Wednesday, April 4, 2007

نسيب مصر ونهاجر كلنا

حوار صحفى جميل جدا كان منشور فى جريدة الدستور يوم 2/4 مع الدكتور المستشار يحيى الجمل
الحوار كان حول التعديلات الدستورية
طبعا الاستاذ الكبير يحيى الجمل اللى انا بحبه وبحترمه جدا كان واضح وصريح فى اجاباته الخاصة بالتعديلات وبأن كل اللى شاركوا فيها هيتحاسبوا امام الله يوم القيامة على اللى عملوه فى الشعب المصرى وكبت حريته بالتعديلات الدستورية. الراجل قال جملة جميلة جدا ان الريس اول ما مسك الحكم قال انه عايش فى سجن كبير ونفسه ولاده ميعيشوش فى السجن ده لكن الواضح ان الريس عجبه السجن الكبير وقرر ان ولاده يعيشوا فى السجن الكبير
سيبك من كلام الدكتور يحيى الجمل واللى انتقد فيه التعديلات الدستورية وحمل اللى عملوها عبء كبير جدا عليهم
اما قالهم ان ربنا هيحاسبهم عليها
الحاجة اللى لفتت انتباهى جملة قالها الدكتور الكبير
انه قال لو ابنه جه يطلب انه يهاجر بره مصر هيوافق لابنه على طول لان المستقبل مظلم فى مصر
ده اللى قاله الدكتور يحيى الجمل طب عايز اسال سؤال
لو كل شرفاء مصر سابوها هيفضل ايه لمصر لو واحد زى يحيى الجمل او محمد حسنين هيكل او ابراهيم عيسى مش كفاية كل العماء الكويسين طفشوا من البلد طب الناس ديه لو مشيت وسابوا الساحة للمنافقين بتوع الحكومة هتبقى البلد ديه بتاعتنا ولا لأ
اما الناس ديه خافت من التعديلات الدستورية وخافوا ان ييجى يوم يلاقوا ظابط صغير كل يوم ساحلهم على القسم او امن الدولة وكله بالقانون طب احنا الشعب العادى هيتعمل فيه ايه هنرجع تانى لعهد زوار الليل وان الواحد يخاف ينتقد حتى رغيف العيش لحسن الحكومة تعتبره ارهابى وتطبق عليه تعديلات الدستور
يا شرفاء مصر استحملوا علشان خاطر الشعب الغلبان ده الشعب ده محتاج حد يقف جنبه يتكلم بأسمه يصرخ فى وش الظلم يتكلم مع القيادات العليا يقولهم على مطالب الشعب يعرف يكون سياسى ويتعامل مع الحكومة لمصلحة الشعب مش لمصلحة الحزب الوطنى اللى انفصل تماما عن الناس ومبقاش واقف غير مع كل حرف يقوله الريس وهما من وراه يقولوا امين
دكتور يحيى الجمل لو انت سبت البلد وكل شرفاء مصر سابوها تفتكر انسحابكم هوا الحل طب مين اللى هيقف مع الناس الغلابة فى وش الظلم اللى هيتعرضوله مع بدء تطبيق التعديلات الدستورية

75 comments:

واحد من الناس::طارق:: said...

محمد بص كد فى التاريخ ..
هتلاقى ان احنا وصلنا للمرحلة اللى قل الانهيار ..احنا على حافة الهواية يا محمد
دكتور الجمل قال كدة عشان عرف ان مرحلة الحوار والتفاهم المظاهرات السلمية مابقتش تنفع ومش ممكن تنفع
الناس بتغلى ... الناس هاتنفجر ومرحلة الفوضى مش بعيدة ..دة اللى انا خايف منه

halwasa-masrya said...

الاستاذ الكبير يحيى الجمل .. هو من ينطبق عليه اسم الفقيه الدستورى بجد .. الراجل ده جامد جدا وانا افتكرله جملة قلها فى الوفد انو اللى بيحصل دلوتى شبه اللى كان بيحصل قبل حريق القاهرة .... تفتكر قصده ايه؟ ان احنا داخلين على حريق قاهرة جديد ؟؟

عندك حق .. لو مصر سابها اساتذة القانون وعلماء الزراعة والصناعة يبقى احنا مقبلين على مستقبل فعلا مظلم وخانق .. وعلى فكرة هما برضوا لو فضلوا هما بس مخنوقين هو برضه نفس المستقبل ... الواحد مش عارف يعمل ايه؟؟

اللهم لا اسالك رد القضاء ولكن اسالك اللطف فى

على فكرة مذكرات د- يحيى الجمل حلوة اوى وطبعت من دار الهلال ابقى اقراها هتعجبك

أميرة البلطجية said...

سعيدة انك موجهتش كلامك للعامة امثالي لأني في اول فرصة للغلعان من البلد حخلع صراحة
وعلى فكرة..انا زمان مكتش بفكر كده.. بس خلاص بقي الخنقة وصلت لأخرها

الأباصيرى said...

صدقنى اللى هيستمر فى مصر ومش هيهرب هيبقى عامل زى اللى شايل قنبلة ومستنى تنفجر فى وشة

الهروب هو أفضل الحلول حاليا.. ربما الاستمرار والمواجهة كان خيار سليم فى وقت من الأوقات... بس بعد التعديلات مفيش حاجة اسمها مواجهة... يبقى لية الاستمرار ؟؟؟

The Alien said...

لو تبص حوليك هتلاقي إن أحسن شباب البلد هما اللي بيهاجروا
كل الكفاءات بتسيب البلد
أنا ف الأخر تهمني حياتي وحريتي
لو مش لاقيها ف بلدي ومفيش أمل ألاقيها
يبقي من حقي أدور عليها ف حته تانيه
ومينفعش نلوم حد

أنا عمري ما عرفت أخد القرار ده
إني أسيب البلد وأحاول أسافر
بس واضح إن ده بقي الحل

تحياتي

raspoutine said...

عندك حق يا محمد والله بس تقول لمين
انت عارف انا حاسس ان الوضع اتغير مليون فى المية بعد العالم كله ما شاف الريس العراقى مسحول وبياخد على قفاه
فقالو ايه بقى احنا نطبق السياسات الامريكيه اللى خارجة من الكونجرس الامريكى الخاصة بالشرق الاوسط
واول السياسات التى يجب ان تطبق سياسة القمع
قنع الشعوب اللى ممكن تخرج ابطال وعلما
وعشان كده الكل بيهرب بيهرب من واقع مظلم ومستقبل اشد ظلمة
الموضوع خرج من ايد الحكام ومن ايد الناس خلاص يا محمد
تحياتى ليك

smraa alnil said...

لو الشرفاء سابوا مصر هيفضل فيها مين؟؟؟

السؤال مش كدة
السؤال لو فضلنا علي الحال دة هنسيب الشعب لمين وهو هيبقي بلا وطن

عارف احنا بجد ناقصنا ثورة
زي ثورة الباستيل في قصة مدنيتين
ونهر من الدم
ورؤوس تطايرت

بس تفتكر احنا في مرحلة فعلا
تسمح بكدة
مش عارفة

smraa alnil said...

نسيت اقولك
ان اول فرصة تجيلي عشان امشي واسيب مصر
صدقني هعملها

مصر هى أمى said...

طارق

فعلا انا حاسس ان احنا وصلنا لمرحلة الانهيار علشان كده انا كنت بقول ان واحد زى الدكتور الجمل اما يسيب مصر ويمشى والناس الكويسة تمشى مش هنلاقى حد يقود الناس يبقى حلقة وصل هنبقى فوضى
ربنا يستر

مصر هى أمى said...

هلوسة

فعلا الدكتور الجمل فقيه كبير جدا وراجل حقانى علشان كده لم يتم الاستعانة بيه والحمد لله انه منضمش للجزب الوطنى علشان ميبقاش مغلوب على امره زى الدكتور مفيد شهاب انا كنت بحبه وبحترمه جدا وانا بقول كنت لان الراجل ده زمان كان كويس جدا لحد اما السلطة خلته طوع امرها وعمال ويدافع عنها بكل قوته

احنا قبل مرحلة حريق القاهرة الجديد ربنا يستر لان كل ثورة ليها ضحايا واحنا مش عايزين ثورة ولا حاجة احنا عايزين احوال البلد تتصلح
بينى وبينك انا بقيت حاسس ان نفس الخطاب اللى اتقال يوم 23 يوليو حاسس انه هيتقال قريب لان البلد انتشر فيها فعلا الفساد ربنا يحفظ مصر والمصريين الشرفاء من كل سوء

هلوسة المستقبل مظلم لمصر لو سابوها الشرفاء
والمستقبل مظلم للشرفاء لو فضلوا فى مصر تفتكرى انهى الاحسن ان الشرفاء يضحوا ويفضلوا فى مصر يمكن يقدروا يغيروا المستقبل المظلم ليهم وللبلد لان البلد ديه تستاهل كل خير

مصر هى أمى said...

اميرة البلطجية

اول فرصة للغلعان هتغلعى واسمك اميرة البلطجية دا هتى احنا كنا ناويين نستعين بيكى فى الثورة اللى كنا هنقوم بيها يوم 30 فبراير سنة 2900 جاهزة ليها انتى والبلطجية بتوعك ولا لأ

المهم اما تسيبى البلد متحرميناش من تعليقاتك

مصر هى أمى said...

الاباصيرى

يبقى الاستمرار على امل ان احنا نحاول نصلح الاوضاع
صدقنى الهروب عمره ما كان حل لان هيسيب الساحة للحرامية والمنافقين يقووا نفسهم ويثبتوا رجليهم فى مصر ويبقى عليع العوض فى مصر

مصر هى أمى said...

بيشوى

شوف انت قلت ايه عمرمك ما فكرت انك تسيب البلد لكن اصبح هوا ده الحل اللى ادامك
ياريت حد من الحكومة يفهم ان الناس بقت مخنوقة لدرجة كبيرة ان الناس اصبحت مش مستحملة
لازم تفضل وتحاول

لازم يكون عندنا امل ان بكرة ممكن يكون احسن

اقولك على حاجة نفسى انا كمان اقنع نفسى انى افضل فى مصر ومسيبش البلد نفسى يكون عندى امل

مصر هى أمى said...

راسبوتين
اهلا بيك جدا يا ايمن

الموضوع مخرجش من ايد الحكام لان الحكام هما اداة لتنفيذ السياسات اللى بتتفرض عليهم فعلا انا حاسس ان كل قيادات البلد الشريفة عايزة تهرب من مصر خايفة من المستقبل المنيل بتاع البلد
فعلا زى ما بتقول يا ايمن ان الحكام دلوقتى اصبحوا بيقمعوا شعوبهم بدرجة كبيرة جدا علشان يخرسوا اى لسان ممكن يتكلم

مصر هى أمى said...

انجى

هنبقى شعب من غير وطن جامدة اوى الكلمة ديه يا انجى بس تصدقى فعلا انا بقيت حاسس ان احنا عايشيين فى بلد غير بلدنا اما تشوفى تصريحات الحكومة وان البلد عايشة فى رخاء عمرنا ما كنا نحلم بيه وان السياسة الحكيمة للدولة انقذتنا من بلاوى كتير بحس ان الحكومة منفصلة تماما عن الشعب بتتكلم عن دولة تانية خالص غير اللى احنا عايشيين فيها

ناقصنا ثورة يا انجى المهم تكون الثورة لمصلحة الشعب

على فكرة موريتانيا اتحولت للديموقراطية من غير ثورة
يا بختهم الموريتانيين

مصر هى أمى said...

انجى تانى

لو لاقيتى فرصة ليا وليكى ابقى قوليلى لانى برده حاسس ان المستقبل منيل مع انى بكره الهروب وبحب البلد ديه

ربنا يستر على البلد ديه

-_- said...

فكرنى بعادل امام في مسرحية الزعيم لما بيقول يا رب الشعوب كلها تموت عشان الحكام يصحوا ما يلقوش حد يحكموه

Unknown said...

صدقنى مبقتش فارقه

لأن الى جوه مصر بقم زى الى براها كلهم مهاجرين


مهاجرين بعقولهم تقدر تقولى كام واحد فى مصر نقدر نقول انه من المصريين

اصلاً مبقاش فيه انتماء و الناس هتعمل ايه الجوع كافر و لقمه العيش هيه الى ليها كل الانتماء

المصريين بقم خليط من افكار غلط خلتهم يا اما فاسدين او بلطجيه او متعصبين او جاعنين و جبناء و يدوب مممكن تلاقى نسبه بيسطه لسه اسمهم المصريين

افكارى مش بائسه او يائسه او كئيبه لكن الصوره هى كده

تحياتى يا صديقى العزيز و شكراً لسوألك عليا

micheal said...

بالرغم من صعوبه الوضع يا محمد الا أني ضد الانسحاب من هذه المعركه...و لابد من أن نبدأ بالاصلاح الداخلي اللي بيبدأ بطبيعه الحال لما كل واحد يبتدي بنفسه..علي العموم أنا حعمل بوست كامل عن موضوع الاصلاح الداخلي و أقول فيه الافكار اللي عندي في الموضوع ده
تحياتي لك يا محمد

halwasa-masrya said...

ردا على سؤالك يا عادل .... لاء مش هسبيب بلدى ولو حتى موت هنا من الضغط .. اصلى دى بلدى يعنى ومهواش كلام شعارات بس لو امى عندها ضغط وسكر وقلب هسبها تموت والا هفضل جنبها احاول اعالجها ؟
انا بحب البلد دى على اد ما اتاذيت واتبهدلت فيها يعنى بحبها اووووى

AHMED SAMIR said...

بكل امانة الشعب المصري مايستحقش ان نخبته ومثقفيه يقفوا جنبه لان الشعب دة ماعندوش مقومات التغيير
الشعب دة يستحق بكل امانة ان الضباط والعساكر والمخبرين يقفوا عليه مش جنبه
لو بتشوف ان كلامي دة قاسي شوية
ارجع لانتخابات الرئاسة اللي فاتت وشوف مبدأ اللي نعرفه احسن من اللي مانعرفوش اللي كان الشغب الغلبان دة بيطبقه
وانت هتعرف انه لا يستحق اي عطف

reri said...

الحياه في البلد دي بقت صعبه أوي... صعبه من كل النواحي يا محمد... أنا مش بلوم حد لما ألاقي فكرة الهجره أو الهج من البلد بتراوضه...خاصة لو متميز في مجاله... بصراحه الجو أصبح فاسد جدا...فاسد لدرجه تخنق بتقف في وش كل شئ كويس وصح وبتساند كل شئ فاسد... أنا شخصيا وأنا لست مميزه في شئ بحلم أتجوز واحد مسافر بره أرض المحروسه...علي الأقل لو فيه غلط دمي مش هيتحرق كل يوم وأنا بشوف الغلط بقي صح ... سلااااااااااامات

فؤاده said...

هو صحيح البلد في اسوأحالتها وتجيب احباط وتطفش والمستقبل اسود

بس البلد ده بلدنا وممكن تكون احسن من كده ، بس عايزه شغل ، صحيح شغل كتير وعايز مجهود وتضحيات بس مفيش حل تاني

مش عارف عمري ما حبيت الفكره ده ، لو مكان مش عاجبك متصلحه احسن من ماتسيبه ، وده مش مكان عادي ده وطن

Anonymous said...

مصر أصبح بلدا يلفظ أبناؤه
واذا لم يلفظهم

تبقا زى القطة
تاكل ولادها

مصر هى أمى said...

شارم

طب اما الشعوب كلها تموت الحكام هيعذبوا مين ويرموا مين فى المعتقلات

مصر هى أمى said...

whyme

صديقى العزيز مهو علشان كده انا زعيلت اما لقيت ناس شرفاء كتير عايزين يمشوا طب مين هيكون القدوة للنسبة حتى البسيطة اللى اسمهم المصريين

فعلا ان الفقر قتل كل روح الوطنية وحب البلد والانتماء من نفوس المصريين بس انا لسه عندى امل وحتى ولو صغير

مصر هى أمى said...

مايكل

انا معاك يا صديقى ان الانسحاب من المعركة مش صح لانه هيسيب الفرصة للانتهازيين لانهم يتحكموا فى البلد
لكن ساعات الواحد بيضعف وبيتخنق ويقول مفيش فايدة

بس انا عن نفسى برجع بسرعة واقول لازم احارب علشان البلد ديه تفضل كويسة
طول عمرها

مصر هى أمى said...

هلوسة

كلامك جميل جدا فعلا لو حد تعبان اسيبه واتخلى عنه ولا افضل جنبه
انا عن نفسى هافضل جنبه لحد ما اكون عملت الواجب معاه وعلى قد ما اقدر

طبعا بعد الشر على مامتك

انا زيك اتبهدلت فى البلد ديه اوى لكن بحبها جدا

مصر هى أمى said...

سارة

تم الرد يا باشا

مصر هى أمى said...

احمد سمير

يا صديقى الشعب ده غلبان ومغلوب على امره يمكن تكون غلطته انه ساب الظلم ينتشر لكن برده هوا شعب طعبان ومظلوم ميستحقش مننا كل ده

Just a Reader said...

SA..
I agree with all of the readers en el balad ba2et mot3eba gedan, bas this doesn't mean enna nsebha, I once read this quote and liked it so much: "Be the chamge you want to see in the world".
law kol wa7ed bada2 bnafso we 2athar fel 7awaleeh el dayra htekbar we hatkber we hattn2el men el fard lel mogtama3 zay ma drasna fel trabya el watnya zaman :).
Bas we should not leave it by all means. Best of luck lel gamee3!.

Just A Reader

مصر هى أمى said...

ريرى

الحياة فعلا صعبة فى مصر لكن هنعمل ايه بلدنا ولازم نفضل نحبها ونستحمل علشان خاطرها

مصر هى أمى said...

فؤادة

دا اللى انا كنت بطلبه من الدكتور يحيى الجمل انه يفضل ويحاول ويحاول دا حق الناس عليه الناي اللى دفعت ضرائب من مرتباتها علشان الدكتور يتعلم جوة مصر وبراها وهوا راجل وطنى جدا وانا بحبه لكن من حق الناس عليه انه يفضل فى البلد ويحارب علشان خاطر الغلابة اللى مش لاقيين حد يدافع عن حقوقهم

لازم نفضل كلنا ونحاول نصلح ان شاء الله

مصر هى أمى said...

شهروزة

العيب مش فى مصر العيب فينا احنا
احنا اللى شعب رضى بالمهانة والذل

ibn nasser - ابن ناصر said...

ههههههه دي تبقي خرب
تحياتي

بنوتة من وسط البلد said...

لما كل الناس تسافر وتسيب بلدها امال مين الى هيقعد للارض دى

ولا احنا عايزين تجربة فلسطين تتكرر ونغنى كلنا ظلموه ونقعد نشحت على ابواب الدول

وهنروح بره نشتغل خدامين وما نفتحش بقنا .. ما احنا مش هيبقى لينا سعر وهنتباع العشرة بسحتوت على الرصيف

وده مفروض يكون هو تفكير الكوادر والقيادات المسؤولة فى البلد

لما دول يخلعوا .. امال مين الى هيدافع عن حق المواطن الغلبان

ااااااااااااااه يا بلد

ody911 said...

لنا الله يا محمد



عادى بقة
أودى

شهيدة said...

سلام يا محمد
والله معاك حق

يعني الحل ما بيكنش في الهروب
ولو الناس القادرة على الوقوف ضد الفساد والظلم سابت الوطن مين اللي حيدافع عن الوطن والشعب؟

لازم كلنا نتمسك بأرضنا ووطنا مهما كانت الصعوبات عشان حقنا نعيش فيها براحة وسعادة وأمان

Anonymous said...

احم احم
مختلف مع حضرتك

ياسيدى اللى عايز يسيب البلد يسيب
واللى عايز يقعد يقعد

فى ناس ممكن تخدم مصر أحسن لما تكون بره البلد
وفى ناس ماتقدرش أصلا تسيب مصر

خلاص كل واحد براحته
أنما مش معاك انك تقول ماتسبش البلد
أمال يعمل ايه يعنى ؟
يموت !!!!!

يابنى ربنا أرضه كبيره وواسعه
والعالم مش مصر بس
العالم كل الدول

وكل ميسر لما خلق له
اللى مش قادر يعيش جوه البلد من حقه يطلع بره ومش اسمه خاين ولا هروب
هو مش عنده من الأول المقدره يبقى ماتحملوش مالا طاقه له به

ومش عايز أقولك انه كل الناس لو ليها الفرصه هاتطلع بره مصر

ياسيدى كل واحد يعمل اللى ربنا قدره عليه لا أكثر ولا أقل

وممكن تبص للموضوع من ناحيه تانيه
لما الناس الكويسه تسيب مصر هايبتقى الوحشيين بس
هموا بقى هايخلصوا على بعض ويبقى خلصنا منهم
مش حل برضه
;)

دمت بخير
وسلام

Ummah said...

كتير بفكر فى الموضوع ده...و بحس أن الطبيعى أن الناس تفضل مثابرة...بس فى لحظات الظلام و اليأس الناس ممكن تحس أن مفيش فايدة و أنهم ممكن يبيعوا القضية....ساعات بيجيلى الاحساس ده...أن الاهتمام باللى بيحصل و التفكير فيه مبيجبش غير و جع الدماغ و الضغط....ساعات بحس أن الواحد خلاص وصل لمرحلة
مفييييييييييش فايدة

يمكن المفروض منوصلش لكدة...بس ده الواقع...بييجى وقت و نحس أنا ضلمت و قفلت.....!!!ا

soosa el-mafroosa said...

في بلد زي ده

مش عايز يسمعنا

و مش عايز يسيبنا نصلحه

و مكتفنا من إيدينا و رجلينا عشان نفضل محلك سر

و المكان اللي نتولد فيه نموت فيه

لازم الشرفاء يهربوا

لنهم لو فضلوا الظروف هتدفعهم بعيدا عن الشرف

إبراهيم محسن said...

دي عزومة مخصوص يا عمي
تيجي تنورني
http://hearttrainer.blogspot.com/2007/04/wama.html

ده لينك العزومة
ومنتظر ردك فورا الوقت ضيق
سلام

الزعيـمة said...

طول عمرى كنت بقولك يامحمد البتقولة وازاى نسيب البلد ونسيبها تخرب
بس كمان الشيفاها ان قعدتنا زي قلتها
محدش بيعمل حاجة ولا فية حاجاة بتتغير
ياريت قعدتنا لها قيمة ولا حتاثر بشئ
انا كمان بتمني اهج من البلد
لانى مش قادرة اشوفها كدا واستحمل
تعرف موضوع الموت الرحيم الكانوا بيناقشوة فى فرنسا؟
بيقولوا لما المريض يكون حالتة متدهورة خلاص ومفيش امل نفضل معيشينة بالاجهزة ولا نفصلها عنة عشان يموت ويرتاح؟ مصر بتحتضر اودام عنينا
احنا معيشنها باجهزة الحب مننا وتمسكنا بيها لكن هي بتموت والحيعيشها مش مجرد كلامنا ولا حبنا ليها لازم ثورة زي ثورة يوليو بس تفتكر التربة الخرجت جمال عبد الناصر قادرة الوقتي على اخراج جمال تانى ولا البلد كل شبابها اصبح سعد الصغير وكل بناتها روبي؟

بوست رائع يا محمد
واعذورني ان كنت بكتب وانا منفعلة
بس غصب عننا خلاص فاض بينا

محمد عبد الغفار said...

فشل

أسوور said...

البلد دى بلدنا ومهما حصل هنفضل نحبها
نحبها بمميزاتها وعيوبها بحلاوتها و وحاشتها

لما باسافر برة يا محمد ولو لأيام بارجع و واحشانى ريحة عرق الناس الغلبانة فى الزحمة .. بجد .. صدقنى

مش هنعرف نسيبها ابدا ولا حتى يحيى الجمل

Ahmad Hegab said...

سلام عليكم

محمد باشا

ازيك و ازى اخبارك

كتير اوى بفكر انى اول لما اخلص دراسة اسافر برة مصر بس برجع و اقول طيب و بعدين حسيب اهلى لمين

بس بجد يا محمد الواحد على اخرة و لو محصلش تغيير قريب كمان سنتين تلاتة حتلاقنى بدون على رحلاتى فى اوربا

BeLiEvEr said...

اللى بيحصل فى مصر دلوقتى سببه إن أحسن ناس فيها هجوا و سبوها فى الستينات و السبعينات و سابوا الناس اللى أقل منهم كفاءه، اللى هما للأسف دلوقتى بيحكمونا.

أنا خايف بعد عشرين أو تلاتين سنه، إن اللى يحكم مصر هما الاقل كفاءه برضه.
يعنى هيه دايره بندور فيها

مصر هى أمى said...

A Human Being

كلامك صج فعلا كل واحد لازم يبدء بنفسة بس فى الاخلاق والمعاملات لكن لازم شرفاء البلد واللى بيحبوها انهم ينكروا ذاتهم الشخصية ويغلبوا مصلحة البلد على مصلحتهم الشخصية

شرفتنى

مصر هى أمى said...

ابن ناصر

معلش مفهمتش اصدقك يا صديقى

مصر هى أمى said...

بنوتة من وسط البلد

كلامك فعلا صح هنبقى زى فلسطسن عايشيين مشردين فى كل البلاد وكل دولة تحن على شوية وتطلعلهم جوازات سفر مختلفة ويقابلوا مشاكل كتير فى المطارات طب ليه منفضل فى بلدنا ونحاول نصلحها البلد ديه تستاهل مننا كل خير

مصر هى أمى said...

ody911

لينا وليك ولكل المصريين الشرفاء يا صديقى

مصر هى أمى said...

شهيدة

هوا ده اللى كنت عايز اوصله ان الهروب فى مواقف معينة مينفعش لازم نفضل ونحاول نصلح الاوضاع السيئة لازم الشرفاء والوطنيين ميضعفوش لان ده قدرهم انهم يبقوا زعماء ويتكلموا باسم الناس الغلبانة المطحونة

لازم كلنا نتمسك بالارض والوطن

مصر هى أمى said...

حسن محمود

انا مش معاك يا صديقى العزيز
لانى كنت بوجه نداء للزعماء السياسيين فى الاصل اللى يقدروا يقودوا البلد ويتكلموا مع الحكومة عندهم المقدرة على المناقشة والمحاورة مع رجال الحكومة والسلطة
اما اقتراحك انهم ممكن يخدموا البلد من برة مصر فده ينفع مع الممثليين المطربيين لاعبى الكورة
لكن اما يبقى الكلام عن مصلحة الوطن لازم يفضل العماء والمدرسين الاطباء المهندسين المحاميين اللى بيدافعوا عن حقوق الانسان لان هما دول اللى بيحموا الشرفاء لكن لو دول سافروا مين اللى هيحمى الناس الغلابة

اما اقتراحك ان مصر هيفضل فيها الوحشيين بس ودوال هيخلصوا على بعض طب الناس الغلابة اللى مش هتقدر تسافر ذنبها ايه

مصر هى أمى said...

omas

فعلا الواحد ساعات بيحس انه وصل لمرحلة متاخرة من الامل لكن لازم نثابر ونحاول
كل الانبيائ تعبوا جدا علشان ينشروا دعوتهم سيدنا نوح ظل يدعوا لطاعة الله ما يقرب من تسعمائة سنة

ربنا يعنا على انقاذ مصر

مصر هى أمى said...

سوسة المفروسة

طبعا الشعب كله متقيد ومتحوط عليه بعساكر امن مركزى وامن دولة
لكن الكتاب الكبار عندهم قدر من الحرية والثقافة انهم يتعاملوا ازاى مع الحكومة

يعنى معتقدش ان الحكومة ممكن تيجى فى يوم من الايام وتقبض على واحد زى محمد حسنين هيكل

معنى ذلك ان واحد زى ده ممكن يتكلم ويقول بصراحة عن معاناة الشعب

مصر هى أمى said...

ابراهيم محسن

معلش يا صديقى مشغول جدا فى الشغل والله

مصر هى أمى said...

الزعيمة

ايه يا بنتى ثورة ايه بس هتودينا فى داهية ليه دا بعد التعديلات الجديدة ممكن يلبسونا قضية ارهابية ان احنا بنفكر نعمل ثورة ونقلب نظام الحكم وديه طبعا فيها اعدام
انتى على وش جواز بلاش الكلام الكبير ده


مالهم سعد الصغير ولا روبى
ماهيا الحكومة عايزانا نبقى مش فاضيين غير للهلس والهبل والبانجو بس علشان منشغلش دماغنا بالبلد واحوالها وكل واحد يخاف على لقمة العيش بتاعته

الموت الرحيم وان مصر عايشة بالمسكنات دا كلام صحيح بس المفروض ان الناس الكويسة تحاول تدور على علاج بدل ما نموت البلد والا الحل الوحيد لو مفيش علاج يبقى ثورة لان كلام الدكتور يحيى الجمل ان الاوضاع الحالية شبه الاوضاع قبل ثورة يوليو

انا موافق على عبد الناصر بس من غير التعذيب وزوار الفجر اللى كانوا فى ايامه

مصر هى أمى said...

محمد عبد الغفار

يعنى ايه مش فاهم الكومنت بتاعك

مصر هى أمى said...

ياسمين


البلد فعلا بلدنا
الواحد بيحب اهله برغم ان فيهم عيوب بيحب اصحابه وبيحب مراته واولاده برغم عيوبهم
علشان كده احنا بنحب مصر بكل عيوبها لانها هيا اللى ولدتنا وربتنا وعيشنا فيها وعلى ارضها وشربنا من نيلها وكلنا من طينها
لازم نرد ليها الجميل فى وقت من الاوقات

مصر هى أمى said...

احمد حداد

صديقى العزيز انت فين يا ابنى والله نفسى اشوفك

هدون رحلاتك فى اوروبا لو رحلات للعمل مفيش مشكلة لكن لو صياعة انا مش موافق خليك فى مصر واستحمل

عايز تغيير خلال سنتين تلاتة حرام عليك يا شيخ احنا لسه هنستحمل سنتين تلاتة

مصر هى أمى said...

BeLiEvEr


طيب اللىى بيحصل سببه ان المصريين الكويسسين سابوها وهاجروا زمان والحالة اتنيلت كده طب اما يمشى دلوقتى القلة الباقية الكويسة طيب هيبقى ايه الحالة بعد عشرين سنة

shabfa2re said...

فكرنى بمحمد صبحى فى تخاريف لما قال
احنا هنستورد شعب من برة

محمد عبد الغفار said...

كنت اقصد ان اللى عاوز يعمله يحى الجمل ده هو الفشل بعينه

الدبور said...

جميل كلام دكتور يحيي الجمل
بس اسجل اعتراض علي انضمام محمد حسنين هكيل الي قائمه المحترمين مع ابراهيم عيسي و الاخرون
هو لم يكن كذلك وكان من اكر منافقين عصرة واقرا كتابه عن السادات بعد انتوفي لتكتش انه اكبر الافقين
وجهه نظري

تحياتي

Unknown said...

عشان بقي يعملو اللي هم عايزينه فيها براحتهم يامحمد, مالجو هيفضلهم بقي.
وأكيد هو ده اللي هم نفسهم فيه, انها تفضي عليهم عشان محدش يوجع دماغهم بكلمة لأ, ولا يسمعو صوت حد غيرهم.
طب والناس الغلابه, اللي مايعرفوش حاجه, مين هيجبلهم حقهم لما كلنا نسيبها ونسافر؟
طب لما نسافر البلد اللي هنروحها هتبقي بلدنا, هتبقي وطنا؟ وهنحبها زي مابنعشق مصر؟؟؟

كلبوزة لكن سمباتيك said...

هاجر يا ابني
حتقعد تعمل اية في البلد
اما شرفاء البلد الصامدين
فربنا معاهم
تحياتي

جبهة التهييس الشعبية said...

اقول لك سر

انا مش باحب يحيى الجمل ده خالص

مصر هى أمى said...

shabfa2re

هوا ده اللى مفروض يحصل ان احنا نستورد شعب من بره لان احنا استحملنا كتير اوى ومحصلش اى تغيير

مصر هى أمى said...

محمد عبد الغفار

وضحت الامور يا صديقى انا برده موافق على ان اللى عايز يعمله يحيى الجمل غلط فى حق نفسه وتاريخة

مصر هى أمى said...

الدبور

طبعا كل الشخصيات العامة ممكن يكون عليها انتقادات معينة
لكن من ناحية تانية هما شخصيات عامة وقريبين من الحكومة والمسئولين وليهم صوت مسموع فى البلد فحقنا عليهم انهم يحموا الغلابة والضعفاء فى البلد

مصر هى أمى said...

اسراء

انا سافرت بره كتير لكن عمرى ما حبيت بلد غير مصر ممكن احب اماكن معينة لكن بفضل برضه بعشق مصر

الحكومة نفسها ان الناس ديه كلها تسيب مصر وتهاجر وميفضلش فيها غير رجالة الحكومة بس لكن احنا مش هنسيب مصر ابدا

مصر هى أمى said...

سمباتيك

كلنا مع شرفاء مصر الصامدين اما بالنسبة للهجرة انا ممكن اسافر اشتغل بره لكن فى الاخر لازم ارجع مصر

مصر هى أمى said...

نوارة

ليه كده بس يا بنتى انا معرفوش شخصيا لكن فى كتابات كتير جدا شوفتهاله عجبيتنى

ibn nasser - ابن ناصر said...

ايه ده انت لسه قاعد ؟؟؟! مهاجرتش !! ده انا سامع عند نواره معترض قوي ..فكرتني بنكتة حسني مبارك اما سأل الوزير بتاعه أنا اشجع ولا عبد الناصر قاله ازاي انت طبعا عبدالناصر كان بيخاف من الروس, قاله طب انا ولا السادات قاله انت طعا يا ريس قاله ازاي ,قاله السادات كان بيخاف من الامريكان ,قاله طب انا ولا عمر بن الخطاب قاله انت طبعا يا فندم قاله ازاي قاله سيدنا عمر كان بيخاف من ربنا!!!
تحياتي

مصر هى أمى said...

ابن ناصر
الله يخرب بيتك هتودينا فى داهية
يا ابنى النكت ديه متتقالش ولا حتى تفكر فيها لان بعد كده اللى هيفكر هيتقبض عليه بناء على التعديلات الدستورية الاخيرة

بعد الكومنت بتاعك افتكر ان احنا هنهاجر لاقرب معتقل لامن الدولة وساعتها هنعرف هما بيخافوا من ربنا ولا لأ