeed said...

ياااه يا محمد...أد إيه إحساسك صادق...ربنا معاك

شهيدة said...

أولا موضوعك حلو جدا وصادق جدا يا محمد
عبرت بشكل واضح وبسيط جدا جدا عن الحقيقة

والجميل أيضا ان تعبيرك عذري بمعنى انك عبرت عن حبيبتك بانك تتمنى تكون زوجتك وده شيء جميل جدا جدا

اللع معاك ويا ربب تتوفق وترجع تعيش الحب والسعادة والراحة

وبجد معاك حق الحياة من غير حب صعبة جدا والواحد بيبقى مكتئب على طول حاسس انو محتاج حاجة أو في حاجة ناقصاه بس مش قادر يعبر عنها

بس انت عبرت

جميل جدا
آسفة على الاطالة
وتحياتي

smraa alnil said...

محمد
الاحساس باك حضنك خاوي في عز ليلك
مش ادام غير الاستعاضة عنه بالمخدة

الاحساس ان دموعك نازلة ومش قادر تسمحها وبتبص في المرايا عشان نفسك حد يجيلك هو اللي يمسحهالك

الاحساس بان مشاعرك كتير وعايزة تنفجر في بني ادم هتخليه ملك علي الكة الارضية
الاحساس بان خلاص مش طايق وحدتك ومحتاج حد غير نفسك واللي حواليك تسكن جواه ويسكن جواك
صدقني دة مش شعورك لوحدك

جايز مش هيبقي بايدك اي شئ تعمله
غير انك تتاكد من شئ واحد بس
زي مانت جواك بركان مشاعر وبتدور علي الحب
اكيد في غيرك برضه بركان مشاعر وبتدور عليك

مش هولك غير انك تدعي لربنا يرزقك بحلمك
ويجمع نصك التاني زي ما بيقولوا
ومش تستعجل الحب عشان مش يبقي اختيارك غلطونابع من احتياجك للحب

فرق كويس اوي بين احتياج الواحد للحب وايمانه وادراكه بان اللي بيكر بيه دة هو لحب

صدقني حتي لو ايمانك ضعيف بالحب اكيد هتلاقه
بس هو محتاج مننا ننضف عيونا عشان نشوف بيها كويس

صبرا جميلا يا محمد

وان شاء الله ربنا هيسعدك ويرزقك

انا قلتلك قبل كدة اننا مش بادينا اي شئ غير اننا نصبر وندعي

The Alien said...

طب تقول إيه ف اللي فقد اﻷمل ف إنه يلاقي حد
لدرجة إني بحاول أشغل وقتي ودماغي تماما
بس برضه حالة الفراغ العاطفي اللي أنا عايش فيها مبهدلاني ومدياني إحساس عظيم بالوحدة

ممكن الإنسان يفضل طول عمره يدور علي الحب ده
ويمكن يموت من غير ما يقابل اللي بيدور عليه
بس لو حصل ولقيه
يبقي المفروض يتبت فيه

تحياتي وأمنياتي

Anonymous said...

حرام عليك يا محمد انت وسمرا ..هاتموتونى
هو انا ناقص

مصر هى أمى said...

عبود

الحمد لله انى لاقيت حد حاسس بيا

اسمع كلامه
هوا مين ده

مصر هى أمى said...

خمسة فضفضة
شكرا لزيارتك

امين يارب انى الاقى بنت الحلال وكل واحد فينا يلاقيها ويلاقى فعلا الحب الحقيقى

مصر هى أمى said...

طارق

هاجى ايه جنبك يا سيدى انا حاولت بس انى اتكلم عن نفسى
معلش لو كنت فكرتك بحاجة بس يالا كلنا فى الهوا سوا

مصر هى أمى said...

محمد عبد الغفار

امين يارب انا محتاج فعلا الدعوات ديه

مصر هى أمى said...

امانى

اخيرا علقتى عندى حمد الله على السلامة

ان شاء الله ربنا هيكون معايا

مصر هى أمى said...

شهيدة
اهلا بيكى ثم ايه اسفى على الاطالة ديه انتى اكتبى زى ما انتى عايزة

فعلا انا الانسانة ديه ببحث عنها ببحث عنها كزوجة مش كا اى حاجة تانية الواحد بيقعد عمره كله يدور عن الحب ويارب نلاقيه كلنا انا عبرت عن احساسى اللى انا بقالى سنيين بتعذب علشانه انتى مش متخيلة الوحدة بالليل عاملة ازاى
ربنا يكرمك يا ستى وتنولى انتى كمان الزوج المناسب ليكى اللى يكون جدير بشخصية زيك

مصر هى أمى said...

سمراء النيل
الصديقة الرائعة اللى حسيت انها اكتر واحدة هتحس بيا

ايه بقى حكاية المخدة ديه طب هكلمها ازاى وترد عايا هشكيلها ازاى همومى المخدة يا بنتى شالت عنى دموع كتير اوى كنت كل يوم بعيط عليها واشكلها همى وحزنى

انا طبع عارف ان فى واحدة اكيد جواها مشاعر من ناحيتى لكن نفسى الاقيها خايف اموت قبل ما الاقيها خايف ان مشاعرى تموت معايا
صبرا جميلا على رايك وان شاء الله كلنا هنلاقى الحب اللى بنتمناه

وفعلا احنا مفيش حاجة بايدينا

قلب أبيــض said...

دعوة عامة
أدعوكم انا احمد سعيد صاحب مدونة عاوز اتجوز للمشاركة معنا فى المدونة الجديدة والتى يوف تنال اعجابكم
وأدعوكم ايضا للمشاركة معنا فى المواضيع
وجزاكم الله خيرا
www.zawage.blogspot.com

Anonymous said...

Alslam alikom..... Rabna yorzo2ak 3agelan ISA bel zoga el sal7a ely ts3edak.
Sub7an Allah 3omri ma 7asset eno momken ragel yb2a byfakar keda i thought el bnat bas, (mesh asdi 7aga bgad) bas el fekra en el ragel b2edo ydwar we y.7tar we el mawdo3 dah karar howa momken ya.7do while en el bnat mesh b2edha 7aga zay keda. Rabna ykremak bas mato2afsh b3eed we testna ely enta 3aizo, you have to try till you find it ISA.

ibn nasser - ابن ناصر said...

ازيك يا محمد واحشني,,, وبقولك دور علي مهلك ترتاح بعدكده لحسن البنات اليومين دول قليلين اكويسين انا عار في ناس هتزعل بس بقول الحقيقه وربنا يرزقك ببت الحلال
تحياتي

halwasa-masrya said...

عادل ... انا مش بحب اشوف حد مضايق او مخنوء مش عشان انا ملاك بس يعنى الخنقة وحشة اوى انا مجرباها ومصاحبها كمان ..

بص يا جميل .. انا معرفش طبعا تفاصيل حبيبتك دى بس لو هى موجودةومش مرتبطة .. ماتحاول تصلح اللى انكسر يعنى .. اى حاجة بتنكسر بتتصلح حتى لو مرجعتش زى الاول بالوقت والصبر واتقاء ربنا فى العلاقة بترجع
انت محتاجلها وطول ما انت بتفكر فيها يبقى عمرك ما هتشوف غيرها ولا هتحس بحد تانى ..
الوحدة شىء بشع .. بتخلى الواحد يحس انو زىالطفل اللى فى حتة غريبة عنه .. بردان وتايه

جرب ترجع لخطيبتك .. مرة واتنين وتلاتة .. مش عيب .. صدقنى العمر مفيهوش كتير .. لسه حد امبارح قالى ( انبسطى عشان ميجيش عليكى وقت تلومى نفسك ) انت كمان حاول ولو محصلش نصيب يبقى تبدأ تنسى .. لازم يا محمد تنسى عشان متعش تعبان طول عمرك ولا موجوع من جرح قديم مش عارف تقفله


معلش انا رغاية .. بس احتمال الحاجات اللى طالعة من جواك هى اللى خلتنى اقلك كل ده والله وعندى اكتر بس انا حاسة انى عاملة زى المذيعة التايهة اللى لقت ضيف فى الصحرا

واخر حاجة

انبسط وطبطب على نفسك وحاول ترجع لحبك واستخير ربنا واقرا سورة يس او اسمعها بصوت مشارى راشد :)

أميرة البلطجية said...

بعد كلامك مفيش تعليق مناسب صراحة
.
.
ابلغ حاجة اني ادعيلك قلبك يرتاح ف الحلال
:)

أميرة البلطجية said...

بعد كلامك مفيش تعليق مناسب صراحة
.
.
ابلغ حاجة اني ادعيلك قلبك يرتاح ف الحلال
:)

أسوور said...

هتلاقيها يا محمد
هتقابلها .. هتحبك وتحبها
هتبقى كل حاجة ليك .. وهتبقى انت كل حاجة ليها .. هتفرح تانى .. وتحلم تانى
صدقنى هيحصل بس افتح قلبك لعلاقة جديدة
واحدة تخيب و واحدة تصيب
انت رقيق المشاعر ومرهف الحس لدرجة لا تصدق
المهم ان لما تلاقيها أوعى بعد كام سنة من الجواز تنسى انك حلمت بيها واتمنيتها من قلبك
أوعى ييجى يوم وتقول انك زهقت
بس هتلاقيها .. صدقنى

MoHaMeD HoSSaM said...

بصارحة يا محمد مش قادر اقولك غير انى مريت بالى انتى فيه قبل كدة
بس صدقنى حتلاقى تانى وحتحب تانى وحتعشق تانى بس انت اصبر ومتفقدش الامل وادى لنفسك فرصة تانية عشان تعيش تانى

جبهة التهييس الشعبية said...

عمي الرومانسي

ايه العواطشف دشي كلها

مين قال الحب ما بيجيش غير مرة واحدة في العمر؟

الحب






















.


.



.


ما بيجيش اساسا

SomeOne said...

سا الخير

اديني اتنين كيلو حب و مشاعر وصلحة

Unknown said...

حرام عليك يامحمد انت بجد خلتني أعيط):
محمد حاول انك تعيش حياتك تاني, وهقولك تاني افتح قلبك للحياه, وسامح نفسك بجد, ساعتها هتعرف تحب تاني, وهتعيش الحياه اللي بتتمناها ان شاء الله.
يارب ربنا يوفقك

فؤاده said...

حاسس بيك والله يا زميلي

عارف ازاي الواحد يكون حاسس انه فاضي من جواه
عارف ازاي حتى لو حياتك مليانة وحواليك ناس كتير بس طول الوقت حاسس بالوحدة
عارف كل ده وعارف الاحساس ده كويس

ان شاء تلاقي قصة الحب اللي بتحلم بيها

Islamist Bloke said...

سبحان الله

كتبت بوست قبل كدة بنفس الكلام والمعانى

حسيت انك انا

ده عنوان البوست

http://islamistbloke.blogspot.com/2006/12/female-partner.html#links

وربنا يهدينا اجمعين

نقطة أخيرة

يأيها الذين امنوا استعينوا بالصبر والصلاة

و ربنا يوفقك ويهدينا ويهديك

micheal said...

ربنا يوفقك يا محمد في ايجاد الحب الصادق لانك بجد تستاهل كل خير
تحياتي لك

سهر الليالى said...

اللى عنده كل الاحساس الراقى ده والمشاعر الحلوه دى لازم يلاقى حب صادق يسعده فى يوم من الايام هتلاقيه هتلاقيه
وعلى فكره الواحد ممكن يحب تانى
:)
تحياتى

Anonymous said...

الظاهر كله بقى بيهرب من السياسه الى المشاعر
والله معاكم حق
أخدنا ايه من السياسه
على كل حال ياريتنى كنت بفهم فى الحب والكلام ده
بس من تجربتى
الحب الأول لا يمكن يتنسى -ماشى
بس برضه الانسان اسمه انسان علشان بينسى
والوقت هو خير مساعد على النسيان
المهم انت نسيت اهم حاجه فى الحب
انه بيجى على غفله
انت مش بتكون متوقعه
انما بيجى
وحاجه تانيه كمان علشان يظهر أغلب المدونين طلعوا من صيدله
هو فعلا الحب كيمياء

شوف هو الحب لازال موجود
فين ؟
الله أعلم
بس أول لما تلاقيه قولى انا كمان عليه
:)
كل شىء مقدر ومكتوب

اما الجواز بقى
اذا اتجوزت اللى بتحبها
خلاص
خير وبركه
اتجوزت واحده تانيه
خلاص لازم تحبها بقى
مافيش رجعه
الجواز برضه مقدر ومكتوب
ومش عايز اقولك برضه زى البطيخه
انت وحظك بقى

بس فى حاجه مهمه قوى
ماتندمش كتير على اللى حبتها وماطولتهاش
ليه؟
انت بتبقى تحت تأثير السحر بتاعها فتبقى مغميه عنيك عن كل عيوبها
مش بيقولوا الحب أعمى
خلاص
هو كده
وبعدين مين عارف
يمكن ربنا يرزقك بواحده أحسن منها
ولا ايه ؟

اييييييييييييييه
دنيا
يلا معلش

اتمنى لك الخير والسلامه
والصحة

ودمت بخير
سلام

مصر هى أمى said...

اليان

الامل موجود ان شاء الله انا اما كتبت البوست ده كنت حاسس انى فقدت الامل لكن فى جزء صغير جوابا بيقول لسه فى امل

انا زيك بحاول كتير انى اشغل وقتى كله علشان مفكرش فى اللى انا فيه لكن بالليل وانا لوحدى بعمل زيك بقعد اعيط كتير

مصر هى أمى said...

طارق
بعد الشر عليك

ثم انا وسمرا ميتيين خلقة فمش فارقة حاجة

مصر هى أمى said...

احمد سعي
هزورك ان شاء الله

مصر هى أمى said...

انونومنس

شكرا على الرسالة انا طبعا مش عارف اذا كنت ولد او بنت
بس عموما الراجل زيه زى الفتاة عنده مشاعر بيحس وبيتالم مش معنى انه راجل يبقى لازم يكون جامد ومعندوش احساس او انه يعبر عنه الناس فاهمة الموضوع غلط فاهمة ان الواحد مدام راجل يبقى لازم يكتم مشاعرة وميعيطش ولا يقول ان بيحس الكلام ده غلط والناس فاهماه غلط
ربنا يكرم الجميع ان شاء الله بالزواج الصالح

مصر هى أمى said...

ابن ناصر
وانت كمان واحشنى جدا اخبارك واخبار مظاهراتك ايه
فعلا البنات الكويسة قليليين جدا بص اما ربنا يكرمك بواحدو كويسة وانت تضيعها من ايدك هيا دى الخسارة الحقيقية فعلا

ربنا يكرمك بزوجة كويسة ان شاء الله

Hannoda said...

آسفة جدا إني ماجيت متأخر
والأسف لنفسي مش ليك

مشاعرك قوية جدا و رائعة

زمن الحب اتغير وبقى نادر قوي فيه انك تلاقي حد بالإحساس ده

بس أكيد اللي يملك قلب زي قلبك لازم ربنا محوشله هدية تستحقه و يستحقها

أنا مش عارفة فهمت صح ولاّ لأ

لكن أنا حسيت إن وحدتك سببها تعلقك بحب حد مش معاك
لو مش معاك عشان اتخلت عن الحب يبقى لازم تفتح قلبك لغيرها و تهيقه للإستقبال من غير ماتقفل عليها هي و بس و تحرم نفسك من حب ممكن يكون قدامك


أما لو لو مش معاك لأي سبب تاني عالجه و قرب
أما بقى لو الحكاية مجرد إن الأوان مجاش فأكييد ربنا شايلك مفاجأه على قد مشاعرك
أصل أكيد لو حد شاف كمية الرقة اللي فقلبك هاتتخطف على طول.. :))

بجد بكل احترام بحيي مشاعرك

مصر هى أمى said...
This comment has been removed by the author.
مصر هى أمى said...

اميرة البلطجية

شكرا جدا على الدعوة بتاعتك
ربنا يخليكى

واحنا على اتفاقنا هجيبلك اخلاء طرف من كل الفيميل بلوجرز علشان انتى توافقى

مصر هى أمى said...

ياسمين
فى كل الحزن والخنقة اللى انا فيها
لسه عندى جزء صغير من الامل انى الاقيها

ربنا يسمع منك ان شاء الله وصدقينى ان شاء الله مش هقول انى زهقت

مصر هى أمى said...

محمد حسام

شوف انت مريت با اللى انا مريت بيه اكيد انت عارف الاحساس ده والشعور ده انك محتاجها

صدقنى انا بحاول افتح قلبى مرة تانية للاحساس بالحب مرة تانية

مصر هى أمى said...

جبهة التهييس الشعبية

عمك الرومانسى بيقولك لا ممكن ييجى
دا انا لو سمعت كلامك وقلت ان الحب مبيجييش اساسا امال كان ايه اللى انا كنت حاسه قبل كده بيسموه ايه اليومين دول
مش حب برده ولا غيروا اسمه

مصر هى أمى said...

شادى فايد

المحل قفل يا اسطى

مصر هى أمى said...

اسراء

انا اسف انا مقدرش اخلى واحدة طيبة ورائعة زيك تعيط معلش سامحينى

صدقينى انا بحاول افتح قلبى للحياة تانى وربنا يسهل ان شاء الله


المهم انتى ادعيلى

على فكرة بورسعيد حلوة اوى انا كنت فيها اليومين اللى فاتوا كانوا يومين حلوين اوى كل ما اقابل حد بورسعيدى اسئله عن خبث ولؤم
فلقيت كل البورسعيدية بيقولوى بتسأل عليهم ليه وحسيت ان انا هنضرب فى بورسعيد

مصر هى أمى said...

فؤادة

زميلى فى الوحدة شوفت احسا الوحدة صعب ازاى بيتخبك فاضى من جوالك علشان كده انا قولت انى خايف انى اموت وتموت مشاعرى معايا

مصر هى أمى said...

Islamist Bloke

اهلا بيك اول مرة تشرفنى

انا شوفت البوست بتاعك انت بتحكى عن امنية نفسك تحققها لكن انا بحكى عن ماضى بالنسبة ليا

انت بتحكى عن احتياجك للحب لكن انا بحكى عن حب كان عندى واكتر بكتير من اللى انت كاتبه لكن انا فقدته

ربنا يرزقنا بالحب ان شاء الله

مصر هى أمى said...

مايكل

ربنا يرزقنا كلنا ان شاء الله

مصر هى أمى said...

سهر الليالى

انتى شرفتينى

نفسى فعلا انى الاقيه تانى
انا عارف ان الواحد مكن يحب تانى لكن تفتكرى ممكن ينسى الحب الاول وانه ميقضيش حياته كلها فى مقارنات

مصر هى أمى said...

حسن محمود

اول حاجة
انا خريج تجارة ( بلا فخر ) مش صيدلة
الانسان اسمه انسان علشان بينسى ده صح بس مش كل حاجة بتتنسى يعنى عمر ما حد هينسى اهله عمره ما هينسى جذورة واصله زى بالظبط عمر ما حد يقدر ينسى حبه الاول
خلاص اول ما الاقى الحب هقولك على طول متقلقش بس الاقيه الاول
يا صديقى العزيز
انا مش ممكن اتجوز واحدة الا لما احبها الاول انا مش من النوع اللى يتجوز وبعد كده اشوف اذا كنت هاحبها ولا لأ

فعلا الحب اعمى وانا فى عيوب كتير مكنتش شايفها بس هاتلى واحد او واحدة مفيهاش عيوب
المهم انها تبقى عيوب مقبولة ممكن تتصلح
ربنا يرزقنا جميعا بالزوجة الصالحة

Just Me said...

ربنا يرزقك بواحده فعلا تبقى ليك الام و الزوجه و الحبيبة و الصديقه
..

hosnysoliman said...

العزيز محمد عادل الجميل
اسمى واجمل شىء فى الدنيا هى الحب..بالحب نحيا وبدون الحب حياتنا قبور..ولكن لقاء القلوب بالمحبة لها ميعاد والموعد هو مع اقدار الله حيث ان الطيبين للطيبات..فلا تستعجل الامور فكل شىء بميعاد..مع العلم بان لحظات الشوق للحبيب وطلب الوصال كثيرا ما تكون اجمل من ساعات الوصال نفسها..الحبيب محمد بداخلك انسان جميل قل وجوده فى هذا الزمان وانا على يقين بان الله سوف يرزقك من تستطيع ان ترعى و تحتضن ذلك القلب الانسان

-_- said...

ياعم ياعم

ايه الجمال ده كله

Unknown said...

اهاااااااااا عشان كده بورسعيد كانت منوره اليومين اللي فاتو, طب مش كنت تقول عشان كنا نعمل معاك الواجب.
علي فكره أنا دبستك في تاجين حلوين خالص((: أدخل عندي خدهم.

الدبور said...

حب ايه اللي انت جاي تقول عليه
انا لا اعتقد !
مش ناوي تيجي عندنا و لا ايه هو المؤتمر مش معاده قرب و لا ايه
ولما تيجي قول ان انت اسماعلاوي متعصب علشان تمشي و انت مطمن

halwasa-masrya said...

بص يا عادل .. انا مكنتش اعرف انها اتجوزت .. بس طالما اتجوزت خلاص باه .. قدر الله وما شاء فعل .. انت عارف انا جالى ايميل غريب مفهمتوش اوى بيتكلم عن ازاى الواحد يتخلص من همومه وبالرغم من انى مش مقتنعة بس هقلك عليها بيقلك يا سيدى تكتب همومك من غير خجل او كسوف فى ورقة زى ما انت حاسسها وبعدين تولع فى الورقة لحد ما تبقى رماد .. وتنفخ الرماد ده .. المتفائلاللى بعتهولى بيقول انه لو انا جوايا قناعة ان همومى اتحولت لرماد نفسيتى هتتظبط بالوقت .. مش عارفة اصلى لو كتبت همومى .. ساعتها هبقى محتاجة اولع فى كشكول

بالنسبة لموضوع العند.. اديك خدت درس عمرك ..ولعلمك كل الناس كده مبتعرفش قيمة الحاجة غير لما تروح منها .. زى الميا مبنحسش باهميتها غير لو توهنا فى صحرا

روق كده

الزعيـمة said...

زميلي الكريم محمد

كل منا بيمر بالمراحل دي قبل ما يلاقي الانسان المناسب اليشاركة حياتة

حاسة باحساسك لاني ياما حسيتة
ورغم كل شئ اكيد فية امل

صدقني مش بعيد تكون قريبة جدا منك
لكن الحب نصيب بيجي فى معاده
ونتمني انك تلاقيها بسرعه عشان نحضر فرح قريب ونفرح بيك وبيها

تمنياتي لك بالسعاده

NOHA said...

محمد

طبعا فيه ناس كتير ردوا عليك فى الموضوع دة و نصحوك تعمل ايه
لكن اللى عايزة اقوله ان الكلام مش بينفع فى الحالات دى
اد ايه الوحدة دى شيئ بشع و قاسى كأنك بتموت بالتصوير البطئ حتى لو شغلت نفسك باى شيى تعملة بردة هاتفضل حاسس بالوحدة

احيانا بقدر اهرب من الحالة دى و احيانا بفشل لكن اهى ازمة و بتعدى و الأيام بمشاكلها بتلهينا عن التفكير

المشكلة كلها بتكون فى الليل انا فعلا ما عنتش بنام من التفكير فى حالى وفى حال الدنيا كنا فين و مخططين لقيه و فى لحظة كل شيئ اتغير و رحنا فى اتجاة تانى و كلمات المواساة مش دايما بتفيد بالعكس ممكن تجرح اكتر و تضاعف الألم

انا ذنبى ايه ؟ صدقنى سألت نفسى السؤال دة كتير قوى و لكن عمرى ملقيت اجابةو قلت لنفسى اكيد ربنا هيفرحنا فى يوم من الأيام بعد ما انكتب علنا الحزن طول الفترة دى

الموضوع بتاعك دة ذى ما بيقولوا جاى على الجرح عندى سواء فى التوقيت او الموضوع

انا دلوقت وضعت مشاعرى و عواطفى فى صندوق و قفلت عليها و رميت المفتاح فى البحر الى ان يشاء الله اما ان المفتاح يحدفه الموج على الشاطئ تانى و حد يلاقيه اما انه يفضل ضايع على طول

هى دى الطريقة اللى تفكيرى هدانى ليها و اللى ممكن تخلينى اشعر براحة و هدوء نسبى و احاول اقف على رجلى و استأنف حياتى

Ahmad Hegab said...

ايه يا محمد فى ايه وجعت قلبى يا جدع

ربنا ينولك اللى فى مرادك يا رب

Amr Ahmed said...

عدولة الجميل الطيب

انا اسف اني اتاخرت عليك

بس ايه ياعمنا الرقة دي

انت طيب اوي يا محمد

بس ليس كل ميا يتمناه المرء يجده

اتمني لك من كل قلبي انك تلاقي بنت الحلال

وان شاء الله تسعدك
وطالما محصلش نصيب المرة الاولي
يبقي نحمد ربنا
وعسي ان تكرهوا شيئا

تحياتي يا بوب

اه صحيح
انا عاوز حلاوة المدولد بتاعتي

Anonymous said...

لابد أسالك مجموعة من الاسئله؟
1-هل لك هدف فى حياتك تسعى لتحقيقه
2-ماذا تعنى هذه الكلمات بالنسبه لك الكرامه.الثقة بالنفس.العزيمه.الحماس.القلب.العقل.القدر.الاحساس بالمسئوليه.
اننى اعلم كل ما نقصده ولذلك لابد من التعلم من المواقف.

مصر هى أمى said...

هنودة
انتى تشرفى فى اى وقت
البوست من ده على ده

حاجات كتير اوى
حب كان موجود وضاع منى او بمعنى اصح كان فى حد هوا السبب فى ضياعه منى

وحب نفسى الاقيه واطلع كل المشاعر اللى جوايا ليها المشاعر اللى بقالى سنيين بحوشها علشانها ونفسى انها تيجى لشان اديها مشاعرى وحياتى كلها

Rania Lelah said...

خلاص بقى
انا هعيط
:((
معقوله اول مرة ادخل مدونتك اخرج دمعتى على خدى
كلامك حلو و كله مشاعر حلوة قوى
ربنا ينولك زوجة صالحة
معقوله يا جدعان لسه فى ناس بالرومانسة دى؟؟؟؟؟؟؟؟؟؟
تحياتى

مصر هى أمى said...

just me

الله يخليكى ويسمع منك ربنا ان شاء الله

مصر هى أمى said...

الاستاذ العظيم والاب الكبير حسنى سليمان

عندك حق فى كل كلمة قلتها ان كل شىء بميعاد
الجملةاللى جاية ديه من تعليقك

مع العلم بان لحظات الشوق للحبيب وطلب الوصال كثيرا ما تكون اجمل من ساعات الوصال نفسها

بس انا خايف انى ملحقش اللقاء ده خايف ان لحظات الشوق تتطول لحد اما اموت واكون فضلت فى لخظات الانتظار واما توصل الحبيبة اكون انا بغادر الحياة كلها

شكرا جدا على كلمات المديح العظيمة اللى حد شرفتنى بيها

مصر هى أمى said...

شرم

شكرا يا سيدى

مصر هى أمى said...

اسراء

طبعا كانت منورة علشان انا فيها ولعلمك وانا مسافر فى السوبر جيت الدنيا قلبت تماما ومطرت طبعا حزننا على انى ماشى
واياكى تقولى فى عقل بالك انها كانت بتمطر علشان تنضف الجو منى وانا ماشى

رحت وخدنت التاجين اوامرك ماشية يا ستى

مصر هى أمى said...

الدبور

المؤتمر اتعمل وخلص بس للاسف انا مسافرتش

انا لايمكن اقول غير اهلاوى اهلاوى اهلاوى بالتلاتة ماشى

مصر هى أمى said...

هلوسة

ايه حكاية الصحرا اللى انتى ماسكة فيها ديه

مين الشخص المتفائل اوى ده اللى عايزنى اكتب همومى فى ورقة يا بنتى انا بتنطبق عليا اغنية
كتاب حياتى يا عين ماشفت زيه كتاب

يا بنتى انا همومى تكفى قبيلة بحالها وعايشة فى الصحرا برده

والله يا هلوسة انا بحاول اروق بقالى اربع سنيين من ساعة ما فقدت الحب الاول وانا بحاول اروق مش عارف الظاهر انى لازم اسكر واشرب مخدرات علشان انسى
لمعلوماتك هيا الحكاية مكنتش عند اوى الموضوع انه اصبح مش نافع ان احنا نرجع لبعض الخلافات بين الاهل اصبحت لا تطاق فكان لازم الانفصال حتى اما هيا طلبت منى ان احنا نرجع لبعض مكنش ينفع برده

مصر هى أمى said...

الزعيمة

الحب والزواج فعلا نصيب لكن اما تحسى ان نصيبك فى ايدك وتلاقى حد تانى بيعمل المستحيل علشان يضيعة ساعتها الاحساس بيكون قاسى اوى

اتمنى انى الاقيها وان شاء الله هتكونى مدعوة انتى وايهاب والدبلة فى ايديكوا الشمال انتوا الاتنين
ان شاء الله
وشكرا ليكى جدا

مصر هى أمى said...

نهى

صديقتى العزيزة
الحمد لله انك حاسة بيا وحاسة نفس احساسى فعلا الكلام كتير والنصايح كتير لكن محدش معاه فى قلبه زرار بيتحكم فيه

الحمد لله انك عرفتى تتحكمى فى نفسك وحطيتى مشاعرك فى صندوق ورميتيه فى البحر وان شاء الله ربنا هينولك اللى يستاهل يفتح الصندوق ويطلع مشاعرك اللى متخزنة جواه

مصر هى أمى said...

احمد حداد

سلامة قلبك من الوجع يا صديقى

ربنا ينولنا كلنا مرادنا والزوجة الصالحة ان شاء الله

مصر هى أمى said...

عمووووور الجميل

حلاوة المولد اتوزعت من زمان لو انت جيت من بدرى كنت خدت تفتكر انا كان ممكن اسيب حاجة فاضلة فى العلبة

يا سيدى ولا رقة مشاعر ولا حاجة انا بس بكتب عن احساس وشعور مفتقده واما تخلص كلية وتشتغل وتدخل فى مرحلة الفراغ العاطفى هتحس بنفس الاحساس وان كنت اتمنى من الله انه ينولك مرادك ومتتعذبش زيى

مصر هى أمى said...

انونومنس

ليا هدف اسعى الى تحقيقة ايوه هوا انى افضل مسلم وادخل الجنة وانول رضا الله وانى اثبت نفسى فى شغلى واكون اسرة مسلمة اربيها كويس وادخل بيهم الجنة

بس الكلمات ديه كلها انا فاهم قصد كلامك لكنمش معنى انك راجل انك لازم تضحى بمشاعرك انك تكتمها انك تقتلها علشان انا راجل كل ده هيؤدى الى الانفجار فى وقت من الاوقات

مصر هى أمى said...

رانيا

انا اسف والله انك اول مرة تدخلى عندى وتخرجى دمعتك على خدك
شكرا ليكى جدا على كلامك الحلو اوى ده
صدقينى لسة فى ناس كتير جدا عندها مشاعر حلوة جدا

إبراهيم محسن said...

الحب ما جاش عندك يا عمنا ووقف
انا هستعير كلمة صديقة اسمها ياسمين أنا حرة
قالت الحب قدر
قد يأتيك سعادة
قد يكون شقاء
قد لا يأتي
قد يأتي لشاب كي يدفع به للشيخوخة
الحب حظوظ
وحظوظ هي أقدارنا
اتمنى لك التوفيق يا محمد وانت حد كويس وبحترمه وصدقني انا شايف انك شخص مثالي جدا والحب موجود ليك بس واضح انه مستني اللحظة المناسبة

Memo said...

شوف يا حماده يا اخويا
اولا :الحب بيجي بيجي اكتر من مره و بكمياء و بفزياء واحياء كمان وعندك اكبر مثل على كدا المصطفي ص ما هو حب عائشه بعد خديجه وممكن اديك مليون مثل على اتنين حبو بعض و الظروف و الحياه مكتبتلهمش اللقا و كل واحد اتجوز حد تاني و سعداء جدا مع اجوازهم


ثانيا :مسن اللي خلاك تحب الانسانه دي مش ربنا ؟؟؟يبقا الوحيد اللي هيقدر ينسيهالك ربنا برضو او يبدلك خيرا منها او يجوزهالك

ثالثا : من لزم الاستغفار جعل الله له من كل هم فرجا و من كل مضيق مخرجا و رزقه من حيث لا يحتسب


تحياتشييييي

بيتنا القديم said...

زوجة+صديقة+عاشقة+ام+اخت

انت تطلب المستحيل

العنقاء اقرب لما تطلبه

تحياتي

Rania Lelah said...

بجد كلماتك بتهز المشاعر قوى
ربنا يسعدك يا رب
و على فكرة مبسوطة ان لسه فى زيك
تحياتى

مصر هى أمى said...

ابراهيم محسن

فعلا الحب زى القدر ممكن يكون كويس وممكن يكون مش كويس من وجهة نظرنا لان القدر من تدابير الله
انا كاتب البوست ده بعبر عن نفسى وعن قطاع كبير من الشباب حسوا انهم كبروا فى السن ولسه ملاقوش الحب ولا حتى اتجوزوا انا كنت بكتب عن شعورهم واحساسهم فى احتياجهم للحب والزوجة

مصر هى أمى said...

ميمو

صح الواحد ممكن يحب تانى وخير مثال انتى استشهدى بيه سيدنا محمد
لكن سيدنا محمد وحتى وهوا متزوج من السيدة عائشة كان لسه بيحب السيدة خديجة لدرجة انه كان بيجزل العطاء والخير لاصدقائها يعنى حتى سيدنا محمد مقدرش ينسى اول حب فى حياته ولاحتى مع قدرة وروعة السيدة عائشة قدرا تنسى سيدنا محمد حبه للسيدة خديجة

ربنا قادر فعلا انه يهبلى ولكل الناس الحب الصادق الجميل ان شاء الله
وعقبالك كده اما تحبى وتتجوزى بس متنسيش تعزمينى فى الفرح

مصر هى أمى said...

سمسم

يعنى انا بطلب زوجة تقولى العنقاء حرام عليك يا سيدى طيب اما ادخل دنيا الاول تبقى تجيلى العنقاء

مصر هى أمى said...

المدير بتاعى

انت انهى واحد فيهم علشان انا عندى خمس مديرين ماهو انا اللى شايل الشركة على اكتافى

اولا معناى الكرامة والرجولة انا عارفها كويس لكن معنى الحب والاحتياج ديه لا تتنافى مع معنى الكرامة لان الانسان بشر مكون من مجموعة من المشاعر والاحاسيس حتى حب الوطن والدين ده من التضحية بالحياة فى سبيلها برده مجموعة من المشاعر والاحاسيس انا مش مشكلتى ان حضرتك معندكش مشاعر ولا احاسيس وان حياتك جامدة بدون اى مشاعر فمش لازم اكون زيك انت مبسوط بنفسك كده انت حر لكن صدقنى اللى انت فيه ده غلط فى يوم من الايام هتندم على انك نكرت الحب من حياتك
مش معنى ان الانسان مكتوب فى شهادة ميلاده انه ذكر يبقى معناه انه ينكر احتياجاته من العاطفة او اى شىء يخليه انه يحس انه سعيد

لو حضرتك فهمت البوست كويس انا مكنتش بتكلم عن نفسى بس انا دخلت تجربة شخصية كمثال لكن انا كنت بتكلم عن طائفة كبيرة من الناس من الشباب لسه متجوزوش وحسوا انهم كبروا فى السن ومحتاجين زوجة تونس وحدتهم بالليل محتاجين صديقة يتكلموا معاها يطلعوا مشاعرهم واحاسيسهم اللى متخزنة جواهم ناس كتير مخزنة احساسها جاها لانهم بيرفضوا انهم يلعبوا او يتسلوا ببنات يقضوا معاهم وقت يشغلوا بيه وقت فراغهم لأ هما محتاجين زوجة بكل معنى الكلمة مش واحدة فى البيت كل مهمتها انها تطبخ وتغسل وتخلف بس مش محتاجين حياة جامدة لا محتاجين حياة كلها رقة وبيت يملئه الفرح والسعادة
افتكر يا سيادة المدير ديه حاجات صعب عليك انك تفهمها

بالنسبة لمن باعنى او طعننى بخنجر زى ما انت بتقول افتكر انك اكتر واحد عارف انه مكانش بايدى ولا بايديها احنا كنا مجبرين على الانفصال
بالنسبة لهواء الرجولة اللى انت عايزنى اتنسمه مش معنى انى اسخدمت تجربة شخصية كمثال وانا بتكلم عن مجموعة كبيرة من الشباب يبقى معناه انى مش متنسم لهواء الرجولة اقتكر انك انت اللى محتاج تتنسم هواء المشاعر والاحاسيس وتعرف معناها
لو كنت تعرف معناها مكنتش كتبت التعليق بتاعك

افتكر بع الرد ده ابدء الم ورقى وحاجتى واتنقل ادارة تانية ولا هتحول للتحقيق فى الشغل

اقرا التعليق بتاعى وافهمه كويس هتلاقى نفسك غلطان تماما مع انى متاكد انك عمرك ما هتعترف بغلطك حتى لو كنت عارف انك غلطان

المدير بتاعى انا عرفتك انت انهى فيهم من الجملة الاخيرة
صديقك من صدقك لا من صادقك

مصر هى أمى said...

رانيا ربنا يخليكى

وشكرا ليكى جدا

يساري مصري said...

الوحده صعبه يا ماررررااااارييي
ايه يا عم الدمعه فرت من عُنيه ماتاخد مخده فحضنك و تريح دماغك يعني
هههههههه
شَبيهيييي او انا شبيهك نفس اللينك عموماً
انت برج الجدي وانا كمان جدي فاهمك حلك حاجه واحدا والله فكك و قاضيها

والله عربدلك قد سنه وانت تنسا امها و تعالالبي بليل على قهوة استلا فالفلكي
نرفع الازازتين و تنام زيييي الفل
ههههه

و زي منواره قالتلك متستناش كتير عشان مش موجود

مصر هى أمى said...

هلوسة

ياااااااااااه بقالك كتير اوى مجيتيش عندى


اول حاجة الخنقة ديه بقت انا وهيا اصحاب جدا
سعادتك انا يمكن من يوم ما اتولدت وانا حاسس انى مخنوق الاحساس ده مسبتوش غير لمدة صغيرة اوى 3 سنيين بس منهم سنتين ونص اصحاب ونص سنة خطوبة وبعديها رجعلى احساس الخنقة تانى

اول حاجة مينفعش انى اصلح اى حاجة لانها ربنا يكرمها اتجوزت وحامل


انا عايز اقولك على حاجة انا يمكن حبها خلص من قلبى لكن انا مفتقد الايام ديه فده اللى مخلينى احس انى لسه بحبها لكن هيا ربنا يكرمها اتجوزت ويمكن يكون احسن منى ربنا يسعدها ان شاء الله

المشكلة انى بكره العند بتاعى لان بعد ما سبنا بعض هيا اتحايلت عليا ان احنا نرجع لبعض تانى لكن المشكلة ان العند ركبنى ازاى اسيبها وارجع لها تانى
علشان كده انا بندم الايام ديه على العند بتاعى

هلوسة الجرح مش قديم ولا حاجة والجرح مش عايز يتقفل نهائى مهما انا حاولت مش عارف اقفلة
ادعيلى

انتى نورتينى وانت مش رغاية ولا حاجة انا بتعجبنى تعليقاتك

مصر هى أمى said...

يسارى مصرى

صديقى فعلا نفس اللينك وبرج الجدى بس على فكرة انا عربدت بعديها 3 سنييين لكن للاسف مش عارف انسى الايام الحلوة ديه

نرفع الازازتين واالله فكرتنى بايام الجامعة

شرفتنى يا باشا

Anonymous said...

أهلاً .. كيفك ؟!

أتمنى أن حياتك تتحسن، وإنك تخرج من حالة الإكتئاب اللي إنت فيها .. أتمنى بالفعل إني أشوفك أحسن ..
أحببت مدونتك .. أتمنى أن تزور مدونتي أيضًا ..

شكرًا
أحمد

Anonymous said...

أحب أذكرك بنفسى، أنا كنت أرسلت تعليق بإسم "المدير بتاعك".

أولا أرجو أن تقبل تحياتى على هذه المدونة الرائعة وإن كنت لم أذكر هذا صراحةً فى ردى الأول بسبب ما أصابنى من حنق كنتيجة لقرائتى كلماتك فى موضوع الحب والمشاعر.
وأكثر ما لفت نظرى فى مدونتك هذه هو أسلوبك المتحضر فى إدارة الحوار المتبادل.
لقد قرأت ردك على كلماتى، وبالرغم من أنه للوهلة الأولى قد يبدو منطقيا إلا أنه فى الحقيقة يفتقر الى الأرضية المنطقية الصلبة التى كنت أتوقعها منك.
فهو رد مبنى على العاطفة والإنفعال أكثر من العقل والحجة.

دعنا لا ندخل فى مبارزة كلامية واختصارا للوقت ، أرجو أن تتنبه للآتى :

1- أنا لم و لن أنكر المشاعر او العواطف الإنسانية الراقية ولم أتعرض لها على الإطلاق فى رسالتى فقد كان كل كلامى منصبا على تجربتك الشخصية أكرر تجربتك الشخصية. وكان انتقادى متركزا على تمسكك بالوهم وبتلك المشاعر التى لا وجود لها فى حيز تجربتك الا فى داخلك أنت فقط. فلا معنى (على سبيل المثال) أن تطرد شخص برئ من منزلك ثم تقول له أرجو أن تشرفنى قبل مغادرتك منزلى بإضافة توقيعك فى اوتوجرافى. هذا هو بالضبط ما حدث فى تجربتك عندما دعتك هى أن تكون شاهدا على عقد زواجها ! فالمفترض أن كلا منكما رشيد وعاقل وكامل الأهلية يملك تماما خيار أن يقول نعم أو لا.

ومرة أخرى أذكرك بكلماتى :

من لا يقدر قيمتك لا يستحق أن تمنحة برهة من تفكيرك .... فما بالك بالدموع!!
من يبيعك فلا يستحق أن تظل متعلقاً بسرابه.
من يطعنك لا يستحق أن تجعل نفسك عبداً لخنجره.


2- لقد بنيت جزء من ردك على ذكر أننى أفتقر فى بيتى الى تلك العواطف والمشاعر فكيف لى أن أتحدث عنها ، وهذا واضح فى كلماتك التى نصها كالآتى:
" معندكش مشاعر ولا احاسيس وان حياتك جامدة بدون اى مشاعر فمش لازم اكون زيك انت مبسوط بنفسك كده انت حر لكن صدقنى اللى انت فيه ده غلط فى يوم من الايام هتندم على انك نكرت الحب من حياتك "

اسمح لى أن اوضح لك أنه فى الحقيقة هذا يعتبر بالنسبة لك غيب ! والغيب لا يعلمه إلا الله فقط. فأنت لا تعيش معى فى البيت وسط أولادى وزوجتى حتى تصل لهذا الحكم المجحف وتبنى عليه ردك. فإسلوبى خارج المنزل ليس معيارا أو مقياسا على خفايا بيتى التى لا يعلمها سوى الله ثم أنا وزوجتى. ..... وهذا جعل ردك بدرجة كبيرة مبنى على أرضة واهية.

3- حتى وان كنت أنت أدخلت تجربتك الشخصية كمثال، فهذا مثال ليس مثالا عادلا لتستخدمه فى هذا الموضع، فقد كان من الأحرى أن تستخدم مثالا حقيقيا يعبرعن الحب المتبادل والتفانى المبذول من كلا الطرفين فى التمسك بنصفه الآخر. ولكن مثالك هذا لا يعبر الا عن حب غير متبادل كما أننى لا أرى فيه أى تفانى أو تضحية من الطرف الآخر فى التمسك بك. وبالرغم من ذلك فإنك ما زلت تعيش تحت أطلال هذه التجربة. بل أنك سلمت نفسك أسيرا لهذا السراب بالرغم من أن الطرف الآخر تعيش الآن حياتها الطبيعية. وأنا متأكد أنها محت من عقلها تماما أى شىء يتعلق بهذه التجربة وأنها منتبهة جيدا لبيتها ولزوجها. فكيف ترتضى لنفسك هذا !!!

5- لا أعتقد أن كل الأشخاص المحيطين بك (بما فيهم أسرتك وأصدقائك) على خطأ فى حكمهم على تجربتك هذه وأنك الإنسان الوحيد الذى على صواب فأرجو أن تستيقظ من ثباتك العميق وأن تحرر نفسك من أسر هذا الوهم الذى لا وجود له إلا بداخلك .... سوف تجد يا اخى ما تبحث عنه سريعا شريطة أن تطهر قلبك وعقلك من الجراثيم والهلاوس التى زرعتها بداخلك هذه التجربة.

أعرف أن عنادك قد يدفعك الى التتفنن فى إيجاد رد تراه (من وجهة نظرك ) منطقيا ولكن فى النهاية لا يصح إلا الصحيح.

أعتذر ان وجدت بعض كلماتى موجعة. ولكن صديقك من صدقك لا من صادقك، فإدراك الحقيقة هى أول خطوة نحو حل المشكلة.

مصر هى أمى said...

احمد
اهلا وسهلا بيك وشكرا جدا على زيارتك

اكيد هازورك قريب ان شاء الله

Anonymous said...

تعرف انه اوقات كتير بتلازمنا حالةالحرمان العاطفى ده ونبقى فعلا مش لاقيين حضن واحد نقدر نرتاح فيه رغم كتر الناس اللى حوالينا بس يا ريت لما ربنا يديلك قلب حنين تقدر تحافظ عليه وما تعلموش القسوة اللى بقت سمة فى كل حياتنا

رباب