Wednesday, February 14, 2007

الاخوان المسلمون 1

هذا البوست ليس هجوما على الاخوان ولا دفاعا عنهم
ولكنه محاولة لطرح وجهة نظر حول الاخوان وياريت تفيدونى برايكم
مبدئيا انا من زمان وانا نفسى اكتب عن جماعة الاخوان المسلمون وزادت رغبتى فى الكتابة بسبب مقال قريتة فى مدونة
الزعيمة عن الاخوان ومقال قريته فى جريدة الفجر لكاتب صحفى محبش اكتب اسمه فى مدونتى لانى بكرهه جدا الكاتب ده سخر كتاباته للهجوم على الاخوان وسماهم بروتوكولات الاخوان تشبها ببروتوكولات صهيون
المهم المقالة كانت بتتكلم عن محاولة الاخوان لحكم مصر
انا عايز اقول حاجة
من صغرى وانا كنت بحلم انى اكون رئيس جمهورية مفيش حد مكنش بيحلم انه يكون رئيس جمهورية
يعنى حلم الاخوان فى الحكم حاجة مشروعة بيكفلها الدستور والقانون يعنى من حق اى حد مؤهل وقادر انه يتقدم لحكم الدولة ويدخل الترشيح على الرئاسة يعنى الاخوان معملوش حاجة غلط ولا حاولوا يعملوا انقلاب برغم ان الجيش عمل قبل كده انقلاب يوم 23 يوليو والشعب كله سانده فيها
معنى ان الاخوان بيحاولوا يطوروا نفسهم ويقووا جبهتهم مش عيب لانهم زى اى حد من الاحزاب الوفد او الغد اى حزب نزل فى انتخابات الرئاسة اللى فاتت محدش قال انهم عايزين يستولوا على السلطة
سيبك من كلمة الجماعة المحظورة مش معقولة تبقى جماعة فيها العدد ده كله وكلهم اساتذة جامعة ودكاترة ومهندسين وهيئة عليا ومرشد عام ومساعدين ورجال اعمال وكلهم معروفين بالاسم ونقول فى الاخر انهم جماعة محظورة امال لو كانوا جماعة علنية كانوا هيبقوا ايه
يعنى احنا اتفقنا ان محاولة الاخوان لحكم مصر حق مشروع
زيهم زى اى حد ممكن يترشح للرئاسة وبيئهل نفسه للترشيح وبيقوى
جبهته الداخلية ويدعم صفوفة زى ما بيعمل الحزب الوطنى دلوقتى انه بيجمع الشباب ويحاول يضمهم ليه علشان شاف ان الاخوان اغلبيته من الشباب المثقف والحزب الوطنى اغلبيته من العواجيز وطبعا مش مجاله ان احنا نتكلم عن الحزب الوطنى وطهارة ايديهم المعروفة زى ممدوح اسماعيل وهانى سرور واحمد عز وطارق السويسى يعنى بسم الله ما شاء الله كل حرامية البلد فى الحزب الوطنى
بالعكس هتشوف ان الاخوان بيمثلوا شريحة كبيرة فى المجتمع زى رجال اعمال محترمين وده اللى خلا الحكومة فى الفترة الحالية بتحاول تضربهم لانهم اصبحوا قوة اقتصادية كبيرة اوى والناس بتثق فى المعاملة معاهم وهناك ايضا رجال اقتصاد واساتذة جامعة منهم علماء كبار جدا فى كل المجالات
كل ده خلا فئة كبيرة من المجتمع متعاطفة مع الاخوان
يمكن فى ناس كتير تتعاطف معاهم كرها فى الحكومة ( مكتب نظيف لخدمات رجال الاعمال ) الحكومة اللى الواحد مشفش منها اى حاجة كويسة سواء فى التعليم او الصحة حتى الانتخابات الناس كانت بتنتخب مرشح الاخوان كرها فى الحكومة ونكاية فيها
الظلم اللى تعرضلة مرشحين الاخوان فى الانتخابات خصوصا المرحلة الاولى خلا الناس تتعاطف معاهم وطبعا كلنا عارفين شهادة المستشارة نهى الزينى التى شهدت شهادة حق ان الانتخابات فى دمنهور اتزورت لصالح مرشح الحزب الوطنى وكذلك لجنة الدقى اللى نجحت فيها الوزيرة امال عثمان ضد مرشح الاخوان
المهم عايزين نقف وقفة امام ليه الاخوان متغلغلون فى وجدان الناس برغم محاولة الحكومة والصحافة الحكومية لجعلنا نكره الاخوان زى ما صحيفة الفجر نشرت ان لدى الاخوان ملايين وشركات ومشاريع ضخمة


البوست القادم الاخوان المسلمون الجزء الثانى

35 comments:

halwasa-masrya said...

الاخوان ...
(( الناس كانت بتنتخب مرشح الاخوان كرها فى الحكومة ونكاية فيها .. ))

عندك حق بس مع احترامى الكامل للاخوان .. ومبادئهم المنشورة على موقعهم اخوان اون لاين . الحياة العملية بتختلف اختلاف كتير عن المنشور على المواقع الالكترونية .. سواء المنشور ده مبادئهم او المنشور ده شتيمة فيهم زى المنشور على coptichistory

بس انا اتعاملت معاهم من قريب على المستوى العملى ومع نائب من نوابهم دلوتى وشفت حاجات كتير معرفتش افهمهاساعتها .. بس اللى هعرف اقوله ان الفساد مش بعيد عن حد .. وكله محصل بعضه

وده رايى ... وبس

مصر هى أمى said...

هلوسة
على فكرة انا مكنتش بدافع عن الاخوان فى البوست ده ولو استنيتى للبوست اللى جاى هتلاقينى موضح عيوبهم
الفسدا مش بعيد عن حد ده كلام صح بس احنا لحد دلوقتى مجربنهمش علشان نعرف اذا كانوا كويسين ولا لأ

halwasa-masrya said...

مجربنهمش فى ايه ؟؟

لو فى الحكم يبقى انت عندك حق

بس لو فى الحياة العملية

انا جربت واحد منهم وصدقنى النتيجة كانت بالنسبة لى غريبة اوى وصدمتنى جدا
جايز مش كلهم كده

كله جايز

ibn nasser - ابن ناصر said...

بس الطبيعي أن الواحد يتعاطف مع الاخوان وهلوسه مصريه كلامها صح الناس بتنتخبهم عشان ضد الحكومه مس أكتر والاخوان في ناس فيهم محترمخ جدا لكن شوف بقي لو مسكوا ايه اللي هيحصل ااه مش هيبقي فيه فساد مش هنبقي مع اسرائيل لكن شوف اللي ممكن يحصل من بره شوف تجربة الجزائر وحماس ده رد الفعل اللي بره شووف هما هيعملوا ايه جوه انا متخيل هيكون فيه حرية التعبير تخيل لو واحد هاجم حسن البنا مثلا !!؟؟ ايه يحصل ؟؟؟

الزعيـمة said...

اخى الفاضل مصر هي امى

اشكرك اولا على اهتمامك بما جاء فى مدونتى وسعيك لتوضيح وجهه نظرك

الاخوان المسلمون كجبهه معارضة للحكم والتوريث فكل المعارضة مثلهم وبالتالى معهم وانا لا اقلل من شان اى معارضة صادقة وهادفة لخدمة مصر وشعبها

ولكن ما اعيب على الاخوان بالتحديد هي مرجعيتهم التي البسوها ثوب ديني
طمعا فى الحصول على تعاطف وتاييد شعبي جارف لمساسها بعاطفة الناس الدينية

ولكن المعارضة الوطنية يجب ان تضع المصالح الوطنية العليا فى الحسبان

عندما يفرق جماعه معارضة بين ابناء الوطن الواحد على اساس جنس او عرق او دين او اصل فانا هنا اقول لا

هم بهذا الشكل لن يكونوا افضل حال من الحزب الحاكم الذي يفرق بين الشعب على اساس المصالج والمنافع والوسايط والمعارف

نحن نريد مجتمع تحكمة العدالة والقوانين الانسانية والتى لا تختلف ابدا مع مبادئ الاسلام ان حسن التحدث باسمة وليس التجني علية

اتمني اكون قدرت اوضح وجهه نظرى لحضرتك
لك ارق التحية

Anonymous said...

الف الف الف شكر
كويس انك أتكلمت عن الاخوان المسلمين
وانا برضه المدونة بتاعت الست الزعيمة نرفزتنى وحرقت دمى وقلت أرد عليها فى المدونة بس قلت بلاش فى ناس قامت بالواجب وزياده
أولا ياسيدى انا مش اخوان أنما عيلتى كلها من الألف الى الياء اخوان مسلمين
وكلهم شرفوا فى السجن فى عهد الزعيم المبجل عبد الناصر وفى عهد انور السادات
يعنى الجيل الأول (الاجداد) عبد الناصر روقهم تمام والجيل التانى (الاباء) انور السادات اداهم اللى فيه النصيب
جم لحد عندى (الجيل التالت) وكل ولاد خالتى وولاد عماتى ماحدش فيهم دخل الاخوان وقالوا كفاية عالينا كده
انا بس كنت عايز أرد على نقطة استغلال الدين فى خدمة الاهداف السياسية
المشكلة تتلخص فى الاتى
نسبة الامية فى الشعب كبيرة جدا ودى مشكلة متراكمة
نسبة البطالة عاليه جدا ودى برضه مشكله متراكمه
وانت المفروض تواجه الحكومة اللى هى ماسكة كل حاجه وفى ايديها كل السلطات
هاتعمل ايه ؟
لازم تدى شعار سهل وبسيط عالشان ينفذ للطبقة الامية - زى العبور للمستقبل كده بتاع الحزب الوطنى
فكان شعار الاسلام هو الحل
المهم بقى هل الاخوان فعلا بيستغلوا الدين؟
شوف منذ قديم الازل وده كان هدفهم أن الدين هو اللى يحكم قبل طالبان وقبل الحكومات الاسلامية
يعنى هم مش جم مره واحده وقالوا يالا نستخدم الدين
هموا من زمان كانوا حاطين الدين فى المنهج بتاعهم
ومش عايز حد يوقلى هانبقى زى طالبان وزى ايران -مع ان ياريت نبقى زى ايران على الاقل عارفه تتكلم مع امريكا مش بتركع زى دول- لأن كل بلد ليها ظروف مختلفه
على كل حال طبعا رأيى لا يمكن يكون حيادى ولازم هاكون واقف مع الاخوان حتى لو مش معاهم
انا بس كنت بوضح وجهة نظر وفرصه علشان اشكرك لأنك اديتنى فرصه اعبر عن رايى وعايز اعرف رأى الناس هنا
واسف للتطويل

أسوور said...

أنا لست اخوانية ولست مع الفكر افخوانى ولا أتمنى أن تقع السلطة فى ايديهم

ولكننى متفقة معك فى ان من حقهم السعى للحصول على الحكم كما أن من حق أى شخص ان يتبعهم

ومتفقة معك ان حظر الحكومة للجماعة شىء عجيب فعلا

وقد كنت من شهود واقعة التزوير فى دائرة الدقى وكنت وكيلة لأحد المرشحين فى لجنة مدرسة القومية بالعجوزة

وشاهدت كيف ان الإخوان فى منتهى التنظيم وكيف أن الجميع كان ينتخب حازم أبو اسماعيل

فتحايلت وبدات أرشد الأهالى لمشروعية اختيار اثنين من المرشحين الفئات طبقا لقانون الإنتخابات

وتم التضامن بين 2 مرشحين من الفئات لأول مرة أحدهما كان حازم أبو اسماعيل مرشح الإخوان والاخر كان محمود ياسر رمضان مرشح الأحرار والذى كنت وكيلة له

وفى الفرز أعلن فوز افخوان .. حازم ابو اسماعيل وبعد انفضاض الناس احتفل الإخوان بينما بكت آمال عثمان فى التليفون ثم أعلن فوزها فجرا بعد ذهاب الإخوان للصلاة

وقد كانت نهى الزينى ومحمود ياسر رمضان هما الوحيدين الذين شهدوا بالحق وبالتزوير فى سجلات النيابة وعلى صفحات الجرائد رغم أن مرشح الأحرار لم يفز بل فاز حازم

اين الديمقراطية؟؟؟ أنا لا أتفق مع الإخوان ولكنى اتفق على أن الديمقراطية ان اتت بهم للحكم يجب على ان اخضع

Anonymous said...

زعلتينى أوى ياهلوسة لما قلتى انه ممكن يطلع فيهم حد فاسد
انا طبعا عارف انهم مش ملايكة وممكن أوى يغلطوا
بس دى تبقى حاجه وحشه اوى
على كل حال فرصه انى أقول انى من هواه متابعه اذاعة ال بى بى سى (أحسن اذاعه فى العالم فى نظرى) هموا عملين لقاء مع مرشد الاخوان المسلمين
فالى عايز يسأل المرشد أى سؤال ممكن يسأله عن طريقهم عن طرق الوصلة دى

http://news.bbc.co.uk/hi/arabic/talking_point/newsid_6370000/6370217.stm

واسف جدا على ازعاجك يا أخ محمد عادل

مصر هى أمى said...

هلوسة
اول حاجة انا مبسوط لاستمرار الحوار بينا
تانى حاجة مش معنى ان ليكى تجربة مع حد منهم وكانت سيئة يبقوا هما وحشيين انا عارف انك انسانة محترمة بس فى حاجة ان العدالة دايما نسبية بمعنى انتى شايفة ان الشخص ده وحش ممكن غيرك يشوف ان اللى حصل ده هوا الصح
ده مفهوم ان الحق والعدل نسبى

Unknown said...

انت عندك حق.
اللي حصل في الانتخابات ان الناس جربت الحكومه ورجلتها وطبعا شافو منهم كل خير وعشان كده لما أي حد نزل ضدهم الناس اتعاطفت مع الضد ده ورشحته.
أما بالنسبه لحكاية الحكم فانا شايفه ان الديمقراطيه مش بتتجزأ يعني ماينفعش احنا ناخد حريه والاخوان لأ, فاكره ان واحده صاحبتي قالتلي لو الاخوان حكمو تبقي كارثه, وكان ردي عليهاالحريه من حق الكل احنا وهما, وهما مش هيحكمو غصب عننا يعني لو الناس انتخبتهم هيحكمو, الناس مش عايزاهم مش هيحكمو يبقي ليه الخوف منهم طالما أولا وأخيرا الموضو راجع لينا؟

مصر هى أمى said...

ابن ناصر
اول حاجة اهلا بيك وعلى فكرة انا من عشاق عبد الناصر بس فى سياسته الخارجية اما السياسة الداخلية فلأ

انا معاك ان سياسة الاخوان الخارجية مش واضحة ولو كنت اسنيت البوست اللى جاى كنت عرفت انا كاتب فيه عيوب الاخوان من ضمنها سياستهم الخارجية واحترام المعاهدات الدولية اللى عملاها مصر

مصر هى أمى said...

الزعيمة
انا من قبل البوست بتاعك وانا بفكر اكتب عنهم بس كان عندى مشاكل مع البيت بسبب بوست الحرية لطلاب الازهر بس لما قريت جريدة الفجر والبوست بتاعك قررت انى اكتب اللى كنت عايز اقولة

اولا اعتراضك على المرجعية الدينية للاخوان ماهو الدستور المصرى بمرجعية دينية بدليل ان احكام الدستور من الشريعة الاسلامية وفى العالم كله فى احزاب دينية زى المانيا الحزب الحاكم هو الحزب الديموقراطى المسيحى يعنى حزب دينى

اما باقى اعتراضاتك فا انا متفق معاكى فيها وفى البوست التانى انا كاتب كده
بس مكنش هينفع انى انزل البوستين مرة واحدة علشان كان هيبقى طويل اوى والناس هتزهق من قراءته
انا معاكى ان احنا عايزين مجتمع تحكمه العدالة سواء كانوا اخوان او حزب وطنى او اى حد المهم العدالة

وحضرتك وجهة نظرك واضحة جدا
وانا مبسوط بالحوار معاكى

مصر هى أمى said...

حسن محمود
اول حاجة انا مدونة الزعيمة منرفزتنيش انا احترمت رايها فى انها عايزة العدالة بدون اى تفرقة بين الشعب الواحد ولو كنت قريت الكومنت بتاعى على هذا الموضوع عندها كنت عرفت انى مع رايها ان مفيش تفرقة بين الشعب المصرى
انا متفق معاك ان الاخوان اتعرضوا للظلم كتير جدا واذا كنت انا ناصرى لكن مكنتش بحب سياسة عبد الناصر او اى زعيم غيرة فى حكاية التعذيب طول عمرى بكره التعذيب ومبحبش ان حد يتعذب بسبب راى او فكر
كل اللى انتى قولته انا مقتنع بيه ان الحكومة ماسكة جميع الصلاحيات فى ايديها فبالتالى لازم تكون عندها حلول لجميع المشاكل
لكن برضة الاخوان مش واضح ليهم اى رؤية لحلول مشاكل مصر الاقتصادية
واستنى لبكرة واقرا البوست التانى بتاعى
انا مش عايز نكون زى ايران ممكن نكون زيهم فى قوتهم ووقوفهم ضد امريكا لكن مش زيهم فى انعزالهم عن العالم وانهم عامليين مشاكل مع دول كتيرة
انا عارف انهم حاطين الدين فى المنهج بتاعهم لكن لازم ميكونش شعار فقط لازم يكون منهج واضح للناس كلهم زالناس تتناقش فيه

مصر هى أمى said...

حسن محمود
تانى
هلوسة حكت عن تجربة شخصية وممكن تكون صح وممكن تكون غلط ومفيش حد فينا ملاك
ونسيت اقولك على حاجة انى مطولتش ولا حاجة انا بتبسط من الحوار المحترم
والف سلامة على عائلتك كلها من الاعتقال

مصر هى أمى said...

ياسمين
ده اللى انا كنت بقوله ان الاخوان بقوا منظمين جدا وبيعرفوا هما بيعملوا ايه وعلى فكرة انا مش اخوانى وزى ما قولت ان الناس انتخبت الاخوان كرها فى الحكومة
طبعا فى مرشحين اخوان كويسيين والناس كانت نفسها تنتخبهم زى حازم ابو اسماعيل
وشهادتك خير دليل على ان الاخوان اتظلموا فى الانتخابات
تابعى معايا البوست التانى محتاج رايك اوى

بيتنا القديم said...

تااااااااااااااااااااااااااج
****************************
ممكن تسألي نفسك بجد آذيت مين النهاردة

ورفع إيدوه للسما ونكش شعره ودعا عليك؟!

أيتها الفارس الأنجلوساكسوني(متسألش معناها إيه عشان معرفش)...اليك هذا التاج

إما ان تجوبه وإما سجن المغوووووول مدي الحياة مع حسن الهلالي جوز ياسمينة، اللي خانوه بدران، اللي كان شغال مع السيد شاهين، اللي هو كمال الشناوي
*********************

اسم مدونتك؟

لماذا اخترته.. ماذا تقصد به؟

هل فكرت في إغلاق المدونة.. والسبب؟

صورتك ف المدونة، رمزيتها؟

طبيعة كتابتك في المدونة بشكل عام..

سياسة.. قصة.. عبث.. كلام فاضي؟

لماذا تدون أصلاً؟

أحلى جملة قيلت لك في وصف مدونتك؟

التعليقات بالنسبة لك.. أهميتها؟

أحلى بوست كتبته.. ضع اللينك.. ثم اذكر لماذا؟

أفضل مدونة قرأتها.. يمكن اختيار عدة مدونات؟

أفضل بوست قرأته.. يمكن اختيار أكثر من بوست.. ومتنساش اللينك؟

هل خسرت صديق بسبب كتابة هنا؟

حد قل أدبه ف التعليق.. إيه رد فعلك؟

أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟

أسوأ بوست.. لازم تجاوب.. ويسمح بتعدد الاختيارات؟

أسوأ مدون.. ما هو حاتجاوب حاتجاوب؟

انشر الآن بشكل حصري بوست لم تجرؤ على نشره من قبل.. مش محتاج أقول إجباري؟

فؤاده said...

اولا الناس منجحتش مرشح الاخوان كرها في الحكومة او على الاقل نسبة قليلة هم اللي عملو كده ، بس الناس نجحتهم عشان شايفاهم قدامهم وبيمارسو العمل التطوعي طول الوقت وبيحاولو يخدمو الناس حتى من غير مايكونو نواب في مجلس الشعب ومفيش حد فيهم معروف عنه انه سيرته فيها حاجه

ممكن تلاقي عناصر مش كويسة ، او مش الصورة اللي في دماغك ، بس في الاخر الاغلبية كويسين ، وكل جماعة او حزب فيه الكويس وفيه الوحش

وبعدين مينفعش تقارن بين الاخوان ةوالحزب الوطني ، لان ده مش حزب اصلا

وفي الاخر رغم ان الاخوان عندهم اكتر من كده يعملوه للبلد ، وادائهم خصوصا السياسي محتاج يتطور ، بس هم القوة الوحيده اللي موجودة

أسوور said...

مصر هى أمى

أكيد هأتابع .. أنا أساسا بأتابع مدونتك بإستمرار

بالمناسبة فاكر البوست بتاعى الخاص بمشكلة بين زوجين

الزوج عمل مدونة مخصوص عشان يعرض فيها وجهة نظره فى التعدد ولأى حد عاوز يحاوه

عنوانها

http://nagibidris.blogspot.com/

الزعيـمة said...

حسن محمود said...
الف الف الف شكر
كويس انك أتكلمت عن الاخوان المسلمين
وانا برضه المدونة بتاعت الست الزعيمة نرفزتنى وحرقت دمى وقلت أرد عليها فى المدونة بس قلت بلاش فى ناس قامت بالواجب وزياده

**************************
اولا من اسلوب الاحترام المتبادل بين المدونين ان يكون الكلام بغير تهكم او سخرية يعني مش كان فية داعى للست الزعيمة ودم حضرتك الاتحرق

كان يكفي مشاركتك برأيك وتوضيح
وجهه نظرك كما فعل الاخرون مثل
الاخ الفاضل مصر هي امى

عرفت لية الناس بتخاف من فكر الاخوان؟

عشان ردك دا واسلوبك فى التناول
لما حبيت تعبر عن اختلاف
مع فكر مدونة اخري تخيل لو ماسك
الحكم الاخوان باسلوبك دا كانوا اهدروا دمي

اما جيل الآباء البتتكلم عنه
فعذرا محتاج تعيد النظر فية
لان معروف كيف ان الرئيس السادات
فتح الباب على مصرعية للاخوان
وجعلهم اوصياء على كل التيارات الاخري
من الناصريين واليساريين والشيوعيين
وكان الجزاء من جنس العمل
واظن تعرف من الذي قتلة فى النهاية
الناصريين ام الشيوعيين او الاخوان اصدقائة


شكرا للزميل مصر هي امى على الرد
وانا وضحت لحضرتك سبب وجهه نظري
من خلال تصريحات الاخوان فى الاخوة الاقباط المصريين مش انتقاد للاخوان دون مبرر



زميلي الكريم مصر هي امى
اعتذر عن الاطالة والاضطرار
لتوضيح بعض الامور

فى انتظار الجزء الثاني

أميرة البلطجية said...

انا برضه مليش في السياسة اوي
ورغم كده ليا وجهة نظرة ..صراحة.. انا حاسة ان مفيش اي حد ع الساحة دلوقتي..يستحق الثقة
زي ما هلوسة قالت..كله محصل بعضه

مصر هى أمى said...

اسراء
نورتينى فينك من زمان
اللى انتى قولتيه هوا ده اللى بحاول اقوله ان الاخوان عملوا ليهم قاعدة عريضة من الناس بسبب فشل الحزب الوطنى والحكومة
علشان كده الحكومة بتزور فى الانتخابات علشان توقف نجاح الاخوان
على فكرة انا مش حابب ان الاخوان هما اللى يحكموا البلد
انا حابب ان حاكم كويس هوا اللى يحكم البلد سواء كان حزب وطنى او اخوان او اى حاجة تانية

مصر هى أمى said...

سمسم
تاج تالت لا حرام عليكوا
انا عندى مشاكل اد كده من التاج بتاع الخمس مواقف فالرحمة شوية
ثم انا عندى اعتراض على سؤال اسوء مدون واسوء مدونة مش عايز تكون المدونات ساحة للحرب بين المدونيين
وعموما هافكر وان شاء الله هارد على التاج بتاعك

مصر هى أمى said...

فؤادة
اولا لكل واحد يقرا الكومنت ده يعرف ان نائل ده الرمز بتاعنا وهوا اللى عرفنى طريق المدونات

بص يا نائل انا قولت فى ردى على هلوسة
ان الاخوان فيهم الكويسين وفيهم الوحشين
الناس فى الاول حبت الاخوان بسبب كرههم فى الحكومة والاخوان استغلوا الموقف صح وحسنوا موقفهم والتحموا بالشعب وخدموا الناس فالناس بدأت تتعاطف معاهم وتقتنع بكلامهم
باقى كلامك عن الاداء السياسى هتقراة ان شاء الله فى البوست اللى جاى

مصر هى أمى said...

ياسمين
انا مبسوط انك بتابعى مدونتى على طول وانا كمان بعتبر مدونتك من اهم المدونات اللى انا بتابعها
انا شفت المدونة بتاعت الزوج ده بس هاستسمحك انى مش هعلق عنده لانى مش حابب الزوج ده مبحبش الراجل اللى عمال يتجوز عمال على بطال وكل ده تحت ستار الدين واباحة التعدد اكتر حاجة بكرها ان الواحد يستخدم الدين لاغراض شخصية

NOHA said...

يا محمد
ممكن الأول اسال سؤال ايه هو مفهوم الاخوان عند الناس
فالمثقفين و متابعى الصحف و الأخبار فكرتهم مختلفة تماما عن الأمين و اللى هما زى ما نت عارف اكتر من المثقفين يكتير قوى
لو نزلت الشارع المصرى و سالت اى واحد عن الأخوان هيقول ان اى واحد مطول دقنه شوية و لابس لبس محترم شوية يقولك اصل دة من الاخوان
و لو هناك نقاش فى مسالة معينة و حد اتمسك بحكم و راى الدين فى المسالة دى يقولوا عليه دة من الاخوان

احنا ليه لما نعرف ان فلان دة من الاخوان بنعتقد دائما ان الراجل دة مش ممكن يتصرف اى تصرف غلط فى يوم من الأيام و نحكم عليه كانه نبى دة حتى النبى علية الصلاة و السلام غلط
و هنا احب اوجة كلامى هنا لهلوسة مصرية و اقولها يا ترى يا هلوسة انت اتصدمتى فى الشخص اللى انت بتقولى عليه علشان ما توقعتيش ان التصرف دة يطلع من واحد فى جماعة الاخوان و لا ايه

الناس بتؤيد الاخوان مش بس لانهم ضد الحكومة و لو ان دة عامل اساسى و لكن برضة لارتباطهم بالدين و اى واحد بيأيد الاخوان بدافع انه بيأيد الدين و انه لازم ينصر دينة بغض النصر عن كون الشخص الممثل للدين هنا يصلح لذلك ام لا

مصر هى أمى said...

الزعيمة
انا معاكى ان اسلوب التهكم مش بحترمه بين المدونيين علشان كده انا رافض التاج التالت اللى جالى علشان سؤال عن اسوء مدون ومدونة
على فكرة انا ما رديت عليكى مكانش هجوم على البوست بتاعك ولا حتى البوست ده هجوم عليكى انا كنت بحاول اطرح رؤية معينة انا شايفها بالعكس انا احترمت المدونة بتاعتك جدا واسلوب الحوار المحترم اللى انا شفته عندك بين المدونيين لان الغرض الرئيسى لينا ان احنا نوصل لفكرة واحدن ان احنا بنحب مصر وخايفيين عليها
الزعيمة لو قريتى ردى على حسن محمود هتلاقينى قولت ان البوست بتاعك منرفزنيش ولا اى حاجة

وشكرا انك وضحتى وجهة نظرك للزميل حسن محمود وادعو الله ان الحوار يكون هادف بينا حتى مع اختلاف وجهات النظر
وحضرتك مطولتيش ولا حاجة
ياريت تشرفينى دائما

مصر هى أمى said...
This comment has been removed by the author.
مصر هى أمى said...

اميرة البلطجية
ليه كده فى ناس كتير محترمة على الساحة
مش شرط يكون اخوان لكن فيه ناس كويسة انا بحب جدا عمرو موسى وكنت بحب كمال الجنزورى رئيس الوزراء السابق
صدقينى فى ناس كويسة

Anonymous said...

ياست الزعيمة أنا ماتهكمتش عليكى

لا معلش بقى انا أى واحد بقولة ياسيد واى واحده بقولها ياست
انتى شايفه ده تهكم براحتك انما ده الطبيعى بتاعى
دمى اتنرفز ده اللى حصل ليه فعلا

ولا
ماعرفتش عالشان انتى مصره تشنعى وتقولى هدر دم
حد جاب سيرة هدر الدم دى
انما سعادتك اللى ابتديتى وقلتى الكلمة دى مش انا
ده اتا بقول مرضتش أعلق عندك
ولعلمك انا مختلف مع ناس كتير وعادى جدا وبعلق عندهم عادى
اللى بحس انه هاينرفزنى بتجنبه خالص وعالشان أبعد عن المشاكل

وطبعا ياستى سهل ان تقولى راجع
النظر هو حد من اهلك انتى اللى اتسجن
لا ياستى الزمن مش بيرجع وفى عهد السادات خالى اتسجن 10 سنين ولما اهلى عملوا مفاوضات طويلة عريضه معاه الراجل تعطف وخلاهم خمس سنين سجن بس - لما أهلى فكروه انه هو نفسه كان اخوان مسلمين- ويعدبن خالى مااستحملش 5 سنين سجن خد 2 سنتين فى السجن وسنتيتن فى مستشفى القصر العينى ولما الحكومة لقيته انه هو عبء عليهم افرجوا عنه

سعادتك بقى عايزانى اراجع نفسى ازاى؟
أغير التاريخ ولا أزور

على كل حال حتى بالى السادات عمله كان أرحم من عبد الناصر
عبد الناصر أعدم واحد من عيلتى وسجن جدى سنتين
السادات سجن بس وخفف الحكم كمان
وتصليح لمعلوماتك اللى قتل السادات تنظيم الجهاد اللى لسه عبود الزمر مسجون فى السجن والمفروض يطلع لأته قضى المده والحكومه مش عايزه تطلعوا
الراجل ده مش اخوان
عرفتى مين اللى قتل السادات؟
انما برضه انتى مصره تورطى الاخوان
الجهاد غير الاخوان

سلام

مصر هى أمى said...

حسن محمود
اول حاجة شكرا على توضيحك انك متقصدش التهكم على الزعيمة
وتانى شكر على معلومة ان اللى قتل السادات هو تنظيم الجهاد مش الاخوان بالنسبة لى ديه معلومة جديدة
وعموما الاختلاف فى الراى لايفسد للود قضية واحنا بنتناقش فى قضية متشابكة وكل طرف ممكن يكون صح او غلط
ثم انتى تقدر تختلف مع الزعيمة يا ابنى ديه الزعيمة عارف يعنى ايه الزعيمة

ثم ايه العيلة اللى انتى فيها ديه امال مين عندكم مدخلش المعتقل

مصر هى أمى said...

نهى
بصى يا ستى مفهوم الاخوان عند الناس 3 حاجات
المؤيدين للاخوان انهم حيكموا مصر بالكتاب والسنة وان احنا هنرجع للعدالة اللى كانت موجودة ايام الصحابة لكن مع التقدم فى كل المجالات ولو اتطبق بالمعنى ده هنكون دولة كويسة

المعارضين للاخوان
انهم ناس بتستغل الدين لتحقيق اغراض شخصية وانهم عايزين يولعوا فى مصر ويموتوا المسيحيين وانهم هيتسببوا فى عزلة مصر عن العالم

الطرف التالت على الحياد
بيكره الحكومة بسبب فشلها وبيأيد اى جبهة معارضة للحكومةسواء كانت اخوان او وفد او الغد بس الاخوان اكتر لانهم اكثر تنظيما وقوة وتلاحم بالناس

الواحد مش لازم ينصر التانى علشان دينه لازم ينصر الحق سواء كان التانى على دينه او غير دينه
وهلوسة حكت على موقف شخصى ورايها مبنى على انها كانت معتقدة ان الشخص ده انسان كويس علشان هوا من الاخوان وطبعا انا مش هاقدر اقول رايى لعدم معرفتى بالموقف ولا برد الشخص

Anonymous said...

الحمد لله اللى ماتقبضش عليهم الستات اللى فى عيلتنا بس
انما كل الرجاله وبلا فخر اتقبض عليهم واللى ماتقبضش عليه نفوه من البلد خالص أو نفوه من الحياه
وده اللى مخلى أهلى مش عايزينى أنضم للاخوان

على كل حال ياستى حقك عليه اذا كنت شايفه انى أتهكمت عليكى
فأنا أسف

والف شكر ليك على رحابة صدرك
سلام

مصر هى أمى said...

حسن محمود
اهلك عندهم حق انهم يخافوا عليك
وعلى العموم انا معتقدش ان فى مشكلة مع الزعيمة كل الحكاية انه اختلاف فى وجهات النظر
واهلا بيك فى اى وقت

أميرة البلطجية said...

بس دول (عمرو موسى والجنزوي) مبقوش في الساحة خلاص
انا قصدي الناس اللي عمالة تهتف وتعارض وتتطالب والتغيير - واخوانهم اللي عمالين يهتفوا ويؤيدوا ويطالبوا بعدم التغير

مصر هى أمى said...

اميرة البلطجية
صحيح هما مش على الساحة دلوقتىلكن الناس كلها بتحترمهم ولو عندنا انتخابات حرة اكيد الناس هتنتخبهم
او اى واحد شريف غيرهم