د . على لطفى حرام عليك

بقالى كتير متفرجتش على التلفزيون فالنهاردة مروح بدرى شوية يعنى مرة من نفسى قعدت اتفرج على التلفزيون وانا عمال اقلب فى القنوات

ولاقيت القناة الفاشلة اللى اسمها

O T V

مستضيفة الدكتور على لطفى رئيس الوزراء السابق

الراجل ده كنت اسمع انه محترم وشريف فاستغربت ازاى يوافق انه يطلع فى القناة ديه وبرنامج مساءك سكر زيادة

المهم انهم كانوا عمالين يسئلوه عن الاوضاع فى مصر والراجل عمال يرد ان الوضع زى الفل وعال العال قولت اشوف اخر الراجل ده ايه

اتفرجت لغاية الاخر

اخر سؤالين بقى كان رده مستفز جدا

السؤال الاول من المذيع الرخم

ما رأيك فى موضة الاضرابات اللى بتحصل اليومين دول بغرض لوى دراع الحكومة

د. على لطفى : طبعا احنا بقينا فى عصر الديموقراطية فلازم نقبل بحدوث الاضرابات زى ما بيحصل فى العالم كله بس المشكلة ان احنا بنعمل الاضراب غلط بره فى امريكا وفرنسا الاضراب ده اخر حاجة ممكن يلجئولها بعد كل المحاولات التانية ما تفشل وكمان بيعملوا الاضراب بدون تكسير اى حاجة فى المنشأت لكن احنا بنعمل العكس تماما الكلام ده كلام الدكتور على لطفى

انا بقى نفسى أسأل الدكتور على حاجة مين ده اللى مبيحاولش يحل المشكلة بكل الطرق الودية روح حضرتك اتفرج على المحايلات اللى عملوها الاطباء وعمال غزل المحلة والصيادلة والحديد والصلب وجزيرة قرصاية كل الناس ديه عملت المستحيل مع الحكومة علشان تحل مشكلتها منفعش يعنى احنا متحضرين زى اللى برة يا دكتور اما بقى حكاية تكسير المنشأت لما حضرتك تقف فى اضراب وواقف باحترامك تلاقى الامن هوا اللى عمال يطحن فيك وفرق الكاراتية تنزل وسط الناس اللى فى المظاهرة تضرب فيهم مش هيكون عندك غير حل انك لازم تضرب انت كمان علشان تبعدهم عنك يعنى الشرطة هيا اللى بتبدء فى الضرب يا دكتور مش زى بره اللى الشرطة بتحمى الناس وتحافظ على سلامة الناس اللى بيتظاهروا علشان ده حقهم

اما الشرطة عندنا اول مايشموا كلمة مظاهرة تنزل تقفل الشوارع وتنشر فرق الكاراتية وعساكر الامن المركزى علشان

تطحن فى الشعب علشان محدش يفتح بقه تانى يعنى يا دكتور فرق معاك اوى ان الناس بتكسر المنشات ومفرقش معاك ان الشرطة بتكسر عضم الشعب

السؤال التانى كان من المذيعة المستفزة التانية

هل حضرتك يا دكتور متفائل للوضع فى مصر

دكتور على لطفى : انا بطبعى متفائل وكمان متفائل بوجود السيد الرئيس حسنى مبارك فى السلطة

ممكن اعلق بكلمة ابيحة ولا لأ

ولا بلاش

هوا الدكتور على لطفى معتقد ان السيد الرئيس لسه رئيس جديد ولا حاجة دا سعادتك فى السلطة بقاله 26 سنة والحال بيزيد سوء وانت متفائل

طب كنت قول متفائل بوجود السيد جمال مبارك فى السلطة كانت تبقى مبلوعة شوية اهوة الراجل لسه فى السلطة جديد لكن تقولى متفائل لوجود السيد حسنى مبارك فى السلطة لا اسمحلى دا بعد فترة حكم 26 سنة بقى عندنا ازمة فى رغيف العيش الحكومة مش عارفة توفره ورئيس الوزراء بيقدم تقرير يومى للريس عن جهود حل ازمة العيش مش بيقدم تقرير عن الصواريخ النووية ولا المحطة النووية رقم 20 اللى مصر بتبنيها ولا مراسم الاحتفال بالمصنع رقم مليون فى مصر ولا جهود مصر لتحصيل الديون المعدومة اللى مصر سلفتها لجزر الانتيل الهولندية وجزر القمر بلاش نقول امريكا ولا روسيا

دكتور على لطفى احنا بعد 26 سنة مش عارفين نحل ازمة رغيف العيش وانت حضرتك متفائل طوال ان السيد الرئيس موجود فى السلطة

لا تعليق

بصراحة مكنتش هاعرف انام غير لما اقول الكلمتين اللى محشورين فى زورى

خليك متفائل يا دكتور لان السيد الرئيس وسلالاته هتفضل فى السلطة اما نشوف اخرة التفائل بتاعك ايه

قاعدين ليه

فلسطين لبنان طوابير العيش سعر الحديد

ازازة الزيت وحاجات تانية كتير اوى


انا عايز اسأل الحكومة ديه قاعدة ليه

من يومين كنت بشوف جرنال الاهرام فى الصفحة الاولى اتنين ماتوا فى خناقة على طابور العيش وفى جرنال الدستور سعر طن الحديد وصل لستة الاف جنيه وكنت خارج مع ناس اصحابى من العالم اللى اتجننت واتجوزت طول القعدة مكنش ليهم غير كلام عن ازازة الزيت والفاصوليا اللى وصلت تمانية جنيه وكيلو الفول اللى بقى بسبعة جنيه
طبعا مكنش فى وقت نهائى نتكلم عن غزة واللى بيحصل فيها مش عارف ديه خطة من الحكومة ان الواحد يتلهى فى العيشة فى مصر والاسعار اللى بقت مولعة وكلنا شفنا ان المظاهرات قلت جدا فى البلد بسبب غزة وحملة التبرعات مبقتش زى الاول طبعا الحكومة واحمد نظيف واحمد عز فضوا جيوب الشعب تماما الواحد هيتبرع منين ما كل واحد خايف من بكرة وخايف ان مرتبه ممكن بعد كده ميجبش عيش حاف

الناس كلها اتكلمت عن قضية الحضرى اكتر ما اتكلمت عن غزة
الريس قاعد يكرم الناس ويديهم وسام الجمهورية والاعبين بيضحكوا واخواتنا فى غزة بيموتوا
امير دبى يدفع تلاتين مليون جنيه مكافأت ومسمعناش انه دفع حتى ربع جنيه لاطفال غزة

امريكا بتبعت المدمرة كول ادام السواحل اللبنانية علشان تهدد اللبنانين كلهم ومعاهم طبعا سوريا
وبعديها بيوم على طول القوات الاسرائيلية تدك غزة يعنى عملية مدبرة تماما طبعا وقفة المدمرة ادام سواحلنا هتخلى اى واحد يفكر مليون مرة قبل ما يعمل حاجة دا اصلا لو كانوا بيفكروا او عندهم حتى النية انهم يعملوا حاجة

مبقاش عندنا غير ان احنا ندعى لغزة ولينا احنا كمان ان ربنا يرفع عنا البلاء من حكامنا ومن الاسرائليين الاتنيين مع بعض

سامحونا يا اهل غزة

من يومين فى العاشرة مساء كانوا مستضيفيين واحد وكان بيتكلم عن حال العرب قعد طول القعدة بيترحم على ايام عبد الناصر وايام ما كان العرب ليهم عزة وكرامة طبعا انا عارف ان ايام عبد الناصر كان فيها مشاكل كتير ومعتقلات لكن ديه مش قضيتنا الاهم ان المصرى كان محترم فى اى حتة فى العالم

الله يرحمك يا عبد الناصر

الله يرحمك يا صلاح الدين

الله يرحمك يا كل حاكم عربى محترم كان موجود

ربنا يخليك للعرب يا حسن نصر الله


نبيجى بقى للاسعار فى مصر اللى وصلت لمعدلات غريبة عمرنا ما سمعناها وعمرنا ما سمعنا ان حد بيموت فى طابور العيش وعمرنا ما سمعنا ان ازازة الزيت بقت بعشرة جنيه ونصف حرام عليكوا الناس هتعيش منين
الشقق بقت غالية طب الشباب هتجيب شقق منين ويتجوزا ازاى
انا عايز اسأل الحكومة ديه ايه هيا وظيفتها مش انها تعمل لمصلحة الشعب
وزارة زى التضامن الاجتماعى ايه مهمتها اذا كان رغيف العيش مش عارفة توفره
وزارة زى الاستثمار بتعمل ايه غير انها بتبيع البلد والمصيبة ان محدش عارف الفلوس بتروح فين
ممكن اى حد يقولى على اى وزارة وناجحة فى مصر
من الداخلية للخارجية للتجارة للزراعة يا قلبى لا تحزن

مش ناقص غير ان الشعب يطلع فى مظاهرة بيهتف للحكومة


قاعدين ليه ما تقوموا تروحوا

وحياة النبى تحلوا عنا

كلكوا عليا ولا ايه

وحشتونى اوى والله العظيم معلش انا عارف انى اتأخرت كتير فى الكتابة والردود على البوست اللى فات بس والله انا مطحون فى الشغل
بطريقة غريبة اوى لدرجة انى بشتغل اكتر من 17 ساعة فى اليوم مش عارف النوم بقى يوحشنى اوى مبقتش اشوفة خالص

المهم

المهم بعد دا كله مش عارف السنة ديه شكلها زى الفل من اولها

طبعا انا من مواليد برج الجدى يعنى مواليد اول السنة والحمد لله وصلت 31 سنة ولسه زى ما انا مفيش اى حاجة جديدة فى حياتى ولا خطبت ولا اتجوزت وشكلها مش باين كمان انها هتحصل السنة دى وبابا طبعا من اول السنة وانا عمال اسمع كلام كل شوية شد حيلك انت ناوى تقعد معانا لحد امتى وكلام من اللى يحرق دم الواحد

نيجى بقى للاهم بعد الطحنة اللى انا فيها من الشغل وطبعا عمال امنى نفسى بقى ان صاحب الشغل هيتعامل معايا بقى معاملة مميزة وهيهتم بيا فى الزيادات السنوية ويمكن بقى المرتب هيتضاعف وخصوصا انى دلوقتى انا بشتغل فى 3 اقسام مختلفة فى وقت واحد يعنى توفير للموظفين فى الشركة ومحدش يقولى ازاى بتشتغل فى 3 اقسام والله ديه الحقيقة فعلا انا بجد بشتغل فى 3 اقسام ملهمش دعوة ببعض لدرجة انى والله وانا نايم ساعات بحلم بالشغل وانى عندى مثلا شغل متاخر عليا يعنى كنت معشم نفسى بالزيادة الكبيرة اللى هاخدها اول السنة وخصوصا انى كل ما اتكلم مع الادارة العليا فى الزيادة لانهم موفرين اتنين موظفين تانيين علشان انا بعمل شغلهم ويبقى الرد الجاهز ان شاء الله اول السنة مرتبك هيتعدل ويزيد زيادة كبيرة متقلقش خالص

وطبعا واحنا شايفين الاسعار عمالة تزيد زيادة غريبة كل يوم





المهم نزلت الزيادات امبارح وانا بكل براءة والضحكة مالية وشى رايح اسأل المدير المالى ها المرتب اضاعف ولا اكتر شوية من الضعف وكانت الصدمة

الزيادة خمسين جنيه

مش بكذب عليكوا خمسين جنيه



مكنش ناقص غير انى اقول كلمة ابيحة ومعتقدش ان القانون كان هيعاقبنى عليها لو قلتها



طبعا جرى على الدور التالت اللى فيه الادارة العليا ورئيس مجلس الادارة والنواب بتوعه ايه يا اخوانا ايه الزيادة ديه لقيت تلات تربع موظفين الشركة واقفين مستنيين دورهم يدخلوا يشتكوا هما كمان



وطبعا دخلت وانا هولع بعد كل الشغل ده والطحن اللى انا فيه وقلة النوم كل ده علشان خاطر الشركة على الاقل احس ان الشركة مقدرة اللى انا بعمله وقعدت اكلمه ان الاسعار بقت غالية جدا فى كل حاجة وان المرتب مبقاش يكفى اى التزامات على الواحد وقلتله الحمد لله انى لسه متجوزتش ولا خلفت

امال يعنى لو كنت متجوز ومخلف كنت هصرف عليهم منين يعنى مش كفاية انى مكنتش بروح بيتنا وكمان مفيش فلوس وطبعا الكلام كان خارج من بقى زى الطلقة مكنتش عارف بقول ايه دا حتى السايس اللى فى الشارع اللى بيركن لينا العربيات ويتصرف يجبلنا اماكن علشان العربية رفع اليومية بتاعته لخمسة جنيه فى اليوم من اول السنة



قلت كل الكلام ده وبالصدفة كنت من يومين رحت اشترى طلبات لماما من السوبرماركت رجعت قولتلها ان الفلوس اللى هيا ادتهالى خلصت ودفعت من معايا كمان طبعا كل الاسعار بقت نار

وكان رده اللى الشركة كلها عرفته
يعنى الحكومة تقلب الدنيا ومطلوب منى انى انا اللى اعدلها
يعنى الحكومة تزود اسعار الحاجة ومطلوب منى انى ازودلكم مرتباتكم بنفس زيادة الاسعار
وانا مالى خلى الحكومة هيا اللى تزود مرتباتكم
يعنى هيا الحكومة كل ما تحب تسرق شوية ترفع الاسعار وبعد كده المطلوب منى انى ارفع المرتبات علشان الحكومة عايزة تسرق

طبعا انا اتخرست ومعرفتش ارد باى حاجة
قطاع خاص ومن حقة انه يتحكم فينا ويعمل اللى هوا عايزة
اما هوا قطاع خاص وبيتحكم فى ماله
امال الحكومة اللى هيا جاية تخدمنا وجاية بفلوسنا بتعمل فينا كده ليه


كلكوا عليا ولا ايه
ابويا وكل شوية عمال يقولى على الجواز
والحكومة والشركة وسايس الجراج والمرتبات والاسعار

انا عايز اسيب البلد ديه واطفش

اجازة طويلة

صباح الخير

معلش اتاخرت عليكوا اوى وبقالى كتير مدونتش حاجة ولا كنت بعلق عند اى حد بس والله كنت مطحون فى الشغل بطريقة غريبة ولسه لغاية دلوقتى بس بالعافية خدت يوم اجازة بعد ستين يوم شغل متواصل من غير اى اجازة ولا حتى الجمعة لدرجة انى كنت بشتغل كل يوم اكتر من 17 ساعة مكنش عندى حتى اى وقت اشوف اى مدونة او اعمل اى كومنت فمعلش اعذرونى انتوا عارفين القطاع الخاص والشغل فيه عامل ازاى

طبعا مكنش ينفع ارجع من غير ما اهنى كل الاهلوية بالفوز المستحق بكاس مصر ومعلش يا زمالك هوا ده قدركم انكم دايما تاخدوا المركز التانى ممكن بعد خمسين سنة كمان تفوزوا على الاهلى مرة تانية

شكرا لكل الاصدقاء اللى سألوا عليا سواء فى الكومنت او الايميل او فى التليفون ربنا يخليكوا وهوا ده برده العشم والاصحاب اللى الواحد طلع بيهم فعلا من المدونة

مرة اخيرة انا اسف جدا على التاخير فى الرد على الكومنت اللى عندى وهحاول ارد عليها قريب ان شاء الله

ولو اتاخرت تانى فى الكتابة اعذرونى لانى لسه عندى شغل كتير اوى

هاتوا الفلوس اللى عليكوا

خبر او تحقيق صحفى عجيب قريته فى جريدة الدستور من كام يوم عن فلوس التامينات الاجتماعية

اغرب حاجة فى الخبر ان الحكومة العظيمة بتاعتنا خدت او سحبت او استولت قول زى ما انتى عايز على كام بقى يا سيدى

على 270 مليار جنيه مصرى خدتهم الحكومة من فلوس التامينات الاجتماعية بتاعتنا ومحدش عارف هما راحوا فين ولا اتصرفوا فى ايه

وخدوا بالكوا من الرقم 270 مليار مش مليون يعنى للناس اللى مش بتفهم

المليار يعنى الف مليون يعنى 270 وجنبها تسعة اصفار

يعنى انا موظف بيطلع عينى طول الشهر

والدولة بتاخد من مرتبى 40% تامينات اجتماعية علشان اما الواحد يطلع معاش هيرجعوله تانى

الحكومة مصدقتش خبر فلوس بالعبيط عندها مش تستثمرها ولا تعمل بيهم حاجة مفيدة

طب انا هاموت واعرف الفلوس ديه راحت فين هوا احنا مش من حقنا نسأل برده ما هيا فلوسنا وتعبنا وشقينا فيها

انا مثلا عندى تلاتين سنة يعنى هنقول عقبال اما الواحد وعى على الدنيا وفهمها شوية قول ييجى من خمستاشر عشرين سنة انا بقى مش حاسس ان فى حاجة اتغيرت ولا المواصلات اتصلحت ولا المرتبات زادت ولا حتى الاقتصاد بقى عدل ولا حتى كنا بنحارب وقولنا الفلوس اتصرفت فى الحرب ولا مصانع اتبنت بايد الحكومة ولا فى حتى مشروعات عملاقة اتعملت غير اللهم مشروع توشكى اللى محدش عارف اذا كان كويس ولا لأ

يعنى الحكومة خدت الفلوس وجنبها 17 مليار بتوع الشبكة التالتة وجنبها كام مليار بتوع المصانع اللى اتبنت من ايام عبد الناصر وعزيز صدقى ابو الصناعة المصرية اللى برده الحكومة عمالة تبيع فيهم

انا نفسى اعرف الفلوس ديه راحت فين مش معقول ياخدوا مننا فلوس التامينات علشان يبنوا بيها معتقلات نتسجن فيها

ايه الهنا ده بنتسجن بفلوسنا

يعنى التامينات اجبارية على الموظفين طب مش من حقنا نعرف الفلوس ديه بتروح فين

لو حد ناوى يقولى ديه موارد للدولة وبتدفع بيها فلوس للجيش والداخلية والكلام ده هرجع اقوله امال الضرائب بتتعمل بيها ايه وفلوس المياه والكهربا والتليفونات وكل مصلحة لازم تدفع فيها دم قلبك وكمان مبقاش فى اى حاجة مجانية فى الدولة ولا تعليم ولا صحة كل الفلوس ديه بتروح فين ما هيا كل ديه موارد الدولة ليه بقى ياخدوا فلوسنا بتاعت التامينات والخبر الجديد بقى اللى لسه قارية فى مجلة ان الحكومة ناوية من اول السنة اللى جاية انها تخفض المعاشات 15 % كمان شوفتوا الافترا

ياخدوا فلوسنا ويضيعوها وكمان عايزينا احنا اللى نتحمل غلطتهم

احنا من حقنا نعرف الفلوس ديه راحت فين ولا احنا ملناش حق فى البلد ديه اصلا

ليه بقينا نقسى على بعض

ليه بقينا نقسى على بعض ليه القسوة دخلت قلوبنا واول ما الواحد بيقسى بتكون اول ضحية ليه اقرب الناس
بعد ما كتبت البوست اللى فات وقولت فيه انى كرهت الدنيا كلها كنت فعلا حاسس بالمرارة كنت شايف الناس وهيا بيتقسى
مبقتش عارف
المصرى طول عمرنا نسمع انه طيب وحنين طول عمرنا كنا بنقول احنا مصريين الحضن الكبير مهما الناس شتمونا وغلطوا فينا هنفضل الاخ الاكبر كان ده طبع المصريين ممكن نكون شعب مضحوك عليه حكامنا بيذلونا شعب ضعيف مهزوم مبيقاومش اى حاكم لكن كنا زمان شعب طيب خدوم
المصرى اول ما كان يسافر برة مصر كان المصريين اللى عايشيين برة مصر يعملوا كل اللى يقدروا عليه علشان يساعدوه اللى يوفرله سكن واللى يحاول يجيبله شغل كنا شعب اصيل
اتفرج دلوقتى على اى واحد مصرى بيشتغل برة مصر يعمل كل جهدة علشان يضرب فى زميله المصرى علشان ياخد مكانه اول ما صاحبه ياخد اجازة يجرى على المدير السعودى ولا الكويتى ولا حتى الهندى او الفلبينى ويقوله انا ممكن اشتغل شغل زميلى المصرى واخد نص المرتب بس طبعا التانى اما يصدق يرجع المصرى من اجازته يلاقى نفسة مطرود من الشغل طب ليه معلش اصل زميلك هيمسك شغلك وهياخد نص المرتب
اول ما بدا يضرب ضرب ابن بلده اللى كان مفروض يبقوا حنينين على بعض يحموا بعض من اى غدر تانى
حتى فى مصر عمرنا ما سمعنا ان اخين قتلوا بعض علشان خاطر الميراث الا من فترات قريبة اخ يقتل اخوة والتانى يعمل مكيدة لاخوة علشان يستولى على الشقة
مصرى يروح يخطب بنت ويلعب بمشاعرها ويوهمها انه ميت فيها وعايز يتجوزها اهه بيتسلى والسلام وقبل الجد يجرى ويقول انا مش قد الجواز قسوة ما بعدها قسوة
بنت تسيب خطيبها علشان جالها عريس تانى كويس او جاتلها سفرية برة كويسة تبيع خطيبها بالساهل المهم مصلحتى مبقاش فى مشكلة ان الواحد يدوس على التانى و لا حتى بقينا نصعب على بعض
بقينا قاسيين جدا على بعض
البنت بتقسى على خطيبها فى الطلبات
والراجل بيقسى على مراته ويسيبلها مسئولية البيت ويشيل ايده من تربية الاولاد

انا حاولت اسال ناس كتير

المصريين كانوا زمان طيبيين ايه اللى حصلنا
يعنى من اجابات الناس ومن حاجات شوفتها حواليا حسيت ان المصريين بدءوا يتغيروا من بعد حرب اكتوبر 73 الرجالة رجعت من الحرب عايزين يعوضوا زوجاتهم واوالادهم فترة الحرمان اللى عاشوها ايام النكسة مكانش ادامهم غير حل واحد السفر للدول العربية وطبعا ساعتها كانت الدول العربية مفتوحة للمصريين مكانش ادام المصريين منافس زى الهنود والباكستانييين ولا حتى الامريكان كنت تروح اى دولة متلاقيش غير المصريين كلهم جريوا على الدول العربية كان فيهم كتير كبروا فى السن وقضوا فترة كبيرة فى الجيش كان لازم يعوضوا اهاليهم وفى نفس الوقت محتاجين يحوشوا فلوس كتير العمر بيجرى وانا ملحقتش اعمل حاجة بقى اسهل حل انى اضرب فى زميلى علشان اخد مكانه وطبعا زميله ده مصرى زيه وبدات الحكاية كل واحد بيضرب فى زميله واللى معندوش اخلاق بيتصرف كده ييجى واحد محترم يلاقى زميله اغتصب مكانه ايه الحل لازم يدافع عن مكانه ومفيش غير انه يعمل نفس اللى اتعمل فيه
بدأنا نقسى على بعض بقت سمة من سمات حياتنا والمصيبة ان احنا اطبعنا بالطبع ده وكمان ورثناه لاولادنا
طبعا مش كل المصريين عملوا كده
لكن خلينا منطقيين مصريين كتير عملوا كده
الاولاد شربوا من اهاليهم القسوة واول ما بدؤا يقسوا اتعلموا فى اهاليهم وفضلت الدايرة تتقفل تتقفل لغاية ما شفنا ان الاخ بيقسى على اخوة والابن يقسى على امه
نفسى نرجع تانى الشعب الجميل الخدوم الطيب
طبعا مش هننسى الايام السودة اللى احنا عايشينها دلوقتى والظروف الاقتصادية المنيلة بتاعت دلوقتى خلت محدش طايق حد وكل واحد بيقول انا ومن بعدى الطوفان فترة حكم كلها مشاكل وتعذيب وظروف اقتصادية منيلة وشوية حرامية بيتحكموا فى البلد ويرفعوا الاسعار زى ما هما عايزين تجار مخدرات على فواتير تليفونات على دروس خصوصية كله عمال ينهب فى لحم الناس الغلابة واللى يتكلم ولا حتى يفتح بقه امن الدولة مستنيه والمعتقلات والتعذيب هتربيه ولو كنت من الاخوان المحاكم العسكرية فى انتظارك
مبقاش حد رحيم بحد
زمان كانت الشرطة فى خدمة الشعب
وبعديها بقت الشعب والشرطة فى خدمة الوطن
ودلوقتى بقت الشعب والشرطة والوطن فى خدمة الريس وعائلته
يبقى لازم الناس تبقى قاسية اكتر من تلاتين سنة الناس بتعانى قربوا ياكلوا لحم بعض
نفسى نرجع تانى المصريين بتوع زمان الطيبة والخوف من ربنا مراعاة الجار احترام النساء نرجع نقول احنا المصريين نرجع نمشى فى اى دولة فى العالم نقول انا مصرى
تسافر اى حتة برة مصر وتقف فى الشارع تقول انا مصرى عايز اى حد يساعدنى تلاقى ميت ايد تتمدلك وتقولك انا مصرى زيك تعال معايا بات عندى نقسم اللقمة سوا نقسم اللحاف مع بعض اسلفك وانا عارف انك هترجعهم تانى
هوا ده المصرى بتاع زمان
يا ترى راح فين

كرهت الدنيا كلها

كرهت الدنيا كلها
بقالى فترة كبيرة جدا بتعرض لمشاكل كتير اوى نفسى اخرج من اللى انا فيه نفسى اسافر نفسى ابعد
مش عارف كنت عايز ابقى طائر طاير فى السما او سمكة فى البحر المهم مكونش انا دلوقتى مش عارف انا ملخبط جدا
انا تعبت جدا من الحياة ليه يا ربى حرمت علينا الانتحار انا عارف انها حكمة الهية علشان منفقدش الامل ولا نيأس من حياتنا لكن اللى فقد الامل فى بكرة اللى يأس من حياته يعمل ايه نفسى اقف فوق برج عالى وارمى نفسى
نفسى اطير فى السما مش مهم ايه اللى هيحصلى بعد كده مبقتش فارقة معايا اى حاجة

ليه نفسيتنا اتغيرت ناحية بعضنا ليه بقينا نقسى على بعض ليه الظلم بقى سهل
نفسى اموت
اكيد ظلمة القبر احسن ميت مرة من نور الدنيا اللى احنا عايشنها دلوقتى
ربى هل استطيع الحصول على استثناء منك
اريد الانتحار
ربى انى لم اكفر برحمتك بل انى اطمع فى عفوك وكرمك عليا
هل ستاتينى الشجاعة انى انتحر واتخلص من حياتى
كرهت حياتى كلها
مبقتش عايش اى لحظات سعيدة
ربى انى عبدتك قدر استطاعتى امنت بك لم اترك فرض من فروضك صمت وصليت وزكيت
ربى ان اقترفت ذنب فى حقك فسامحنى ربى اتوسل اليك ان لا تعذبنى ان اقترفت ذنبا فى حقك

اللهم انت ربى لا اله الا انت خلقتنى وانا عبدك وانا على عهدك ووعدك ما استطعت اعوذ بك من شر ما صنعت ابوء لك بنعمتك على وابوء بذنبى فاغفر لى فانه لا يغفر الذنوب الا انت