اما كتبت البوست الاخير بتاعى نسيب مصر ونرحل كلنا
جاتلى تعليقات كتير ما بين احنا لازم نفضل ونحارب علشان البلد ديه جميلة وتستاهل
وتعليقات تانية ان الواحد مفروض فى اول فرصة انه يرحل من مصر ويهاجر
سألت نفسى سؤال تسمحولى اسئلهولكوا
يعنى ايه مصر ؟
هيا مصر ديه الارض والتراب والسما ولا هيا الاخلاق والشهامة والطيبة والجدعنة بتاعة ولاد البلد ولا هيا النيل وسمار بشرتنا
هيا مصر ديه الناس والشعب اللى عايشيين على ارض مهما كانت هيا فين الارض ديه ولا مصر ديه الارض اللى الناس عايشة عليها مهما كان مين اللى عايش على الارض
احنا بنحب البلد ديه علشان اتولدنا فيها واتربينا فيها يعنى حب بالامر الواقع علشان مفيش غيرها
احنا بنحب ايه فى مصر
ايه اللى خلانا نكره مصر
الحكومة والتوريث والتعديلات الدستورية والسرقة والفساد والرشوة وحادثة العبارة واللبن المجنس واحتكار الحديد وسرقة الاثار ومنافقين الحزب الوطنى والضعف والهوان والذل اللى الشعب شايفه على ايد
الحكام وتحكم امريكا فين
ايه اللى خلانا نحب مصر
وايه اللى خلانا نكره مصر
يعنى ايه مصر
الشعب ولا الارض
مين اللى عمل عظمة مصر وربا جوانا حبها
الناس ولا الارض
77 comments:
ممكن لما تعرف تقولى ...انا بجد مش عارفة
انا بسال نفسى السوال ده فى اليوم الواحد من تلاتين لاربعين مرة
نفسى فى رد
اضحك عليك لو قلتلك
لو لم اكن مصريا لودت أن أكون
:)
بس انا شخصيا بعشق
المكان والناس
هما الاتنين مصر
ومش صح نفصل بينهم
تسمع عن تأثير البيئة في شخصية الانسان
؟؟؟
مصر يعني وطنا, مش بلدنا لأ وطنا.
وطنا اللي لو معانا فلوس الدنيا مش هنقدر نشتري واحد غيره
مصر هي أمنا بجد, مش كلام أغاني, هي اللي اتظلمت مع الحكومه الظالمه والشعب اللي خايف.
مصر دي حاجه كبيره أوي يامحمد كبيره أوي بجد.
ارض مصر ماهياش احسن ارض في العالم...في بلاد تانية كتيرة فيها خيرات اكتر وجوها احسن100مرة من جو مصر...كفاية ان الربيع عندهم بيبقى فيه ورد مش مليان تراب و عفرة زي هنا
لكن غصب عننا بنحب الارض دي لانها بلدنا ولاننا لو رحنا اي حتة تانية هنبقى مواطنين درجة تانية
أه احنا النهاردة في مصر مواطنين درجة تانية وساعات بنبقى مواطنين درجة تالتة كمان والاجنبي ليه قيمة عن المصري...لكن دة سببه الناس
الناس ممكن تتغير...انما الارض هتفضل زي ماهي
لو الارض هي اللي مش عجباك يبقى تهاجر لانها مش هتتغير....انما لو الناس هي اللي مش عجباك يبقى تفضل في مصر و تحاول تغيرهم
واللة يابنى السؤال دة صعب أوى أنا فكرت كتييير فى معناة و مالقيتش غير إجابة واحدة
مصر يعنى إحنا أنا و أنت و الناس الموجودين بنا و أجدادنا اللى ضحوا علشنا
دمت بخير أخى الكريم
تصدق فعلا معاك حق
يعني مصر هي الارض..والنيل والشوارع الزحمه ..والخضرة ...والصحرا
وللا مصر الناس السمرا اللي في عيونها طيبة الدنيا..وغلب الدنيا .. الناس اللي زيي وزيك زي اهلينا وجدودنا
رغم الهم والغم والزفت اللي بيخلي الواحد يلعن الف مرة ام اليوم اللي اتولد فيه ..وجه للدنيا فيه عشان يشوف الايام السودا اللي شايفها ..بس في لحظة صفا وروقان ..وانت بتتمشي علي الكورنيش تقزقز ترمس وتاكل درا مشوي ..وللا وانت قاعد في البلكونه تتفرج علي الناس ..تلاقي نفسك بتقول ..الله مصر حلوة اوي ...برغم كل شئ
رغم اني كنت متزعمت حركة الفرار والهرب من البلد إلا اني ده لا يعني بالمرررة اني مبحبش مصر..بالعكس طبعا...انت سألت هي مصر بالنسبالنا يعني ايه..حقولك مصر بالنسبالي يعني الحاجة اللي خلتني انا..الظروف..المناخ..الناس..اهلى وصحابي والشوارع و و و
زطبعا مصر تستاهل الكفاح..بس بصراحة كده وبيني وبينك..اد ايه اللي بيكافحوا عشان مصر...انا فاهمة ان كلنا بنكافح..بس عشان دي طبيعة الحياة..انا بسأل كام واحد بيشتغل عشان البلد..بيفكر في البلد..يعني..في وسط ثقافة "على اد فلوسهم"..و"مدام دي مش بتاعتي يبقي طظ"..مين اللي صابر غلب عشان خاطر عيون مصر؟ الناس صابرة غلب عشان مفيش اختيارات تانية
..مش عارفة ايه اللي دخلني في القصة دي..المهم يعني..عظمة مصر بالنسبالي (غير التاريخ والاهرامات و و و و) مستمدة من كل حاجة ساهمت في تكويني من يوم ماتولدت هنا في مصر..والحقيقية..انا بيني وبين نفسي متمناش اهاجر ومرجعش تاني..لأ..يمكن اتمني اسافر شوية بس عشان اعرف اني زي السمك معرفش اطلع من الميه وان الغلب هنا ارحم من الغلب بره..وبعدين اعود الى ارض الوطن سالمة غانمة بأذن الله
تصدق السؤال لما قريته حسيته سهل اوى بس لما جيت اجاوبه حسيت بصعوبته
احنا ليه بنحب مصر ؟؟ مش عارفة احتمال عشان كل ذكرياتنا فيها ومع ناسها وعلى ارضها ...؟؟ احتمال عشان هى الارض اللى اتولدنا عليها ومنستحملش حد ياخد منها حتة ؟؟ برضه معرفش
ليه بنكره مصر ؟؟ احنا مش بنكرهها احنا زعلانين عليها انت عارف لما تقطع مع واحد صحبك عزيز عليك بس شايفه بيعمل حاجات غلط كتير بتحاول تغيره ولمامبتعرفش بتقطع معاه زعل عليه مش منه ....
مصر دى عاملة زى صاحبتى مثلا اللى سابت الكلية وراحت تقف تستزرق من جامعة الدول وابوها الريس هو اللى شغلاها كده وابنه بيلم ايراداها .. يعنى مصر متهانة اوى يا محمد .. انا زعلانة عليها مش منها
المكان لا ينفصل عن المكين هذا يأخذ من ذاك والعكس
انما فىالمجمل مصر هى احنا تنصلح اما ننصلح احنا
انا بحب مصر الكنت شيفاها وانا صغيرة واهلى بيحكوا عنها.. انها بلد الطيبة والاصالة والدين السمح والاخلاق
مكنتش بشوفها شمس ورمل وارض وسما
كنت بشوفها عز وفخر وماضي وحضارة
دا الخلاني احب مصر الناس تقريبا زي ما انت سالت .. لكل كل شئ حلو فيها اتغير وحال الناس اتبدل
وطبعا حال الناس اتغير يا محمد بتغير السياسات وانظمة الانتفاع وقوانين يلا نفسي وانا ومن بعدي الطوفان
والوقتي عشان ترجع مصر زي ما كانت حتباة زي سؤال البيضة الاول ولا الفرخة
يعني الشعب اليتغير الاول ولا سياسة الحكم وفى الحالتين امتي حيحصل وازاى
تقبل ارق تحياتي
عارف يا محمد . الوطن عاما بيبقى هى الارض اللى اتولدت عليها واطبعت بطبعها وخدت شطلها وملامح ناسها واللغة اللى قعدت عمرك كله تتكلم بيها وتحلم بيها وتفكر بيها ..والاحلام والامانى والمستقبل اللى فضلت تحلم تحققه .. لكن
بص على اللى احنا فيه دلوقتى ...
الارض مسروقة وملوثة ومليناة زبالة
الهواء بقى كله امراض
الاحلام ماتت تحت جزم الواسطة والفساد
المستقبل ..زى مانت شايف يا تقبل تعيش مواطب درجة تاسعة ياتغووور من هنا
الناس اللى كان ممكن تهون عليك كللل اللى فات دة اتحولت بقيت مش ناس ..
مش قادر اعيش فيها وانا مش قادر اعملها حاجة ..
محمد ... عارف ان بديل اليأس دة يكون ايه ... عنفففففففففف ..الكبت دة كله لو انفجر
عارف يعنى ايه تطلع مظاهرة ضد كارثة جاية على البلد ومش تلاقى حد اصلا غير هما هما ال 200 نفر بتوع كل مرة .. وطب الناس . .
ساعات كتير ببقى شايف انى عاوز اهرب برة قبل ما يخلونى اكرها فعلا .. هى مين بقى ؟ مش عارف ... بعد كل دة تلاقيها جواك مش قادر تتبرى منها
عارف يا محمد .. وااله يا بنى .انا كل ما اشوف عربية امن مركزى ولا عساكر وظباط الرعب المركزى دول ... ببقى فى حالة صعب اوى .. مش هيستريا ولا خووووف ..وعنيا تدمع على طول ابقى هاين على... ولا اقولك .. بلا هاين بلا بتاع ..الواحد زهق من الكلام والبكا
إخوانى،
لو أى واحد فيكم دخل الجيش وذاق الذل من أشخاص أقل ما يوصفوا به هو الجهل الشديد أعطتهم مصر السلطة كى يتحكموا فى خيرة شباب البلد هيعرف يعنى ايه مصر.
لو أى حد منكم دخل قسم شرطة حتى ينهى مصلحة شخصية هيعرف يعنى ايه مصر.
لو واحد منكم دخل مصلحة حكومية هيعرف يعنى ايه مصر.
لو واحد منكم فكر يركب اتوبيس عام هيعرف يعنى ايه مصر.
كما يقولون ان الضحك من غير سبب قلة أدب ... كذلك الحب من غير سبب قلة أدب!!
كل واحد منكم له أهله وأصدقائه ومنزله فقط ، أما غير ذلك من الأشياء المفروض ألا يعنى لك شئ سوى الذل والقرف والهوان والفساد والظلم والسرقة. اللى يحب منكم هذه الأشياء يبقى بيحب مصر.
خذوها منى كلمة : أنا بأكره مصر. وأى واحد يطلب منى عكس كده يبقى عايزنى أكون منافق.
هأحبها ليه ؟؟؟ أبويا هو اللى علمنى وصرف عليا وأعطانى دروس خصوصية لما كنت طالب فى فصل جواه خمسة وستين واحد وكان المدرسين ما بيشرحوا شئ.
أهلى هم أصحاب الفضل الوحيد عليا ، أما أن تطلبوا منى أن أحب مستنقع الفساد هذا ، فأنا أعتذر.
أنا مش أعرف مسر دي
انا اعرف العيزبة عندنا
جميلة قوي
فيها تورات بتلف في الساقية عشان تجيب لنا فلوسات كتير
مصر بيتي و مدرستي و اولادي و اهلي و جوزي
ازاي محبهاش
و مين اللي بيكرهها
محدش
سلام يا محمد
بما اني مش مصرية
فأنا حتكلم عن الوطن بشكل عام
سؤال لماذا نحب الوطن؟ سؤال صعب
هو سهل ممتنع
يعني حنا بنحب وطنا بس ما بنعرفش نقول ليه
الوطن هو كل حاجة بالنسبة للإنسان
تعرف انت فكرتني بقصيدة للشاعر عمر الفرا عن الوطن
بيقول فيها لابنو
الوطن يابني....
ماهو طابع ولا هاتف ولا عنوان
الوطن يابني ماهو سايب يصير بلحظة مجنونة لأي من كان
الوكن للي جذوره مأصلة بتاريخ يتزاحم مع الأزمان
الوطن للي يخلي الصحرا مخضرة ويزرع بالصخر بستان
الوطن للي يرد الغارة بالكونة
على الله توكل وجابه ولغيره ما طلب عونة......
وفي الآخر بيقول..بنهايتها الوطن يابني.. الوطن عرض البني آدم
آسفة على الإطالة
تحياتي
يااااااااااااااه يا محمد مصر دي هي كل حاجه...حياتي وذكرياتي ...وطني اللي مهما يخربوا فيه بحس فيه بالأمان.. لما بنشتم في الأوضاع مش بيكون قصدنا مصر.... أنا مش ضد إن الناس تسيبها وبعذرهم زي ما قلتلك في البوست اللي فات... كل حاجه ملوثه الضماير والعقول قبل البيئه اللي تخنق.... بس برده مش ذنبها ...مش ذنبها إن بيحكمها شلة حراميه وشعبها شعب أقل ما يوصف بيه هي السلبيه... شعب بيتحكم فيه بطنه ولقمة عيشه... مش ذنبها..الذنب ذنب أهلها
ورغم الفساد اللي مسيطر علي كل ركن ومعشش فيه.. في حاجه غريبه لسه بحس بيها وأنا في مصر... وهي الأمان... ما تستغربش... هو ده الفرق بين الوطن وأي مكان حتي لو كان جنه
والله بعد فترة صغيرة بره مصر إكتشفت ان جمال مصر في ناسها جايز تلاقي ارض احسن من مصر في جمالها ونظافتها ويمكن جوها بس اللي فعلا مش ممكن تلاقيه ناسها هي اللي بتعمل حياة وقيمة لمصر
بره مصر اللي بيخفف غربة الواحد انه يكون له اصحاب مصريين زي اصحابه اللي في مصر لكن مش ممكن شوارع وارض يلاقيهم في بلد تانية زي شوارع وارض مصري يهونوا عليه الغربة
مصر هي ناسها
أنا مش بحب فيها غير ناسها
لكن لما الناس تتغير يبقي أحبها ليه
لما الحاجات الحلوة البسيطة اللي كانت باقية تضيع وتختفي يبقي أحبها ليه
لما أشوف الجهل وثقافة التخلف هي اللي بتحكم الناس يبقي أحبها ليه
الناس إتغيرت يا محمد ومبقاش فيه الناس اللي تخليني أحبها
ومع ذلك مش متأكد إذا كنت عايز أهاجر ولا
تحياتي
مصر دي يا سيدي الفاضل مجموعة حاجات عكس بعضها تماما طلعت لنا بلد
ناس طيبة وناس مفترية...فقر شديد وغنى فاحش...تدين واخلاق وكمان فجور وفحش
مساجد وكنايس مسلمين ومسيحيين مدارس ومسارح كباريهات وقصور ثقافة
حاجات كدة كلها عكس بعض
ناس عايشين مع بعض ع الحلوة والمرة
هي دي مصر
عفوا
كل دة كان جزء من مصر
تحياتي ليك
امممممممممممممم
سؤال وجيه يا محمد
اما فكرت فيه لقيت مصر مكان اتولدنا و اتربينا و عشنا فيه منكرش ان شوية من ولادها هما الى بوظوها
انما حبها بيجرى فى دمنا
حتى لو اكتئبت شوية و حبيت تهرب انتمائك لمصر و حبك الدفين ليها هيرجعك تانى
و هتندم اول ما تسيبها
ربنا يخليها و يحميها لينا
بوست رائع يا محمد
بس عارف؟ قعدت كتير افكر فى سؤالك
ابقى هات اسئله سهله بعد كدة
تحياتى ليك
الناس .. الناس .. الناس
والأرض .. الأرض .. الأرض
بحبهم .. بعرقهم .. بمشاغباتهم و ريحة ظروفهم وتعبهم
بحبهم .. بعصبيتهم .. وطيبتهم .. وسخريتهم من الدنيا ومن نفسهم
بحبهم .. بيت صفيح وعشة خشب .. وكوم زبالة جنب عمود نور
بحبها .. نيل وزرع وبرج شاهق وفندق فخم جنب عشة فى وكلة البلح
بحبها .. طبلية وقلة .. وكافيه فى المهندسين وشباب هلس وجد ولعب وكره وحب
بحبها .. فلاح وحصيرة .. معزة وبقرة وحمار .. وعربية مرسيدس آخر موديل
بحب الكشرى والطعمية والشكشوكة والكباب فى الرفاعى والكوارع فى العهد الجديد وشاى وشيشة فى الفيشاوى
بحبها سيمون فيميه فى الجى دبليو ماريوت
وحمام محشى فى التكية وفرحات
بحبها ستيك بالمشروم وساندويتش فول من جاد
بحبها ..جامعة الدول فى المهندسين والعرب ماليينه
بحبها شارع الموسكى والغلابة بيخبطوا فى بعض من الزحام قبل العيد
بحبها .. هرم وقلعة وغيط فى الريف
بحبها مدرسة النصر حكومة والشويفات أمريكان لغات
لو قلت عنها مش هيكفى المكان
بس
حد يقدر ما يحبهاش
مصر الارض مش الشعب ، انا كتبتها عندك قبل كده وهافضل اقولها لحد لما اموت
مصر تستحق شعب احسن ميت مرة مننا، احسن من الشعب الغريب ده
مصر بعبقرية مكانها وامكانيتها وثرواتها لو فيها شعب تاني كان زمانا احسن بلد في العالم
جربت يا محمد تسهرلوقت متأخر في البلكونة و تتفرج على السما في مصر حاجة غريبة أو تقف على كورنيش اسكندرية اثناء الغروب ... صدقني مش بس ارض و ناس غلابة البسمة مش بتفارء شفايفهم و كمان السما و البحر حتى عسكري الأمن المركزي الغلبان اللي ساب بلدهم و اهلة عشان يضرب ناس مش عارف بيضربهم ليه مش عارفة اية الحب دة كلة لمصر و اهلها مكنش عارفة اني حقدر اكتب كل الكلام دة لكن بحها بعنف و على استحياء و العن ابوها
واسمع ألك عمك صلاح جاهين:
القمح مش زى الدهب
القمح زى الفلاحين
عيدان نحيلة جدرها بياكل فى طين
زى اسماعين
و محمدين
و حسين أبو عويضه اللى قاسى و انضرب
علشان طلب
حفنة سنابل ريها كان بالعرق
عرق الجبين
القمح زى حسين يعيش ياكل فى طين
يلبس حريير
و السنبله
يبعت رجاله يحصدوها من على
عود الفقير
لما سألتك فى يوم من الايام وقولتلك يا محمد انت ليه سميت المدونة مصر هى امى
رديت وقولتلى لانى فعلاً بحس ان مصر زى امى بعيوبها ومميزاتها بحنيتها وقسوتها
وانا مش هلاقى رد احسن من كده عشان اقولو ليك كرد على سؤالك يعنى ايه مصر ؟
مصر زى ما انت قولت بالظبط يا محمد
تحياتى ليك يا صاحبى
I want that they forgive me for my errors thank you
أريد أن تغفر لي بلدي الاخطاء شكرا
اما انت لت كده افتكرت الفيلم الجاسوسه المصريه واما ظابط المخابرات قالها ..ده الهرم وده ابو الهول وده النيل ,,دي مصر يا عبله """
لأ مش دي مصر مصر ارضا وشعبا ...
تحياتي
ومعلهش احب اقول حاجه تاني ,,مصر مش هبة النيل
مصر هبة المصرين
لابلد دي فيها حاجه غريبه بتشدك ليها دايما حتي لو أنت مش طايق نفسك
تحياتي لك
مصر حجات كتيره زي مانتا قولت بس فيه حجات كتيره غلط مش لاقيه حل بس الشمس قريب اوي هتطلع انا كتبت موضوع زي كده بس بيحكي عن الفقر شكرا ليك
nono
والله انا كمان نفسى اعرف يعنى ايه مصر وليه حبها متغلغل فى حياتنا
مختلف ماك يا صديقى انا بعشق مصر يمكن بكره سلبيات كتير موجودة لكن فى الاخر هى ديه بلدى اللى اتولدت فيها واتربيت فيها
بحب الارض والناس
اسراء
فعلا مصر اتظلمت بسبب الحكومة والشعب احنا اللى لوثنا سمعتها وخليناها حاجة سيئة كل ما تيجى سيرة مصر منفتكرش غير الرشوة والمحسوبية
احنا اللى بوظنا سمعتها لكن والله مصر ديه بلد عظيمة
واحد زهقان
انا بحب الاتنين الارض والشعب بس الشعب المصرة الطيب الاصيل ابن البلد نفسى يرجع تانى نفسى الورءة الشهامة بتاعت المصريين ترجع تانى هنكون كويسسين اوى
قائد
صح يا صديقى مصر ديه هيا انا وانت واهلى واهلك وصاحبى وصاحبك ومراتى ومرات وولادى وولادك والارض الجميلة اللى اتربينا عليها بس المهم نرجع تانى لايام زمان ايام الشهامة المصرية والالتزام الاخلاقى
هترجع مصر ديه دولة عظيمة
none
اما تمشى بالليل على كوبرى قصر النيل لا اكتوبر اما تركبى مركب فى النيل اما تتمشى على كورنيش اسكندرية اما تروحى اسوان ولا الاقصر اما تروحى دير سانت كاترين اما تدخلى جامع الازهر ولا تتمشى فى الحسين كل الاماكن ديه تخلى الواحد يقول الله عليكى يا مصر
بينسى اصادها كل المشاكل والحكومة الظالمة وكل القرف والزهق اللى كان ممكن يشوفة مصر قادرة تنسى الواحد كل مشاكله
اميرة البلطجية
ناس كتير جدا ممكن يسافروا لكن بتفضل مصر جواهم بيفضلوا يحنوا ليها
انتى عارفة المشكلة فى ان المصريين عايشيين فترة الطموح مقتول فيها حب الانتماء مقتول الحكومة خلت الناس مش مهتمة غير بلقمة العيش الناس كلها بقت خايفة ده اللى دمر الناس ده اللى خلى الشعب مبقاش يحب مصر خلاه شعب سلبى
حلم عادى
والله انا كمان زعلان عليها
بس المصيبة ان احنا اللى بينهانها واحنا اللى مرمطنا بسمعتها الارض احنا اللى خلينا بناتها تقف فى جامهة الدول تسترزق والرجالة بتلم الايراد هوا بصراحة تشيبه صعب اوى لكن فيه جزء من الحقيقة انا نفسى نرجع تانى لاياو الشهامة فترة الحكم الصعبة ديه تزول والله ممكن نبتدى من جديد ونرجع تانى شعب يستحق الارض الطاهرة ديه
محمد عبد الغفار
نفسى احنا ننصلح لان لو احنا بقينا كويسسن الارض هتبقى كويسة لان احنا اللى بوظننا الارض مش الارض هيا اللى بوظتنا
الزعيمة
كلنا حبينا مصر من ذكرياتنا فيها زمان
هيا مش البيضة الاول ولا الفرخة
احنا سياسة الحكم عندنا دمرت الطموح الامل فى الشعب يبقى اما تتغير وتيجى فترة حكم كويسة الشعب هيرجع كويس وبالتالى مصر هترجع كويسة لان احنا اللى بوظنا الارض وسمعة مصر
طارق
ده كله سببه الحكم
قتلت الطموح خلت الناس ملهية فى لقمة العيش خايفة حتى تتكلم ده اللى خلا 200 نفر هما هما بتوع كل مرةخلا الاهل يخافوا على ولادهم لدرجة رهيبة لان اللى بيعتقل مش لوحده عيلته كلها بتتبهدل معاه امن الدولة ربا الرعب فى قلوب الناس خلانا نكره مصر مش نحبها خلانا نفكر كلنا فى الهجرة من البلد اللى اتولدنا فيها اللى اتطبعنا بطباعها اللى مية النيل بتجرى فى عروقنا الشرطة كرهتنا فى البلد مع ان احنا بنحبها اكتر منهم بكتير جدا بنخاف عليها مش على الحكومة لا بنخاف على الارض الطاهرة من كل مكروه هما بس يسيبونا نحبها والله هتبقى مصر ديه جميلة جدا
مجهول
كل اللى انت قولته صح بس مين اللى كان بيذلك فى الجيش مش مصرى زيك ومين اللى بيعذب فىالقسم ومين اللى خد منك رشوة فى مصلحة حكومية مش برده مصرى
العيب فينا احنا والدك صرف عليك بس هوا جاب الفلوس منيين مش من شغله فى مصر وقبض مرتب من مصر يبقى على الاقل لازم نرد للبلد شوية من افضال علينا لازم نصلح من نفسنا
انا عن نفسى بحب البلد جدا نفسى احوالها تتصلح
خضرة
مصر ديه بقى العزبة الكبيرة انتوا عنكوا عزبة صغيرة لكن مصر ديه عزبة كبيرة والشعب كله بيلف فى ساقية علشان يجيب فلوس للحكومة
طهقانة
اما انتى بتحبى مصر علشان فيها جوزك
امال مطلعة عينه ليه بس
محدش ميقدرش يحب مصر احنا بس زعلانيين عليها
شهيدة
احنا يشرفنا انك تكونى مصرية
الوطن هوا فعلا عرض البنى ادم هوا الى بيحمى شرفى وشرف اسرتى بس المشكلة ان الوطن بتاعنا مش الوطن لا الظروف البوليسية خلت الوطن قاسى اوى على الناس
ريرى
الوطن ده المكان اللى بيشكل وجدانا وبيرسم حياتنا انا ساعات كتير بحس ان اللى بيجرى فى عروقى مية النيل مصر ديه حاجة كبيرة اوى بس احنا اللى ضيعنا كرامتها وزى ما انتى قولتى ان مهما حصل هتفضل فى حاجة بتشدنا لمصر
استاذ / شقير
صحيح فى ناس ممكن تهون على الواحد غربته لكن للاسف فى ناس ممكن تكره الواحد فى الوطن
احنا المصريين عندنا ميزة عظيمة ان احنا مرتبطين ببعض اوى بنقل اى حد غريب وبنرحب بيه عندنا مميزات عظيمة
بس للاسف فى ناس بتضيع اى ميزة للمصريين
اما بخصوص الشوارع والحوارى والمناطق الجميلة فى مصر معتقدش ان الواحد ممكن يشوفها فى اى حتة تانية
بيشوى
انا متاكد انك مش هتهاجر انت ممكن تسافر تشتغل لكن هجرة لا عارف ليه لان فى حاة هتفضل تشدك لمصر اصحابك الشوارع اللى مشيت فيها البورصة الاوبرا بلدكوا اى مكان ليك فيه ذكرى جميلة هتلاقى نفسك هترجع
صحيح احنا عندنا ثقافة التخلف دلوقتى لكن انا بدعى ربنا ان يرزقنا بحد كويس يحاول ينهض بالناس يرجع ليهم المفاهيم الصح تانى
يارب
سمير
علشان كده انا قلت ان مصر دولة بتسوعب اى حاجة عمالة بالظبط زى الحصالة بتحط فيها اى عملة لكن فى الاخر كلها بتتالف وبتحب بعضها هتلاقى الغنى بيحب الفقير والفقير مبيحقدش على الغنى عمرك ما هتلاقى الكلام ده فى اى دولة تانية
رانيا
اجيب اسئلة سهلة عندك 25 سنة وكل يوم بنتقولى كلمة مصر وعمرك ما فكرتى فى اجابة لا يا ستى السؤال ده عامل زى اسئلة الثانوية العامة لازم يكون صعب
هههههههههههههه
انا سافرت بره كذا مرة وفى كل مرة برجع للبلد ديه بحس انها وحشانى جدا كلامك صح مهما زعلت منها لكن انا اللى بجرى اصالحها واستسمحها انها تسامحنى
ياسمين
فضلت واقف ادام الكومنت بتاعك ده كتير اوى مش عارف ارد
كل الاماكن ديه روحتيها وشوفتيها ياااااه
تفتكرى فى مكان فى العالم فيه كل الاماكن ديه والناس بتحب المكان ده
بتحب المكان الغالى والمكان الرخيص معتقدش انك هتلاقى مكان فى عظمة مصر نهائى
انا عن نفسى مقدرش محبهاش
فؤادة
صح كلامك ان فى ناس من الشعب بوظوا البلد لكن هرجع اقولك ان اغلبية الشعب ده مين مش ابويا وابوك وامى وامك واخويا واخوك مش هما دول اغلبية الشعب
المشكلة فى القلة الحاكمة هيا اللى قتلت ا ى روح جميلة فى الشعب
احنا ندعى ربنا انه يرقنا بحد يعمل ثورة الاول فى افكار الناس يغيرها يرجعنا تانى لايام الشهامة الوطنية
مجهول
امشى فى اى حتة جوة مصر انزل الحسن وامشى فى الشوارع ادخل اى جامع او كنيسة هتلاقى فى مصريين بيضحكوا
الشعب ده عظيم جدا برغم انه بيتسرق من مئات السنيين برغم كل القهر والظلم والتعذيب اللى شافه لكن لسه عايش وعنده القدرة انه يضحك
طين البلد ديه شكل ملامحنا اتحفر جوانا خلا الخير موجود جوا الناس يمكن مش قادرين نطلع الخير ده لكن مسيرنا فى يوم نطلعة ونخلى البلد ديه جميلة
راسبوتين صديقى العزيز
مصر هى امى بكل حاجة كويسة محدش بيختار امه ولا حد بيختار بلده لكن ممكن الواحد يغير بلده
بس انا عمرى ما هعملها انا بعشق تراب البلد ديه بكل مميزاتها وعيوبها
davied
i dont understand you
ابن ناصر
فيلم الصعود الى الهاوية
يمكن مصر تكون ارض وشعب لكن المشكلة ان فى قلة من الشعب ده حكمانا وبتبوظ فى مصر وبتلوث سمعة مصر للاسف
انا اغلبية الشعب ده طيب وغلبان
ابن ناصر تانى
مصر هبة النيل لان النيل كان قبل المصريين وبعد كده المصريين القدماء هما اللى عملوا حضارة مصر
مصر هبة النيل والمصريين
مايكل
فعلا يا صديقى جرب تسافر فى اى مكان هتلاقى مصر وحشاك حتى بريحة عرق الوظفين فى الاتوبيسات هتلاقيها واحشاك
كل حاجة فى مصر بتشد الواحد لمصر تانى
فارس
ان شاء الله الشمس هتطلع قريب
وكل حاجة هتتصلح باذن الله
انا قريت موضوعك وهاعلق عليه ان شاء الله
مصر هيا البلد اللى اتولدنا فيها
و شربنا من نيلها و اكلنا من اكلها
و مصر هيا الناس هيا المصريين
المصريين هما اللى عملو مصر مش مصر اللى عملت المصريين
يبقى مصر هيا الشعب
مش الحكومة هيا مصر و لا الريس هوا مصر
مصر هيا البلد اللى اتولدنا فيها
و شربنا من نيلها و اكلنا من اكلها
و مصر هيا الناس هيا المصريين
المصريين هما اللى عملو مصر مش مصر اللى عملت المصريين
يبقى مصر هيا الشعب
مش الحكومة هيا مصر و لا الريس هوا مصر
مصر تعنى حبا بداخلنا
لترابها
لشعبها
لدينها
لتقاليدها
لجوها
لكل شئ
الا حكامها
البغض والكره لهم فقط
تحياتي
حاقولك حاجة
أنا قبل ما خرج من مصر
ماكنتش حاسة اني بحبها و لا ما بحبهاش
وعمري ما فكرت في الفكرة
اللحظة الوحيده اللي كنت بحس ان ليها حق علي
لما كنت أسمع حد حولي في موقف ما بيقول" ده شعب متخلف"
والكلمة ده كانت بتتقال في الطرابير بتاعت أي ورق بنعمله
وكتير في طوابير المدرسة و الكلية
الكلمة ده كانت بتخزق قلبي و تثيرب غضبي الشديد .. وكانت بتحول نظري للي قالها لدرجة اني بحس ان نظرتي حاتكون رصاصة ترشق فيه
بس لما طلعت حسيت ان فيه حاجة ككبيرة قوي جوايا اسمها مصر
لقيت غيرة شديده على أهلها
ولقيت مسئولية كبيرة جدا أخدت مكان في عقلي ناحيتها تلقائيا
لقيت لهفة شديده لمعرفة تاريخها و أخبارها
لقيت فخر شديد جواي بعلماءها و أعلامها
ليه و منين و إمتى ؟؟... ماعرفش
رغم المفاجأه الكبيرة جدا.. إني أساسا سودانية
لكن كل اللي أعرفه عن السودان هو جواز سفري و لوني
أما دمي و عروقي و ريحة الهوى اللي ماليه مناخيري وصدري
هي مصر
مصر الأرض و الناس و التاريخ اللي درسناه في المدارس
مصطفى كامل و عرابي وعبد الناصر
حتى الخريطة اللي حاططها انت في مدونتك بحبها
من أيام ماكنت برسمها في المدرسة و أرسم عليها خط النيل و فاكرة كل انحناءاته وحافظاها وبموت فيها
أنا رغيت كتير
صح؟؟
بس ولا كلمة من اللي قلتهم قالت هي ايه مصر جواي
تصدق بالله
انت راجل محترم
مصر بالنسبالى
بلد اتولدت فيها ومعرفتش أعيش فيها فهاجرت
مش بحبها ومش بكرهها
ولونزلتها فى يوم يبقى عشان اشوف معارفى وأفتكر الأماكن اللى قضيت فيها حياتى وبس
يعنى بأختصار نفس الأحساس لو كنت أتولدت فى اى بلد تانية
كلامى ممكن يخلى ناس ترفعلى حاجبها .. بس انا مبحبش النفاق
شعب عادى
صديقى الكلام ده كان ومان ان المصريين كانوا كويسيين وبيخافوا على البلد هما اللى بنوا مصر العظيمة لكن تفتكر ان فئة معينة بتتحكم فى مصر دمرت مصر
صاحب البوابة
مصر فعلا كل الحاجات اللى انت قولتها وزود عليها طيبة المصريين الغلابة المطحونيين
شرفتنى يا صديقى
هنودة
انتى مرعتيش ولا حاجة انتى بتشرفينى جدا ونفسى اشوفك عندى على طول
الواحد مبيحسش بقيمة النعمة غير لما بيفقدها
اما بنبقى جوا مصر بننتقد فيها سلبيات كتيرة اوى لكن اول ما بنخرج بحس ان روحى بتنسحب منى بعد الايام علشان ارجع تانى
مصر ديه فيها ميزة عظيمة اوى بتشد الواحد ليها مهما زعل منها بيفضل يحبها على طول
طهقان
ربنا يخليك
والله انت اكتر واحد مخلينى حاسس انى فى نعمة انى لسه متجوزتش
اباصيرى
بس انت اتولدت فيها وتربيت فيها وشربت ميتها واكلت من طرح طينها وهيا اللى وفرتلك التعليم وفى الاخر هاجرت يعنى مصر ما استفادتش منك حاجة يبقى على الاقل ترد ليها جميلة وتحبها مش كده يا صديقى
مصر هى بيتنا القديم
مصر هى بيت سيتى القديم
مصر هى الزقازيق
مصر هى الحسين
مصر هى الازهر
مصر هى وسط البلد
مصر هى الجوامع
مصر هى النيل
مصر هى مدرستى القديمة
مصر هى بيتنا الجديد
مصر هى امى
مصر حبى الاولانى
مصر هى تعبى فى ترحالى
مصر هى عربية الفول
مصر هى النتكتة الحلوة
مصر هى العيال الرجالة
مصر هى الشهامة
مصر هى المتحف المصرى
مصر هى الابنودى
مصر هى الفراعنة
مصر هى عمرى اللفات
مصر هى الجيران و لمتهم
مصر هى المقاومة
مصر هى عبد الناصر
مصر هى السادات
مصر هى صاحبى مينا
مصر هى الاخوان
مصر هى الاقباط
مصر هى المثقفين
مصر هى الفلاحيين
مصر هى الصعيدة
مصر هى الست الجميلة
هى دى مصر اللى انا اعرفها
يا سلااااااااام
شوف الناس الي بتفهم
المصريين هما الي عملو مصر و اللهي بعيوبهم بحلوتهم بكل حاجه فيهم حلوين
ولا يمكن احنا الي اخدنا على المناظر دي
تحياتشي ليك و للموضوع الي داخل دماغي
احمد حداد
قعلا مصر هيا كل اللى انتى كاتبه
نفسى كمان تكون مصر اللى تقف فى وش الظلم نفسى ترجع مصر الحقانية اللى مترداش بالظلم وان حد يتعذب فيها
نفسى ترجع مصر جميلة زى زمان
ميمو
شوفى المصريين هما اللى عملوا مصر زمان وعملوا ليها نهضة وحرية وعملوا ليها اسم فى العالم كله
لكن المشكلة دلوقتى ان فئة معينة بتدمر الاسم العظيم ده وبتدمر معاه مبادىء جميلة فضلت محفورة لالاف السنين فى مصر
مش عارف ليه بحبها
بس انا بحبهـــا!
مينا
انا كمان بحبها جدا
مصر هى أنا ه ذلك الجو الخانق الذى تربيت فيه مصر هى ألية القمع الكبرى القادرة على فرمنا جميعا أو فرمى أنا على وجه الخصوص مصر هى الذل مصر هى تقليد الآباء والأجداد مصر بلد لا يظهر فيه جديد أنا طردت مصر من داخلى فبعد أن كانت مصر هى أنا أصبحت أنت
لو عرفتى الى قبلهم راحو فين هتعرفى دول راحوا فين ببباطة اكيد شربوا بيهم بيبس
موقعنا الجديد هى كدة
تجيبها كدة تجيلها كدة هى كدة
www.hyakada.com
اكتب رائيك وكلامك العمر واحد والرب واحد
Post a Comment