Sunday, March 11, 2007

اسراء وتاجاتها اللى مبتخلصش

اسراء مش عايزة ترحمنى من التاجات
كل ما يتبعتلها تاج تقوم مدبسانى فيه ماشى كلامك يا اسراء هانم طبعا الرجالة لازم تسمع كلام البنات وخصوصا الحلوين

قمت اتغديت للمرة التالتة النهاردة وقعدت على الكمبيوتر واستعديت للاسئلة بتاعة اسراء هانم ونبدأ الاجابة


اسم مدونتك ايه
مصر هى امى

لماذا اخترته.. ماذا تقصد به؟
اخترته واقصد بيه انى بحب مصر اوى فى مثل زمان كنت بسمعه الام تعشش والاب يطفش
المثل ده معناه ان الام هيا اللى بتلم اولادها حواليها ولو اى حد بص على مصر هيلاقيها كده المسلم عايش جنب المسيحى والسنى عايش مع الشيعى واللى من الصعيد عايش جنب اللى جاى من اسيا وبتاع اوروبا عايش جنب واحد امريكى كل دول مصر هيا اللى جمعتهم حواليها فا انا اعتبرتها انها ام لكل دول لانها بتتعامل انها الام
وانا كمان اعتبرتها انها امى

هل فكرت في إغلاق المدونة.. والسبب؟
عمرى ما فكرت اقفل المدونة خصوصا انى اتصاحبت على ناس كتير اوى حلوة بسببها انا اعتقد انى هافضل ادون لغاية يوم ما اموت

صورتك فى المدونة ..رمزيتها ؟
خريطة مصر معتقدش ان فى رمز اكتر من كده

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
سياسة على انسانيات على تجارب شخصية

لماذا تدون أصلا ؟
بحتول افرغ اللى جوايا على المدونة احنا كنا زمان بنكتب مذكراتنا فى كشكول ونفضل محتفظين بيه فى مكان امن
دلوقتى انا بعمل نفس الشىء بحاول افرغ اللى جوايا ويمكن حد يستفيد بيه

أحلى جملة قيلت لك فى وصف مدونتك ؟
كل واحد دخل عندى ترك تعليق مهما كان بعتبره جملة جميلة فى وصف المدونة

التعليقات بالنسبة لك ..أهميتها ؟
بهتم بيها جدا وبتحسسنى ان فى ناس مهتمية بيا وافتكر انها مهمة لاى مدون لانى بتكشف قيمة الشخص والموضوع اللى هوا كاتبه
وكمان فى تعليقات بتنمى شخصيتى وبتوضحلى حاجات كتير ممكن اكون مش واخد بالى منها
وبهتم جدا انى اما ادخل على حد واعلق عنده انى ادخل مرة تانية واشوف هوا رد على الكومنت بتاعى ولا لأ

أحلى بوست كتبته ..ضع اللينك ..ثم اذكر لماذا ؟
احلى بوست مفيش حد يقدر يقيم البوست بتاعه بس عموما البوست اللى قريب منى هوا
هل انا سعيد
وفى بوست تانى انا كتبته بس خايف انزله على المدونة لانه طويل اوى وكئيب جدا وسميته
هل هوا عقاب من الله
يمكن انزله قريب على المدونة
سبب انهم قريبين منى انا بتكلم فيهم عن تجربة شخصية مريت بيها ولغاية دلوقتى مش قادر اتخلص من اثارها

أفضل مدونة قرأتها ..يمكن اختيار عدة مدونات ؟
طبعا فى مدونات كتير اوى انا لفيت على مدونات كتير ورسيت فى الاخر ان كل المدونات اللى بعلق فيها هيا افضل مدونة شوفتها

أفضل بوست قرأته ..يمكن اختيار اكتر من لينك ؟
اى بوست بقراه والاقيه كويس بعتبره افضل بوست
بس عموما البوست اللى عمرى ما هنساه طول عمرى اللى قريته عند شارم مع اننا مش اصحاب ولا حاجة ونادرا اما حد فينا يعلق عند التانى بس هوا عنده بوست حلو اوى اسمه
جيش مصر مطلعش ساكن فى مدينة نصر
البوست ده وهم جدا جامد اوى

هل خسرت صديق بسبب كتابة هنا؟
معتقدش انى ممكن اخسر صديق بسبب كتابة هنا ولو حصل معتقدش انه كان صديق

حد قل ادبه فى التعليق ..ايه رد فعلك ؟
الحمد لله محصلش ممكن يكون حصل خلاف بين الناس اللى بتعلق عندى لكن كنت بحاول اهدى رتم الحوار بينهم بس لكن محصلش ان حد قل ادبه عندى
المرة الوحيدة اللى انا مسحت كومنت عندى ان لقيت واحدة من المثليات علقت عندى وطبع مكنتش متوقع انى الاقى اصلا ناس زى ديه عاملة مدونة من اصله ففوجئت بيها وكمان بتعلق عندى فطبعا مسحت الكومنت وهيا فهمت اكيد انى مش عايزها عندى من اصله

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
كل المدونات بتاعة الشواذ سواء اولاد او بنات
كل المدونات اللى بتهاجم الاديان بدون اى لازمة بدعوى الحرية
مدونة واحد اسمه ابو لهب شوفتها مرة ودخلت شتمته وخرجت تانى لانه كان كاتب قران هوا اللى مؤلفه وعمال يشتم فى الانبياء

أسوأ بوست ؟
اى بوست بيدافع عن كريم عامر فى تهمة ازدراء الاديان اما التهمة التانية فمفيش مشكلة انى ادافع فيها عن كريم عامر
البوست المشهور بتاع منال اللى فى مدونة منال وعلاء

أسوأ مدون ..مهو هتجاوب هتجاوب ؟
ابو لهب اللى اتكلمت عليه قبل كده
واحدة اسمها زبيدة عندها مدونة اسمها الحرملك
اى مدون شاذ

المطلوب منى ادبس اى حد فى التاج ده
ماشى ماهوا لازم تتدبسوا زى ما انا اتدبست واللى مضايق من التدبيسة دى يدعى على اسراء اللى هيا بتدبس اى مدون فى التاجات ديه

عموما رحمة باسراء من الدعاء عليها
كفاية عليها الدعاء بتاعى
اللى عايز ياخد التاج ده ياخدة ويحله ويورينا شطارته

49 comments:

raspoutine said...

ازيك يا محمد انا حبيت اعدى عليك واسيبلك السلام وكويس ده انا اول تعليق اهو
اجاباتك صريحه وسهلة وصادقة
انا لو وكيل نيابه وبحقق معاك فى اى قضيه لا قدر الله وربنا ميجبش وحش
انا هديلك
اخلاء سبيل بضمان نضافته قلبه

ربنا يكرمك يا محمد وتحي مصر ومصر تحبك زى ما انت وكلنا بنحبها
بس الظاهر ان مصر مشغولة حبتين عن ولادها اليومين دول او وخدا فى خاطرها مننا مش عارف ليه
ساعات بحس اننا عملنا حاجه غلط وزعلاناها وساعات بقول لاء المفروض اننا مهما زعلاناها هيا تبقى حنينة
مبقتش عارف يا محمد والله
بس المهم كنت منور الاوبرا

الزعيـمة said...

جميلة جدا اجاباتك يا محمد
وباين فيها صدقك وطيبة كل المصريين

ضحكت جدا على موضوع التعليق الانت حذفتة انها مثيلية وكمان جاية تعلق عندي .. حسيتك بجد مشمئز

ودا الحسيتة لما فوجئت بمدوناتهم
هما والادينين بيخلونى اشعر بالغثيان
وتجدهم يدافعون عن بعضهم البعض

مهو حرية باه وانت فاهم طبعا
اشتم , سب , العن , شذ
وقول حرية حد عنده اعتراض ؟

ربنا يكفينا شرهم ويحمي مصر
وكل المصريين من امثالهم

ارق تحياتي لك

Anonymous said...

محمد باشا
كلام جميل وكلام معقول
ماقدرش أقول حاجه عليها

ربنا يوفقك ياسيدى وتحقق كل أمنياتك
وان شاء الله مصر هاتتحسن حالتها طول مافى ناس زيك كده
بس لازم تخلى عندك أمل

ودمتم بخير

smraa alnil said...

حتي انت يا محمد
بس تصدق ايه اللي فلت تظري في البوست دة
انك اتغديت تلات مرات
ههههههههههههه
بس اجابتك جميلة والله

بس ليا عتاب بقي

بص يا سيدي بالنسبة لمدونات المثليات
انا مش بقول اني معاهم
واكيد ضدهم
بس الناس دي بجد تعبانة في حياتها
فلازم نتعامل معاهم علي انهم بني ادمين بغض النظر عن ميولهم او فكرهم ايه
هما بيقولوا ان هما كدة لانهم مش قادرين يتكلموا
بس اعرف زي مانت بتقول علي تجربة شخصية ليك هنا عشان مش قادر تقولها لحد من اصحابك او قرايبك
في منهم كمان بيصرخ هنا ويقول ان هما تعباننين
يعني من الاخر نتعامل معاهم علي انهم بني ادمين وخلاص
اوك يا فندم

وبعدين بطل اكل شوية عشان ناوية اخليك تعلب اسكواش مع الريس

ibn nasser - ابن ناصر said...

ايه الاجابات الجامده دي ,خلاص براءه المره دي
تحياتي يا صديقي

أميرة البلطجية said...

صباح الخير يا محمد
جميل التاج
وعلى فكرة ساعتك مأخرة
:)

NOHA said...

كيفيك يا محمد

ايه رايك فى التحية الشامى دى

انا مشفتش واحد بيحسد نفسه زيك كدة فيها ايه يعنى لما تتغدى تلات و لا اربع مرات!!!!!!!!!!

عموما انا شايفة ان موضوع التاج دة موضوع جميل قوى و من خلال كل تاج بتقدر تتعرف اكتر على شخصية المدونين و تكتشف فيها نواحى كتير قوى

ربنا يوفقك يا محمد و " بونابيتيه"

david santos said...

هذا عمل جيد جدا ، شكرا

Unknown said...

انت قصدك يعني انك بتدعي عليا لما بدبسك في التاجات دي, ماشي ماشي.
اجباتك صريحه وحلوه, طبعا باثتثناء ان اللي مش عاجبه يدعي علي اسراء, كمان عامل دعوه عشان الناس تدعي عليا, ربننننننا يسامحك, انت كنت شفتني دعيت علي أحمد فؤاد ولا أحمد مبرمج حر.
مانا حليت البوست بكل وداعه((:

Anonymous said...

انتا عارف انتا صريح اوي ودي بيعجبني فيك ربنا يصلح الحال بوست اكتر من امتياز تحياتي ليك ويلريت تبقي تشرفني دايما

جبهة التهييس الشعبية said...

اتقبض على ناس في مظاهرة
اظن التظاهرة التدوينية مش شغب ولا حاجة
رجاء من كل المدونين وضع هذه الأغنية في مدونتهم:
يا قبضتي دقي على الجدار
لحد ليلنا ما يتولد له نهار
يا قبضتي دقي على الحجر
لحد ما تصحي جميع البشر
مش فاهم اللي حاصل
لكن بقلبي واصل
واللي مش فاهمه عقلي
بتشرحه السلاسل
يا قلوب بتنزف دم في العتمة
يا قلوب بتنزف دم وتغني
سجنوكي والكلمة
غصبن عنها وعني
طلعت من القضبان وم الاسوار
الاكواد بتاعة الاغنية اهه
رجاء تبقى شعار المدونين في الوقت اللي بيتعرض فيه كل صاحب رأي - على اختلاف انتماءاتهم - للظلم
الاكواد بتاعتها في الموقع ده






كنت اخدتها من غزالي
http://www.macromedia.com/go/getflashplayer

جبهة التهييس الشعبية said...

تصحيح اللنك



http://www.mp3asset.com/swf/mp3/minime.swf?myid=1575758&f=3

Ahmad Hegab said...

فاكر لما كنت بتتكلم على موضوع أنك الاخ الوسطانى

أنا حاسس انك اخويا الكبير مش عارف ليه

يمكن علشان مليش اخوات كبار

انا ليا اصحاب اكبر منك على فكرة بس برضه انا اعتبرتك اخويا الكبير

يمكن علشان عجبنى فيك حبك للبلد دى مش عارف

بص يا عم الحاج انت اخويا الكبير و خلصنا

Unknown said...

ايه يا عم محمد

فين يا عم البوست الى يضحك الى قلت هتكتبه انا مستنيه اصلى نفسى اضحك شويه

تحياتى و على فكره انا مبقتش محتاج تاج علشان اعرفك انت بجد كل شئ مكتوب بوضوح و صراحه و نضافه على وشك

و الى يشوفك مش محتاج اى تاجات تانيه لانك بتدخل قلبه على طوووووول ة بيحش انه يعرفك من زمان


تحياتى
من واحد عارفك من زمااااااااااااااان

SomeOne said...

انا بمسي التماسي التماسي احسن تقولوا ان انا ناسي

محمد انا من متابعين منال
واول مرة اسمع عن البوست ده
يا ريت تكتبلي اللينك

إبراهيم محسن said...

إجاباتك كويسة زي بعضه بس واضح منها إنك صريح قوي.. وواضح.. وده يخليني أحبك أكتر

حبك لمصر ده حاجة جميلة واحييك على كده.. لأني محتاج إني أصالح مصر لأنها بجد محتاجانا نخلصها من اللي مسوأ صورتها وانت عارف مين هم

جميل إنك ترفض المثليين عندك ده يخليهم يكنوا شوية ويلزقوا في بعض بعيد عنا اللهم أحفظنا منهم

ثانياً ابو لهب ده متشتمهوش علشان متعملش عقلك بعقله يوم الدين يفصل بينا وربنا بجد يحفظنا من البشر دول كمان والله أراهن إن الشيطان بيستحي من كلامهم لأن الشيطان لا يجرؤ على سب الله كما فعل ابو لهب ونيكنييف والعياذ بالله


يالله سلام وربنا يوفقك

مصر هى أمى said...

ايمن
انتى تشرفنى فى اى وقت يا باشا والنبى يا ايمن انا بحبك بلاش حكاية وكيل النيابة ديه حتى ولو هاخد براءة
الصراحة احنا غلطانيين فى حق مصر ان سبنا الحرامية والافاقين ينهبوا فيها ويسوءوا سمعتها
مصر تالت دول فى العالم فى البحث عن كلمة جنس فى محرك جووجل
شوفت الهيافةاللى بقينا فيها
والدكتاتورية والظلم اللى احنا فيه كل ده مش عايز مصر تزعل مننا

الاوبرا كانت منورة بيك

مصر هى أمى said...

الزعيمة
زيارتك بتشرفنى دائما
شوفتى المدونات ديه بتثير اشمئزازك ازاى انا كمان صدمت لما شوفتها دا حتى اذا بليتم فاستتروا
المشكلة ان احنا فهمنا الحرية غلط الحرية مش معناها ان احنا نكون مخالفيين للقواعد الطبيعية على طول الخط عمر ما كانت ديه حرية

تحياتى ليكى

مصر هى أمى said...

حسن محمود اللى مش عايز يبقى مدون

مش عيب عليك تكون اخوان وتسمع اغانى وكمان تستشهد بيها دول لو عرفوا فى الجماعة يتاووك ومحدش يعرف طريقك تانى

والله يا صديقى انا عندى امل ان البلد ديه تتحسن ان فرج ربك لقريب ان شاء الله
ان بعد العسر يسرا
وما اعتقدش ان فى عسر اكتر من كده

مصر هى أمى said...

سمراء النيل
لفت نظرك انى اتغديت تلات مرات طب دا انا مش واخد راحتى فى الاكل اليومين دول علشان فى مشاكل بينى وبينهم فمبكلش كتير اليومين دول
----------------------

بالنسبة لتعليقك التانى عن الشواذ

عزيزتى سمراء

التجربة الشخصية اللى انا مقدرتش اقولها احد واقولتها على المدونة دى تجربة ممكن اى حد يمر بيها مش خرجت عن القانون الطبيعى للبشر اللى ربنا خلقهولنا
المدونة بتاعة المراة المثلية ديه كانت بتحكى وبكل فخر عن حكايتها مع صاحبتها وطريقة المعاشرة اللى كانت بينهم فديه واحدة مكنتش بتصرخ من الالم بل على العكس ديه كانت بتفتخر انها كده
اللى بتصرخ من الالم من انها مثلية ممكن تروح تتعالج وافتكر ان فى دكاترة ممكن تعالجهم لكن البنت ديه كانت اسلوبها فى كتابة البوستات قبيحة جدا
سيدنا عمر ابن الخطاب
اما وجد ان فى شواذ فى عهدة القى بيهم من فوق الجبل
الناس ديه بيزلزلوا عرش الرحمن من فعلتهم
البنت الشاذة ديه كانت كاتبة ان اللى بتعمله مش حرام وانهامقتنعة بكده معتقدش ان ديه واحدة ممكن اتعاطف معاها
---------
سمراء
الاسرائيلين بنى ادميين زينا هل ممكن اتعاطف مع واحد زى شارون او اليعازر
لا طبعا مش كل بنى ادم ممكن اتعاطف معاه وخصوصا ان البنت ديه بتفتخر انها مثلية
-------------------------------

تعاليلى بقى سعادتك
اسكواش ايه اللى هلعبه ومع مين
انتى بتهرجى ولا ايه دا انا لو قالولى خس وتلعب اسكواش هاكل فى اليوم عشرين مرة مش كره فى الاسكواش ولا حاجة بالعكس انا بحب الاسكواش جدا لكن انتى فاهمة بقاه
لمكن لو هالعب اسكواش مش شخصية ظريفة ورائعة زيك ممكن اخس ميت كيلو فى اسبوع ايه رايك
لكن حد تانى هاتخن ميت كيلو اى يوم واحد

مصر هى أمى said...

ابن ناصر

شكرا يا جميل وشكرا تانى انك سامحتنى
وشكرا على البراءة

مصر هى أمى said...

اميرة البلطجية
صباح النور يا باشا
الساعة متاخرة انا عارف لكن المشكلة ان صديقى اللى عملى المدونة مقاليش اغيرها ازاى وبصراحة انا مبعرفش فى الحاجات ديه وهوا بيزل فيا اما احب يعدلى حاجة

فمعلش اعذرينى لغاية اما اتصاحب على حد ممكن يصلحلى الساعة

مصر هى أمى said...

نهى
كيفيك انتى يا جميلة

طبعا انتى معايا فى حكاية حب الاكل ديه ايه المشكلة انى اتغدى تلات او اربع مرات

التاج فعلا حلو مع انه ساعات بتكون فيه اسئلة رخمة بس معلش هنعمل ايه
وشكرا ليكى يا باشا ومتقطعيش الزيارات

مصر هى أمى said...

دايفيد
شكرا ليك واهلا بيك فى اى وقت

مصر هى أمى said...

اسراء
اه قصدى انى ادعى عليك هوا انا هاخاف ولا ايه احنا برده رجالة اوى وبشنبات كمان يقف عليها الصقر
يعنى بصيتى على العى عليكى ومشفتيش وانا عمال اقول ماشى كلام الحلوين اللى زيك يااااااه دا البنات دول عالم غريبة بتدور على الخناق بس
تفتكرى ان فى حد يقدر يدعى على مدونة جميلة وحلوة زيك تتقطع لسان اى مدون يدعى عليكى باستثنائى طبعا
شكرا ليكى على التاج ويارب تفضلى دايما فكرانى بتاجاتك الهايلة ديه

مصر هى أمى said...

فارس
شكرا ليكى يا صديقى
وربنا فعلا يصلح الحال وانا رحت عندك ومدونتك حلوة وسيبت تعليق ياريت تقراة

مصر هى أمى said...

جبهة التهييس الشعبية للمرة الاولى والتانية
مش بعرف احط اكواد فى المدونة طب اعمل ايه محدش عايز يقولهالى اوعدك هاحاول

spoony said...

فعلا مدونتك شخصيه بحته وجيده وفعلا هيا دي المدونه لانك بتدون افكار اجتماعيه بس وجهه نظرك انتا ودي احسن حاجه ابقي تعالي زورني في مدونتي وياريت تبقي تلكمني شويه عن الندوات اللي بيعملها المدونين عشان انا بفكر ابقي احضرها بس يعني قبل ما الواحد يجي يفهم الموضوع ماشي ازاي
www.toto3alakaboto.blogspot.com

Unknown said...

أنا كنت بهزر معاك والله يامحمد.
وانا عارفه انك عارف اني بهزر((:
وطبعا مش هنساك من التاجات, أمال همررها لمين بس, بس ربنا يبعدها عني(:

شهيدة said...

سلام يا محمد

صادق زي عوايدك

تاج جميل
انا حنفذ وعدي ما نستش التاج القديم اللي بعتهولي
بس استنى علي لما أخلص الامتحانات اوكي

يللا سلام

مصر هى أمى said...

احمد حداد
ديه حاجة تشرفنى اوى بس ازاى اكون انا اخوك الكبير وانت احسن منى بكتيير اوى دا انا اما احتاج حاجة هجرى عليك انت ماشى يااخويا

مصر هى أمى said...

whyme
صديقى العزيز انت مش محتاج تاج علشان تعرفنى ولا انا محتاج تاج علشان اعرفك الطيبة اللى نابعة من كلامك ومن قلبك رائعة
انا مبسوط انى عرفتك والله

حاضر هاكتب الموضوع ده ان شاء الله علشان خاطرك انت بس

مصر هى أمى said...

شادى
الحمد لله ان احنا تحت نظر سعادتك
بخصوص البوست اللى انت عايز تعرفة للاسف انا مش بعرف اعمل لينكات لكن اسم البوست
سرتن سرتن فى كل مكان
عرفت انا ليه مكتبتهوش فى البوست عندى
روح شوفه انت بقاه

مصر هى أمى said...

ابراهيم
شكرا اوى لزيارتك
اجاباتى حلوة ربنا يخليك بس ايه زى بعضه ديه
ابو لهب استفزنى كلامه جدا بصراحة كان كلامه فيه قلة ادب مهولة ونيكنييف انا سمعت عنه لكن الحمد لله مشفتش مدونته انا فعلا بكره مدونات الادينيين والشواذ جدا

مصر هى أمى said...

spoony
شكرا لزيارتك

بخصوص الندوات احنا عملنا تلات ندوات لحد دلوقتى كنا فى الاول الغرض بتاعها ان المدونيين يتعارفوا على بعض يبقوا اصحاب ويتناقشوا فى كل حاجة مشتركة بينهم والموضوع اتطور بعد كده وبقينا نفكر ان احنا نعمل جمعية للمدونيين تقوم بنشاط خيرى زى زيارة الايتام والملاجى والمسننين وان شاء الله هبلغك بميعاد المقابلة اللى جاية

مصر هى أمى said...

اسراء
ايه كل الاعتذارات ديه يا بنتى انا اللى كنت بهزر ولو مضايق من التاج كنت برده حليته علشان خاطرك هوا انا خلفت الا اسراء

انا عارف كويس انك كنتى بتهزرى
وربنا يديم المعروف وتكونى فاكرانى دايما

مصر هى أمى said...

شهيدة
بعد معركة اول امتحان
والحمد لله عديته بسلام حد عاقل يكتب بوست قبل الامتحان بساعة
انا سايبك لحد ما تخلصى الامتحانات بس عايزين الخمس مواقف اللى محدش يعرفها

Ahmad Hegab said...

يا خواتى على التوضع

دى حاجة تشرفنى يا محمد

كلبوزة لكن سمباتيك said...

طيب مفيش اختيارات؟

:)

تحياتي

Tamer Nabil Moussa said...

ازيك محمد

اخبارك اية

اية حكاية التاج دة انا عايز اعرف مين اول واحد مخترع لفكرة التاج دى

كل ما يخرج من القلب يدخل الى القلب

تحياتى+

سهر الليالى said...

ايه الاجابات الصريحه دى
على فكره انا متفقه مع سمراء فى حكايه المثليات ده
تحياتى

أسوور said...

شكرا يا محمد على دعمك ومساندتك لى فى محنتى

بجد شكرا

تحية من قلب مجروح

Memo said...

ana 3iza posttttttttt
7aram kifia tagat la7ad kda
tahiatshyyy

مصر هى أمى said...

احمد حداد

ده يشرفنى انا يا جميل

مصر هى أمى said...

سمباتيك

احنا فى دولة ديمقراطية مفيهاش اى اختيارات ده اذا كان عاجبكم

مصر هى أمى said...

تامر
افكار مرعبة

نفسى اشوف مين اللى اخترع التاجات ديه بس ساعات بتبقى لذيذة وبتعرف المدونيين ببعضهم وتفكيرهم

مصر هى أمى said...

امانى
متفقة مع سمراء على العموم ممكن تقرى ردى على تعليق سمراء

على العموم اهلا بيكى فى اى وقت

مصر هى أمى said...

ياسمين
اخيرا خرجتى من العزلة الحياة لازم تستمر وخليكى قوية زى الصورة اللى انا رسمتهالك فى خيالى عنك
ووقفنا كلنا جنبك ده اقل واجب ممكن نعمله

مصر هى أمى said...

ميمو
حاضر يا ستى فى بوست جديد
بس هوا فى غرفة العمليات بيتجهز الاول انتى عارفة اهم من الشغل تظبيط الشغل