Thursday, February 15, 2007

الاخوان المسلمون 2

اتفقنا فى البوست اللى فات ان الاخوان من حقهم انهم يترشحوا للرئاسة
نيجى للحاجة التانية اللى صحيفة الفجر نشرتها ان الاخوان عندهم شركات وملايين من الجنيهات كانه حرام على اعضاء الاخوان انهم يكون عندهم فلوس او شركات او مشاريع يعنى حلال لرجال الحزب الوطنى واعضاء مجلس الشعب انهم يكون عندهم فلوس وشركات ينهبوا بيها البلد ويتعاملوا مع المصالح الحكومية بالمخالفة للدستور وحرام على الاخوان انهم يعملوا شركات ده حتى الظريف ان جريدة الفجر وهيا بتهاجم الاخوان واوجه انفاق اموالهم انها بتصرفها على الفقرا ومساعدتهم والطلبة المغتربة وتوفير سكن لهم والملازم والكتب الجامعية ومساعدة الفلسطنيين
ايه التهريج ده هوا ده يبقى عيب اليومين دول ده حتى مفروض ان الحكومة تتكسف على دمها مفروض هيا اللى كانت تقوم بالدور ده يعنى حكومتنا لا بترحم ولا بتسيب رحمة ربنا تنزل يعنى لا الحكومة بتساعد الفقرا واما تيجى جماعة الاخوان تساعدهم يقبضوا عليهم والتهمة مساعدة الفقرا
يا اعضاء الحكومة الافاضل
اما الفقر بيدق باب الواحد اول حاجة بيعملها انه يبيع ابنه وبعدين بيبيع لحمة والست بتبيع شرفها عارفين ليه علشان معندهمش حاجة تانية يبيعوها كل ده علشان لقمة العيش اما الجوع بيقرص الواحد وهوا مش لاقى العيش الحاف وبياكل من الزبالة ويلاقى الحكومة مش معبراه وبتدى قروض بالمليارات للحرامية علشان ينهبوها ويلاقى الناحية التانية ناس بتعاملهم كويس وتعطف عليهم وتساعدهم هيعمل ايه هيقول لا دول جماعة محظورة يا عم محظورة مين المهم اكل واعيش
انا بحثت كتير جدا وسالت كتير جدا هل جماعة الاخوان
اتهمت قبل كده انها عملت عمليات ارهابية ضد سياح
اتهمت قبل كده انها كانت سبب فى فتنة طائفية فى اى مكان
اتهمت قبل كده انها حاولت قلب نظام الحكم
اتهمت قبل كده بالرشوة واستغلال النفوذ وسرقة اموال الشعب
كل ده اجابته لا
العمليات الارهابية جماعات اخرى غير الاخوان واعتقد ان الاخوان ادانوا هذه العمليات
الفتنة الطائفية لا برضه محصلش انهم اتهموا باشعال الفتنة الطائفية
قلب نظام الحكم محصلش كل تهمتهم انهم بيعدوا نفسهم لتكوين حزب للترشيح للانتخابات
انا عايز اقول للحكومة انتوا مش اوصياء على الشعب سيبوا الشعب يختار بلاش كلام ان الاخوان خطر على مصر وانهم ضد المسيحين وعايزين يقتلوهم ويدفعوهم الجزية انا الكلام ده عمرى ما سمعتوه الا فى الصحف الحكومية اللى عايزة تشوه صورة الاخوان
عموما لو الاخوان حاولوا يأذوا اى حد من المسيحيين اول ناس هتقف ليهم المصريين المسلميين لان المسيحيين وقفوا كتير جدا يدافعوا عن المسلمين
انا بقول للحكومة حاجة حسنوا صورتكم الاول
وصدقونى الناس هتقف جنبكم
نضفوا الحزب الاول
اللى كل سنة بيخرجلنا حرامى جديد ينهب البلد
وبعدها هاننتخب مرشحيكم خلوا الانتخابات حرة وخلوا مرشحيكم يلتحموا بالناس مش من وراء زجاج العربية اللى هوا جواها ومش حاسس بالناس ولا بمشاكلهم وبعد ما الانتخابات تتزور لمصلحته محدش يشوفه تانى ولا ينفذ اللى وعد بيه
انا قلت فى الاول ان البوست ده مش دفاع عن الاخوان
طبعا الاخوان ليهم اخطاء كتيرة زى الاستعراض العجيب اللى هما عملوة فى جامعة الازهر مع ان الاخوان اعتذروا عنه اهم احسن شوية بيغلطوا وبيعتذروا مع ان الصحف كبرت الموضوع بشكل كبير علشان تكون فرصة للحكومة انها تضرب الاخوان
وزى تصريحات المرشد العام اللى قال انه هيضرب المعارضة بالجزمة
وزى ان الاخوان مش بيحاولوا يقووا علاقتهم بالاقباط صحيح ان كل كلام الاخوان عن الاقباط انهم لهم ما لنا وعليهم ما علينا لكن مبيعملوش خطوات جدية تزيل الشك من قلب اى مصرى سواء كان مسلم او مسيحى مع رفضى للتفرقة بين المسلمين والمسيحيين لان كلنا مصريين
الاخوان ملهمش اى رؤية مستقبلية للاوضاع فى مصر ولا خطط للتنمية وملهمش سبل اقامة علاقات خارجية مع الدول والحكومات ولا كيفية التعامل مع المشاكل الخارجية بسياسة حكيمة يعنى من غير نرفزة ولا نعرات قومية ولا قرارات فجائية غبية تضر بالبلد
مشكلة الاخوان انهم متسرعون وكلنا شفنا ده فى كتير من تصريحاتهم
انا مش من جماعة الاخوان ولكن بحاول اطرح رؤيتى للموقف كشاب
ممكن اكون غلط وممكن اكون صح
لكن التعذيب والسجن والاعتقالات اللى الواحد شايفها بتحصل لافراد الجماعة خلوا الواحد يتعاطف معاهم وسيبكوا من الصحفى اللى كل مهمته انه يشتم فيهم بدون طرح اى رؤية حيادية للموقف
حتى كلام الصحفى ده عن الاخوان مفيهاش اى حاجة تعيبهم محاولة حكم مصر افتكر ان كل واحد فينا وهوا صغير كان نفسه يكون رئيس جمهورية عندهم شركات ومشاريع مش عيب ولا غلط بيرشحوا نفسهم للانتخابات فى مجلس الشعب والنقابات والنوادى ايه المشكلة لو هما وحشين محدش هينتخبهم
انا عايز اقول حاجة اخيرة الناس حبت الاخوان من كتر كرههم فى الحكومة والحزب الوطنى
علشان كده اغلبية الشباب بدءوا يروحوا للاخوان لقوا نفسهم مع الجماعة لان الحزب الوطنى مقفول على ناس معينة واغلب قياداته مش حسنة السمعة
لكن الاخوان عمرنا ما سمعنا ان حد فيهم خد قرض وهرب ولا اغرق عبارة عليها 1500 مصرى وهرب
ولا رفع سعر الحديد واحتكرة ومحدش بيمتلكه غيرة فى مصر ولا هرب اثار البلد برة مصر ولا باع اكياس دم فاسدة ولا سرق اراضى الدولة
بالعكس مكتوب فى صحيفة الفجر ان من ضمن التهم الموجهة للاخوان مساعدة الفقراء
ما هيا بقت تهمة فى مصر دلوقتى
ياريت تفيدونى برايكم ونتناقش فيه
حوار محترم من غير اى تعصب او محاولة فرض راى بالقوة

68 comments:

NOHA said...

يا محمد
بصراحة كدة نفسى اسال الصحفى المبجل اللى بيهاجم الاخوان فى جريدة الفجر و اقول له :
هى المشكلة كلها ان الاخوان عندهم فلوس و بيصرفوها فى عمل الخير

هو لازم الواحد علشان يعمل خير يكون بينتمى لجماعة معينة

يعنى السيد فلان و السيد علان اللى هما من الاخوان لما اتبرعوا بفلوسهم فيه اى حد قال لهم لا و لا قبلوها يا سيادتة الصحفى المبجل مش سيادتك بتكتب بردة عن الناس الغلابة اللى مش لاقية تاكل و بتدافع عن حقوق الفقراء المظلومين بدل ما نقعد نقول ان الفقراء بقول لعبة الاخوان لضمان تحقيق اكتر شعبية عند المواطنين الافضل نعمل حملة صحفية نطالب بها بتبرعات اكتر للناس الغلابة و مش مهم مين اللى بيتبرع و لا من اى جماعة المهم ان فيه تبرع جاى ان فيه عيان هيتعالج و فيه جعان هياكول و فيه مشرد هيلاقى اربعة حطان يحموه من البرد دى حتى الست فيفى عبدة و اعذرونى انا مش بقارن طبعا بنها و بين الاخوان بتعمل مائدة رحمان فى رمضان هى و غيرها من المشاهير منظرة بقى مش منظرة المهم ان الناس الغلابة بتروح و بتاكل و بترجع مبسوطة لما تحس انها ليها حق تشوف الاختراع العجيب اللى اسمه اللحمة دة و تعيش و لو يوم واحد ذى الاغنياء

على فكرة انا مش بشجع افلوس الحرام و لكن كل اللى بطلوبة علشان نكون ناس منطقيين و الكلام اللى نقولة نلاقى حد بيسمعة و ينفذة هو قبل ما تمنعوا المعونات و المساعدات اللى بتقولوا انها من طريق حرام حاولوا الأول توجودا طرق حلال بديلة

اسفة انى طولت عليكم لكن هو دة الموضوع من وجهه نظرى صحفى حب يعمل فرقعة لقى ان اللى ماشى اليومين دول هو موضوع الاخوان فقال يكتب عنه بس احب اقول له انه كدة مش هاجم الاخوان بالعكس دة مدح فيهم

ibn nasser - ابن ناصر said...

قولت كلام جميل أوي , بص أنا مش ضد الاخوان خالص أنا أعرف كتير منهم مش وحشين أبدا لكن انا لما قولت ان مش من مصلحة مصر انهم يمسكوا الحكم (في الوقت الحال)ما كونتش لوحدي بالعكس د.عبد المنعم أبو الفتوح عضو مكتب الارشاد قال كده ,, ولكن معلش في حاجه أحب اقولهالك انت قولت علي انهم لم يتهموا بعمليات ارهابيه ضد السياح أو أشياء من هذا القبيل مش هتكلم أي زمان لان الاخوان لهم مواقف كويسه في محاربة اسرائيل لكن في مطابع وحاجات كده كانت بتنفجر وتاني حاجه الاخوان اتهموا قبل كده بقلب نظام الحكم وعندي الدليل ومش معني كده ان انا ضدهم بل هدفنا كلنا واحد لكن كل واحد لازم يغرف اللي عليه واللي له يعني مثلا الاخوان عندنا في الكليه حاجه تشرف مساعدات وحاجات فعلا يعني يشروا عليها بيساعدوا المحتاجين وبيصوروا ملازم ببلاش ودايما الأمن بيتحرش بيهم من غير سبب ولا أي داعي وهما اللي بينظموا المظاهرات لو مش موجودين مافيش أي حاجه بتحصل و بالنسبه لدعوتك للحزب الوطني بتنظيف الحزب معاك حق لو كان اتهمهم للاخوان بمساعدة الفقراء طب ما تساعدوا انتوا طب ما يجوي الجامعه يساعدوا الناس لكن كلها حجج فارغه ومقالك اكتر من ممتاز وسوري قوي طولت عليك

Anonymous said...

أشكرك يا ابنى على حياديتك على الرغم من انك بتقول انك ناصرى

شوف الأزمة الحقيقة هى الحرية
لو الحرية اتفتحت كل أمور البلد هاتتظبط - السجن يبقى للمجرمين بس
طبعا انا معاك انك لازم تخاف من الفوضى اللى هاتحصل بس كل حاجه ليها مقابل
مافيش حاجه ببلاش

سلام

.:.-=- ELGaZaLy-=-.:. said...

عارف يا مصر هيا امى رغم ان فى شوية انتقدات تتاخد عليك الا ان البوستين روعة بجد...

بجد ممتاز تحياتى

Unknown said...

فعلا والله كل التهم الموجه ضد الاخوان تخلي الواحد يضحك.
وبعدين انت ماتعرفش انةمساعدة الفقراء حاجه غلط ولا ايه, لأنك لما تساعدهم هتقضي علي محدودي الدخل ودول أهم ناس بالنسبه للرئيس مبارك واللي بيستحوذو علي اهتمامه, فلما كلهم يتغنوا الريس ياخد باله من مين؟

الأباصيرى said...

أنا قولت أقرا البوستين وبعدين أعلق

شوف ياباشا
الأخوان المسلمين محدش ينكر أنهم كانوا جماعة محظورة لان كانت أتجاهاتهم متطرفة وخاصتا مع المسيحيين وسمعتهم سابقاهم فى العالم كلة.. وطريقة القوة والبلطجة منفعتش انهم يوصلوا للحكم لانهم حسوا أن

المسيحيين كرهوهم من اللى بيعملوة فيهم من تحريض وقتل وحرق كنايس وطلب خروجهم من مصر كأنهم هنود مش مصريين زيهم

والمسلمين المعتدلين كانوا رافضين الأخوان لانهم مش عايزين يغرقوا فى دم ناس عايشين معاهم بقالهم قرون وشافوا الخير والشر معاهم وحسم سوا بالهزيمة وحققوا مع بعض النصر

والحكومة كانت رفضاهم لانهم كانوا يعتبروا جماعة مسلحة تهدف لزعزعة الأمن وأختلاق المشاكل بين عنصرى الأمة للوصول للحكم

يعنى من الأخر لقوا أن الموضوع بالقوة والسلاح والتشدد مش جايب نتيجة
فقرروا أن الأعتدال أفضل وغيروا منهجهم ليواكب العصر

فبالنسبة للمسيحيين أقروا بحقهم فى مصر وانهم مش معترضين حتى لو كان رئيس مصر مسيحى مادام هيخدم مصر ومصالح الشعب، ووقفوا موضوع الكرة للمسيحيين وأعمال القوة ضد المسيحيين... وكل دة لكسب المسيحيين

وبالنسبة للمسلمين المعتدلين لما شافوا أن الأخوان أصبحوا معتدلين وبيعملوا الخير ووقفوا تحيزهم ضد المسيحيين فتقبلوهم وحبوهم وساندوهم فى اعمالهم

يعنى كدة كسبوا المسيحيين والمسلمين وفاضل الحكومة... ودى ملهاش حل لانك بتتكلم فى الحكم والسلطة

بس تعالى نفكر كدة بالراحة هما دلوقتى تمام التمام وأنا واحد من المتفائلين بيهم تفائل حذر
بس فى نفس الوقت لازم نفكر بعقل شوية.. دول غيروا سياستهم ومنهجهم وغيروا أفكارهم لكسب ود الجميع وكشفوا الفساد لبيان حسن النية وأنهم ناويين على أصلاح البلد

بس أدينى سبب واحد يأكدلنا أنهم لو حصل ووصلوا للحكم مش هيغيروا سياستهم ومنهجهم ليواكب العصر الجديد وترجع ريما لعادتها القديمة

أحتمال برضة مش كدة

مصر هى أمى said...

نهى
عندك حق فى كل اللى انتى قولتيه مش لازم اكون منتمى لجماعة علشان اعمل خير الصحفى ده كل همه انه ينافق النظام ويشتم فى المعاضين ليه الناس ديه عايزة الدين يختفى من مصر
بس مع احترامى ليكى انا معترض تماما على مائدة رحمن بتاعة فيفى عبدة
انتى مطولتيش ولا حاجة انتى نورتينى

مصر هى أمى said...

ابن ناصر
انا من رايك ان الاخوان لسه مش مؤهلين لحكم مصر وده اللى انا قولته انهم ملهمش اى خطط مستقبلية واضحة
شوف انتى قولت ايه هما بيساعدوا الطلبة علشان كده الناس بتنجذب ناحيتهم وهما اللى بيحركوا المظاهرات ضد اسرائيل

لكن ليا سؤال امتى الاخوان حاولوا يقلبوا نظام الحكم انا عمرى ما سمعت عن حاجة زى كده

مصر هى أمى said...

حسن محمود
العفو يا سيدى انا اكتر حاجة نفسى فيها ان الواحد يوصل للحقيقة وانا معالك ان لازم تكون فى حرية والسجن للمجرمين بس صدقنى البلد ديه هتبقى كويسة اوى

مصر هى أمى said...

غزالى
ربنا يخليك وشكرا اوى وياريت تقولى على الانتقادات اللى تتاخد عليا علشان احسن من نفسى واستفيد منك وعلى فكرة مدونتك جميلة اوى وتصميمها حلو جدا

مصر هى أمى said...
This comment has been removed by the author.
مصر هى أمى said...

اسراء
شوفتى التهم مضحكة ازاى والله يا أس أس انا كنت اول مرة اعرف ان مساعدة الفقرا تهمة فى مصر واما هما ولاد الريس سايبهم ليه وسايب الاخوان يساعدوهم

مصر هى أمى said...

الاباصيرى
طبعا الاخوان المسلمون كانوا جماعة محظورة من زمان ولسه لحد دلوقتى برغم كل عملياتهم الفدائية ضد الاحتلال وده باعتراف الرئيس الراحل عبد الناصر وهما بعد كده تعرضوا للاعتقال والتعذيب اول ما الرؤساء حسوا ان الاخوان خطر على كراسيهم وانا معال انهم عملوا عمليات عنف لكن فى عمليات كتير الصقت بالاخوان وهما معهملوهاش لكن الحكومات اتهمتهم بيها علشان تسوء سمعتهم
والاخوان دلوقتى حسنوا من نفسهم وحاولوا يزيلوا الشك من قلوب الناس من ناحيتهم وانا كاتب ان من عيوب الاخوان انهم مبيعملوش خطوات جدية لازالة الشك من قلوب المسيحيين

الجملة اللى جاية من الكومنت بتاعك وديه من احسن الكومنتتات اللى جاتلى

بس فى نفس الوقت لازم نفكر بعقل شوية.. دول غيروا سياستهم ومنهجهم وغيروا أفكارهم لكسب ود الجميع وكشفوا الفساد لبيان حسن النية وأنهم ناويين على أصلاح البلد

بس أدينى سبب واحد يأكدلنا أنهم لو حصل ووصلوا للحكم مش هيغيروا سياستهم ومنهجهم ليواكب العصر الجديد وترجع ريما لعادتها القديمة

أحتمال برضة مش كدة

صح يا اباصيرى احتمال اه واحتمال لا وده مشكلتهم ان محدش عارف ليهم سياسة واضحة بس هما لو فضلوا زى دلوقتى ومسكوا الحكم اكيد هيكونوا ارحم شوية

ibn nasser - ابن ناصر said...

الحكايه دي كانت أيام مأمون الهضيبي وممكن تبقي تلفيق بس معتقدش انها تلفيق عادي كل جهه عايزه السلطه ليها ده العادي

الزعيـمة said...

صباح الخير زميلي مصر هي امى
احييك على البوست الرائع المحايد
ذكرت عيوب ومميزات الفكر الاخوانى
على السواء بكل شفافية

ولكن هل تتوقع ان يصبح لدي حزب مصداقية بعد ان يصرح بمواقفة ضد الاقباط ثم يتراجع فيها

وبعد ان يقول ظز فى مصر
والفى مصر ثم يتراجع فيها

وشوية ويقول مش عنده اعتراض ان يحكم مصر مسلم من اى مكان ولا يحكمها مسيحي ثم يتراجع فيها على حد ما جاء من معلومات فى تعليق الزميل الاباصيري

نعم ربما للاخوان الكثير من الاعمال الخيرية ولكن الم نسال انفسنا من يمولهم ؟ ومن يقف وراء تمويلهم سوي المد الوهابي الخليجي ؟

حتي لو هذا افتراء ولا يقف وراءهم
الا تمويلهم الذاتي ولكن هل كل التصريحات المثيرة للجدل التى قالوها ثم تراجعهم فيها كلما صارت ضجة بسببها يولد عند الاخرين مصداقية فى فكر الاخوان او حتي تنفيذهم لما سيعدون بة الشعب ؟

هذا ما اود قولة بجانب ما قولتة
حول ان ليس لهم ادنى خطط معروفه
لقياده البلد اجتماعيا وسياسيا

الم تسمع مرشدهم العام عندما قالوا له الاقباط خائفون من توليكم الحكم وما سيكون مصيرهم هل تعلم بماذا اجاب؟
قال الاقباط المش حيعجبهم البقاء تحت سلطتنا .. بالسلامة !!

كيف نود تصليح سياستنا الداخلية وتوحد المصريين جميعا بعد عقود من التفرقة ثم نستبدل القهر السياسي بقهر ديني

ام ننتظر الى تراجعهم عن ذلك
فى تصريح جديد ؟

شكرا لك زميلى الفاضل مصر هي امى
مقدرة لك تفهمك وحفظك للتوازن الحواري المثمر

halwasa-masrya said...

عادل .. بص توضيح بسيط بس وهرجع تانى

الحديد غير محتكر لاحمد عز بس .. الحديد ما بين احمد عز وسامى بشاى .. عز الدخيلة وبشاى للصلب ..

بالنسبة للاخوان .. هشتغل شوية وارجع اناكف فيك

مصر هى أمى said...

ابن ناصر
ممكن يكون كلامك صح وممكن يكون ده مخطط من الحكومة علشان تضرب الاخوان وكل ده فى الصراع على السلطة

أميرة البلطجية said...

كلام جميل وكلام معقول مقدرش اقول حاجة عنه

مصر هى أمى said...

هلوسة مصرية
مع انى زعلان منك علشان البوست اللى انتى مسحتيه لكن انا مقدر وجهة نظرك وشكرا على المعلومة المفيدة ديه بس احمد عز هزا اكبر محتكر للحديد فى مصر بدليل حديد عز وكمان اشترى الدخيلة يعنى على الاقل 70%من تجارة وتصنيع الحديد فى ايده وكمان رئيس لجنة الخطة فى مجلس الشعب يعنى بيحط القوانين اللى تخدم مصالحة

مستنى مناكفتك الجميلة
وخالى بالك من مديرك هوا انتوا صحيح لسه مأكلينه تورتة لكن برده

على فكرة المدونة بتاعتك اول مدونة لبنت بفتحها الصبح واما مبلقيش فيها بوست جديد بزعل اوى
علشان اول مدونة لولد بتاعت نائل فؤادة

مصر هى أمى said...

اميرة البلطجية
ايه الكلام الجميل ده اخجلتم تواضعنا

مصر هى أمى said...

الزعيمة

اول حاجة ياريت تشوفى التعليقات اللى فى البوست اللى فات علشان حسن محمود اعتذرلك على التهكم على كلامك وشوفى
الرد بتاعى على اخر تعليق ليكى

***********************************

اسمحيلى اقولك ان من ضمن اعتراضى على الاخوان تصريحاتهم المثيرة للجدل وبعد ما يقولوا التصريح يتراجعوا عنه زو ما انتى قولتى والاباصيرى قال ممكن يكون اكتشفوا انهم غلطانيين فى التصريح او يكتشفوا انهم غلطانيين فى انهم ادلوا بالتصريح ويفضل فكرهم زى ما هوا
وديه مشكلتهم ملهمش سياسة للحوار مع الاقباط تزيل الشك من نفوس المصريين كلهم
اما عن المصداقية فالنقطة ديه مهمة جدا هما بيتراجعوا كتير فى تصريحاتهم ودى بتأثر عليهم وطبعا مش مجاله ان احنا نقارن بينهم وبين الحزب الوطنى اللى معندوش مصداقية من اساسه

بصى يا زعيمة انا قولت ان الاخوان لو عايزين يحكموا مصر لازم يتعلموا سياسة الاول بمعنى انهم ميقولوش تصريحات تودى فى داهية وبعد كده يتراجعوا عنها لازم يفكروا الاول قبل ما يتكلموا

اما بخصوص التمويل ومصادرة فطبعا انا معنديش علم
لكن هقولك على حاجة حتى لو هوا تمويل من الخليج انا معنديش مشكلة طول ما هوا بيأثرش على استقلال مصر وان احنا ناخد الكويس من الخليج ومش لازم نتأثر بيهم هى مش نظرية ميكافللى علشان متفهميهاش كده لكن المبدا ان احنا ناخد اللى تقاليدنا تسمح بيه ونسيب الباقى اللى مش موافقين عليه
بس انا قريت تصريحات كتير ليهم ان تمويلهم ذاتى ومن تبرعات رجال الاعمال وده اللى خلا الحكومة تحاول تضربهم اقتصادهم وشركاتهم علشان تجفف منابع التمويل عندهم
زى خيرت الشاطر اللى كان من اشرف رجال الاعمال فى مصر وكان بيقدم تبرعات كتيرة للاخوان اما الحكومة معرفتش تسجنه بالقضاء العادى اللى حكم ببراءته فحولوه للقضاء العسكرى اعتقد ده منتهى الظلم لرجل اعمال شريف وفاتح بيوت ناس كتير

طبعا زى ما انتى قولتى انهم ملهمش خطط لقيادة البلد ممكن يكون ليهم لكن مش معروفة لحد وده غلط لازم الناس تعرفها وتتناقش فيها علشان يزيلوا الشك من قلوب الناس ده اذا كان ليهم خطط اصلا

صدقينى المصريين ممكن يسحملوا القهر السياسى اللى هما عايشين فيه لكن مش ممكن يقبلوا بالتفرقة بين المصريين على اى اساس دينى نهائى
المسلميين هما اول ناس هتقف ضد الاخوان لو فكروا يؤذوا اى حد من اخواتنا المسيحيين
وانا عايز اقول لاى مصرى ان الدين الاسلامى مش محصور فى الاخوان بس
يعنى مش لازم اكون اخوان علشان اكون مسلم كويس


الزعيمة شكرا ليكى انتى لانك تواصلتى معانا فى هذا الحوار وانك بترحبى بالاختلاف فى وجهات النظر
ياريت كل الزعماء الحقيقيين اللى ربنا عاقبنا بيهم يتعلموا من هذا الحوار

ولتانى مرة معلش سامحى حسن محمود برده انتى الزعيمة واقرى رده فى الكومنت بتاع البوست اللى فات

وشكرا ليكى وابقى شرفينى دايما
ومعلش طولت فى الرد عليكى

halwasa-masrya said...

اول حاجة انا مديرى زى القطط ياكل وينكر ... تانى حاجة ميرسى يا جيمل على انك بتفتح مدونتى اول واحدة بس ابقى افتح بشويش ليكون حد نايم

تالت حاجة ..انا نزلت اعتذار عشان البوست اللى اتمسح

رابع حاجة .. فى رد على سؤال هل حاول الاخوان قلب نظام الحكم ؟؟
لو هنمشى بالعهود؟؟
بص على عهد ناصر .. مين حاول يغتاله فى المنشية ؟؟؟
بص على عهد السادات .. مين اغتاله فعلا؟؟
لو هنبص على عهد ابو علاء... فانا اتمنى للاخوان كل التوفيق ....

الأباصيرى said...

جامد الكلام اللى قالتة الزعيمة
كيف نود تصليح سياستنا الداخلية وتوحد المصريين جميعا بعد عقود من التفرقة ثم نستبدل القهر السياسي بقهر ديني


تمام الحوار بدأ يسخن


انا متابع

كلبوزة لكن سمباتيك said...

قرات
و مليش تعليق
ينفع اسلم

عاشق مصر said...

انا شايف واعزرنى انك بدافع عن الاخوان بس مش بطريق مباشر انا شايف انهم لو مسكوا الحكم هايكونوا اوحش من حسنى ياريت ندور على البديل والمهم يكون بيحب الوطن ودا هدفه بس

Anonymous said...

ياست هلوسة
أحب أوضح ليكى الاتى
حادثة المنشية دى تمثلية اتلعبت بحنكة
فى حد لما يروح يقتل زعيم يبقى معاه مسدس بس؟
طيب انتى سمعتى لما كمل الخطبة بعد المحاولة؟ خدتى بالك انه اتهم الاخوان على طول؟
عرف منين ان اللى عملها اخوان؟
على كل حال الخطبة موجوده على موقعه ممكن تسمعيها
بالنسبة للسادات والله وضحت فى التعليق اللى فات اللى قتله خالد الاسلامبولى وعبود الزمر والاتنين مش اخوان مسلمين خالص ولا كانوا حتى فى الاخوان
وياستى عبود الزمر لسه عايش مماتش ومسجون
اذا قال انه كان اخوان مسلمين يبقى ليكى الكلام- ليه مش عايزه تصدقى انه تنظيم الجهاد؟
طيب اعملى بحث على النت وشوفى هايقولك ايه

نيجى لموضوع الريس - الريس كان موجود لما السادات مات يعنى عامل حسابه كويس
لعلم سعادتك الشخصى الحرس الجمهورى المصرى لا يمكن اختراقه وأقوى من الحرس الرئاسى الامريكى
والكلام ده انا جبته من مجلة التايمز الامريكية ساعت لما حاولوا يقتلوا الريس فى اثيوبيا.
ولعلمك واحد صاحبى من ايام المدرسه كان ليه قريب فى الحرس الجمهورى بيقول المسدسات بتاعت الحرس الجمهورى مالهاش لسان امان يعنى الضغطه برصاصه على طول
يعنى تقدرى تقولى ان الحرس الجمهورى بتاعه محصن ضد اى حاجه- والاسلحة اللى بتيجى ليه من نوع خاص
شوفى اللى تقدرى تقولى ان الاخوان فعلا قتلوهم اتنين ومش منهم عبد الناصر ولا السادات
وكان اجتهادات شخصية من ناس فى الاخوان
على كل حال الحرس السرى بتاع الاخوان اتحل خلاص
وعلى كل حال ياستى
الجماعه مش ملايكة أكيد ليهم أخطاء
وانا حقيقى زعلان ان فى واحد يطلع وحش ويكون من الاخوان
يالا معلش
--------------------------------
نيجى بقى لحضرة الزعيمة
ياستى بكرر اسفى اذا كنتى افتكرتى انى بتهكم عليكى
وبعدين لو عندك اى دليل واحد بس ان الوهابيين بيساعدوا الاخوان قولى عليه على طول
وطبعا استحاله هاتلاقى اى علاقة لان الحكومه كانت أكيد مسكتتش
ومع ذلك ياستى اقولك التمويل بيجى ازاى
من بعد حادثة المنشية عبد الناصر قلب جامد على الاخوان
وفى ناس سجنهم وفى ناس نفاهم بره البلد كتير قوى
الناس دى خدت لجوء سياسى وطبعا كان مسموح عالشان انجلترا والدول الغربيه كانت معاديه مصر فلما واحد يروح يقلهم عبد الناصر هايموتنى يروحوا مديينه حق اللجوء على طول
فى ناس كتير عملت كده
ومنهم جوز خالتى
وفى ناس راحت سويسرا وانتى لو سألتى فى سويسرا -اللى هى بلد المال - هاتلاقى ان فى اتنين مركز اسلامى واحد بتاع الاخوان وواحد بتاع السعودية وده ينفى ان السعوديه بتمول الاخوان اهه
الناس دى طبعا اخوان وهموا اللى بيلموا الفلوس وبيجمعوها والناس دى فى منهم مليونيرات زى يوسف ندا.
الخلاصة ان الناس لما خرجت استغلت اللجوء واشتغلت وجمعت الفلوس ولسه بتديها للاخوان
عالشان كده الاجنده بتاعت الاخوان اخوانيه صرف مافيش فيها ضغط من الخارج
وبرضه اتحداكى لو جبتى مؤسسة واحده قالت انها بتدعم الاخوان على العكس هاتلاقى الاخوان هى اللى بتدعم مؤسسات تانيه
على كل حال ده ردى على التمويل
أما بقى بخصوص انهم يراجعوا تصريحاتهم
خدتى بالك ان مفتى مصر أفتى بعد جواز امامه المراه للحكم وبعد كده رجع تانى من يوم واحد بس قال لا يجوز امامه المرأه
طالما ان التراجع مش على مبدأ يبقى تراجع حميد
أنما المبدأ هو اللى مافيهوش تراجع

واسه يا أخ عادل طولت عليك
كنت بوضح وجهة نظرى بس

Unknown said...

سايبهم لأن الراجل بيضحي بولاده, شفت تفاني أكتر من كده؟

Anonymous said...

معلش برضه نسيت اوضح حاجه مهمه جدا جدا جدا بخصوص الاخوان والأقباط
---------------------------------
هل الاقباط كان فى بينهم وبين الاخوان صراع؟
ابدا
الدليل
أنت عارف الراجل الوحيد اللى مشى فى جنازه حسن البنا مؤسس الاخوان كان مسيحى واسمه مكرم عبيد
وطبعا مكنش فى رجاله من الاخوان لأن كلهم كانوا فى السجن
وطبعا البوليس مايقدرش يقبض عليه عالشان مش هايقدره يتهموه انه اخوان مسلمين
طيب تفتكر ليه الراجل ده تطوع ومشى فى جنازه مؤسس الاخوان؟

وفى الانتخابات الاخيره كان فى دايرة الست منى مكرم عبيد واحد من الاخوان وواحد من الوطنى
الاخوان على طول سحبوا مرشحهم من قدام الست منى مكرم عبيد بس ياخساره اللى فاز بيها الوطنى
-
الفكره ان الاخوان خدموها
اللى بيروج ان فى مشكله هاتحصل بين الاخوان والمسيحيين مش حقيقى
حتى الاتنين اللى الاخوان قتلوهم مكنوش مسيحيين
وحتى لو فرضنا ان فى خلاف عمره ماهيوصل انه يبقى صراع
على كل حال شاكر ليك جدا انك سمحتلى أوضح وجهه نظرى
على كل حال قررت ماتكلمش عن موضوع الاخوان تانى
اللى عايزه ربنا هايكون

ودمتم بخير
سلام

شهيدة said...

سلام يا محمد
أنا دخلت مدونتك متأخر فقررت أحفظ الصفحة وأقراها على رواق
وان شاء الله حكتبلك تعليقي عليها المرة الجاية ماشي

انا كتبت بوست جديد يارب يعجبك

سلام
موفق ان شاء الله

Anonymous said...

معلش يا عادل مش عارف اعلق عشان دماغى مبرجلة شوية...بس انا متابع الكلام كله والكومنتات كلها ...استفدت انا كتير من حلقة النقاش دى ..استفدت معلومات مكنتش عارفها وعرفت ليه اللى بيكره بيكره ..وليه اللى بيحب بيحب ليه.

بس عموما ..هل اقبل بتغير القهر السياسى الحالى بقهر دينى محتمل من الاخوان ؟؟
نعم اقبل ..ليه بقى ..لسبب بسيط جدا ..ما انا لو اقدرت اغير نظام القهر السياسيى الحالى (الحقيقة هو مش سياسى بس) خلاص كدة هنبقى العقدة اتحلت ..يعنى الناس بقت تقدر تغير .. الناس بقت تقدر تثور .. يعنى بقيت تخوف يا عفرتو.. بغض النظر عن اللى هايجى ان شالله يكون مجلس ادارة الزمالك ..ماحنا خلاص عرفنا السكة ومش ممكن ساعتها هانرجع خطوة لورا ابدا.
ايه دة ..انا عملت كومنت اهو .. ولا خت بالى .
عاوز اقابلك اونلاين عادل

مصر هى أمى said...

هلوسة
حرام عليكى مديرك كويس انتوا كده دايما الستات ميعجبهاش العجب
مدونتك ديه من احسن المدونات يا باشا
وانا دايما بخبط قب ما افتح المدونة لحسن يكون حد خالع راسه ولا حاجة طول عمرى مؤدب وبخبط قبل ما ادخل
ممكن ادخل بقىء زهقت من الوقفة ادام الباب

الاخوان على فكرة مش هما اللى حاولوا اغتيال عبد الناصر فى حادئة المنشية انا شفت برنامج وثائقى فى الجزيرة مسكت الموضوع ده وقتلته بحث مع خبرا امنيين وشهود على الواقعة وتحقيقات النيابة والمخابرات كل ده اكد ان الحادثة كانت مدبرة علشان عبد الناصر يلاقيها فرصة يضرب الاخوان وانتى عارفة ان الناس كانت بتحب ناصر ازاى فكل الناس وقفت ضد الاخوان

اما السادات فعبود الزمر المتهم بقتله من تنظيم الجهاد مش من الاخوان

طبعا ابو علاء اللى انتى بتكلمى عليه هوا ابو علاء بتاع الخضار اللى على اول شارعكم وعايزة الاخوان يغتالوه علشان مش عايز يديكى حريتك ولا حق فى الاختيار
طبعا حريتك وحقك فى اختيار وتنقية الخيار مش كده ولا ايه

مش عايزين قلق فى المدونة وحياة ابوكى انتى نورتى يا يا يا يا يا مش عارف اقول ايه بس

مصر هى أمى said...

الاباصيرى
طبعا اللى بتقوله الزعيمة جاد مش الزعيمة يا ابنى

الناس ممكن تقبل القهر السياسى لكن مش ممكن تقبل القهر الدينى

الحوار بيسخن يا باشا علشان احنا حطينه على النار

افضل معانا مش هتقدر تغمض عينيك
بالعند فى هالة سرحان

مصر هى أمى said...

سمبتيك
ينفع تسلمى ولو حتى مقولتيش حاجة انتى نورتى
خلينا على بالك دايما

مصر هى أمى said...

عاشق مصر
انا مش بدافع عن الاخوان ولا بهاجمهم انا بحاول اطرح وجهة نظرى انا عارف انها متعاطفة مع الاخوان شوية بس يمكن علشان الاعتقالات اللى بتحصل ليهم
وعايز اقولك على حاجة انا اكتر حاجة صعبانة عليا العمال اللى فى الشركات اللى قفلوها بتهم ان اصحابها من الاخوان طب الناس ذنبها ايه تتشرد ماهو ده افترا من الحكومة على العمال اللى مش هتلاقى شغل تانى

انا نفسى اللى يحكم مصر حاكم عادل مش مهم يكون حزب وطنى او اخوان او الوفد او الغد او اى حد المهم يكون كويس

بالمناسبة الريس وبلا فخر حصل على المركز الرابع عشر فى قائمة اسوء حاكم على مستوى العالم

مصر هى أمى said...

حسن محمود
اول حاجة بلاش كلمة ست ديه احسن بتزعل البنات اوى اليومين دول خليها اختى او زميلتى الفاضلة افتكر احسن مش كده برده

بالنسبة لعبد الناصر كلامك صحيح وانا رديت على هلوسة وقولتلها انى شفت فى الجزيرة برنامج عن هذا الموضوع وقالوا فعلا ان الحادثة مدبرة من طرف عبد الناصر

اما السادات فانا اشكرك على معلوماتك بصراحة كانت معلومة
جديدة ليا ان عبود الزمر من الجهاد

بالنسبة للريس مفيش حاجة اسمها الريس متحصن
يأتيكم الموت ولو كنتوا فى بروج مشيدة
وانا عارف ان الحرس الخاص للاخوان اتحل من ساعة محصلت عمليات الاغتيال بدون علم القيادات العليا وبتصرف فردى من اعضاء الحرس الخاص علشان كده مكتبتهاش من ضمن عيوب الاخوان
بص يا حسن مفيش حد ملاك فى العالم كلنا بشر وكلنا معرض للخطا

بص الاقباط خايفين من الاخوان والمسلمين كمان خايفين من معاملة الاخوان مع الاقباط علشان ملهمش سياسة واضحة فى تعاملهم مع الاقباط حتى ولو هما قالوا لهم ما لنا وعليهم ما علينا لكن مفيش خطوات فعلية
اما بالنسبة لمكرم عبيد فديه معلومة صحيحة لان الزمن اللى فات كان زمن جميل والناس كلها كان المهم عندهم مصلحة مصر بغض النظر عن مسلم او مسيحى

نتمنى ان الخلاف بين الاخوان والاقباط ميتحولش الى صراع لان مصر مش حمل حرب اهلية

وشكرا ليك جدا على اشتراكك معانا فى الحوار برغم ان ملكش مدونة نقدر ندخل عليها ونعلق عندك

مصر هى أمى said...

شهيدة

حمد الله على سلامتك من الجنوب اللبنانى العظيم
انا مستنى تعليقيك

البوست بتاعك جميل اوى انتى فعلا بتعرفى تنقى الكلام ومحللة سياسية كويسة وفعلا مواطنة عربية اصيلة
ربنا يخليكى للعرب وللبنان

وسلامى لكل اهل الجنوب

مصر هى أمى said...

اسراء
فيه مثل بيقول
لو جالك الطوفان حط ابنك تحت رجليه

والباشا من ساعة ما مسك الحكم وهوا حاطط الشعب كله تحت رجليه هوا مش تحت رجلين الطوفان

مصر هى أمى said...

واحد من الناس
يا ابنى انت دماغك مش متبرجلة دا انت عندك مدونة تبرجل بلد

الحمد لله انك استفدت من مدونتى والنقاش اللى داير

كده انت فاهمنى لو احنا قدرنا نغير الحكم المستبد مرة كل حاكم هييجى بعده هيخاف من الشعب كل حاكم سواء كان اخوان او غيرة ساعتها النخوة والوقوف امام الظالم هترجع لروح الشعب مرة تانية ومش هنرجع لعهد الظلم مرة تانية

باشا ابعتلى رقم موبيلك على الميل وانا اكلمك واحنا نتفق نتقابل اونلاين

سهر الليالى said...

مافيش فايده حكمه قالهاسعد زغلول
البلد دى مافيش فايده فيهادايما نخلط الامور ببعضهاعندهم فلوس وايه يعنى على الاقل مش هنخاف يكون قصدهم من الحكم جمع الاموال وتحويلها على بنوك سويسرا

شهيدة said...

سلام يا محمد
أنا قريت موضوعك
وصراحة انا ما بفهمش كتير فحكاية الاخوان المسلمين وما بعرفش عنهم تفاصيل
ورغم اهتمامي الكبير بمتابعة اخبار مصر مش قادرة لسة أكون رأي واضح عنهم.
بس مثلا انا لسة فاكرة وقت الحرب وقفتهم مع حزب الله بشكل جميل، طبعا في ناس بتحلل السبب في انهم عايزين يكسبوا تأييد شعبي، وده يمكن صحيح، بس بالنهاية دي أساليب سياسية معروفة
بس كمان اللي حصل في الجامعة جعلني استغرب شوية يعني هم ليه عملوا كدة؟ هل كان هذا تصرف فردي من بعض العناصر؟ ولا ايه؟ مش عارفة
المهم ان نقطة ان الناس بتتعاطف مع الأخوان نكاية بالحكومة ده شيء أوافقك عليه تماما

المهم ان مقالك جميل وموضوعي، انت حاولت انك تبقى محايد قدر الإمكان
ربنا يوفقك
سلام

مصر هى أمى said...

حسن محمود
نيجى بقى لحضرة الزعيمة
ايه يا عم انتى عاملة حرب بينك وبينها ولا ايه

كل المعلومات اللى انتى قولتها كويسة اوى طبعا فى حاجات منها معروف زى التمويل من الاعضاء اللى بيشتغلوا بره مصر اما حكاية مركز سويسرا فديه جديدة عليا واول مرة اسمع عنها

حسن
الموضوع مش تحدى بينك وبين الزعيمة الموضوع كله انها بتسأل عن مصادر التمويل وانتى تفضلت مشكورا ووضحت مصادر التمويل

ولو رجعت للبوست بتاعى هتلاقى انى كاتب من عيوب الاخوان كثرة تصريحاتهم وبعد كده يكتشفوا انها غلط فيتراجعوا صح هوا الرجوع للحق فضيلة لكن لازم الاخوان يتعلموا انهم يفكروا فى تصريحاتهم الاول

اوانت مطولتش ولا حاجة
ووجهة نظرك وضحت وشكرا ليك مرة تانية انك مستمر معانا فى الحوار

مصر هى أمى said...

امانى
اهلا وسهلا بيكى

مش لازم نخاف من الحاكم علشان هياخد فلوسنا ويهربها برة بس طب الملك فاروق محدش قال عليه انه خد فلوس وهربها برة مصر يبقى كدة بقى حاكم عادل
بس انتى رايك من راى ناس كتير ان كله محصل بعض كلهم وحشيين
ويبقى كدة فعلا مفيش فايدة

مصر هى أمى said...

شهيدة
اول حاجة اللى حصل فى الجامعة كان عبارة يوم كامل ثقافى ورياضى ومسرحى بس الغلطة انه كان من ضمن الانشطة الرياضية الاستعراض العجيب اللى الطلبة عملوة هما مفكروش ساعتها فى العواقب بتاعة الوقوف ضد الحكومة وهما لسة مش جاهزين وانا رافض الاستعراض ده والاعلام الحكومى اما صدق وعملها حريقة علشان يدارى على فشل الحكومة فى الاقتصاد وبالمرة فرصة لضرب الاخوان ومهمهمش الطلبة ديه يتشردوا ويضيع مستقبلهم

المهم ان الاخوان وقفوا مع حزب الله لان ده الواجب اللى على اى حد عربى وهما عملوا اللى زعماء العرب خافوا يعملوه علشان الزعماء دول خايفين على مناصبهم وكراسيهم

الحمد لله انى تجيلى شهادة من شخصية كويسة زيك انى طرحت الموضوع بحياد
انا اشكرك على هذه الشهادة
ربنا يوفقك انتى كمان

Anonymous said...

ياسيدى خلاص
مافيش داعى نقول ست طالما بتزعل البنات
-------------------------------
ده انا كنت متخيل انك مش هاتصدق حكاية حادثة المنشية دى ابدا
والله كويس

دى بالظبط بتفكرنى بانتحار عبد الحكيم عامر
كل الناس فكره انه انتحر بس الحقيقة غير كده خالص
وانا مش مع ولا ضد المشير أنا ماعرفش قصته كويس علشان كده مش عارف أحكم عليه
على كل حال لن يفيد البكاء على اللبن المسكوب
والماضى راح فى حاله
خلينا فى الحاضر وجماله على رأى ليلى مراد
:)

عاشق مصر said...

والله فرحتنى ان الريس خاد مركز 14 اخيرا حققنا انجاز مش مهم فى ايه المهم مركز وبس
عرفتوا انكم ظالمينه

hosnysoliman said...

محمد على باشا
انا لسه راجع من اللقاء..سعدت بالتعرف اليك انت من الشخصيات التى تدخل الى القلب مباشرة
انا قلت امس دلوقتى وبعدين اليا عوده الى البلوج بتاعك

إبـراهيم ... said...

محمد عادل باشا .. أنا لسه راجع من اللقاء حالاً


ههههههههههههه


قلت برضه أسلم عليك


إخـوان مين يا عم .....


أنا إيه اللي جابني هنا ؟؟؟

AbdElRaHmaN Ayyash said...

أحييك يا محمد
تحليل رائع
ونظرة مدققة
تحياتي

مصر هى أمى said...

عاشق مصر

طبعا يا باشا احنا ظالمينه ربنا يكرمه كده ويوصل لاعلى المراكز اكتر واكتر

مصر هى أمى said...

استاذ حسنى سليمان
ربنا يخليك يا باشا انا كمان سعدت بالتعرف عليك وصدقنى انا حسيت من كلامك انك بتبصلنا على ان احنا مش شباب هايف ولا تافة فربنا يخليك وتفضل معانا كده على طول
والمرة الجاية ان شاء اللة هتكون فى الاوبرا زى ما حضرتك اقترحت

مصر هى أمى said...

ابراهيم معايا

رجلك هيا اللى جابتك

الاجتماع الجميل هوا اللى خلانا نتعرف على بعض فاهلا وسهلا بيك

مصر هى أمى said...

عبد الرحمن

شكرا اوى وربنا يخليك

MAKSOFA said...

بصراحه قرات البوست للنهايه
لكن اقول لك الحقيقه انا باصدع لما اتكلم في السياسه
لأني بجد باشعر بالقهر

مصر هى أمى said...

مكسوفة

بس هيا السياسة هيا ديه حياتنا ولازم يكون لينا راى فى قضايا بلادنا
وشكرا اوى على زيارتك

فؤاده said...

بص يا زميلي

اول حاجه انا مش فاهم لييه بتقول الاخوان معندهمش رؤية وبرنامج ، بالعكس الاخوان عندهم برنامج لكل حاجه والكلام ده موجود على النت والرنامج الانتخابي وهينزل قريب في برنامج الحزب الل بيتحضر دلوقتي

تاني حاجه ، اخر حاجه ممكن تقولها على الاخوان انهم متسرعين ، بالعكس ، ده موضوع المدى الطويل ده من اهم مبادئهم اللي ساعات ممكن يكون عيب من عيوبهم

ويعدين انت ليه مصمم تتكلم عن الحزب الوطني على انه حزب
يابني دول شوية مرتزقه

في الاخر كان نفسي ارد على كل الناس اللي بيهاجمو الاخوان عندك دول بس انت عارف عندي ظروف ومش فاضيلهم

فؤاده said...

اما عن موضوع الاخطاء ، عادي كل الناس بتغلط ،واخطاء الاخوان قليله ، والمهم انهم بيعتذرو وبيصححو اخطائهم طول الوقت

مصر هى أمى said...

نائل
اول حاجة البقاء لله فى وفاة جدتك
----------------------------------

نائل
البرنامج موجود صح لكن اما تبص فيه مش هتلاقى مصادر التمويل ولا كيفية تنفيذه ممكن اى حد يعمل برنامج لكن هل هما عندهم القدرة على تنفيذه ده اللى انا اشك فيه
وغير كده ليه تغاطيت عن نقطة الاقباط معلقتش عليها ليه

الاخوان بيحضروا فعلا لخطط طويلة المدة لكن انا قصدى على التسرع انه تسرع فى اطلاق التصريحات وبعد كده التراجع عنها
وده بيعمل صورة سيئة عند الناس

انا معاك ان الحزب الوطنى هوا اسوء حاجة عايشاها مصر وانه سبب الكوارث فى مصر واغلبيته من الحرامية لكن هنعمل ايه اهو ذنب مكتوب علينا نستحمله

الناس اللى عندى مش بيهاجموا الاخوان الناس ديه بتطرح مخاوفها من وصول الاخوان للحكم وهيعملوا ايه

ثم ان الجرائد الحكومية مصورة الاخوان على انهم شياطبن وعايزين يولعوا فى البلد وده خوف ناس كتير بتاخد معلوماتها من الجرائد الحكومية

انا عارف ان مشاغل سعادتك كتير والحركة الوطنية واخداك
زى جماعة 30 فبراير

-_- said...

انا هعلق على نقطة واحدة بس ضحكتنى وهي اللى نشرت في جريدة الفجر تحت عنوان ان الاخوان يمتلكون ملايين

يا سلام ؟؟

ايه المشكلة يعنى ؟؟

سبت ابراهيم نافع و احمد عز و اتكلمت في الاخوان

عار عليك

Anonymous said...

غريبة ان كل أباطرة ومحتكرى الصناعة والمال فى مصر والمقربين من الأسرة الحاكمة لم يتم ذكر ولا اسم منهم
ورغم ذلك ينظر وبقوة هجومية على تمويل الاخوان؟؟

رغم اعتراضى على جماعة الاخوان المسلمين شكلا وموضوعا ومضمونا
الا أنى ضد أى الصاق أى تهمة باطلة لهم
وضد أن يتم الصاق تهم التربح والتمويل الأجنبى لهم
وفيه غيرهم بيمص فى دم الناس هنا وتحت رعاية الأسرة الحاكمة سواء كان مسلم أو مسيحى او حتى مالوش ملة
ما يجمعهم فقط هو دين واحد
السلطة والمــــال
دين النظام العالمى الجديد

يعنى هم بيتمولوا من برة
وغيرهم بيتمول من جوة
تبقا بصرة

من باب أولى للى نشر كلام زى دة ومن باب العدل والمساواة والحيادية فى الجريدة
كان ينشر معاه مقارنة بين تربح المسئولين الكبار من مناصبهم
وكمان المتربحين والمنتفعين من رجال أعمال الحاشية الملكية الجديدة

لو قلنا انه ظلم الاخوان
يبقا كان يكمل جميله
ويظلم الرؤوس الكبيرة كمان
المساواة فى الظلم عدل

ولا يمكن منتظر التصريح بتخطى الخطوط الحمرا

تحياتى

micheal said...

أولا أحييك علي هذا الطرح الرائع و المحايد لوضوع شائك مثل الاخوان..بجد دة من أجمل ما قرأت في موضوع الاخوان
ثانيا...أنا متأكد من نقطة أن الحكومة واقفة للاخوان علي اي هفوة و ان من مصلحتها تكوين صورة سيئة للاخوان عند االعامة بس بصراحة أنا متهوف جدا من الاخوان و شايف أن خطورتهم علي مصر ممكن تبقي أكتر من الحكومة الحالية لسببين
الاول..هوا أن فية احتمال كبير الاخوان يتسببوا في مشاكل طائفية مع الاقباط لو اصروا علي تطبيق الجزية و حرمان الاقباط من الالتحاق بالجيش لان ساعتها بصراحة الاقباط حيحسوا أنهم مواطنيين درجة تانية في بلدهم و دة ممكن يعمل جو من الاحتقان مصر في غني عنة تماما
الثاني...نظام الاخوان ممكن يجلب علي مصر أخطار خارجية نحن في غني عنها فممكن جدا تلاقي الامريكان بدأوا يتلككولنا و يقولوا احنا لازم ندخل بحجة حماية الاقليات من اضطهاد النظام و بحجة ان النظام دة خطر علي السلام في الشرق الاوسط و أنهم بيتعاونوا مع القاعدة..الخ و طبعا الامريكان مش حيغلبوا أنهم يطلعوا ميت حجة هايبة لو أرادوا الاطاحة بالاخوان لكن في النهاية كلنا اللي ممكن ندفع التمن و أنت نفسك أشرت الي تصرفات الاخوان العنترية الغريبة و تصريحاتهم الغريبة و طبعا احنا مش في زمن العنتريات و لا البلد مستحملة أي تصرفات طائشة
مدونة رائعة تستحق كل المتابعة..سعيد جدا أني اتعرفت عليك و لازم أشوفك اللقاء الجاي
تحياتي لك

مصر هى أمى said...

شارم

اهلا بيك عندى
ما هوا ده اللى استفزنى عندهم ملايين وبيصرفوها على الفقرا يعنى الحكومة لا بترحم ولا بتسيب رحمة ربنا تنزل
اما احمد عز واصحابه فدول بيكونوا نفسهم انتوا زعلانيين ليه

مصر هى أمى said...

شهروزة
اهلا بيكى اول مرة تزورينى
ويارب متكونش الاخيرة

كل الاسرة الحاكمة والاسر والعائلات الملكة محدش يقدر يقربلها الا بأذن يعنى اما صلاحيتهم خلصت بالنسبة للنظام يطلقوا عليهم الصحفين اياهم ويبدءوا يتكلموا على نزاهتهم طب كنتوا فين المدة اللى فاتت ديه كلها محدش عارف

اما الاخوان انا برده ليا اعتراضات كتير عليهم
بس المشكلة ان التهم اللى بتتوجهلهم اى كلام يعنى تمويل خارجى وكلام فارغ واما القاضى الشريف براهم وافرج عنهم من المحكمة قام البوليس قابض عليهم ومحولهم محكمة عسكرية يعنى هما كانوا مصوا دم الشعب زى الحرامية بتوع الحزب الوطنى محد يفهمنا يا اخوانا
يا شهروزة
اللى بيحكم مصر دلوقتى كام اسرة هيا اللى بتعمل فى البلد كل اللى هيا عايزاه
ابقى شرفينى تانى

مصر هى أمى said...

مايكل
انا اللى سعيد انى تعرفت على شخصية كويسة زيك وقرحت جدا انى الاقى شباب صغير زيك ومهتم بالبلد وقضاياه

اول حاجة شكرا على مجاملتك اللى اعتبرت ان البوست ده من احلى البوستات اللى بتناقش موضوع الاخوان

بالنسبة لاعتراضك الاولانى
انا قولت كدة فى البوست هما الاخوان بيقولوا ان الاقباط هيكونوا اخواتنا وان التصريحات بتاعت الجزية ديه كانت غلطة لكن مشكلة الاخوان انهم مبيحاولوش يقربوا من الاقباط ولا بيحاولوا يزيلوا الشك من نفوش اخواتنا الاقباط مع ان الوحيد اللى مشى فى جنازة الامام حسن البنا كان الاستاذ فكرى مكرم عبيد يعنى قبطى لان زمان كان كل هم الاخوان انهم يحاربوا الاحتلال فكان كل الشعب معاهم اما دلوقتى فهما مبيحاولوش يقربوا من الاقباط

بخصوص الجزء التانى انا اعتقد ان امريكا ناوية تحتلنا كده كده سواء جه الاخوان او ما جوش يمكن لو الاخوان مسكوا الحكم امريكا هتسرع شوية فى التلكيك لمصر باى حاجة
اما فى الوقت الحاضر فهيا محتلانة بس من غير جيش
بس الواجب على الاقباط لو امريكا حاولت تتدخل بحجة حمايتهم انهم هما اللى يقفوا لامريكا ويقولوهم ان الاقباط عايشيين فى مصر جنب المسلمين ايديهم فى ايد بعض كلنا مصريين وكلنا بنمارس حقوقنا الدينية بكامل حريتنا وعايزك تعرق حاجة حتى ولو الاخوانفكروا انهم يضهدوا الاقباط اول ناس هتقفلهم هما المصريين المسلمين صدقنى ديه حقيقة فعلا

واشوفك ان شاء الله القاء اللى جاى وانا مبسوط انى عرفتك

raspoutine said...

بيتهيألى خلاص الموضوع ده خلص
وكفايه اخوان مسلمين واحد واتنين

محمد انت شخصية طيبه اوى وانت بجد دخلت قلبى وحسيت انك اخوى اللى مشفتهوش من زمان مع انى مهنديش اخوات اولاد

محمد انا عايزك تكتب عن اللقاء بتاعنا لازم مدونتك الجميله تتكلم عن اللقاء ده
وده هيبقى شرف لينا كلنا
تحياتى لك ايها الاخ


اخوك ايمن فاروق

مصر هى أمى said...

راسبوتين
انا فعلا كتبت عن اللقاء بتاعنا بس مكنش عندى يوقت انى انوله على المدونة لكن انا نزلته دلوقتى
انت فعلا من الشخصيات المحبوبة جدا

Amr Ahmed said...

mohamed how r u

plz contact me at
casper_miro18@hotmail.com

Esmeralda said...

اعتقد ان لازم يحصل تجديد فى تفكير الاخوان و طريقتهم و اولها الشيخ مهدى بتاعهم داه , الراجل داه صدقنى اسوأ دعاية ممكن يقدموها لنفسهم , اى حد يسمع كلامه الغريب داه, الجزية و الافلام ديه , و هو المفروض المرشد العام لازم يصدق انهم جماعة متخلفة مش متطرفه و بعدين برضه بعض الحركات الخايبه اللى بتقلب الناس عليهم زى موضوع الانسحاب من الجلسة عشان الدستور , ايه الهبل داه؟؟؟؟ هو يا اعمل اللى انا عايزه يا مش لاعب مايوعواالناس احسن و يفهموهم المفروض يبطلوا الانفعلات بتاعتهم ديه , الجماعة دول عايزين تجديد و تنظيم شويه و يعملوا حاجة بجد ,لازم يبقوا عمليين , حد حايقولى محدش مديهم فرصه, لأ اللى عايز يعمل حاجة بيعملها , زى ما قلت معاهم فلوس ممكن يعملوا حاجة بيها , ليه مايبقوش قوة اقتصاديه مثلاو مش بس بيصرفوا على الفقرا زى ما بتقول , و بعدين موضوع الخوف منهم داه اعتقد لو فيه دستور قوى يحمى الشعب مش حايبقى فيه خوف و الا كده حنفضل خايفين على طول و برضه حانفضل راضيين و اللى نعرفه احسن من اللى منعرفوش و داه ردا على مايكل ,

هما كمان عملوا زى الحزب الوطنى ,ركود ومفيش دم جديد و القياده هى هى

اللى مضايقنى انهم نجحوا فى الانتخابات كرها فى الحكومة مش عشان اقتناع انهم الاصلح بس اهو المهم ان فيه حركة بدل الركود

انا زرتك اهه و يا ريت كانت زيارة خفيفة :)

مصر هى أمى said...

Azmiralda
اولا شكرا على زيارتك
بس بصراحة اول مرة اشوف حد يعلق على بوست مكتوب من اكتر من شهر

بالنسبة لتعليقك على الاخوان انا موافق على حاجات كتير فيه فعلا هما ليهم تصريحات غريبة وتودى فى داهيةوده بسبب انهم متعلموش سياسة هما طول عمرهم فى حرب مع الحكومة فمكنش عندهم وقت ولا حد سمح ليهم يتعلموا ازاى يكونوا سياسيين
وده يرجعنا لنقطة الانسحاب من الجلسة ومقاطعة الدستور شغل عيال صغير ة متروح وتقول لا كده كده الانتخابات هتتزور لمصلحة الريس والحكومة فعلى الاقل الواحد ريح ضميره ادام ربنا
الناس زهقت من الحكومة علشان كده اختاروا بتوع الاخوان يمكن يكونوا احسن منهم