Wednesday, February 7, 2007

التاج علينا حق

مساء الخير عليكم جميعا
طبعا بعد التاج الاولانى اللى جالى من بنوتة وسط البلد لقيت تاج تانى بيتحدف عليا من اسراء وماراويتا بقيت مش عارف ايه القصة قولت الاولانى يمكن اهالينا هما اللى عاملينه علشان يعرفوا كل حاجة احنا كنا مخبينها
طب التانى الحكومة هيا اللى عاملاه علشان تعرف شخصيتنا بس بعد كده قولت ايه الغباء ده ما هيا الحكومة عارفانا واحد واحد
ماعلينا متشكرين اوى يا اسراء انتى وماراويتا على الهدية الحلوة ديه مردودالكم فى الافراح ان شاء الله
نبدء نجاوب على الاسئلة اللى كلها اجبارى ولا كأننا فى الثانوية العامة

الاول - ايه اللى هيحصل لايميلك اما تموت

اولا بعد الشر عليا طب الناس تعيش ازاى من غيرى
تانى حاجة اقصدكم انهى ايميل ما انا لامؤاخذة عندى 8 ايميل
عموما هيفضلوا شوية قيمة عشرين سنة وبعدين هيتقفلوا اتوماتك

التانى - اديت الباسوورد لحد قبل كده

لسه متهبلتش للدرجة ديه عمرها ماهتحصل حتى لمراتى بعينها انها تشوف الباسوورد حتى انا مش كاتبهم لان سبعة منهم نفس الباسوورد والتامن الايميل بتاعى فى الشغل
الشركة كلها عارفة الباسوورد بتاعت الكمبيوتر والايميل

التالت - اسمك ايه

محمد بن عادل بن عبد الكريم باشا بن السيد بن سلامة بن تارا بيه والباقى احتار فيه علماء الحفريات والمؤرخييين

الرابع - اسم الدلع المشهور وسط اصحابك

اصحابى مكنوش بيدلعونى
على طول كانوا بيندهولى عادل انتوا عارفيين نص الشعب المصرى اسمه محمد
بنت الجيران الوحيدة اللى كانت بتقولى يا مودى
واللى معايا فى الشركة بيقوللولى يا دودى على اساس دودى الفايد فاكرينه بتاع ديانا ومحدش يقولى اشمعنى دودى لان ده دلع عادل علشان برده كل الشركة بتقولى يا عادل

الخامس - عمرك
تلاتين سنة وشهر و3 ايام

السادس - برجك

بصوا انا مش مؤمن بالابراج خالص بس عموما هما بيقولولى انا انا برج الجدى معرفش حتى كويس ولا وحش

السابع - مجال دراستك
خريج كلية تجارة جامعة عين شمس دفعة 98
دراسات عليا فى الاستثمار والتمويل دفعة 2002
يبقى بشتغل ايه اكيد مش مهندس ولا دكتور
محاااااااااااااااااااااااااااسب فى شركة ملاحة بحرية

التامن - شخصيتك نوعها ايه

انا انسان مش سعيد بطبعى يعنى من زمان وانا انطوائى شوية وبحب العزلة وبحب جدا امشى ابص فى وشوش الناس اللى فى الشارع وبحب امشى على النيل بالليل اوى وابص للنيل ونفسى ارمى نفسى فيه
كنت زمان بتمنى اكون اتولدت عصفورة طايرة طول الوقت بس طبعا مفيش عصفورة وزنها 145 كيلو
بس عموما على حسب المود اللى انا فيه يعنى النهاردة عفاريت الدنيا بتتنطط ادامى علشان روحت لقيت ماما عاملة سمك وانا بكره السمك واحنا عقبالكم بناكل سمك تلات مرات فى الاسبوع زى الدوا كده
بس انا من النوع اللى بيتمنى الخير للناس كلها وممكن ييجى على نفسه كتير علشان خاطر ناس تانيين
الناس بترتحلى بسرعة وبتتكلم معايا فى مواضيع كتيرة وبتاخد رايى فى مشاكلها الشخصية لكن انا للاسف مبعرفش اخد راى حد فى مشاكلى دايما رايى من دماغى بس
وانا عنيد جدا مش بسهولة اعترف ان انا غلطان او انى اغير رايى لكن ادام اهلى وتحكماتهم مبقتنعش بكلامهم فى حاجات كتير لكن غصب عنى كلامهم بيمشى

التاسع - السفر بالنسبة لك

بحبه جدا انا سافرت كتير اوى بس وانا صغير بقالى فترة ما سافرتش بره مصرغير للعمرة فبعوض ده بالسفر لاماكن كتيرة جوه مصر
بس للامانة اكتر حتة سافرتلها ونفسى اروحها كل سنة مكة المكرمة والمدينة المنورة وبالذات المدينة ربنا يكتب للواحد ان يعيش هنالك على طول

العاشر - المود بتاعك

على حسب الحالة اللى عندى يعنى لو الاهلى كسبان ببقى مبسوط جدا ولو روحت مطعم ببقى مبسوط اوى عموما انا كائن حزين وانطوائى سعادتى اما الاقى كتاب جديد أقعد قراه

الحادى عشر - وقت فراغك بتعمل فيه ايه

كنت الاول بقعد اكل وبعد شوية حبيت القراءة اوى اما اشتغلت الحمد لله الشركة مش سايبالى وقت فراغ من اصله
لكن فى الاوقات النادرة انا بقعد على النت واشوف المدونات اللى خدت كل وقتى القليل اللى انا فاضى فيه
وطبعا ما ننساش الاكل الاكل الاكل اهم حاجة عندى فى حياتى

الثانى عشر - الاكلة المفضلة

اى نوع من الاكل انا بحبه انا بعشق حاجة اسمها الاكل بس اكتر حاجة بحبها اكلة اسمها
الكسكسى بس بالطريقة الليبية
المبكبكة ديه اكلة ليبية برده
وبحب جدا كنتاكى

اكتر حاجة بكرهها السمك مبحبوش خالص والمسقعة يعنى لو اتقدمت لواحدة من المدونات تبقى عارفة مش عايزين مشاكل

الثالث عشر - الصفات اللى خدتها من بابا

هوا لو كنت خدت صفات من بابا كنتوا قريتوا الخمس مواقف بتوعى اللى فاتوا
المهم
خدت من بابا
احترام المواعيد
حب القراءة بابا موسوعة متحركة
العند
العصبية
حب الشغل والعمل
ان الراجل يكون متعاون مع مراته فى البيت
احترام الزوجة

الرابع عشر - الصفات اللى خدتها من ماما

الطيبة
الحنية
حب المطبخ والطبيخ على فكرة انا بعرف اطبخ حلو اوى
بتئقمص بسرعة زيها لكن برده بصفى بسرعة زيها
الكلام القليل
حب الناس وحب مساعدتهم

فيه بأه صفة مشتركة خدتها من الاتنين

ان الواحد لازم يحترم البيت والزوج يحترم زوجتة والعكس ومراعاة شعور الاخر
بابا وماما اجمل قصة حب ممكن الواحد يشوفها من ايام الكلية وهما مع بعض حتى الان ربنا يستر عليهم من قركم وحسدكم
اقولكم على حاجة بابا جه فى سنة وسقط فى الكلية وماما نجحت تانى سنة ماما مدخلتش الامتحان علشان تعيد السنة وتبقى معاة اما بابا ينجح
الخامس عشر - اكتر 6 حاجات بحبها

ربنا وسيدنا محمد
اهلى واصحابى والشغل
الاكل الاكل الاكل
النادى الاهلى
المدونة بتاعتى
السيد / حسن نصر الله وحزب الله
النظام والدقة واحترام المواعيد
مساعدة الغير
الجواز مع انى لسة مجربتوش
اكتر من ستة مش كده برده

السادس عشر - اكتر 6 حاجات بكرهها

امريكا واسرائيل
الحكام العرب الخونة والنظام المصرى الرئاسى والتوريث
الخيانة انى ادى ثقتى لحد واكتشف انه ما يستاهلهاش
عدم احترام المواعيد
الظلم والكدب والنفاق
انى اروح عند الميكانيكى الاقى عيل صغير بلية بيشتغل ومش مستمتع بطفولته
حلم كنت بحلمه زمان كل يوم ان ثعبان بيعضنى
السمك السمك

السابع عشر - الشغل بالنسبة لك

كنت زمان بقول امتى اتخرج علشان اشتغل دلوقتى بعد ما اشتغلت بقول نفسى ارجع صغير تانى
اظن الاجابة واضحة بس عموما انا بحب الشغل اوى

الثامن عشر - ايه الكمبيوتر والانترنت بالنسبة ليك

انا من زمان عندى كمبيوتر بس كنت مجرد مستخدم للكمبيوتر مبعرفش فيه كل حياتى عليه العاب وافلام بس ودلوقتى باقعد علية علشان الشغل
اما النت بعد ما عملت المدونة ديه بقى حاجة كبيرة فى حياتى

التاسع عشر - تحب تمرر التاج لمين بعدك

يعنى قصدكم ادبس مين بعدى
ماشى
طبعا صديقى نائل فؤادة اللى قلتلكم ادعوله وانا الكلمة ديه بوجها لباباه صدقنى يا عمى المدونات ديه مش مؤذية خالص ده مكان كل واحد ممكن يطلع اللى جواه ويحكى عن نفسه
زينب شهيدة
نهى بنت النيل
واحد من الناس
هلوسة مصرية

45 comments:

smraa alnil said...

ههههههههههه
استمتعت بقرياة اجابتك
اجابات انسيابية وبسيطة
شخصيتتك لذيذة
تحياتي

جبهة التهييس الشعبية said...

ههههههههههههههههههههههههههههههههههههههههههههههههههههههههههههه

بس انت دمك خفيف ومش باين عليك انك انطوائي وحزين زي ما بتقول على نفسك

مصر هى أمى said...

سمراء النيل
انتى نورتينى مش كنتى تقولى انك هتشرفينى علشان نحضر غدا ولا حتى عشا
وغلاوتك لو كنت اعرف كنت دبحتلك حد من اخواتى يعنى مظنش ان فى معزة اكتر من كده
الحمد لله ان اجاباتى عجبتك بس مقولتليش رايك ايه فى التاج الاولانى بتاع الخمس مواقف عجبوكى برده ولا لا
انا زرت مدونتك وعجبنى البوست بتاعك اوى وسبت تعليق عندك
شكرا على الزيارة ابقى كرريها

مصر هى أمى said...

نوارة
اما تجيلى شهادة من اكتر واحدة كوميدية عرفتها زي سعادتك يبقى انا فعلا دمى خفيف
اما حكاية انى انطوائى فهيا فعلا حقيقة انا مش بعرف اخد على الناس بسرعة
اما حكاية انى حزين فممكن تقرى البوست بتاعى هل انا سعيد
وتعرفى اذا كنت حزين ولا لأ
ميغرقيش انى بضحك او بهرج انا ماساة متحركة سيبك انتى اهه ايام وعايشنها يالا حسن الختام

halwasa-masrya said...

يا مدبساتى .. رجل المواقف الفاضحة
هههههههه اسعدنى تمرير التاج .. هرد ان شاء الله .. ميرسى ليك

Unknown said...

اجباتك حلوه يادودي (:
ودمها خفيف بجد .

فؤاده said...

انت يابني
ازاي متكتبش اسمي في الحاجات اللي انت بتحبها ، انت عايز الرمز يزعل منك ولا ايه ؟

انا عشان عارفك ، عارف ان اظرف حاجه قلتلها موضوع العصفورة ده
ههههههههههههههههه

وبعدين هسالك نفس السؤال ، الاهلي اللي انت بتكتبه ده ، الاهلي الليبي ؟؟

مصر هى أمى said...

هلوسة مصرية
معلش تعيشى وتاخدى غيرها بصى انا تقريبا معرفش عنك حاجة فعايز اعرف كل حاجة يعنى زى ما انتى مسميانى رجل المواقف عايزك تكونى ست المواقف
ماشى
عايز مواقف مهلوسة

مصر هى أمى said...

اسراء
ربنا يخليكى انتى اللى فيهم يا اسراء دايما كده رافعة روحى المعنوية

مصر هى أمى said...

نائل باشا
الـــــــــرمـــــــــــز

طبعا يا نائل انتى الرمز وهتفضل طول عمرك الرمز بتاعنا
وانا كتبت عنك كتير اوى وقولت للناس يدعولك ان الحصار عنك يتفك
ايه يعنى اما كان نفسى اكون عصفورة مش عصفورة اوى ممكن طائر الرخ ينفع طيب

الاهلى ده الاهلى المصرى يا زملكاوى
اوحش حاجة فيك انك زملكاوى علشان كده احنا رابطة المدونيين بنفكر نسحب منك لقب الرمز علشان ازاى تبقى مصرى ومتكونش اهلاوى
ربنا يهديك وتبقى اهلاوى يا نائل اميييييين

أسوور said...

برج الجدى زيى وكمان خريج تجارة زيى بس أنا جامعة القاهرة

بس ما بتحبش السمك والمسقعة وانا بأموت فيهم

يبقى خلاص كدة لازم نفترق

:)))))))

مصر هى أمى said...

ياسمين
اااااااههههههههه يا قاسى

لالالالا يا ياسمين

السمك كنت بحبه زمان بس من كتر ما ماما اكلتهلنا كرهته اما المسقعة فا انا مبحبش البتنجان خالص الا لو كان محشى بس
فى حاجة تانية نسيت اقولها
انى محبش حد يقولى اعمل ريجيم نهائى وزى ما انتى قريتى انا رفيع جدا 145 كيلو بس يعنى طائر كناريا مش كده ولا ايه

وبتقولى نفترق يا ياسمين ليه مش كنا اصحاب ولا الكومنت بتاعى اللى على البوست اللى عندك ضايقك دا حتى انا دافعت عن المدونة بتاعتك
خلينا اصحاب يا ياسمين علشان انتى عارفة ان ردودك بتعجبنى

شهيدة said...

سلام يا عادل
ايه الاجابات دي؟؟
المهم انا لاقيت ان في حاجات مش مشتركة خالص بينا
معقولة ما بتحبش البتنجان؟؟؟

ويالنسبة لمودك
يعني مش باين عليك انك شخص حزين
يا رب تفضل مبسوط على طول
تحياتي

توقع اجاباتي قريبا
بس الله يسامحك على التدبيسة

الأباصيرى said...

بص انا أينعم كارهك من ساعة موضوع جيجى والمقطم

بس أجاباتك حلوة وربنا يخليلك عم الحاج وطنط الحاجة ويديم الحب والمودة ويديم الصحة عليكم ويديكوا على قد نيتكم ولايحرمكوش من نضر عنيكم

قـــــــادر ياكــــريم

الأباصيرى
من أمام جامع السيدة زينب

الزعيـمة said...

مصر هي أمى

حلوة اجاباتك
واتاحت لنا فرصة لمعرفتك اكتر


تقبل تحياتي

مصر هى أمى said...

شهيدة
معلش على التدبيسة
ثم ايه حكاية ان الناس بتحب البتنجان ده محسسنى انى الوحيد اللى مبيكلش البنتجان هوا يعنى لحمة ولا حاجة وانا مش واخد بالى
عموما انا كنت حزين زمان لكن من ساعت ما عملت المدونة ولقيت صديقة زيك مبقتش حزين
مستنى اجاباتك
روحى عند مدونة نائل محتاجين رايك فى البوست بتاعه

مصر هى أمى said...

الاباصيرى
والله انا كمان كاره نفسى علشان مرحتش معاها المقطم
وربنا يخليك على الدعوة الحلوة ديه وميوقعش فى ضيقة دايماويخليلك عيالك ومراتك واهلك ويطعمك ولا يحرمك ويرزقك من اوسع ابوابه قادر يا كريم

من امام باب جامع السيدة زينب التانى

مصر هى أمى said...

الزعيمة
فعلا زعيمة كلمتين وبس
زى الزعماء بجد خير الكلام ما قل ودل

halwasa-masrya said...

انا رديتلك علىالتاج يا عم

halwasa-masrya said...

انا رديتلك علىالتاج يا عم

محمد عبد الغفار said...

برج الجدى يا عزيزى

صورة طبق الأصل

مصر هى أمى said...

هلوسة
احنا متشكرين على الاجابات الحلوة ديه
انا بقول لكل اللى يشوف الكومنت ده يروح يشوف اجاباتك الحلوة

مصر هى أمى said...

محد عبد الفغار
ديه حاجة تشرفنى يا باشا
على فكرة مدونتك جميلة اوى
ممكن نكون اصحاب

LAMIA MAHMOUD said...

بجد اجابات زي العسل .. اللذيذ بقى اني لحد ما جيت هنا كنت بتعامل على ان ده بلوج بت مش عارفة ليه .. فاسفة موت على سوء الفهم والخلط .. لو كنت قريت رد الكومنتات عندي .. وكويس ان عرفنا عنك كل ده

Amany Y. El-Saeed said...

إجاباتك لذيذه يا محمد...و شخصيتك بسيطه...يارب تفضل كده علطول

محمد عبد الغفار said...

ده الشرف لينا احنا ، اكيد ممكن نكون اصحاب

أميرة البلطجية said...

انت تحفة
قريتلك كام بوست
بجد تخش القلب

مصر هى أمى said...

لمياء
انتى شرفتينى شكرا اوى على المجاملة ديه ومش شكرا على انك كنتى شايفانى بنت حرام عليكى انا بنت
هوا فى بنت وزنها 145 كيلو ده حتى يبقى شكلها صعب اوى
اديكى عرفتى كل حاجة عنى انفع بقى
وشكرا على الزيارة

مصر هى أمى said...

امانى

ربنا يخليكى وان شاء الله هافضل كده على طول ادعيلى انتى بس
كل سنة وانتى طيبة بمناسبة عيد الحب

مصر هى أمى said...

محمد عبد الغفار

ده الشرف ليا انا وابعتلى ايميلك واحنا نبقى اصحاب ان شاء الله

مصر هى أمى said...

اميرة البلطجية
شكرا اوى على الزيارة وشكرا على المجاملة الحلوة ديه وانتى مدونتك حلوة اوى

eskandrany said...

بص يابوحميد...مش هعلق على كلامك...بس هعلق على اللى فهمته من كلامك
انتى بجد شخصية جميلة قوى قوى
كفاية انى اقولك انى حسيت انك انسان انسان بجد
على فكرة يا صاحبى "ماليش دعوة انا خلليتك صاحبى " انا برضه بحب اوى اما امشى فى الشوارع او اقعد على قهوة اتفرج على وشوش الناس اللى حوالية
المهم مدونتك روعة و ياريت المرة الجاية الاقى حاجة ساقعة ، سندويتش ،صنية كنافة، اى حاجة يا عم

-_- said...

تعيش و تستلم غيره يا باشا

و كل تاج و انت طيب

مصر هى أمى said...

اسكندرانى
اهلا وسهلا بيك فى اى وقت والحاجة الساقعة والسندوتشات وصنية الكنافة موجودين بس انتى اللى محتاج عزومة علشان تاكل
انا يشرفنى انى اكون صاحبك وقولى امتى بتقعد على القهوة وانا اجى اقعد معاك ونبص على الناس اللى ماشية بص انا مبعرفش اعاكس بنات علشان تبقى عارف

مصر هى أمى said...

شارم
لا كفاية تيجان لغاية كده
مدونتك اكتر من رائعة وبالذات البوست الاخير جهد جميل جدا ياريت كل واحد يروح يشوفه

.:.-=- ELGaZaLy-=-.:. said...

حلوة لعبة التاج والاحلى اجبابتك بجد جميلة...

ربنا يكرمك دى اول زيارة ليا بس اكيد مش هاتكون الاخيرة

Anonymous said...

حلو التاج دة يا باشا..
انا ممكن اقبل منك التاج دة مش التاج الاولانى ..
هارد عليه قريب

مصر هى أمى said...

غزالى
ربنا يكرمك انت ان شاء الله
وشكرا على الزيارة وان شاء الله مش هتكون الاخيرة

مصر هى أمى said...

واحد من الناس
بص انتى من الناس اللى مشفتهاش لغاية دلوقتى لكن مدونتك جميلة اوى
البوست الاخير اكتر من رائع
علشان كده تقبل اى تاج انا موافق

ibn nasser - ابن ناصر said...

والله اجاباتك حلوه مع أن مواضيعك القديمه االلي يشوفها يقول يائس ,,بس استمتعنا قوس بأسالتك ودمك الخفيف ده http://ibnasser.blogspot.com

Ahmad Hegab said...

هىهىههى
الكومنت الحادى و الاربعين

بوست لذيذ

^_^

علي الالفي said...

هو انا كل ما ادخل مدونةالاقي التاج العجيب ده
حتى في مدونتي
عموما اجاباتك قد كدة حقيقية و سلسة
ابقى نورنا

مصر هى أمى said...

ابن ناصر

اهلا وسهلا بيك بص انا يمكن بعد اليائس بشوية انا بعتبر نفسى حطام انسان لسه عايش بس مش عارف عايش ليه

مصر هى أمى said...

احمد
ربنا يخليك وشكرا اوى

مصر هى أمى said...

على الالفى
شكرا يا باشا وحاضر هازورك قريب