Sunday, January 21, 2007

انا بقيت من المدونيين

اولا مساء الخير اصدقائى الاعزاء
انا محمد بكتب اول مدونة ليا يوم السبت 20/1/2007 يوم راس السنة الهجرية ربنا يجعلها سنة سعيدة
الفضل الاول بعد ربنا فى انشاء هذه المدونة صديقى نائل صاحب مدونة فؤادة
ونائل ده موظف عندنا فى الشغل قعد فى السجن اكتر ما قعد فى الشغل وربنا يستر ما بقاش زيه
انا كنت فى الاول بكتب لنائل تعليقات كتيرة فى المدونة بتاعته وهوا كان مسمى نفسه الرمز ودلوقتى هابقى انا الرمز بشرطة بس لما حسيت ان نائل اتشهر جامد اوى بسبب تعليقاتى قررت اعمل مدونة ليا وجحا اولى بلحم طوروه
ممكن الناس تسأل يعنى ايه اسم المدونة مصر هى امى وليه اختارت الصورة الرئيسية صورة مصر
انا اعتقد ان مصر هى اعظم دولة فى العالم سيبك من اللى بيحصل فيها دلوقتى من سرقة ونهب وتعذيب وتوريث حكم بص على الشعب نفسه هتحس ان الشعب المصرى ده شعب عظيم جدا بيتسرق من مئات السنيين ولسه عايش وفيه خير وعارف يضحك وينكت ممكن تقول ده شعب اهبل بس لأ الشعب المصرى شعب جميل جدا
انا عن نفسى بعشق تراب البلد ديه اتولدت فيها واتربيت فيها وهاموت فيها ان شاء الله
صدقونى البلد ديه جميلة جدا كفاية انك تمشى باليل على كوبرى قصر النيل وتبص على النيل تحس ان روحك هاننردلك مرة تانية وتنسى اى هموم للدنيا . ممكن الناس تضحك عليا وتقول ايه الهبل ده بس والله ده ما هبل البلد ديه حلوة علشان كدة اخترت صورتها صورة رئيسية علشان اى واحد يشوف المدونة يشوف صورة اعظم بلد فى العالم عايز تعرف ليه انزل فى يوم محطة مصر الساعة 7 الصبح وبص على القطر اللى جاى من الاقاليم وشوف كام الف واحد نازل منه علشان يشتغل فى القاهرة يعنى صحيوا من الساعة 5 الصبح ونزل من بيته فى الضلمة علشان يسافر ورا لقمة العيش ويرجع بيته اخر اليوم بعد السفر رايح جاى ويكون قادر يضحك ويقعد مع اولاده ومراته وهوا صابر على المرتب الكحيان بتاع الحكومة اللى ميكفيش عيش حاف والامراض اللى الحكومة بتجيبها من الادوية البايظة والزرع المسرطن ومع ذلك فهو عايش مش بقولك شعب عظيم
انا عارف ان ممكن المدونة تعمل مشاكل كتير مع البيت والاسرة وعلى العموم انا لسه العاقل الوحيد فى اصحابى اللى لسه متجوزش
ممكن تعمل مشاكل مع الحكومة انا بقولهم متخافوش منى انا ناوى اكتب فى حاجات كتيرة مش المعارضة بس الكويس هقول عليه كويس ( بس المهم الاقى حاجة كويسة للحكومة علشان اقولها )والوحش هقول عليه وحش وربنا يستر مع بتوع الامن
بس يارب الاقى اصحاب كتير عن طريق المدونات وياريت تبعتولى تعليقاتكم وشكرا
MUHAMMAD ADEL

8 comments:

فؤاده said...

الف مبروك يا زميلي ، انا متأكد من مستوى التعليقات اللي كنت بتكتبها عندي ان المدونة بتاعتك هتطلع حلوة ، لما كنت بشوف تعليقاتك كنت بقول التعليقات ده تنفع موضوعات تتكتب في مدونة وقلتلك الكلام ده
وشكرا على الكلام اللي انت كاتبو عني هو ده العشم برضه

ده بالنسبة للتهنئة

اما الموضوع ،انا مش عايز اختلف معاك من اول مرة ، بس استحملني ، بصراحة الشعب ده لا هو حلو ولا حاجه ، بالعكس ده شعب من غير ميزة ، شعب طول عمرة مستعبد ومذلول ،
بس انا معاك ، مصر حلوة ، انا بحب مصر بس مش بحب المصريين ، باختصار ، مصر تستاهل شعب احسن من ده كتير

مبروك ، ومتنساش ، انا الرمز ، ماشي

مصر هى أمى said...

الله يبارك فيك يا نائل طبعاهتفضل انت الرمز
اما بالنسبة للموضوع فمعلش انت كلامك فيه جزء من الصح ان الشعب المصرى طول عمره مذلول من حكامه بس انا عندى امل فى المستقبل وعلى فكرة الشعب المصرى حلو اوى كفاية انا منه علشان يبقى عظيم

Anonymous said...

عزيزي محمد اهنئك على المدونة الجميلة التي يارب نشوف فيها حاجات حلوة كتير ولو ان احنا مش محتاجين نعرف فضايحنا احنا عايزين نعرف كيف نتجنبها ونصلح أحوالنا يا محمد الشعب الحلو الذي تتحدث عنه هو أساس المشكلة في سلبيته وسلوكياته السيئة لمعالجة أموره ولكن في النهاية السلبية ديه شئ حتمي لأن من يحاول أو يفكر أنه يتكلم يجد العصا والكرباج وقطع الأرزاق ولو أن الأرزاق بالله بس ياريتنا نؤمن بكده ولكن لابد من أن نغير ما بأنفسنا (إن الله لايغير ما بقوم حتى يغيروا ما بأنفسهم) وليكن لنا مثل يحتذى في المعارضة اللبنانية.
وأهنئك مرة أخرى

مصر هى أمى said...

صديقى محمود
اولا الله يبارك فيك كلامك جميل وشوف نت قولت ايه الى بيتكلم بيتعرض لقطع رزقه علشان اناكده قولت ان ده شعب عظيم مع كل الاستبداد اللى هوا بيتعرضله لسه قادر يعيش ويضحك
ثم احنا فين ولبنان فين يا ابنى الشرطة اللى فى لبنان هيا اللى بتحمى المعرضين مش بتضربهم زينا

Amany Y. El-Saeed said...

مبروك المدونه الجديده يا محمد...معلش بئه و الله نسيت أحضر الإفتتاح مع إني قلتلك إني جايه
أنا برضه بحب مصر و المصريين زي ما إنت بتحبهم بس مش لنفس السبب...أنا بحبهم لطيبهم مش لسلبيتهم...أنا مبحبش مصر عشان هي أحلى بلد في العالم لأنها ببساطة مش كده...أنا بحبها لأن قلبي بيحبها...حتى لو أوحش بلد في الدنيا...برضه هحبها...إللي يحب بلده عشان الحاجات الحلوة إللي فيها يبقى حبه مسبب...و أنا بحب الحب إللي ملوش أسباب

مصر هى أمى said...

اولا الله يبارك فيكى يا امانى
وانا اسف فعلا انى نسيتك فى حفل الافتتاح خلاص ليكى عزومة على حسابى فى الوقت اللى انتى عايزاه
انا عايز اقول ان احنا متفقين على حب مصر سواء علشان طيبتها او الخير اللى فيها المهم ان احنا نحبها طب ماكل واحد بيحب اهله سواء كانوا كويسيين او وحشيين المهم ان احنا نعمل حاجة للبلد ديه

شهيدة said...

سلام عليكم يا محمد
أولا مبروك المدونة
وأنا أؤكدلك انها تجربة رائعة حتفرح بيها جدا وحتلاقي ان في أيام بتبقى الافكار زي المطر مش ملحق عليها وأيام فيه جفاف في الأفكار بس مش مشكلة. وبالنسبة لنائل، هو بجد صديق كويس وملهم يعني بصراحة. انا كطمان غرت منو وعملت مدونة بعد ما هو عرفني على مدونتو. المهم الشعب المصري زي ما قلت عنو شعب رائع، انا شخصيا بحسو شعب عظيم وبحبو جدا جدا. وزي ما قلت انو بيعرف يضحك رغم كل المصاعب. انا دايما بدعيلكن مشاكلكم تتحل. وان الحكومة تحل عنكم شوية. بس الظاهر ان حكوماتنا كلنا ملزق\ة يا محمد. ومشكلتنا هنا في لبنان أكبر دليل. يا رب كل الشعوب العربية تعرف تتحرر في أقرب وقت
وفقك الله لكل ما هو خير

ويا نائل. اما معاك ان يمكن مصر تستاهل شعب أحسن من كدة، ما هو لا يغير الله ما بقوم حتى يغيروا ما بأنفسهم، بس كمان يعني ما تقساش على الشعب أوي. ما تنساش ان القوى اللي بتقمع الشعوب قوية شوية. انا متفقة معاك ان الشعوب لازم تتحرك بقى. كفاياها نوم وخمول. بس كمان أنا لسة بقول ان الشعب المصري شعب طيب وبيضحك، ويمكن ده سبب مشكلتو

مصر هى أمى said...

شهيدة
شكرا جدا على زيارتك الحمد لله لاقيت حد يقف معايا ضد نائل والله طول اليوم عنال اقوله الشعب ده كويس ومش عايز يقتنع اتمنى انه يقتنع بعد كلامك ده
واهلين بلبنان اخوتنا وكل المدونيين اللبنانيين