رسالة الى الوالى

سيادة اللواء / حبيب العادلى وزير الداخلية

انا شاب مصرى اعشق تراب هذا الوطن ارسل هذه الرسالة اليكم واتمنى من الله ان تقرأها وتستجيب لها

سيادة الوزير ارسل هذه الرسالة بخصوص 180 طالب بجامعة الازهر الذين تم اعتقالهم بدعوى انهم من الاخوان وبعيدا عن الاستعراض العجيب الذى قام به هؤلاء الطلبة وبعيدا عن اعتراضىعلى هذا الاستعراض لانه مش وقته فكلنا نعرف ان الاستعراض فى الاصل كان عرض لمدة 6 ساعات منها فنى وثقافى ودينى ورياضى ولان الاعلام وامن الدولة اما صدئوا يلاقوا حاجات غلط يمسكوها على الاخوان علشان يضربوا فيهم ويتم تضخيم الموضوع بالصورة اللى احنا شايفنها وبتوع الحزب الوطنى اما صدئوا علشان يوجهوا ضربة لجماعة ال88 بتوع مجلس الشعب وطبعا سعادتك عارف اللى حصل بعد كده كل ده مش مهم وبرضه مش مهم حربكم ضد قيادات الاخوان لانهم سواء كانوا صح او غلط فهم عارفين هما بيعملوا ايه المهم عندى الطلبة الغلبانة اللى مرميين فى المعتقلات بتاعة امن الدولة وطبعا حضرتك عارف ايه اللى بيحصل فى المعتقلات

الاب اما ابنه بيغلط ما بيقتلوش ولا بيرميه فى السجن انما بياخده فى حضنه ويعرفة ايه الغلط

اعتبر ان هؤلاء الطلبة ولادك وغلطوا واتصرف معاهم على هذا الاساس حرام نرمى طلبة متفوقة علشان انهم غلطوا الطلبة ديه ضحية حربكم مع الاخوان ملهمش ذنب ممكن يكون اضحك عليهم وممكن يكونوا على حق ايه المانع لما تقعد معاهم وتتناقش معاهم والصح فيكم يقنع التانى مش ده احسن من الاعتقال

الطلبة ديه بتحب مصر ( على فكرة انا معرفش ولا واحد منهم ) بس ده احساس فبدل ما تحبس 180 طالب وتحولهم الى 180 ارهابى بسبب الاعتقال ده ممكن بسهولة تقعد معاهم واعتبرهم اولادك وارحم 180 اب وام واسرة

افتكر حاجة واحدة ان دول مصريين زيك هما مش اعداء

سيادة وزير الداخلية وسيادة رئيس مباحث امن الدولة وسيادات ظباط امن الدولة افتكروا انهم مصريين زيكم وبنى ادميين ممكن يكونوا صح وممكن يكونوا غلط

افتكروا حاجة اهم من كل اللى فات انكم هتقفوا امام الله يوم القيامة ولوا عذبتم حد فيهم ظلم ربنا هوا اللى هايخدلهم حقهم وطبعا عذاب ربنا اكبر من اى عذاب تانى واخشوا يوما ترجعون فيه الى الله

ان الله حى لا يموت ويمهل ولا يهمل

الطلبة ديه عندها امتحانات وبلاش كلام احنا جبنالهم ورق ومذكرات علشان يذاكروا هما فاضين يذاكروا ولا يضربوا من الظباط حرام نضيع مستقبا 180 شاب زى الورد علشان انتوا عاوزين تضربوا جماعة الاخوان ومعتبرينها عدوكم الاول

صدقنى ال 180 طالب دول ممكن يطلع منهم ارهابيين يضروا البلد بسبب الاحساس بالظلم

من فضلك حس بأحساس اهل ال 180 طالب

MUHAMMAD ADEL