Thursday, March 1, 2007

جربت مرة تكون أعمى

معرفش ليه التفكير ده سيطر عليا هل حد فينا فكر مرة انه يغمى عينيه ويقضى يوم كامل وهوا مغمى عينيه
اغلبية الناس هتسأل ليه التفكير ده
هقولكم
فى يوم وانا رايح الشغل قررت اروح بالمترو المهم ركبت من المحطة بتاعتى ووقفت بين الكراسى ووسط الناس لقيت ادامى طفل صغير عمره بتاع 8 سنيين وكان اعمى وكان معاه والده بيوصله للمدرسة لان الطفل ده كان لابس لبس المدرسة بعد كام محطة واحد قاعد ادامهم قام وانا قعدت مكانه اقعدت ابصله وافكر ايه شعورى لاقدر الله لو كنت اتولدت اعمى كنت هاحس بأيه كنت هاحس بالدنيا واتمتع بيها ولا لأ
اقعدت اتكلم مع الطفل ولكرم ربنا بالطفل ده كان ظريف جدا
كل الناس اللى فى المترو قعدت تضحك وتهزر معاه بس كل واحد تيجى محطته يقوم يسلم على الطفل ده وينزل ويسيب الطفل ووالده
انا كمان جت محطتى بس قررت ما انزلش واكمل مع الطفل معرفش ليه حبيت افضل معاه يمكن علشان عمرى ما فكرت ايه شعور الاطفال ديه
يمكن اللى بيتولد ما بيسمعش هنقوا اهه اسمه شايف واللى عايزين نقولهوله هنكتبه وهوا يقراه
واللى مابيكلمش اهوا شايف وبيسمع لكن فعلا اصعب حاجة انك متشوفش
متقدرش تتخيل حتى شكل الشحرة لانه عمره ما شافها حتى العربية او حتى السرير اللى هوا نايم عليه شكل الساندوتش اللى هوا بياكله حتى لو كبر واتجوز ميقدرش يتخيل شكل مراته ايه
حتى ابسط حاجة فى حياته انه يحلم وهوا نايم ميقدرش يحلم لانه ميعرفش شكل اى حاجة
سألت والده هوا بيروح مدرسة ليه
قالى هوا بيتعلم بطريقة برايل وبيحفظ قرأن طبعا والده كان صعبان عليا اوى بيبقى صعب جدا ان يكون عندك ابن ليه نفس الحالة
معندهمش غير هذا الطفل ديه الجملة اللى قالهالى الاب وهوا كان خايف جدا لو مات هوا والام مين اللى هيراعى الطفل ده
مفيش حد
وما أعتقدش ان الجيران ولا حتى الاقارب اليومين دول لسه عندهم الشهامة انها تراعى طفل فى هذه الحالة
اقعدت افكر فعلا نعم ربنا علينا لاتعد ولا تحصى اهمها نعمة النظر
هوا الواحد بيشوف بيها الدنيا بيستمتع بيها يعرف يمشى لواحده مش هيحتاج لحد يعديه الشارع
فضلت افكر فى نعمة النظر وقعدت اشكر ربنا على انه محرمنيش من النعمة ديه
جت المحطة اللى الطفل هينزل فيها قمت معاه ومسكت ايده ونزلت من المترو ووصلته مع باباه لحد المدرسة
اقعدت اتخيل طفل زى ده محروم حتى من اللعب فى الشارع محروم حتى من انه يمشى لوحدة انه يختار هدومه بنفسه انه ينقى اى حاجة يحبها
طول طريق رجوعى من المدرسة للشغل بتاعى قعدت اشكر ربنا على نعمة النظر
ياريت كل اللى يقرا البوست ده يشكر ربنا على نعمة الكثيرة التى انعم بها علينا

رب اعنى على ذكرك وشكرك وحسن عبادتك
امين يارب العالمين

109 comments:

Anonymous said...

باحث علم الاعصاب لافرنسى فيليب بينو قال فى وصف الحالة دى

ان الذين ولدوا عميانا يشكلون أحلامهم فقط من خبرات اللمس والسمع والتذوق وهى فقط المعلومات المخزنة والمستحدمة فى الحلم
أى فى الغالب ما تكون الأحلام عبارة عن ضوضاء أو أحاسيس أو روائح أو الشعور بوجود احد ما الى جوار الحالم يتكلم معه أو عند الحلم بالقراءة أو الكلمات يحلم الحالم فيما يرى بأنه يقرأ بطريقة برايل
الا أن أحلامهم تخلو من الصور والألوان

=========

أحيانا يا عزيزى ما يكون فقد البصر نعمة كبيرة على صاحبه
تقيه شر المناظر القبيحة القذرة فى دنياه
ربما هى رحمة من الله بقلبه الرقيق

ولو كان والداه يخشيان عليه قسوة الحياة
فهما لن يكونا أحن عليه ممن خلقه
هو بين يديه

تحياتى

Anonymous said...

السلام عليكم

ايه بس ياعم محمد مش تخليك محضر خير بينى وبين الزعيمه؟
ياسيدى هى قلبها أبيض ونسيت الموضوع خلاص بتفكرها ليه بقى ؟
ايه ياعم بتثبتلى ان الستات أحسن من الرجاله ولا ايه؟
;)
المهم بالنسبه لموضوع العمى ده
الواحد مهما عمل مش هايقدر يوفى ربنا حقه
الحمد لله على كل حال وعلى كل حاجه
بس تأكد ان ربنا ليه حكمه من كل حاجه هو -جل جلاله عملها- يعنى مافيش حاجه بتبقى اعتباط
وده فكرنى بقصه قديمه من الاثر
الله قال للملايكة اقبضوا روح الست دى
وهى كانت لسه بترضع ولد صغير
فطبعا الملايكة بتنفذ الأوامر وبس بس صعب عليهم الولد الصغير
طبعا الله لا يخفى شىء عليه فى الأرض ولا فى السماء
بعد مامر زمن كبير قوى
الله أمرهم انهم يقبضوا روح راجل عجوز جدا
المهم الملايكة لقيته متمسك قوى بالحياه
اتعجبوا قوى ايه اللى بيخليه يحجب الدنيا قوى كده
هنا ربنا قال ليهم هو ده الولد اللى صعب عليكم لما قبضتم روح والدته
على كل حال الواحد مايتعجبش أبدا من قدر الله لأن له فى ذلك حكم
والله أعلم بس غالبا اللى بيبقى فاقد حاسه النظر بتبقى حواسه التانيه قويه قوى زى السمع أو الشم
وشوف الفيديو ده

http://www.youtube.com/watch?v=Fto7qfJ7xUg

انا أول لما شفت الفيديو ده عن طريق مدونه انسانه
http://2insana.blogspot.com/
هى كاتبه الكلمات بتاعته بالانجليزى فى موضوع هى نشراه وحاطه فيه الفيديو

اخر حاجه بقى
أذكر بحرف ال ذ مش ال ز
وشكرا جزيلا
سلام

أميرة البلطجية said...

جزاك الله كل خير يا محمد عن البوست دي
واللهم ما اصبح وامسي بي من نعمة او بأحد من خلقك فمنك وحدك لا شريك لك غلك الحمد ولك الشكر

hosnysoliman said...

الحبيب محمد..انا قرات التعليقات الثلاثة السابقه وكله جميله وكويسة اعتقد ان هذا المنطق واضح وبينفى عقل كل انسان عنده ايمان بالله الخالق مهما كانت ديانته وحتى الكافر فهو يعلم انه مخلوق بقدرة وقوة ما وان لم يؤمن بالله فهو يؤمن بحتمية فرضت من الله وان لم يؤمن به وهى حجة عليه يوم القيامة الا وهى حتمية الموت.
الذى لفت نظرى واحببته فى هذا الموضوع انت ولااحد غغيرك..ليه؟؟؟؟؟؟؟؟؟؟
انت كنت راكب المترو وركب ناس ونزل ناس وضحك ناس مع الولد ولما جات المحطه كل واحد نزل فى محطته
انت الوحيد اللى اهتمت وتفكرت وتحركت مشاعر الى الحد الذى بقيت فيه مع الولد الى باب مدرسته
لم يكن فعلك هذا من الافعال النبيله التى ان تدلت فانما تدل على قدر كبير من طيب المشاعر وبياض القلب والقرب من الله
كما اريد ان اقول شىء اخر
تالمت عندما قال لك والده احنا مش عارفين الولد حايعمل ايه لما نموت..
انا عايز اسال سؤال وجواب انتى عنه بنفسك انتى ايه اللى جعلك لاتنزل فى المحطة التى كان من المفروض ان تنزل فيها وكملت معاه لحد المدرسة..هل تظن ان الله لن يسخر له من يكمل معه مشوار حياته..الله سبحانه وتعالى له من الصفات مالا يحصى ولا يعد ولايمكن استيعاب كنه هذه الصفات ومنها انه عليم خبير حكيم عليم رؤوف و رحمان رحيم الحبيب محمد زاد حبى وتقديرى وقربى منك ومن قلبك وشخصك ما ذكرته زادك الله رقة وعطفا وقربا من الاخرين والاحساس بهم..انى احبك فى الله

كلبوزة لكن سمباتيك said...

سقطت الذال سهوا من كلمة ذكرك
----

فعلا عندك حق
تصور في نعمة بنستهين بيها كلنا هي نعمة الاستحمام
عادي كل يوم ننزل تحت الدش و محدش متصور ان دي حاجة لها قيمة او انها نعمة

لكن اللي بيتلقى علاج اشعاعي -نسال الله السلامة- ممنوع من لمس الماء لجسمه
تصور ان يعيش الانسان محروم من الاستحمام

ربنا يرحمنا و يعينا على شكر نعمته

----
عايزاك ضروري عندي
ايدك معانا
و هات كل اصحابك معاك
ضروري قبل بكرة

Ahmad Hegab said...

بجد انا سرحت فى كلامك و ركبت معاك المترو و فضلت اتفرج على الولد و مانزلتش برضة فى المحطة و روحت وصلتوه لمدرستة و بما انى محدش شافنى انا دخلت معاه المدرسة و عشت معاه يومه

اللهم انى احمدك و اشكر فضلك على ما انا فيه

Amr Ahmed said...

انت رقيق اوي يا محمد

بس سبحان الله له في كل شئ حكمة

وبعدين مفيش انسان كامل

يعني اكيد ربنا مديله حاجة
مش عند الناس اللي بتشوف

الحمد لله علي نعم ربنا
التي لانشعر بها الا بعد ان نفقدها

The Eagles said...

الحمد لله على النعم التى انعمنا بها والتى نعلمها والنعم التى انعمنا بها ولا نعلمها
الحمد لله على كل شىء
اضم صوتى لصوت كلبوزة
سقوط الذال سهو من ذكر الله
بسم الله الرحمن الرحيم
لقد خلقنا الانسان فى احسن تقويم
صدق الله العظيم
فى شخص شرحلى معنى الاية دى وهى ان ربنا خلق كل انسان فى ابهى صورة له والتى يعملها هو وحده
انت فعلا انسان يا محمد انك تحس بالاخرين وكتب الموضوع باسلوب حسستنا
اننا كنا معاك فى نفس المترو
بص يا مان
احنا بنقترح اجتماع قريب عشان نظبط للاجتماع اللى حددناه يوم البورصة
لان ان شاء الله هيكون فى مفاجاة جامدة جدا
ابقى ضفنى عشان نتكلم ونظبط مع بعض
hoba_2800@yahoo.com


والسلام.........

Amr Ahmed said...

حملة انقذو الاقصي من الزملاء المدونين
قاسم افندي
http://kassemafandi.blogspot.com/

كلبوزة لكن سمباتيك
http://kalbozza.blogspot.com/
ارجو الاهتمام

Hannoda said...

حسستني بتأنيب ضمير لما قلت:
وما أعتقدش ان الجيران ولا حتى الاقارب اليومين دول لسه عندهم الشهامة انها تراعى طفل فى هذه الحالة

ربنا يخليله أبوه وامه

و البوست رائع و الأروع انك وصلته للمدرسة

ربنا يجازيك كل خير ويديله الصبر

-_- said...

فكرتنى بشريط للشيخ محمد حسين يعقوب بيتكلم فيها عن غض البصر و ازاي انها نعمة اكبر من البصر نفسه

كان شريط مؤثر جدا لانه اتكلم عن العمى و قد ايه الانسان ممكن يتحول في ثانية لشخص كفيف

أسوور said...

الحمد لله على نعمة البصر بجد

كتير فكرت فى اللى انت بتقوله دة

واكتر حاجة تعذب حد مش انه يكون كفيف .. لأ .. ان ابنه .. فلذة كبده يكون كدة

Ahmed Shokeir said...

عظمية هي تلك النعمة التي انعمها الله علينا ولمن حرمها الله منها يكفي قول الله عز وجل في الحديث القدسي

من أذهبت حبيبتيه فصبر و احتسب لم أرض له ثوابا دون الجنة

وحبيبتيه هنا يقصد عينيه

فما اعظم اجرا عند الله من الجنة

raspoutine said...

محمد عادل

قد ايه انت انسان طيب القلب وحنين وشعورك مرهف اوى
بس انا عايز اقولك هوا ممكن يكون الطفل ده نقصاه حاجه مهمه اوى زى نعمة البصر لكن اعتقد ان ربنا سبحانه وتعالى انعم عليه بنعم تانيه كتير اوى مش محسساه بنقصه وانا مبعتبرشوش ناقص حاجه
كفايه يا محمد الحب اللى شافه الطفل من غير ما يكون بيشوف شافه وحاسه منكم من ناس لايعرفوه ولا يعرفهم لمجرد ان دمه خفيف
يعنى ربنا سبحانه وتعالى انعم عليه بنعمه الحب ومن احبه ربه حبب اليه عبده

صح ولا ايه ؟؟

مصر هى أمى said...

شهروزة
ده اللى انا قولته انه مش قادر حتى يتخيل شكل الشجرة ولا لون اى حاجة
طبعا كلامك صح انه ممكن تكون رحمة من ربنا ووقاه شر المناظر القبيحة لكن برده الحياة فيها مناظر جميلة هوا محروم منها
والده مؤمن بربنا لكن برده ميمنعش انه يقلق عليه ده شعور طبيعى

مصر هى أمى said...

حسن محمود

اهلا بيك لا والله ياسيدى انا كنت بستفسر بس لانى لاقيت مدونة باسمك فقلت اسال انت ده ولا لأ لانك معزمتنيش على الافتتاح
انا طول عمرى محضر خير متقلقش بدليل انى كنت بهدى من رتم الحوار اللى بينكوا
طبعا ربنا هوا اللى بيسير خلقه كما يشاء لكن احنا برده بشر بيصعب علينا فلان او علان ده شىء طبيعى

شكرا جدا على التصحيح بس هوا خطأ مش مقصود وجزاك الله كل خير

مصر هى أمى said...

اميرة البلطجية

ربنا يبركلك ويستجيب لدعائك ان شاء الله

مصر هى أمى said...

استاذنا الكبير / حسنى سليمان
شكرا جدا على تشريفك عندى
وشكر تانى على كلماتك الجميلة عن شخصى المتواضع
الجملة اللى جاية انا مقتبسها من تعليق سعادتك عندى

كما اريد ان اقول شىء اخر
تالمت عندما قال لك والده احنا مش عارفين الولد حايعمل ايه لما نموت..
انا عايز اسال سؤال وجواب انتى عنه بنفسك انتى ايه اللى جعلك لاتنزل فى المحطة التى كان من المفروض ان تنزل فيها وكملت معاه لحد المدرسة..هل تظن ان الله لن يسخر له من يكمل معه مشوار حياته..الله سبحانه وتعالى له من الصفات مالا يحصى ولا يعد ولايمكن استيعاب كنه هذه الصفات ومنها انه عليم خبير حكيم عليم رؤوف و رحمان رحيم

استاذ حسنى ده من احسن التعليقات اللى جالى عارف ليه لانى مفكرتش التفكير ده نهائى انا اما عملت كده ورحت مع الولد المدرسة مجاش فى بالى انى افكر ان ربنا هيسخر ليه حد يكمل معاه مشوار الحياة
والله ديه حكمة انا تعلمتها منك

ربنا يباركلك ان شاء الله وانا كمان احبك فى الله

مصر هى أمى said...

سمباتيك

شكرا على التصحيح

صحيح نعمة الاستحمام نعمة جميلة جدا
لكن اللى بيتعالجوا بالاشعاع ربنا يشفيهم مسيرهم فى يوم من الايام يخفوا ان شاء الله لكن اللى بيتولد فاقد نعمة البصر مبيخفش بيفضل طول عمرة فاقد هذه النعمة

انا رحت عندك وبعت الميل لليونسكو
وان شاء الله ييجى بفايدة

مصر هى أمى said...

احمد حداد

ياريت فعلا كلنا نعمل كده متتصورش السعادة اللى كان فيها الولد ده عاملة ايه والناس كانت بتتكلم معاه

وانت اهه احسن منى انك دخلت معاه المدرسة ولعبت معاه حتى ده لو محصلش كفاية شعورك العظيم ده يثبت ان مصر لسه فيها شباب فيهم الخير

مصر هى أمى said...

عموووووووور

تعال انت وقعت تحت ايدى تروح الحفلة من غير ما تقولى ماشى والله لاوريك

صح كلامك مفيش انسان كامل وربنا يكرم الطفل ده ان شاء الله
الحمد لله فعلا على نعم ربنا

مصر هى أمى said...

ايجل

انا موافق على اى اجتماع تقولوه

نعم ربنا علينا كتيرة ولا تعد

ربنا فعلا خلقنا فى احسن تقويم لكن المشكلة ان احنا اما نبص على حد فاقد النعمة ديه بيصعب علينا

الحمد لله الذى عافانا مما ابتلى به الاخرين

مصر هى أمى said...

عمرو احمد
خلاص انا روحت عند كلبوزة وبعت الميل وان شاء الله ييجى بفايدة

مصر هى أمى said...

هنودة
شكرا ليكى جدا
انتى شايفة ايه لسه فى ناس فيهم الخير ولا لأ

اعتقد ان الخير موجود بس فى ناس قليلة بس

الخير فى وفى امتى الى يوم الدين
ده كان حديث شريف عن سيدنا محمد

شكرا اوى لزيارتك

مصر هى أمى said...

شارم

اهلا بيك
طبعا غض البصر نعمة كبيرة اوى ياريت كل الناس تحاول تطبقها ده هيحمى الشباب من حاجات كتير غلط بيعملوها

البوست ده مش هييجى حاجة جنب بوستاتك الهايلة اللى انت بتكتبها

مصر هى أمى said...

ياسمين

احلى حاجة قولتيها احساس الامومة والابوة اللى انت اتكلمتى عليه
بتبقى حاجة صعبة جدا على الاهل ربنا يصبرهم ويجعلهم فى ميزان حسناتهم

مصر هى أمى said...

الاستاذ المبجل / احمد شقير
اخيرا شرف عندى

انت منورنى والله

شكرا جدا على الحيث الشريف ده
انا اول مرة اسمعه فجزاك الله كل خير
ومن علمنى حرفا صرت له عبدا
فما بالك بحديث عظيم زى ده اتعلمته منك فشكرا ليك
صدقنى لو الواحد ضامن انه هيصبر ويحتسب مش هيزعل على فقدان اى شىء من نعم الله علينا
لكن المشكلة ان احنا بشر بنبص وبنحلم وبنتمنى حتى الحاجة اللى مش فى ايدينا بنعوزها لينا ربنا يلهمنا جميعا الصواب وحسن الخاتمة

ياريت تزورنى دايما

مصر هى أمى said...

راسبوتين

صح يا صديقى العزيز من احبه ربه حبب اليه عبده

والطفل ده كان فعلا ظريف جدا وكان بيهرج مع اى حد يتكلم معاه
اكتر حاجة فرحتنى انه كان حافظ قرأن كتير وبيجود القرأن كمان
ربنا يجعله فى ميزان حسناته
شكرا ليك جدا على الزيارة

big big girl...in a big big world said...

اول شىء بيحى الانسان فيك

تانى شىء بقى انا بحس ان الكفيف بيشوف الدنيا برضه

بس بيشفها as it is

يعنى انت لما تتعرف على حد اول شىء بترتطم بيه هو شكله الخارجى
لكن الكفيف بيشوف روحه

احنا شايفين الكرسى ده
و هو حاسس الكرسى ده
حاسس تفاصيله
عارف حقيقته

و اخيرا فعلا الحمد لله الحمد لله الحمد لله

Ummah said...

yeah,..ana fakart keteer abl keda fy 7agat zay dy ,..ya3ny law makontesh bashof aw basma3 aw bat7arak,...besara7a kont ba7es be so3obet el mawdo3 we mekdar el 7agat elly el ensan momken yet7erem menha....!!!

el sha7'seya elly mesh ba2dar ata7'ayalha "Helen Keller" .....ezay kanet ma7roma men 7agat keteer bas fy nafs el wa2t kanet 3aysha,..we mesh 3aysha bas dy kan kolaha amal we a7lam ...!!

sob7an allah..!

فؤاده said...

الغريب ان الواحد لو بص لطفل زي ده وحس بالنعمة اللي هو فيها المفروض ما يزعلش على اي حاجه ، لكن تعمل في النفس البشرية ، ممكن الواحد يزعل ويموت نفسه
على حاجات تافهة وملهاش اي لازمة
ويحس ان ربنا مضيقها عليه من غير سبب

بس طبعا حكمة وعدل ربنا موجودين
وممكن الطفل ده لما ربنا يكرمه ويدخل الجنة هيقول الحمد لله ان انا طلعت كده

ibn nasser - ابن ناصر said...

فعلا الحمدلله علي نعمة البصر وفكرت في الحكايه دي زمان عارف يا مصر هي أمي قلت ايه ,قلت يا تري ايه أغلي حاسه عند الانسان قلت البصر من غيرها الواحد يعيش ازاي بعدين قلت السمع يعني منتسمعش بعدين الكلام وبعدين بعدين ,,,,ولاقيت سبحان الله اي حاسه بتقل بتعمل عجز كبير,لكن أعتقد انه يري ,
لكنه يري
بقلبه

تحياتي

halwasa-masrya said...

السلام عليكم يا عادل
ازيك .. بوست حلو
اولا: الحمد لله على كل حال
ثانيا : معلش تعاطفك وحده مع الطفل مش هيفيده بحاجة .. حول تعاطفك الى طاقة ايجابية هتسالنى ازاى ؟؟؟
هقلك .. بص يا سيدى .. جمعية رسالة فيها قسم اسمه قسم المكفوفين ده موجود فى كل فروعها ومتهيالى اقربفرع لشغلك هو المهندسين
الموضوع مش محتاج اى مجهود وانا مجرباه ولعلمك بيكون سهل اوى .. عايز تساعد كفيف بجد؟؟

ممكن توصله فى سكتك لاى حته او حتى تاخد ملازم وتكتبها ورد على الكومبيوتر بتاعك وتبعتهالهم بالايميل عشان هما يحولوها برايل - ممكن كمان تاخد منهم كتاب وتسجله بصوتك عشان الكفيف يسمع الشريط ويقرا الكتاب بعينيك انت - لو اللى فات صعب عليك - روح ساعة واحدة بعد الشغل اقرا لاى مكفوف صفحتين تلاتة فى اى كتاب وصدقنى هتلاقى حاجات كتير اتغيرت فى حياتك من غير ما تعرفلها سبب.....

تعاطفك هينتهى بانتهاء يومك وممكن يمتد معاك يومين تلاته بس الاهم انك تحوله لطاقة ايجايبة توظفها فى خدمةالبنى ادم اللى اتعاطفت مع حالته
معلش .. انا بقيت رغاية

The Alien said...

مش عارف ليه دايما بفكر ف الموضوع ده
ودايما بغمض عيني وأتخيل إني أعمي
وف النهاية دايما بعيط

إحنا مش بنحس بـأي حاجة فادينا غير لما تضيع
تحياتي

Memo said...

دايما اقول الحمد لله على نعمه النظر و العقل و الصحه
تحياتشي

الأباصيرى said...

أية ياعم
أنا شكلى هعيط ولا حاجة

بجد ربنا يصبرهم لان الموضوع بيبقى صعب أوى سواء للطفل أو للأهل

بحييك لاحساسك الجميل

تحياتى يابو قلب أبيض

مصر هى أمى said...

big big girl...in a big big world
شكرا ليكى جدا

صح هوا فاقد نعمة البصر بيشوف برده لكن بروحة لكن هوا بيحس ان فى حاجة ناقصاه او يمكن احنا اللى بنحس ان لو حصلنا كده هتكون فى حاجة ناقصانا

شرفتينى بالزيارة

مصر هى أمى said...

omas
اول حاجة انت نورتنى
ياريت بعد كده تكتب عربى او انجليزى لانى بصراحة جاهل فى اللغة ديه اوى وخليت واحد زميلى يقرالى الكومنت بتاعك لانى مبعرفش اقرا اللغة ديه

المثال بتاع هيلين كيلر مثال حلو جدا بس هيا شخصية واحدة اللىعملت كده لكن فى ناس كتير جدافقدوا النعمة ديهومش قادرين يكملوا حياتهم

micheal said...

مشاعرك جميله أوي يا محمد و دة أنا حسيته منذ رؤيتك في لقاء المدونيين...و الحمد لله علي نعمه النظر
تحياتي لك

مصر هى أمى said...

فؤادة
طبعا النفس البشرية فيها حاجات كتير طماعة وميملاش عين الانسان اللى التراب
فالحمد لله على نعمه علينا وياريت الناس كلها تبص للنعمة اللى فى ايديها

مصر هى أمى said...

ابن ناصر
طبعا نعم ربنا كلها حلوة اوى وعظيمة بس ليا راى ان احنا عاملين نقول انه بيشوف بقلبة لكن احنا عمرنا متحطينا فى الموقف ده علشان نقول

وكلامك صح ان فقدان اى نعمة بتعمل فرق كبير عند الانسان

مصر هى أمى said...

هلوسة

اولا انا زعلان من حكاية قفل مدونتك وبناشد اى حد يقرا الكومنت ده انه يروح يطلب منك انك تسيبى المدونة وتفضلى تكتبى
------------------------------
------------------------------
------------------------------

انا الحمد لله وشكرا على سؤالك
صدقينى انا فعلا فكرت انى اعمل حاجة لكن مكنتش عارف اعمل ايه واوعدك انى هاروح فعلا جمعية رسالة واعمل حاجة وطبعا الشكر ليكى انك وجهتينى للناحية ديه

انتى مش رغاية ولا حاجة واتمنى اشوفك فى اجتماع المدونيين اللى جاى علشان كلنا نتلم عليكى ونقنعك انك متفليش المدونة

مصر هى أمى said...

اليان

كلامك صح احنا مش بنحس بالنعمة غير لما تضبع مننا
وانا اقعدت اتخيل حياتى من غير نعمة النظر كان شعور رهيب صدقينى فما بالك باللى اتولد من غيرها

مصر هى أمى said...

ميمو

كواحنا فى الاجتماع الاخير لقيت المدونيين كلهم بيتكلموا عليكى بالذات عمرو اريدكى انثى
كان نفسى فعلا انى اشوف مدونتك والحمد لله وصلتى عندى معنى ذلك انى اخدت الاذن انى ازورك فى مدونتك ممكن

الحمد لله على كل نعم ربنا

تحياتشششششششششششششششششى

جبهة التهييس الشعبية said...

انت بتقول لي خشي عشان يجيلي اكتئاب؟

انا مقموصة

مصر هى أمى said...

الاباصيرى
بعد ما خرج من قمم الشغل

شكرا يا جميل على كلمة قلب ابيض

ربنا فعلا يصبر الطفل واهلة

مصر هى أمى said...

مايكل
شكرا ليك انت يا جميل وانت اللى مشاعرك فعلا نبيلة ورائعة جدا

مصر هى أمى said...

جبهة التهييس الشعبية

احنا اسفين يا باشا انى كتبت موضوع جابلك اكتئاب
والنبى ما تتقمصى دا انت الوحيدة اللى كوميدية فى المدونيين تيجى انتى يجيلك اكتئاب سماح المرة ديه ماشى واما تيجى اجتماع المدونيين هصالحك ماشى

sydalany-وش مكرمش said...

أخيرا لقيت مدون تخين
بس إنت لسة صغير
145

أنا أزيد منك بعيل صغير
175

Ummah said...

أسفة جدا على الكتابة كدة....!!!ا ساعات مش ببقى مقررة حكتب انجليزى ولا عربى....بس على كل حال حاخد بالى بعد كدة ان شاء الله....و انا مراعية النقطة دى فى المدونة بتاعتى عشان الوضوح فى المواضيع الكبيرة...ان شاء الله اشوفكوا هناك...!!ا
شكرا

مصر هى أمى said...

وش مكرمش

ياااااااااه اخيرا لقيت صديق مدون رفيع زيى انت فين من زمان
هاعمل المستحيل علشان اوصل لوزنك استنى عليا يومين بس

مصر هى أمى said...

omas
ولا يهمك يا ياباشا انتى سعادتك تكتبى باللغة اللى انتى عايزاها واحنا نتحرق فى الترجمة
الاعتذار مقبول ولا يهميك

بس سؤال هتشوفينا هنالك فين انا مش فاهم

mado said...

انا كذا مرة فكرت في الموضوع ده و حاولت فعلا اني امشي في الشارع مثلا و انا مغمض عيني خالص و كان الموضوع صعب اوي لان التوازن عندي كان بايز خالص

بص موضوع انه مش عارف شكل الشجرة او شكل مراته لما يتجوز و كده، اعتقد ان ربنا سبحانه و تعالي ادلهم خيال قوي اوي و تعامل مع الأصابع و تواصل معاها كبير برضه فاحيانا مع لمس الأشياء و خياله الخصب يكون جاب تقريبا 80% من شكل اللي قدامه و ده بيساعده كتير علي التواصل غير انه برضه ممكن بمجرد وصف للحاجة اللي عايزها انه يكون شكلها

اللهم أعني علي ان اشكر نعمتك التي انعمت علي و علي والدي

Anonymous said...

محمد .. معلش ردت متاخر
البوست جميل اوى ... واحساسك بالطفل دة كان انسانى اوى.
عارف .. انت كنت بتقولى انى بعرف اكتب اللى بحسه وعبر عنه ... بس فى الاخر اهو احساسى انا .. انما انت اجمل حاجة فيك انك بتحس اوى باللى حوالك.. نعمة جميلة اوى انك تقدر تشوف اللى حوالك من جوا ..ومتكونش اعمى وعينك مفتحين.
عاوز اقولك انى كنت مبسوووووط اوى لما كلمتنى على التليقون. فرقت معايا كتير مكالمتك.

عاجبنى اوى تعليق big big girl ..
وعجبنى اوى الاقتراح بتاع هلوسة .. ايه رايك؟

Anonymous said...

محمد باشا
كده برضه تشك فيه؟
يعنى هأعمل مدونة ومش هاقولك؟
ده كلام !!!!
يا ابنى اذا قررت ان شاء الله أعمل مدونة أكيد هاعزمك
ياعمى انا عارف ان قلبك طيب وانك محضر خير
والدليل اهه انك تأثرت بالولد الكفيف
بس انا أضطريت أعمل أكونت مش مدونة علشان أعرف أرد على الناس اللى مانعه الانينموس و اللى مالهمش مدونات
علشان أعلق على توتا و كلبوظه لكن سمباتيك
وبعدين لما الزعيمة عملت البوست قلت يالا أعلق عندها هى كمان
وسبحان الله يا أخى متفق مع رأيك ميه فى الميه ودى حاجه غريبه

على كل حال شكلى هابقى معلق دائم عندك
اذا مش عندك مانع يعنى

والرد بتاع هلوسة مصرية هو الرد العملى - ناوى أروح قريب ان شاءالله

ودمت بخير وصحة
سلام

الدبور said...

الحمد لله الذي عافانا مما ابتلي به كثيرا من خلقه و فضلنا علي خلقه تفضيلا

افضل دعاء تقوله عند رؤية المبتلي
وربنا يعافينا كلنا

تحياتي
الدبور

الزعيـمة said...

فكرة البوست دي تحفة
بجد بتخلينا نفكر فى النعم العندنا
ونحمد ربنا سبحانة وتعالى عليها
كمان بتخلينا نفكر فى الناس
الربنا اراد لها انها تكون عمياء
ياتري عايشة ازاى وبتتخيل اية وبتفكر فى اية وهي مش شايفة اى شئ

مرات فكرت اجرب انى اغمض عيني
واحاول اشوف احساسي وحعمل اية

بس لقيتة صعب جدا وخصوصا للحس بالنعمه دي وبعد كدا يفقدها

لكن اكيد ربنا مع الابتلاء
بيعطي الصبر والتحمل

الزميل الكريم محمد
بحييك على مشاعرك الرقيقة دي
والحمد لله على نعمه التى لا تعد ولا تحصي


ارق تحياتي لك

MAKSOFA said...

الحمد لله علي كل نعم الله سبحانه وتعالي علينا

مصر هى أمى said...

مادو

اهلا بيك طبعا الموضوع بيكون صعب جدا علينا لكن اللى بيكون كفيف ربنا بيلهمه ازاى يتصرف ويمشى مع احساسه
طبعا احنا ممكن نقعد نحكيلهم على شكل الاشياء لكن اكيد اما الواحد يشوفها

مصر هى أمى said...

واحد من الناس
مفيش مشكلة انك تيجى متاخر اهم حاجة عندى انك تعلق عندى وانا كمان كنت مبسوط جدا بمكالمتك وياريت تكرر دايما ونتقابل زى ما اتفقنا

الحمد لله طبعا انه الهمنى انى افضل مع الطفل ده لغاية اما اوصله للمدرسة
طبعا اقتراح
bigbig girl
وهلوسة جميل جدا وانا هاحاول انى انفذهم لكن حكاية انى اوصل واحد فيهم كل يوم هتبقى صعبة جدا لان مواعيد شغلى ملخبطة تماما
طارق احلى حاجة فيك انك فعلا بتقدر تعبر عن نفسك وده اللى انا قولتهولك فى التليفون

اجتماع المدونيين هيكون يوم الجمعة لازم تيجى ماشى

مصر هى أمى said...

حسن محمود
يا جميل انا مقدرش اشك فيك انا كنت بستفسر بس
ولازم تعزمنى على الافتتاح ولا ناوى تضيع عليا التورتة والجاتوة

انا معنديش اى مانع انك تشرفنى وتعلق عندى انا عارف ان فى حاجات مشتركة بينا وده طبيعى ولو فى اختلاف عمره ما هيفسد الود بينا
وشرفنى دايما

مصر هى أمى said...

الدبور

الحمد لله الحمد لله فعلا

وشكرا ليك وربنا يستجيب لدعائنا ان شاء الله

وهشوفك فى الاجتماع ان شاء الله

مصر هى أمى said...

الزعيمة
شكرا ليكى فى الاول
وياريت متحرميناش من ارائك لانها كتير جدا بتعجبنى وزيارتك بتسرنى جدا وبيسعدنى مشاركتك معايا

كل الكومنتات اللى جاتلى بتقول انها حاولت تفكر التفكير ده وتخيلت نفسها مبتشفش والنتيجة زى ما حضرتك قولتى انها حاجة صعبة جدا تخيلى بأه احساس اللى اتولد وهوا فاقد هذه النعمة صعبة جداوربنا يصبرهم ويجعلهم فى ميزان حسناتهم ان شاء الله

انا اما كتبت البوست ده كان قصدى انى احكى عن شعورى ناحية اللى شوفته واشكر ربنا على نعمه واطلب من الناس انها تشكر الله على نعمه

الزميلة العزيزة الزعيمة اشكرك جدا
والحمد لله فعلا على نعم الله علينا

مصر هى أمى said...

مكسوفة

الحمد لله فعلا على نعم الله علينا
وشكرا لزيارتك

smraa alnil said...

انتو اكيد ناوين علي موتي النهاردة
ابكيتني يا محمد

علي فكرة من فقد بصره انعم الله عليه ببصيرة مش موجودة فينا

اللي اتولدوا كدة عندهم القدرة علي الاحساس واللمس والشعور بالشئ
تخيل الولد دة لو لمس حاجة ممكن يقولك لونها ايه

بيحس ان كان دة وحش ولا حلو

وزي ما شهروزة قالت
ربك كريم بعباده
انا تخيلت نفسي عامية قبل كدة
بس عارف لقيت الحياة ممكن تكون احلي لاني مش هشوف اللي بشوفه دلوقتي

ربنا يصبر اهله ويديلهم الصحة والرزق يارب
وبجد انت انسان اوي عشان تعمل كدة

اللي انت شفته دة انا شفته كتير مع اطفال بجد
مختلف الاعاقات
هبقي اكتب بوست واحكي فيه علاقتي مع عبد الرحمن
طفل معاق كنت بمرنه سباحه
اد ايه كنت بحبه اوي

كان نفسي دايما اساعد حد محتاج
وجاتلي الفرصة اني اساعد في جزء من علاجه بالسباحة
انت كمان لازم تعمل كدة
اقل خدمة انك رسمت ابتسامة علي وشه ودي صدقة
عارف
انت خليتني اعيط ونفسي اشوف الولد دة
ما تديني عنوان مدرسته

ibn nasser - ابن ناصر said...

يا مصر هي أمي
نسيت اقولك حاجه -بس ماتضحكش- تخيلت لو كان كل اللي عايشين في البلد عميان بنوع الحزب الوطني هايعملوا فينا ايه ؟؟؟هههههه والموضوع اللي جاي متقلبوش نكد بفي هه؟

raspoutine said...

دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


وذلك يوم


الجمعه الموافق 9/3/2007


بدار الاوبرا المصريه


كوفى شوب الابداع


بجوار دار الابداع بداخل الاوبرا


والدخول للمكان من البوابه الخلفيه للاوبرا امام النادى الاهلى


والحضور بالملابس الشتوية


واوجه الدعوة خاصة الى الاخوات المدونات

اخوك ايمن

kaed said...

أخى العزيز مصر هى أمى
قال العرب قديما كل ذى عاهة جبار
من منا لا يذكر هوميروس و بيتهوفن و طة حسين و الأمثلة كثيرة و كلهم كانوا أصحاب عاهات من لايملك البصيرة هو الأعمى يا سيدى

frozen love said...

انا فكرت التفكير ده قبل كده..وكتبت قصة كده كمان...فعلا متفق معاك

الحمد لله الذي عافانا

معلش متاخر عليك بقالي كم بوست بس اول ما فضيت جتلك على طوول

تحياتي

مصر هى أمى said...

سمراء

احنا اكيد ناويين على موتك
حرام عليكى طب نعيش ازاى من غيرك

سمراء ناس كتير قالتلى ان اللى فقدوا النعمة ديه مبسوطين انهم مشفوش الحاجات السيئة اللى احنا بنشوفها
لكن الحياة برده فيها حاجات كويسة كتيرة
مستنيين البوست بتاع صديقك عبد الرحمن وربنا يباركلك انك رسمتى على وجهه ابتسامة وانتى احسن منى انك فضلتى تساعديه مدة كبيرة لكن انا وقفت معاه مدة صغيرة بس

انا مش فاكر المدرسة عنوانها ايه بالظبط لكن احنا نزلنا محطة غمرة ومشينا فى شوية شوارع لكن هاحاول انى اجيبلك الوصف بالظبط

مصر هى أمى said...

ابن ناصر

يا اخى حرام عليك هيا البلد ناقصة فهما بتوع الحزب عندهم عمى اصلا عن الحق يبقوا كمان مبيشوفوش هيا البلد ناقصة مصايب

مصر هى أمى said...

راسبوتين
انا جاى ان شاء الله وسيبت تعليق عندك بستئذن فيه انى اجى

مصر هى أمى said...

قائد

مرحبا بيك الاول فى اول زيارة عندى
طبعا فى ناس كتيرة عظماء لكن احنا عمرنا ما فكرنا احساسهم ايه عمر ما حد سألهم انتواحاسيين بان فى حاجة ناقصاكم ولا لأ

مصر هى أمى said...

فروزن لاف

انت تشرفنى فى اى وقت واهلا بيك
احنا متفقين مع بعض علشان فى حاجات كتير مشتركة بينا
ياريت تبعتلى القصة ديه او انشرها فى بوست انا متاكد انها هتكون عظيمة

admelmasry said...

مش عارف اقولك ايه بصراحه

مش لاقي كلام

بنوتة من وسط البلد said...

محمد انا عاجبنى اوى اوى موضوعك ربنا يبارك فيك

بحب هذه الموضوعات والتى تبحث فى معاميق معاميق النفس البشرية

انا تخيلت نفسى مكان الولد ده .. واكيد ربنا كريم على عباده ورحمته شامله كل شئ .. فبرغم اعاقة هذه الطفل الا اكيد ليه عالمه الخاص الذي ينسج تفاصيه من وحى خياله وهو الى بيضع القواعد والمعايير وفقا لاحاسيسه هو وما يريده هو

ممكن يكون انسان ناحج ومثقف ولديه فكر وعقل يعمل افضل من مئة بصير وليس لديهم البصيرة

انا بحييييييك
تحياتي

إبـراهيم ... said...

حلو قوووي يا محمد يا جميييل



تخيل وااااحشني فعلاً


ياللا بقى خللي يوم الجمعة ييجي بسرعة

Anonymous said...

ياعزيزى محمد
الصراحة مش ناوى أعمل مدونة مش بهرب والله من التورته والجاتوه انما لأنى فعلا مش بحب أكتب ومش عندى حاجه اقولها انما بعرف أعلق كويس. شوف هاحكى ليك قصة بدل المدونة... ماشى؟
;)
زمان كان فى واحد بيحب الموسيقى أوى بس ماحدش كان مهتم بيه. المهم عمل سيمفونية بس طلعت وحشه قوى قوى فمعجبتش الناس. الراجل لم ييأس (وده أول درس من القصة دى) وعمل سيمفونيه تانيه طلعت وحشه برضه بس أحسن من الاولانيه. المهم صادف ان امبراطور النمسا كانوا عنده مناسبه سعيده فقال للوزير بتاعه انا عايز أعمل احتفاليه ماحصلتش ولا هاتحصل , عايزك تجيب كل المغنيين وكل الموسيقيين اللى فى البلد والمشهورين , كلهم كلهم لازم يجوا الحفلة اللى هاعملها. المهم الوزير قاله طيب والراجل ده اللى عمل سيمفونيتين وحشيين نجيبه ولا لا؟ الامبراطور بلم وبرطم شويه , طبعا كلام الملوك لا يرد ,راح فكر شويه وقال للوزير هاتوه مش هايضر بس تخليه اخر واحد خالص فى الحفله. طبعا لما الخبر وصل للكل الكل فرح بالحفله وقال فرصه بقى كل واحد يثبت نفسه ويورى نفسه للامبراطور ولعلية القوم. فى يوم الحفلة الموعود حضر الناس كلهم وطبعا كل المغنيين والموسيقيين , صاحبنا اتصدم لما لقى نفسه اخر واحد بس مازعلش وقال وماله يالا خير
بس هو طبعا مكنش واخد على جو القصور والسرايات والحفلات فقال لنفسه فرصه بقى اتفرج على قصر امبراطورى واشوف الناس دى عايشه ازاى – اصل صاحبنا الموسيقى ده فقرى وماشفش عز قبل كده- فراح يتفرج على الأوض بتاعت القصر الامبراطورى وطبعا أنبهر بالعظمه والأبهة والفخامه بتاعت القصر بس ماعجبتوش خالص فراح خرج للبلكونه يشم هوا وهو فى البلكونه لقى بنت قاعده لوحدها وشكلها حزين فاستغرب قوى وراح نحيتها وسألها ليه يابنتى زعلانه فى امسيه سعيده والكل فرحان فى الليلة دى؟ سكتت شويه فسألها تانى ,سكتت وبعد كده ردت عليه أصل نفسى أشوف القمر . فاستغرب قوى وقال قمر ايه؟ فلما دقق فيها أكتشف انها عاميه فزعل أوى اوى من نفسه انه ماخدش باله قبل مايسألها (وده الدرس التانى من القصه) فسألها طيب واشمعنى القمر؟ قالت ليه بسمع الشعراء بيتكلموا عنه كتير وبسمع كتير اوى الحبيبه بيعشقوا القمر ودايما بحلم بالقمر . فالبنت سألته ياترى فعلا القمر جميل؟ هو أزبهل من السؤال ومعرفش يجاوب وزعل أوى انه أولا احرجها وتانيا انه هو نفسه مش عارف القمر حلو ولا لا. يعنى هو عمره مافكر فيه خالص.
الراجل بينه وبين نفسه قال لا, لايمكن انا لازم أساعد البنت دى بأى شكل مش ممكن اللى انا عملته فيها ده ومش ممكن اللى هيه عملته فيه ده وظل يفكر ويفكر وهو باصص للقمر لحد مافى الاخر خالص جاله الحاجب وقاله جاه دورك انك تعزف. الراجل راح للقاعه وهو مبسوط اوى وقالهم : ايها الساده وانا قاعد دلوقتى فكرت فى سيمفونيه جديده وعملتها فعلا وسمتها "فى ضوء القمر" واحب أهديها للبنت ديه وشاور عليها. المهم عزف و طلعت السيمفونيه رائعه جدا والناس كلها مذهوله انه هو اللى عاملها علشان كل المغنيين والملحنيين موجوديين يعنى لايمكن يكون سرقها مثلا . الناس اتبسطت قوى. المهم البنت دى طلعت بنت الامبراطور شخصيا فطبعا الامبراطور أكرمه اخر كرم
عرفت بقى مين الموسيقار ده؟
اتمنى تكون القصه عجبتك
سلام

askurself said...

اولا مساء الخير لان الساعة 2:30 ظهرا
ثانيا من فترة كبيرة شردت فترة من الزمن فى الموضوع دة و فكرت كتير قوى فى الناس دول بشتى انواع الاعاقة من نظر او سمع او خرس ، كل اعاقة صاحبها يعيش مأساة لكن حقيقى الرب هو الوحيد اللى يقدر يصبر الانسلن و يصبر اهلة و اكيد عمره ماحسيبه ابدا، مش يمكن العمى دة يكون احسن علشان ميشوفش الدنيا الوحشة بتعتنا دى الدنيا الى ماتتشفش اقصد ماتتعش ، صدقنى دى ممكن تكون نعمة و بركة لية و لعلتة المهم ان ربنا يعطية هو و اهلة سلام.

Haitham Abu Akrab said...

سمعت فيما معناه
ان الله يعوض فاقد احديعنيه بالجنه
فما بالك بالاعمي



بصراحه الموضوع فيه فلسفه حلوه

أميرة said...

هى نعمة والحمد لله على النعمة وكل اللى قلته دة حسيته بنفس تفكيرك ومعاك فيه بس ربنا بيقطع من هنا ويوصل من هنا

طه حسين كان أعمى

وعبقرى الموسيقى عمار الشريعى أعمى

تصور ان عمار الشريعى ازاى بيعزف العبقريات دى باحساسه ولمسات ايده من غير مايشوف هو بيلعب فين وعلى الة ايه
دة غير الاستديو بتاعه اللى بيشتغل على لوحاته الكبيرة ويظبط الصوت بنفسه
دة غير انه بيشتغل على الكمبيوتر
تصور بيشتغل على الكمبيوتر
هو يمكن يكون شايف الدنيا احسن واحلى مننا لانه شايفها بدماغه هو من جوة نفسه
وبالمناسبة اتسأل سؤال
لو دلوقتى قالوله ان فى علاج وممكن يتعالج ويشوف هيوافق ؟
قال لا لانى طول حياتى متخيل الناس والدنيا بشكل اخاف يطلعوا اوحش

كل واحد بياخد نصيبه وربنا بيعوض كل واحد فى حاجات تانية

تحياتى ليك على البوست

Unknown said...

ياه يامحمد, البوست جميل أوي, واحساسك بالطفل ده جميل جدا, ربنا يكرمك يامحمد ويعزك

مصر هى أمى said...

ادم المصرى
كفاية انك شرفتنى يا باشا

مصر هى أمى said...

بنوتة من وسط البلد
شكرا ليكى يا باشا
معاميق معاميق الشخصية ايه الكلام الكبير ده

طبعا كل واحد فينا ليه عالمه الخاص سواغء كان راجل او واحدة كويس او وحش كل واحد ليه العالم اللى بيرسمه فى خياله
اكن انا كتبت البوست ده علشان الناس اما تقراه تحمد ربنا على نعمة البصر

وشكرا على زيارتك اللى بتسرنى دايما

مصر هى أمى said...

ابراهيم معايا

وانت والله واحشنى جدا وان شاء الله هاشوفك يوم الجمعة

مصر هى أمى said...

حسن محمود
المهم لو ناويت تعمل مدونة لازم اتعزم

القصة جميلة ومعبرة جدا وفيها جزء من البوست بتاعى ان حاسس ان الاعمى بيتمنى يشوف اللى احنا بنوصف فى جماله وهوا محروم يشوفة

مصر هى أمى said...

askurself
اولا مساء النور
مش عارف ليه جاتلى تعليقات كتيرة بتقول ان ممكن يكون احسن ليه علشان ميشوفش الدنيا الوحشة اللى احنا فيها
بس محدش فكر انه يمكن عايز يشوفها زى ما احنا شوفناها اكيد الدنيا فيها حاجات كويسة وفيها حاجات وحشة

عموما قدر الله وما شاء فعل وزى ما انتى قولتى ربنا يديله واهله السلام

مصر هى أمى said...

هيثم ابو عقرب

عظمية هي تلك النعمة التي انعمها الله علينا ولمن حرمها الله منها يكفي قول الله عز وجل في الحديث القدسي

من أذهبت حبيبتيه فصبر و احتسب لم أرض له ثوابا دون الجنة

وحبيبتيه هنا يقصد عينيه

فما اعظم اجرا عند الله من الجنة

ده كومنت جالى من استاذ احمد شقير مدونة حكاوى اخر الليل

وده بيأكد كلامك المهم ان الطفل ده يصبر ويحتسب اجره عند الله

زيارتك نورتنى

مصر هى أمى said...

اميرة ويلز
تحياتى ليكى الاول
طبعا النظر نعمة من الله والحمد لله عليها
كل اللى انتى قولتيه انا موافقك عليه بس انا عايز اقولك حاجة كام واحد اعمى طلع عبقرى وخد شهرة نسبة لا تذكر لكن الاغلب ان فى ناس فقدوا هذه النعمة وعانوا بسببها فطبع احنا لازم نحمد ربنا على هذه النعمة
وفعلا كل واحد بياخد نصيبه من الدنيا وده اللى خلانى اقول لازم نحمد ربنا على نعمة النظر واى نعمة اخرى

مصر هى أمى said...

اسراء
يااااااااااه يا اسراء اخيرا شرفتينى دا انا مكنتش بنام بالليل واقول اسراء مش بتزورنى ليه

شكرا ليكى يا اسراء على الكلام الجميل ده
وربنا يباركلك ويعزك انتى كمان

شهيدة said...

محمد
ازيك عامل ايه

الموضوع بجد مهم جدا

وكلامك بيخلينا نفكر أوي بكل نعمة ادهالنا ربنا سبحانه وتعالى
انك تشعر بشعور الضرير وتغمض عينيك ولو للحظة بيخليك تشكر الله ألف مرة على نعمة البصر وغيرها من النعم كتير اللي احنا حتى مش حاسين بيها أبدا

انا كتبت بوست جديد

نصائح للدرس
أكيد حتستفيد :)
سلام

Music Gates said...

دي اول زيارة ازورهالك و ان شاء الله هتكرر علي فكره وبسم الله ماشاء الله حلوه

اول شئ انا لفت انتباهي اسم البوست و يمكن انا رديت في بالي علي سؤالك

جربت مرة تكون اعمي ؟؟

قلت اه جربت بس كان ساعتها بهزار او بشوف قدرتي علي الحركة و الاحساس بس غمضت عيني و حاولت اشوف احس ايه حواليا ده يمكن مش علشان موقف مؤثر لا ده انا كان بعد فيلم امير الظلام فكنت بس بشوف التجربة شكلها ايه لو الواحد فعلا اعمي ... عارف انا من اسبوع كدا كان برنامج اوبرا شغال كنت قاعد بتفرج عليه اوبرا كانت مستضيفه ولد معاق و اعمي كمان بس معاق جسمانيا ... عارف الولد لما بتسئوله انت توجه رسالة للناس تقول ايه عارف قال ايه ... قال بالظبط كدا

المبصريين يستطيعون ان يروا الاشكال و المناظر و يمكن ان تخدعهم هذه المظاهر لاكن مع فقد بصري الا انني في نعمة لانني لاتخدعني مناظر و ان الله يمنحنا قوة اكبر للتعرف علي حقيقة الانسان فنحن في نعمة

تخيل كفيف و بيقول كدا

قلت سبحان الله ....

Unknown said...

فين اجابة التاج يأستاذ؟

karakib said...

أنت أنسان حقيقي
كل اللي أقدر أقوله بعد البوست ده
شكرا

مصر هى أمى said...

شهيدة

انا الحمد لله كويس
طبعا لازم نحمد ربنا على كل نعمه علينا والكلام الجميل اللى انتى قولتيه مش غريبة يطلع من شخصية رائعة زيك

انا رايح حالا اشوف البوست الجديد

مصر هى أمى said...

copa
انت تشرفنى فى اى وقت وياريت متكونش الزيارة الاخيرة

كلامك جميل جدا والولد اللى انت حكيت عنه قال حكمة فعلا ان المناظر ممكن بتخدع لكن طبعا النظر نعمة لان الواحد ممكن يشوف حاجات كتير جميلة

سلامى ليك

مصر هى أمى said...

اسراء هانم

سعادتك انا وعدتك انى اجاوب عن التاج ده يبقى اوامرك لازم تنفذ واوعدك انى اجاوب عنه قريب جدا
ماشى اوامر الحلوين اللى زيك

مصر هى أمى said...

كراكيب
ربنا يخليك يا باشا وتفضل رافع روحى المعنوية كده

Unknown said...

ماشي أنا قاعده مستنيه أهوه(:

FATMA said...

انا بروح اوقات في رسالة في قسم المكفوفين بتعامل مع ناس زي اللي بتقول عليهم دول
بس تعرفهم انا لما بتكلم معاهم بلاقي نفسيتهم فظيعه اجمد مننا بكتير اوي
ممكن تجرب تروح اي فرع من فروع رسالة بيكونو محتاجين متطوعين
بجد هتتبسط اوي

إبراهيم محسن said...

جميل جداً ورائع الإحساس ده..بجد بشكرك إنك خلتني أفكر شوية مع نفسي أنا ليه بعمل حاجات مش كويسة بنعمة ربنا..ومبشكروش عليها

من فترة واحدة اتعرفت عليها كانت كفيفة..مولودة كده بسبب مرض متوارث عن أهلها..سألتني هي مش عارفة يعني إيه رجل ويعني إيه إمرأة؟ هي فاهمة إنهم جنسين مختلفين..بس مش عارفة الشكل..وبصراحة سألتني سؤال محرج..ارجو انك تفهم..إيه الفرق بين الرجل والمرأة فسيولوجياً؟

طبعاً حاولت أهرب من السؤال..قلتلها يعني المرأة رقيقة وهادية..وطبعا منفعش الوصف ده لأن كده وصف للطباع
قلت إن المرأة سمبتيك يعني جمال في الشكل..قالتلي يعني إيه جمال الشكل..دي الصدمة بجد

يعني إيه جمال الشكل؟

هي سمعت عن جمال الطباع والروح..بس إيه جمال الشكل؟

آسف..طولت عليك..هي حكاية طويلة..بس بجد انا بشكرك على روحك الرقيقة..واتمنى نكون اصدقاء

اليوم النهارده بتاع البلوجرز كان لذيذ رغم إننا متعرفناش بشكل قوي..بس تتعوض..اتمنى انك تفتكرني

سلام

إبراهيم محسن said...

إخلاصك واتمنى اننا نبقى اصحاب بجد..معرفتش بسبب الزحمة إني اتعرف عليك بشكل حميمي..بس قريب تتعوض

سلام

مصر هى أمى said...

اسراء

هتفضلى كل الوقت ده قاعدة ادام الكمبيوتر مستيانى يااااااه انا لو اعرف كده كنت جاوبت على التاج ده من اسبوع فات

مصر هى أمى said...

توتة توتة

شكرا جدا على نصيحتك ليا وان شاء الله هاروح واحاول اساعد الناس المكفوفيين واى حد مريض عموما ربنا يعفى عنا وعنهم
وربنا يباركلك على مساعدة الناس ديه

مصر هى أمى said...

ابراهيم

طبعا انا اتشرقت بيك واتمنى فعلا نكون اصحاب وانت مطولتش ولا حاجة والقصة جميلة جدا وفعلا بتعبر عن احساس الناس ديه وهما مفتقدين لايه
بس شطارتك انت انك تشرحلها اللى هيا عايزاه من غير ما تجرح شعورها يالا يا بطل ديه مش مهمة سهلة خالص

مصر هى أمى said...

ابراهيم
تتعوض ان شاء الله وانا تحت امرك فى اى وقت

NOHA said...

محمد

معلش متاخرة فى الرد عليك شوية
تفتكر ان الأعمى الحقيقى هو اعمى النظر و لا اعمى القلب
انت قولت ان الناس كلها حبت الطفل و ضحكت معاه حتى انت نفسك قررت ما تنزلش فى محطك و كملت معاه و دى نعمة كبيرة قوى ربنا سبحانه و تعالى انعم بيها على الولد انه حبب فيه خلقة و دى نعمة مش موجودة عند كل الناس

لكن اعمى القلب بقى ربنا سبحانه و تعالى نزع الرحمة من قلبة مهما عمل هيكون مكروه و ملعون من الناس كلها

اعمى النظر ممكن ناس كتير تدعيله لكن اعمى القلب اكيد كل الناس بتدعى عليه

كما ان اعمى البصر بيتمتع باحساس مرهف فهو بشعر بالاخرين و يتفاعل مع مشاعرهم اكثر من الأشخاص العاديين

و كمان فيه معلومة سمعتها مش عارفة صح و لا غلط ان اعمى البصر بتكون حاسة السمع عندة قوية

مصر هى أمى said...

نهى

الاتنين اعمى سواء كان النظر او القلب
لكن اعمى الفلب ممكن فى مرة يتهدى وممكن فى مرة تانية الناس تتجنبه
لكن اعمى النظر بيبقى محروم من اى متع للحياة كفاية انه لما ييجى يتجوز هيلاقى صعوبة كاملة فى اختيار شريكة حياته ولو واحدة وافقت عليه اللى جنبه هما اللى هيقرروله انها حلوة ولا لا
شوفتى معاناة اكتر من كده ان حتى مراته بيشوفها من نظرة الاخرين ليها

NOHA said...

يا محمد

تفتكر الأهم ان يكون شكل العروسة جميل و لا روحها اجمل

احنا اتفقنا ان الأعمى بيكون عنده احساس مرهف و انه بيكتشف العلم من حواليه من خلال حاسة السمع و اللمس كمان بيكون انطباعه عن الأخرين من خلال شعورة نحتهم و طريقة كلمهم يعنى مش بيعتمد فى حكمة على الناس لا على شكلهم و لا لبسهم و اعتقد ان هى دى الطريقة الأفضل فى اختيار شريكة الحياة و هنا بنلاقى ان الأعمى بيكون هنا محظوظ لأنه ممكن يشوف الى غيرة مش بيشوفة بعينة المجردة