مدونيييين

23/02/2007
هذا التاريخ من احسن الايام فى حياتى اتقابلت مع اصدقائى المدونيين كنا هناك فى قهوة البورصة فى وسط البلد طبعا شكر كبير وتصفيق كبير جدا لياسمين صاحبة مدونة سكاى لايت لان ده اقتراحها وهيا اللى كانت بتنظمه
وبقول لياسمين مين عارف ممكن كمان كام شهر يبقى مؤتمر كبير وتكونى انتى رئيسة المؤتمر
وطبعا اتشرفت بمعرفة ناس كتير جدا ومختلف الاعمار كنت مبسوط جدا ان شرفنا
الاستاذ / حسنى سليمان صاحب مدونة افنان وفنون
استاذ / حسنى فنان عظيم وعنده معلومات كتيرة اوى يعتبر موسوعة متحركة ومحسسناش ان فى فرق سن كبير بينا
وكمان شرفنا استاذ / احمد شقير صاحب مدونة حكاوى اخر الليل وكنا مستمتعين بحديثه معانا وانه بيشجع الشباب الصغير علشان يكتب ويحكى عن نفسه
واخيرا شوفت انجى صاحبة مدونة سمراء النيل اللى لقيتها عارفة كل المدونيين وكل المدونيين بيعزوها جدا
وبعدين شوفت بيشوى صاحب مدونة اليان وبيشوى صاحب فكر عالى اوى يمكن اختلفنا معاه فى شوية نقط بخصوص الحريات لكن يفضل احترامنا ليه على تفكيرة الجميل
ايلارى صاحب مدونة حد فاهم حاجة اللى حكلنا سبب تسمية مدونته بهذا الاسم وهوا شخصية محترمة جدا وهيكون مهندس ناجح ان شاء الله
وايمن راسبوتين المدون اللى اسم مدونته طاغى عليه شوية
واسامة صاحب مدونة الدبور الدكتور اللى جه من الاسماعيلة مخصوص وهوا من الشخصيات الكويسة اوى عيبه الوحيد انه مش بيشجع الاهلى
محمد حامد صاحب مدونة فروزن لاف ده بقى حكاية من الحكايات مهندس وشاعر كبير وعنده فرقة بتغنى اغانيها من تاليفة حاجة كده كبيرة اوى
عمرو احمد صاحب مدونة اريدك انثى مع انه كان اصغر واحد فينا الا انه مثقف جدا وكفايه انه اول واحد صور احداث المجزرة فى كلية تربية عين شمس
مايكل محسن صاحب مدونة ميكليتو اللى يستحق تحية كبيرة علشان قعد ساعة ونصف بيلف علينا فى وسط البلد ومزهقش كل ده علشان يقابلنا
ابراهيم صاحب مدونة انا وانا المؤلف الكبير اللى فرجنا على احدث اصداراته من الكتب وتشرفت بمقابلته
احمد الحداد صاحب مدونة احمد اتش اللى كنت مبسوط بيه جدا على البوست بتاعه بتاع قصر البارون وكانت مفاجأة ليه انى اشوفه والاقيه شاب كويس اوى
وايهاب صاحب مدونة ايجل بردهشاب كويس اوى وكان اكتر واحد مصر على انه ياخد اسماء المدونين كلهمواسماء مدوناتهم

استاذ / حسنى افنان وفنون - ايلارى حد فاهم حاجة

محمد حامد فروزن لاف - خالد صاحب محمد حامد - محمد عادل مصر هى امى - بيشوى اليان
ايهاب ايجل - استاذ / حسنى - ابراهيم انا وانا

ايمن راسبوتين

بجد انا فرحت جدا بكل المدونيين اللى انا شفتهم وكان يوم جميل جدا

ان شاء الله دايما

الاخوان المسلمون 2

اتفقنا فى البوست اللى فات ان الاخوان من حقهم انهم يترشحوا للرئاسة

نيجى للحاجة التانية اللى صحيفة الفجر نشرتها ان الاخوان عندهم شركات وملايين من الجنيهات كانه حرام على اعضاء الاخوان انهم يكون عندهم فلوس او شركات او مشاريع يعنى حلال لرجال الحزب الوطنى واعضاء مجلس الشعب انهم يكون عندهم فلوس وشركات ينهبوا بيها البلد ويتعاملوا مع المصالح الحكومية بالمخالفة للدستور وحرام على الاخوان انهم يعملوا شركات ده حتى الظريف ان جريدة الفجر وهيا بتهاجم الاخوان واوجه انفاق اموالهم انها بتصرفها على الفقرا ومساعدتهم والطلبة المغتربة وتوفير سكن لهم والملازم والكتب الجامعية ومساعدة الفلسطنيين
ايه التهريج ده هوا ده يبقى عيب اليومين دول ده حتى مفروض ان الحكومة تتكسف على دمها مفروض هيا اللى كانت تقوم بالدور ده يعنى حكومتنا لا بترحم ولا بتسيب رحمة ربنا تنزل يعنى لا الحكومة بتساعد الفقرا واما تيجى جماعة الاخوان تساعدهم يقبضوا عليهم والتهمة مساعدة الفقرا
يا اعضاء الحكومة الافاضل
اما الفقر بيدق باب الواحد اول حاجة بيعملها انه يبيع ابنه وبعدين بيبيع لحمة والست بتبيع شرفها عارفين ليه علشان معندهمش حاجة تانية يبيعوها كل ده علشان لقمة العيش اما الجوع بيقرص الواحد وهوا مش لاقى العيش الحاف وبياكل من الزبالة ويلاقى الحكومة مش معبراه وبتدى قروض بالمليارات للحرامية علشان ينهبوها ويلاقى الناحية التانية ناس بتعاملهم كويس وتعطف عليهم وتساعدهم هيعمل ايه هيقول لا دول جماعة محظورة يا عم محظورة مين المهم اكل واعيش
انا بحثت كتير جدا وسالت كتير جدا هل جماعة الاخوان
اتهمت قبل كده انها عملت عمليات ارهابية ضد سياح
اتهمت قبل كده انها كانت سبب فى فتنة طائفية فى اى مكان
اتهمت قبل كده انها حاولت قلب نظام الحكم
اتهمت قبل كده بالرشوة واستغلال النفوذ وسرقة اموال الشعب
كل ده اجابته لا
العمليات الارهابية جماعات اخرى غير الاخوان واعتقد ان الاخوان ادانوا هذه العمليات
الفتنة الطائفية لا برضه محصلش انهم اتهموا باشعال الفتنة الطائفية

قلب نظام الحكم محصلش كل تهمتهم انهم بيعدوا نفسهم لتكوين حزب للترشيح للانتخابات

انا عايز اقول للحكومة انتوا مش اوصياء على الشعب سيبوا الشعب يختار بلاش كلام ان الاخوان خطر على مصر وانهم ضد المسيحين وعايزين يقتلوهم ويدفعوهم الجزية انا الكلام ده عمرى ما سمعتوه الا فى الصحف الحكومية اللى عايزة تشوه صورة الاخوان

عموما لو الاخوان حاولوا يأذوا اى حد من المسيحيين اول ناس هتقف ليهم المصريين المسلميين لان المسيحيين وقفوا كتير جدا يدافعوا عن المسلمين

انا بقول للحكومة حاجة حسنوا صورتكم الاول

وصدقونى الناس هتقف جنبكم

نضفوا الحزب الاول

اللى كل سنة بيخرجلنا حرامى جديد ينهب البلد

وبعدها هاننتخب مرشحيكم خلوا الانتخابات حرة وخلوا مرشحيكم يلتحموا بالناس مش من وراء زجاج العربية اللى هوا جواها ومش حاسس بالناس ولا بمشاكلهم وبعد ما الانتخابات تتزور لمصلحته محدش يشوفه تانى ولا ينفذ اللى وعد بيه

انا قلت فى الاول ان البوست ده مش دفاع عن الاخوان

طبعا الاخوان ليهم اخطاء كتيرة زى الاستعراض العجيب اللى هما عملوة فى جامعة الازهر مع ان الاخوان اعتذروا عنه اهم احسن شوية بيغلطوا وبيعتذروا مع ان الصحف كبرت الموضوع بشكل كبير علشان تكون فرصة للحكومة انها تضرب الاخوان

وزى تصريحات المرشد العام اللى قال انه هيضرب المعارضة بالجزمة

وزى ان الاخوان مش بيحاولوا يقووا علاقتهم بالاقباط صحيح ان كل كلام الاخوان عن الاقباط انهم لهم ما لنا وعليهم ما علينا لكن مبيعملوش خطوات جدية تزيل الشك من قلب اى مصرى سواء كان مسلم او مسيحى مع رفضى للتفرقة بين المسلمين والمسيحيين لان كلنا مصريين

الاخوان ملهمش اى رؤية مستقبلية للاوضاع فى مصر ولا خطط للتنمية وملهمش سبل اقامة علاقات خارجية مع الدول والحكومات ولا كيفية التعامل مع المشاكل الخارجية بسياسة حكيمة يعنى من غير نرفزة ولا نعرات قومية ولا قرارات فجائية غبية تضر بالبلد

مشكلة الاخوان انهم متسرعون وكلنا شفنا ده فى كتير من تصريحاتهم

انا مش من جماعة الاخوان ولكن بحاول اطرح رؤيتى للموقف كشاب

ممكن اكون غلط وممكن اكون صح

لكن التعذيب والسجن والاعتقالات اللى الواحد شايفها بتحصل لافراد الجماعة خلوا الواحد يتعاطف معاهم وسيبكوا من الصحفى اللى كل مهمته انه يشتم فيهم بدون طرح اى رؤية حيادية للموقف

حتى كلام الصحفى ده عن الاخوان مفيهاش اى حاجة تعيبهم محاولة حكم مصر افتكر ان كل واحد فينا وهوا صغير كان نفسه يكون رئيس جمهورية عندهم شركات ومشاريع مش عيب ولا غلط بيرشحوا نفسهم للانتخابات فى مجلس الشعب والنقابات والنوادى ايه المشكلة لو هما وحشين محدش هينتخبهم

انا عايز اقول حاجة اخيرة الناس حبت الاخوان من كتر كرههم فى الحكومة والحزب الوطنى

علشان كده اغلبية الشباب بدءوا يروحوا للاخوان لقوا نفسهم مع الجماعة لان الحزب الوطنى مقفول على ناس معينة واغلب قياداته مش حسنة السمعة

لكن الاخوان عمرنا ما سمعنا ان حد فيهم خد قرض وهرب ولا اغرق عبارة عليها 1500 مصرى وهرب

ولا رفع سعر الحديد واحتكرة ومحدش بيمتلكه غيرة فى مصر ولا هرب اثار البلد برة مصر ولا باع اكياس دم فاسدة ولا سرق اراضى الدولة

بالعكس مكتوب فى صحيفة الفجر ان من ضمن التهم الموجهة للاخوان مساعدة الفقراء

ما هيا بقت تهمة فى مصر دلوقتى

ياريت تفيدونى برايكم ونتناقش فيه

حوار محترم من غير اى تعصب او محاولة فرض راى بالقوة

الاخوان المسلمون 1

هذا البوست ليس هجوما على الاخوان ولا دفاعا عنهم
ولكنه محاولة لطرح وجهة نظر حول الاخوان وياريت تفيدونى برايكم
مبدئيا انا من زمان وانا نفسى اكتب عن جماعة الاخوان المسلمون وزادت رغبتى فى الكتابة بسبب مقال قريتة فى مدونة الزعيمة عن الاخوان ومقال قريته فى جريدة الفجر لكاتب صحفى محبش اكتب اسمه فى مدونتى لانى بكرهه جدا الكاتب ده سخر كتاباته للهجوم على الاخوان وسماهم بروتوكولات الاخوان تشبها ببروتوكولات صهيون
المهم المقالة كانت بتتكلم عن محاولة الاخوان لحكم مصر
انا عايز اقول حاجة
من صغرى وانا كنت بحلم انى اكون رئيس جمهورية مفيش حد مكنش بيحلم انه يكون رئيس جمهورية
يعنى حلم الاخوان فى الحكم حاجة مشروعة بيكفلها الدستور والقانون يعنى من حق اى حد مؤهل وقادر انه يتقدم لحكم الدولة ويدخل الترشيح على الرئاسة يعنى الاخوان معملوش حاجة غلط ولا حاولوا يعملوا انقلاب برغم ان الجيش عمل قبل كده انقلاب يوم 23 يوليو والشعب كله سانده فيها
معنى ان الاخوان بيحاولوا يطوروا نفسهم ويقووا جبهتهم مش عيب لانهم زى اى حد من الاحزاب الوفد او الغد اى حزب نزل فى انتخابات الرئاسة اللى فاتت محدش قال انهم عايزين يستولوا على السلطة
سيبك من كلمة الجماعة المحظورة مش معقولة تبقى جماعة فيها العدد ده كله وكلهم اساتذة جامعة ودكاترة ومهندسين وهيئة عليا ومرشد عام ومساعدين ورجال اعمال وكلهم معروفين بالاسم ونقول فى الاخر انهم جماعة محظورة امال لو كانوا جماعة علنية كانوا هيبقوا ايه
يعنى احنا اتفقنا ان محاولة الاخوان لحكم مصر حق مشروع
زيهم زى اى حد ممكن يترشح للرئاسة وبيئهل نفسه للترشيح وبيقوى جبهته الداخلية ويدعم صفوفة زى ما بيعمل الحزب الوطنى دلوقتى انه بيجمع الشباب ويحاول يضمهم ليه علشان شاف ان الاخوان اغلبيته من الشباب المثقف والحزب الوطنى اغلبيته من العواجيز وطبعا مش مجاله ان احنا نتكلم عن الحزب الوطنى وطهارة ايديهم المعروفة زى ممدوح اسماعيل وهانى سرور واحمد عز وطارق السويسى يعنى بسم الله ما شاء الله كل حرامية البلد فى الحزب الوطنى
بالعكس هتشوف ان الاخوان بيمثلوا شريحة كبيرة فى المجتمع زى رجال اعمال محترمين وده اللى خلا الحكومة فى الفترة الحالية بتحاول تضربهم لانهم اصبحوا قوة اقتصادية كبيرة اوى والناس بتثق فى المعاملة معاهم وهناك ايضا رجال اقتصاد واساتذة جامعة منهم علماء كبار جدا فى كل المجالات
كل ده خلا فئة كبيرة من المجتمع متعاطفة مع الاخوان
يمكن فى ناس كتير تتعاطف معاهم كرها فى الحكومة ( مكتب نظيف لخدمات رجال الاعمال ) الحكومة اللى الواحد مشفش منها اى حاجة كويسة سواء فى التعليم او الصحة حتى الانتخابات الناس كانت بتنتخب مرشح الاخوان كرها فى الحكومة ونكاية فيها
الظلم اللى تعرضلة مرشحين الاخوان فى الانتخابات خصوصا المرحلة الاولى خلا الناس تتعاطف معاهم وطبعا كلنا عارفين شهادة المستشارة نهى الزينى التى شهدت شهادة حق ان الانتخابات فى دمنهور اتزورت لصالح مرشح الحزب الوطنى وكذلك لجنة الدقى اللى نجحت فيها الوزيرة امال عثمان ضد مرشح الاخوان
المهم عايزين نقف وقفة امام ليه الاخوان متغلغلون فى وجدان الناس برغم محاولة الحكومة والصحافة الحكومية لجعلنا نكره الاخوان زى ما صحيفة الفجر نشرت ان لدى الاخوان ملايين وشركات ومشاريع ضخمة

البوست القادم الاخوان المسلمون الجزء الثانى

التاج علينا حق

مساء الخير عليكم جميعا
طبعا بعد التاج الاولانى اللى جالى من بنوتة وسط البلد لقيت تاج تانى بيتحدف عليا من اسراء وماراويتا بقيت مش عارف ايه القصة قولت الاولانى يمكن اهالينا هما اللى عاملينه علشان يعرفوا كل حاجة احنا كنا مخبينها
طب التانى الحكومة هيا اللى عاملاه علشان تعرف شخصيتنا بس بعد كده قولت ايه الغباء ده ما هيا الحكومة عارفانا واحد واحد
ماعلينا متشكرين اوى يا اسراء انتى وماراويتا على الهدية الحلوة ديه مردودالكم فى الافراح ان شاء الله
نبدء نجاوب على الاسئلة اللى كلها اجبارى ولا كأننا فى الثانوية العامة

الاول - ايه اللى هيحصل لايميلك اما تموت

اولا بعد الشر عليا طب الناس تعيش ازاى من غيرى
تانى حاجة اقصدكم انهى ايميل ما انا لامؤاخذة عندى 8 ايميل
عموما هيفضلوا شوية قيمة عشرين سنة وبعدين هيتقفلوا اتوماتك

التانى - اديت الباسوورد لحد قبل كده

لسه متهبلتش للدرجة ديه عمرها ماهتحصل حتى لمراتى بعينها انها تشوف الباسوورد حتى انا مش كاتبهم لان سبعة منهم نفس الباسوورد والتامن الايميل بتاعى فى الشغل
الشركة كلها عارفة الباسوورد بتاعت الكمبيوتر والايميل

التالت - اسمك ايه

محمد بن عادل بن عبد الكريم باشا بن السيد بن سلامة بن تارا بيه والباقى احتار فيه علماء الحفريات والمؤرخييين

الرابع - اسم الدلع المشهور وسط اصحابك

اصحابى مكنوش بيدلعونى
على طول كانوا بيندهولى عادل انتوا عارفيين نص الشعب المصرى اسمه محمد
بنت الجيران الوحيدة اللى كانت بتقولى يا مودى
واللى معايا فى الشركة بيقوللولى يا دودى على اساس دودى الفايد فاكرينه بتاع ديانا ومحدش يقولى اشمعنى دودى لان ده دلع عادل علشان برده كل الشركة بتقولى يا عادل

الخامس - عمرك

تلاتين سنة وشهر و3 ايام

السادس - برجك

بصوا انا مش مؤمن بالابراج خالص بس عموما هما بيقولولى انا انا برج الجدى معرفش حتى كويس ولا وحش

السابع - مجال دراستك

خريج كلية تجارة جامعة عين شمس دفعة 98
دراسات عليا فى الاستثمار والتمويل دفعة 2002
يبقى بشتغل ايه اكيد مش مهندس ولا دكتور
محاااااااااااااااااااااااااااسب فى شركة ملاحة بحرية

التامن - شخصيتك نوعها ايه

انا انسان مش سعيد بطبعى يعنى من زمان وانا انطوائى شوية وبحب العزلة وبحب جدا امشى ابص فى وشوش الناس اللى فى الشارع وبحب امشى على النيل بالليل اوى وابص للنيل ونفسى ارمى نفسى فيه
كنت زمان بتمنى اكون اتولدت عصفورة طايرة طول الوقت بس طبعا مفيش عصفورة وزنها 145 كيلو
بس عموما على حسب المود اللى انا فيه يعنى النهاردة عفاريت الدنيا بتتنطط ادامى علشان روحت لقيت ماما عاملة سمك وانا بكره السمك واحنا عقبالكم بناكل سمك تلات مرات فى الاسبوع زى الدوا كده
بس انا من النوع اللى بيتمنى الخير للناس كلها وممكن ييجى على نفسه كتير علشان خاطر ناس تانيين
الناس بترتحلى بسرعة وبتتكلم معايا فى مواضيع كتيرة وبتاخد رايى فى مشاكلها الشخصية لكن انا للاسف مبعرفش اخد راى حد فى مشاكلى دايما رايى من دماغى بس
وانا عنيد جدا مش بسهولة اعترف ان انا غلطان او انى اغير رايى لكن ادام اهلى وتحكماتهم مبقتنعش بكلامهم فى حاجات كتير لكن غصب عنى كلامهم بيمشى

التاسع - السفر بالنسبة لك

بحبه جدا انا سافرت كتير اوى بس وانا صغير بقالى فترة ما سافرتش بره مصرغير للعمرة فبعوض ده بالسفر لاماكن كتيرة جوه مصر
بس للامانة اكتر حتة سافرتلها ونفسى اروحها كل سنة مكة المكرمة والمدينة المنورة وبالذات المدينة ربنا يكتب للواحد ان يعيش هنالك على طول

العاشر - المود بتاعك

على حسب الحالة اللى عندى يعنى لو الاهلى كسبان ببقى مبسوط جدا ولو روحت مطعم ببقى مبسوط اوى عموما انا كائن حزين وانطوائى سعادتى اما الاقى كتاب جديد أقعد قراه

الحادى عشر - وقت فراغك بتعمل فيه ايه

كنت الاول بقعد اكل وبعد شوية حبيت القراءة اوى اما اشتغلت الحمد لله الشركة مش سايبالى وقت فراغ من اصله
لكن فى الاوقات النادرة انا بقعد على النت واشوف المدونات اللى خدت كل وقتى القليل اللى انا فاضى فيه
وطبعا ما ننساش الاكل الاكل الاكل اهم حاجة عندى فى حياتى

الثانى عشر - الاكلة المفضلة

اى نوع من الاكل انا بحبه انا بعشق حاجة اسمها الاكل بس اكتر حاجة بحبها اكلة اسمها
الكسكسى بس بالطريقة الليبية
المبكبكة ديه اكلة ليبية برده
وبحب جدا كنتاكى

اكتر حاجة بكرهها السمك مبحبوش خالص والمسقعة يعنى لو اتقدمت لواحدة من المدونات تبقى عارفة مش عايزين مشاكل

الثالث عشر - الصفات اللى خدتها من بابا

هوا لو كنت خدت صفات من بابا كنتوا قريتوا الخمس مواقف بتوعى اللى فاتوا
المهم
خدت من بابا
احترام المواعيد
حب القراءة بابا موسوعة متحركة
العند
العصبية
حب الشغل والعمل
ان الراجل يكون متعاون مع مراته فى البيت
احترام الزوجة

الرابع عشر - الصفات اللى خدتها من ماما

الطيبة
الحنية
حب المطبخ والطبيخ على فكرة انا بعرف اطبخ حلو اوى
بتئقمص بسرعة زيها لكن برده بصفى بسرعة زيها
الكلام القليل
حب الناس وحب مساعدتهم

فيه بأه صفة مشتركة خدتها من الاتنين

ان الواحد لازم يحترم البيت والزوج يحترم زوجتة والعكس ومراعاة شعور الاخر
بابا وماما اجمل قصة حب ممكن الواحد يشوفها من ايام الكلية وهما مع بعض حتى الان ربنا يستر عليهم من قركم وحسدكم
اقولكم على حاجة بابا جه فى سنة وسقط فى الكلية وماما نجحت تانى سنة ماما مدخلتش الامتحان علشان تعيد السنة وتبقى معاة اما بابا ينجح
الخامس عشر - اكتر 6 حاجات بحبها

ربنا وسيدنا محمد

اهلى واصحابى والشغل
الاكل الاكل الاكل
النادى الاهلى
المدونة بتاعتى
السيد / حسن نصر الله وحزب الله
النظام والدقة واحترام المواعيد
مساعدة الغير
الجواز مع انى لسة مجربتوش
اكتر من ستة مش كده برده

السادس عشر - اكتر 6 حاجات بكرهها

امريكا واسرائيل
الحكام العرب الخونة والنظام المصرى الرئاسى والتوريث
الخيانة انى ادى ثقتى لحد واكتشف انه ما يستاهلهاش
عدم احترام المواعيد
الظلم والكدب والنفاق
انى اروح عند الميكانيكى الاقى عيل صغير بلية بيشتغل ومش مستمتع بطفولته
حلم كنت بحلمه زمان كل يوم ان ثعبان بيعضنى
السمك السمك

السابع عشر - الشغل بالنسبة لك

كنت زمان بقول امتى اتخرج علشان اشتغل دلوقتى بعد ما اشتغلت بقول نفسى ارجع صغير تانى
اظن الاجابة واضحة بس عموما انا بحب الشغل اوى

الثامن عشر - ايه الكمبيوتر والانترنت بالنسبة ليك

انا من زمان عندى كمبيوتر بس كنت مجرد مستخدم للكمبيوتر مبعرفش فيه كل حياتى عليه العاب وافلام بس ودلوقتى باقعد علية علشان الشغل
اما النت بعد ما عملت المدونة ديه بقى حاجة كبيرة فى حياتى

التاسع عشر - تحب تمرر التاج لمين بعدك

يعنى قصدكم ادبس مين بعدى
ماشى
طبعا صديقى نائل فؤادة اللى قلتلكم ادعوله وانا الكلمة ديه بوجها لباباه صدقنى يا عمى المدونات ديه مش مؤذية خالص ده مكان كل واحد ممكن يطلع اللى جواه ويحكى عن نفسه
زينب شهيدة
نهى بنت النيل
واحد من الناس
هلوسة مصرية

حرام عليكم فضحتونى

الزميلة العزيزة بنوتة من وسط البلد صاحبة مدونة كلام خلاصة ضايقها اوى ان حد فضحها على المدونات وقلها تحكى على خمس مواقف محدش يعرفها غيرها ولانها اتفضحت واتجرست وسط المدونييين فقالت تفضح معاها مدونيين تانيين

ماشى يا بنوتة نستفتح ونبدء نقول الفضايح بس الاول كل واحد يعرف ابويا امانة علية ميقولوش حاجة ماشى يا جماعة

مرفيت الشغالة

وانا لسه فى ابتدائى جيت فى يوم وطلبت من بابا انى اشترى هدوم وكنت لسة شارى هدوم من فترة صغيرة بس لقيت واحد صاحبى شارى هدوم شيك اوى اكتر منى قعدت ازن اد كده على على بابا عايز هدوم عايز هدوم بابا قالى انه معاهوش فلوس طبعا ده علشان يخلص من زنى المهم صدقته بعديها بيومين كنت بتفرج على التليفزيون اللى فى اوضة بابا علشان كان عندنا ضيوف فى الصالة لقيت جنب التلفزيون فلوس كتير مكنتش اعرف يعنى ايه المرتب واول الشهر والقبض المهم قعدت اقول اهه معاه فلوس ومش عايز يجيبلى هدوم طب ودينى لاوريهم طلعت البلكونة وقعدت اقطع الفلوس وارميها من البلكونة طبعا بعد ما الضيوف مشيوا وانا رحت اوضتى سمعت زعيق وضرب نار فى البيت وبابا عمال يزعق المرتب راح فين مين اللى خده طبعا انا بكل براءة قولت معرفش مش انا وطبعا صدقونى ما انا لسه صغير معرفش حاجة المهم العملية لبست فى مرفيت الشغالة عندنا وبقيت هيه الحرامية وعلى بيت ابوها روحت فى نفس اليوم وبابا حلف انها ماتبات فى البيت

طبعا اوعى حد يقولهم فى البيت ومش عايز اقولكم انه كان شهر عدى علينا ازاى كل يوم فول وطعمية

مرفت انا اسف

جارنا العزيز

المرة ديه كنت فى اعدادى واحنا فى اجازة الصيف كانت ماما واخواتى مسافرين وانا اللى كنت قاعد مع بابا فى البيت كنت الخدامة بتاعته طول عمرى غلبان ومظلوم فى بيتنا بابا كان فى الشغل وجالى ناس اصحابى قعدوا معايا طول اليوم وجم وهما ماشيين حبيت اعمل معاهم حركة رجولة وقلتلهم لازم اوصلكم بالعربية ماهو لسه بدرى على ما بابا ييجى من الشغل المهم نزلت اوصلهم وطبعا كان لازم اركن العربية فى نفس المكان بالظبط والمصيبة انى كنت بعرف اسوق لكن مكنتش بعرف اركن العربية المهم وانا باركن خبطت عربية واحد جارنا خبطة جامدة بس عربيتنا الحمد لله ماحصلش فيها حاجة المهم وقفت تاكسى كان ماشى فى الشارع وقولت للسواق يركنلى العربية علشان مش عارف اركن المهم ركنلى العربية فى نفس المكان القديم وغطيتها وطلعت بيتنا ولا كان حاجة حصلت بعد شوية سمعت جارنا واقف يزعق ويشتم فى اللى خبط عربيته ونزلت وقفت معاه وقعدت ازعق انا كمان واقول ناس معندهاش دم وشتايم كل اللى ييجى على بال الواحد

جارى العزيز انا اسف

حفلة شواذ

اول ما دخلت ثانوية عامة طبعا كان الواحد بياخد دروس فى كل المواد وكانت المدرسة بالنسبة لينا مكان نخرج فيه من البيت محدش كان بيهتم يحضر اى حصة ومكانش فيه غياب المهم اتعرفت على واحد معايا فى الفصل كان عايد السنة اسمه اسلام الواد ده هوا سبب فشلى فى الثانوية بعد ماكنت من الاوائل فى المدرسةكنت التالت على المدرسة فى تانية ثانوى اسلام ده علمنى التزويغ من المدرسة كنا بنخرج نفطر الاول عند عم محمد بتاع عربية الفول اللى جنب المدرسة وبعدين نروح سينما الحفلة الصباحية بتاعت المزوغين المهم جه اسلام فى يوم وقالنا ان فيه سينما فى وسط البلد اسمها نيوكورسال طبعا المدونيين الصيع اكيد عارفنها وقالنا ان السينما ديه بتعرض خمس افلام من الساعة 9 الى الساعة 2 والتذكرة بــ 2.5 جنيه بس

رحنا السينما طول ما حنا قاعدين حاسس بحركة غريبة واصوات غريبة بعد اول فيلمين ما خلصوا حبيت اروح الحمام دخلت الحمام لقيت ناس استغفر الله العظيم زى عمنا خالد الصاوى فى فيلم عمارة يعقوبيان كده عينى عينك وقفت وانا مش عارف اعمل ايه من اللى انا شايفه وبعدين لقيت اتنين جايين عايزين يتكلموا معايا وبيحاولوا يتفاوضوا معايا يا نهار اسود ومنيل وطبعا اخوكم حليوة وطول وعرض ووزن كنت ساعتها 130 كيلو طلعت اصرخ فى وسط السينما واقول الحقوا فين ناس ................ ( طبعا النقط كانت شتيمة زبالة اوى ) لقيت السينما كلها بتزعق فيا وتقولى امال انتى جاى هنا ليه يعنى مكنتش تعرف

فوجئت ان احنا الشلة الوحيدة المحترمة اللى فى السينما كلها طبعا كلنا جرينا هوا وخرجنا من السينما الحاجة الوحيدة اللى كانت صعبانة عليا انه ضاع عليا 3 افلام من الخمسة منهم فيلم قدارة بتاع فيفى عبده وطبعا مش عايز اقولكم على اللى احنا عملناه فى اسلام

واوعى حد يقول لبابا لحسن هيقول ما انتى لو مكنتش زوغت كان زمانك دكتور ولا مهندس

انا بعت دمى

ايام ما كنت فى الكلية وديه احلى ايامى وانا فى اولى كلية اتعرفت على شلة بنت ستين فى سبعين وكان افقر واحد او واحدة فيها كان عنده عربية نضيفة اوى وكنت انا طالب جديد وعايز اعيش فى الدور واعمل شلة كبيرة وكان معايا فلوس كتيرة من الفلوس اللى جاتلى اما نجحت فى الثانوية العامة الفلوس ديه كلها خلصت مكملتش شهر وطبعا المصروف الشهرى بتاعى كان بيخلص فى طلعة واحدة مع انه كان كويس اوى وكنت كل شوية اخد فلوس من بابا علشان اشترى كتب الجامعة ومكنتش باشترى اى كتب لغاية ما بقى شكلى وحش وزبالة اوى فى البيت

وانا فى يوم فى الكلية جت عربية بتاعة تبرع بالدم وقالوا انهم هيدوا للى هيتبرع بسكوت وعصير وطبعا رحت جرى اصل انا بعز الاكل اوى اكتر من اى حاجة ومحدش يوزه عقلة ويقول ده مفجوع لحسن ودينى لابهدلة وبعد ما اتبرعت اكتشفت انهم مبيدوش بسكوت وعصير بس لا كمان بيدوا ايصال تروح تاخد بيه كتاب من كتب السنة من المكتبة وكمان خمسين جنيه هييييه هييييه اهى فرجت كتاب وخمسين جنيه اجيب بيه كتاب لمادة تانية وارفع راسى فى بيتنا بعد ما كان كل يوم خناقة فى البيت على الكتب

اوعى حد يقول لبابا

الاخت الفاضلة جى جى

المرة ديه برضة فى الجامعة كنت اتعرفت على بنت بس بصراحة طحن وكنا بنقعد مع بعض كتير اوى جينا فى مرة حبينا نخرج مع بعض طبعا ما كنش ينفع نركب تاكسى لاننا كنا هنخرج بالليل اوى وهنرجع متأخر فرحت عندنا فى البيت وقولتلهم انا عندى فرح اخت واحد صاحبى وعايز اخد العربية علشان هتاخر فى الفرح وخت العربية طبعا قبلها اشتريت منوم لجىجى علشان تحطه لمامتها فى كوباية العصير علشان تنام وتعرف جىجى تخرج من غير ما مامتها تحس

رحت خت جىجى من تحت بيتهم طبعا مالوش لازمة اقولكم كانت لابسة ايه اااااااااه دا انا بتنهد لما بفتكر الايام ديه المهم سألتها تحبى تروحى فين جىجى هانم اقترحت المقطم يا نهار اسود المقطم الساعة 11 بالليل بينى وبينكم خفت قولت تبقى مصيبة وبوليس الاداب يمسكنا هناك طبعا انتوا عارفين المقطم واللى بيحصل هناك

قولتلها مينفعش اقترحت طريق المطار نقعد فيه شوية مش عارف ليه كانت اختياراتها منيلة بستين نيلة كده

رسيت فى الاخر ان احنا رحنا فيلم النوم فى العسل حفلة الميد نيت ( يعنى منتصف الليل للى مش عارف ) الفيلم خلص الساعة 2.3 بالليل فاكرين نيكول سابا فى فيلم التجربة الدنماركية فى مشهد المطار اهى السينما كلها كانت عاملة كده علشان خاطر جىجى وعقبال ما روحتها وروحت بيتنا كانت الساعة 4 الفجر لقيت بابا بيصحى علشان يصلى الفجر فى الجامع ماهوا عقبالكم بابا بيصلى كل الصلوات فى الجامع قعدت احكيله على الفرح والمطربيين والاكل اللى كان فى الفرح

مش عايز اقولكم ان بعديها باسبوعين لقيت واحد صاحبى بيسالنى على مكان الصيدلية اللى جيبت منها المنوم لأم جىجى فسالته ليه قالى انه رايح المقطم هوا وجىجى النهاردة بالليل وكانوا عايزين يجيبوا المنوم لمامتها علشان يعرفوا يخرجوا بالليل

بنت ستين فى سبعين فضحتنى فى الكلية كلها والناس كلها عرفت انى خفت اروح المقطم معاها واكتشفت انها شغالة عليا وعلى اصحابى ويا بخته صاحبى راح معاها المقطم

طبعا ربنا يسامحك لتانى مرة يا بنوتة من وسط البلد فضحتينى ولو سمحتوا محدش يجيب سيرة لبابا لحسن يطين عيشتى واسمع كلمتين من

عينة ما لو كنت فالح فى التعليم كان زمانك مهندس ولا دكتور مع انى بقبض دلوقتى مرتب احسن من المهندس او الدكتور

وزى ما انا اتفضحت ومطلوب منى افضح خمسة غيرى فا انا برشح

1 - نائل فؤادة بس ادعوله ان ربنا يفك الحصار المنزلى اللى عليه دلوقتى

2 - نوارة جبهة التهييس الشعبية

3 - ياسمين SKYLIGHT

4 - مروة ماراويتا

5 - واحد من الناس

6 - نهى بنت النيل

7 - زينب شهيدة