Monday, April 23, 2007

تاج اميرة البلطجية

تاج تاج تاج انا مش عارف ايه كل التاجات ديه وعلى راى اميرة البلطجية انا شبعت تاجات فقامت بعتالى تاج هيا كمان يعنى هيا جت عليها صحيح المشكلة بقى انى مخدتش بالى ان كل التاجات اللى جاتلى من عند
فيميل ( female )
بلوجرز
هوا مفيش رجالة بتبعت تاجات ولا ايه
المشكلة انى لسه فى ذمتى تاجين من عند اسراء وسمراء النيل
معلش يا اسراء هجاوب على التاج بتاعك بس انتى عارفة التاج ده بتاع اميرة البلطجية ولو مجاوبتش عليه بسرعة ممكن تفجر المدونة كلها او مكن تنتحر علشان مجاوبتش على التاج بتاعها
اما بالنسبة لسمراء النيل فديه مقدور عليها
أحب شخص لقلبك فى الدنيا؟

طبعا بعد ربنا وسيدنا محمد
ومراتى اللى مش عايزة تيجى
احب شخص لقلبى عمتى

انسان مستعد تضحي بحياتك –ركز فى كلمة حياتك- عشانه؟

قرار التضحية بالحياة صعب جدا بس عموما انا ممكن اضحى بحياتى علشان خاطر دينى او بلدى وممكن فى مواقف معينة الواحد ممكن يضحى بحياته عن طيب خاطر علشان ينقذ انسان ضعيف مثلا بس المواقف ديه بتبقى نابعة من لحظتها

.انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

انا نفسى فعلا امسك سكينة واغرزها فى قلبى
لو مكنش الانتحار حرام كنت عملتها من زمان
واى واحد ممكن يفكر يأذى اهلى او بلدى او دينى

ما هو:اسم أجمل كتاب كتبه بشر قرأته ومحتفظ به حتى الان؟

خمس سنوات فى بيت من زجاج - لبطرس غالى الامين السابق للامم المتحدة

اسم كتاب-كتبه بشر برضة- انت متعلق بيه وبتقرأه كل فترة؟

الماسونية العالمية

اهم جهاز منزلى انت متعلق بيه او بتستخدمه كتير؟

البوتاجاز والتلاجة

شىء تحس بالراحة النفسية عندما تنظر اليه؟

السماء او البحر الفراغ عموما
وطبعا الاكل برتاح جدا اما بلاقى اكل ادامى

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

فيلا عمتى فى البلد وانا واقف فى التراس بتاع الفيلا وادامى الارض الزراعية الى ما لا نهاية ساعتها بحس بالحنين الى انى ارجع طفل صغير مفيش حاجة بتشغل باله
بحن دايما للمكان ده معرفش ليه

مكان تحس بالراحة عندما تدخله؟

المسجد النبوى فى المدينة

اجمل مدينة زرتها داخل مصر؟

اسكندرية وبعديها بورسعيد وبعديها مرسى مطروح

أجمل مكان طبيعي رأيته داخل مصر؟

البحر فى مرسى مطروح

شخصية كارتونية بتحبها؟
توم وجيرى

نوع هاتفك المحمول؟

نوكيا

سرعة بروسيسور جهازك؟

والله يا اميرة البلطجية ما اعرف

حجم ذاكرة –هارد- جهازك؟

والله برضه ما اعرف

المساحة التى تشغلها المواد الاسلامية على جهازك؟
على الكمبيوتر معتقدش فى مواد اسلامية كتير بس عندنا سى دى كتيرة اوى مواد اسلامية بابا بيقعد بالساعات يتفرج عليها وخصوصا انه معلوماته فى الكمبيوتر متتعداش انه يحط السى دى ويشغلها بس
فاللاسف لو حطينا مواد اسلامية على الهارد بابا مش هيعرف يوصلها ولا يشغلها

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

اتمنى من الله انه يدينى مساحة كبيرة من قلبى تكون مخصصة للمواد الاسلامية

أهم هدف انت واضعه لحياتك دلوئتى؟

يمكن بقالى فترة كبيرة مفيش حاجة فارقة معايا وبالتالى مليش اى هدف فى الحياة بصحى كل يوم الصبح اروح الشغل افضل فيه لغاية 10 او 11 بالليل وبعديها اروح انام على الساعة2 بالليل وهكذا كل يوم

مواصفات فتاة –أو فتى للبنات- الأحلام بالنسبة لك؟

ايه الغرض من السؤال ده يا اميرة البلطجية
عموما تكون حنينة اوى وبنت ناس ومحترمة بس اهم حاجة تكون حنينة اوى اوى اوى تكون انثى مش عايز اتجوز واحد صاحبى
انثى بمعنى الكلمة
ايه السؤال ده هوا انا هتنك على ايه
اى واحدة والسلام
قطيعة تقطع الحوجة وسنينها

صف ما يأتى:شعورك لما بتسمع كلمة مصر؟

بحبها اوى وبخاف عليها

شعورك لما بتسمع كلام عن اليهود؟

حاجتين الكره الشديد ليهم
واعجاب شديد بيهم
كره ليهم وافتكر معروف ليه بكرهم
اما اعجاب بيهم فلانهم الامة الوحيدة اللى على الارض اللى بتعمل اللى هيا عاوزاه من غير محد يقدر يقولهم حاجة بيذلوا فينا وفى حكامنا واحنا مبنقدرش نتكلم قوة اقتصادية مهولة العرب كمان عندهم فلوس كتير جدا بس للاسف بيصرفوها فى الهلس

شعورك لما بتشوف ظابط شرطة؟

نفسى اقوله احنا بنى ادمين زيكوا وعندنا اهل ومشاعر وبنحس بالتعذيب وان احنا بنحب البلد ديه جدا
نفسى اقوله اتقى ربنا وخاف الله

شعورك لما بتشوف الكناس العجوز فى الطريق؟

بقول فين الشهامة والمروءة بتاعة ولاد البلد

لون البطانية اللى بتتغطى بيها فى الشتاء؟

بطانية خفيفة جدا لونها احمر ( النادى الاهلى طبعا ).ومبتغطاش غير لما يبقى الجو شتاء بجد

لون الجورب-الشراب- المفضل لديك؟

الكحلى

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

ايه السؤال المقرف ده
انا مش هتفرق معايا اوى ممكن تسألوا ماما لانها هيا اللى بتساوى البيت

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

لو فعلا ملتزم فى سلوكه وبيحافظ ويصون اللحية اللى فى وشه والمصحف اللى فى جيبه هدعيلة ان ربنا يكرمه وهدعى ان احنا كلنا نكون زيه
بس عموما الاسلام عمره ما كان بالمظهر مش لازم جلابية بيضاء قصيرة وعمامة علشان يبقى الشخص ده كويس او وحش الاسلام بالاعمال وليس بالمظهر


احساس يراودك فى اشارة مرور مغلقة بسبب مسئول كبير؟

بصراحة بشتم المسئول الكبير ومبفتكرش غبر حاجة واحدة عن سيدنا عمر ابن الخطاب اما كان نائم تحت شجرة ومر عليه حاكم فارسى ووجده نائم فقال له حكمت فعدلت فامنت فنمت يا عمر

التاج ده أمرره للاتية أسماؤهم

43 comments:

smraa alnil said...

ههههههههههههههه
بقي سمراء النيل مقدور عليها
طب عارف لو مش عملت التاج بتاعي لاجي افجر نفسي في مدونتك واعملك مصيبة

او اجي افجر مدونتك واطربقها فوق دماغك

وبعدين انا عارفة انت ليه بتستخدم البوتجاز والتلاجة كتير
بامارة لما تقوم من النوم الساعه 2 بليل

وبعدين صحيح انت هتتنك ولا ايه
انت لاقي اي جثة تعبرك
ان شالله تكون شيتا اقبل يا عم وعلي ضمانتي

فيلا عمتى فى البلد وانا واقف فى التراس بتاع الفيلا


ههههههههههههههههههه

الله يرحم ولا بلاش

ibn nasser - ابن ناصر said...

تاج جميل قوي والله ربنا يبارك لك
تحياتي

Unknown said...

مبروك علي التاج
يعني لازم أعملك ارهاب عشان ترد علي التاج بتاعي؟
وكمان بتمررلي تاج, حرام عليك هو انا ناقصه؟

واحد من الناس::طارق:: said...

ربنا يريح بالك يا محمد ويرزقك ببنت الحلال اللى تعوضك وتنسيك اللى فات
عاشن انت بجد والله بنى ادم تستاهل كل خير

محمد عبد الغفار said...

الرجاله مبتبعتش تاجات لبعض عشان بتخاف على بعض وبتقدر الظروف

انما اخوانناالبعده غاويين شماته فينا وفضايحنا

smraa alnil said...

محمد يا عبد الغفار

مين اخوانا البعدا بقي

ماشي
اول تاج هيجيلي هممره ليك
وابقي فكر بس انك مش تعملوا

أميرة البلطجية said...

بص..اهم حاجة في تاج ده..الفيلا بتاعه عمتو
..
ها؟ حتجيب اخلاء الطرف امتي؟؟
ههههههههههههههه

أميرة البلطجية said...

حبه جد بقي
!!!
اصل والله مش عارفة ابقي جد..
طب خلاص خلاص..حبطل ضحك اهو
اولا..سوري ع السؤال المقرف..عارف انا بدأت اخد بالي ان التاج اللي ببعته لحد بيلبسوا فيا الاسئلة بتاعته رغم اني مش انا الل حطاها.بما فيهم سؤال فتاة الاحلام..انا عايزة اقولك والله التاج ده انا شايلة منه سؤالين عشان شخصيين بدون داعي..لكن لقيت بقيت الحاجات عادية يعني مفهاش قلق
وبعدين حيكون قصدي ايه يا كابتشن
مكتش حته فيلا يعني
ههههههههههههههه
ثانيا..كل مرة اقرالك بيتأكدلي انك بني ادم طيب ومحترم اويييييييي
ثالثا..كويس انك معترف بقدراتي التدميرية..احب اخد وضعي بين الرعية
هههه
تحياتشي بقي

david santos said...

O dia 25 de Abril de 1974 foi o dia do derrube da ditadura fascista em Portugal, a chamada REVOLUÇÃO DOS CRAVOS, e a queda do (poder) dos inimigos do povo. 25 de Abril, sempre.

Day 25 of April of 1974 was the day of it knocks down of the dictatorship fascist in Portugal, the call REVOLUTION OF the flowers, and the fall of the power of the enemies of the people. 25 of April, forever!
يوم 25 نيسان 1974 كان يوم تقرع عليها من الديكتاتوريه الفاشيه في البرتغال والدعوة للثورة الزهور ، وسقوط سلطة أعداء الشعب. 25 نيسان ، الى الابد!


День 25 апреля 1974 года, в день он постучит в воздухе фашистской диктатуры в Португалии слово О РЕВОЛЮЦИИ цветы, и падение власти враги народа. 25 апреля, навсегда!
Le jour 25 d'avril de 1974 était le jour de lui frappe vers le bas du fasciste de dictature au Portugal, de la RÉVOLUTION d'appel des fleurs, et de la chute de la puissance des ennemis du peuple. 25 d'avril, pour toujours !
Tag 25 von April von 1974 war der Tag von ihm klopft unten vom Diktaturfaschisten in Portugal, von der Anruf REVOLUTION der Blumen und vom Fall der Energie der Feinde von den Leuten. 25 von April, für immer
25天41974年的一天,它拍下來的法西斯獨裁政權,葡萄牙 號召革命的鮮花,秋天的權力得到人民的敵人. 25日,永不停息

الزعيـمة said...

اجاباتك كلها جميلة يامحمد
واكتر واحده عجبتني لما قولت

************
بس عموما الاسلام عمره ما كان بالمظهر مش لازم جلابية بيضاء قصيرة وعمامة علشان يبقى الشخص ده كويس او وحش الاسلام بالاعمال وليس بالمظهر
*************


انت انسان طيب وخلوق وربنا
ان شاء الله حيكرمك ببنت الحلال

بس انت انوي وحتلاقي التستاهلك
ربنا يوفقك ويديلك كل التتمناة
وبشكرك على تمرير التاج

تقبل ارق التحيه

Rania Lelah said...

تاج حلو و ربنا يكرمك
حياتى
و لمحمد عبد الفغار
متشكرين على الالم و الجراح متشكرين على الى عدى و الى راح على راى المطرب الشعبى الاصيل حسن الاسمر
:))

Ali Mahdi said...

السلام عليكم ورحمة الله وبركاته

الاخ العزيز
مدونتك جميلة جدا
ودى اول مرة ازورها
ومش هتكون الاخيرة ان شاء الله

انا مصرى وبحب البلد زيك
وان شاء الله تكون معرفة خير

واتمنى انك تشرف مدونتى البسيط بالزيارة

we can

واسمحلى اضيف مدونتك عندى

احمد مغازى

Anonymous said...

كويس انك رديت علي تاج منهم اصل انا عليه كتير اوي انا عاوزك تشرفني عندي علشان فيه موضوع عاوز رايك فيه

AHMED SAMIR said...

ظريفة الاجابات دي فعلا
واضح انك شخصية محترمة
ربنا يوفقك

شهيدة said...

تاج جميل جدا يا محمد

بس المشكلة ان أغلب الأسلئلة عن مصر

يعني أحولها أسئلة عن لبنان؟ ولا ايه رأيك؟

على العموم شكرا على التمريرة وححاول أسجل جون
ههههه

تحياتي

سهر الليالى said...

تحيه على الاجابات القويه يا محمد باشا
اشمعنى التلاجه والبوتاجاز دى طمع فى اكل البيت كله بقى السخن والساقع
:)
تحياتى

reri said...

إجابتك علي التاج حلوه بجد.. ربنا يوفقك وتحقق اللي إنت عايزه

سلامي ليك

micheal said...

و الله رغم أن الواحد شبع قراءه تاجات بس اجاباتك لذيذه جدا يا محمد بس جامد أوي موضوع البوتاجاز و التلاجه ده..هههههه
علي فكره أنا بموت في توم و جيري حتي الان
بيجوا كتيير علي
mbc3
تحياتي لك

الأستاذ جمال بيه said...

I liked your replies
visit my blog
elezba.blogspot.com

محمد مصطفى said...

بالتعاون مع أتيليه القاهرة تعتزم ورقة قلم إقامة ندوة أدبية أسبوعية كل أربعاء على أن يكون الأسبوع الأول من كل شهر ندوة بعنوان "ديوتو" لعرض أديبين و الثاني بعنوان "تجربة" لعرض تجربة أدبية و الثالث "قراءة و كتابة" لمناقشة عمل أدبي تحت الطبع و الرابع "مد وجذر" لمناقشة قضية أدبية كل أسبوع و من المقرر افتتاح سلسة النودات الأربعاء القادم 2 مايو حيث تقام ندوة "دويتو" للأديبين محمد صلاح العزب و وليد خيري و ذلك في تمام السابعة في قاعة الندوات بأتيليه القاهرة

مصر هى أمى said...

سمراء

اه طبعا مقدور عليكى

والله انت عارفة
فعلا هتنك على ايه جتنا نيلة فى حظنا الهباب
بالنسبة لفيلا عمتى والله هيا فعلا موجودة وبنفس اللى انا قولته ولو مش مصدقة تعالى اوريهالك

مصر هى أمى said...

ابن ناصر

شكرا ليك انا عرف انك مش بتحب التاجات علشان كده مبعتهولكش

مصر هى أمى said...

اسراء

شكرا ليكى والله هعمله من غير ارهاب بس انتى عارفة اميرة البلطجية ممكن تعمل ايه وانتى بنوتة جميلة مش هتعملى مشاكل وكمان مش فاضية ليا كفاية عليكى عيد ميلادك اللى يوم كتب كتاب الوريث

اما بالنسبة لتمريره ليكى فده طبعا لازم اخد حقى مرة منك

مصر هى أمى said...

طارق
شكرا ليك وربنا يخليك يا جميل

مصر هى أمى said...

محمد عبد الفغار

غلطت غلطة عمرك شوف انجى هتعمل فيك ايه هتكشر عن سنانها وتبدء تعض بعد كده

بس تصدق فعلا انا عمرى ما شفت رجالة بتعمل تاجات

مصر هى أمى said...

سمراء تانى
خلاص الراجل عرف غلطته اما بالنسبة لاخواتنا البعدا فدول طبعا معروفين لكل الرجالة

مصر هى أمى said...

اميرة البلطجية

فيلا عمتو الله احلى حاجة واحلى مكان بروحه هيا مش فيلا كبيرة اوى هيا دور واحد لكن مبنية على ربوة صغيرة فى البلد وهيا فى طرف البلد وادامنا الارض الزراعية بمساحات كبيرة

يا بنتى انا ابن ناس كويسيين بس هوا الزمن اللى عمل فيا كده


بالنسبة لاخلاء الطرف وغلاوتك لانزل كل الكومنتات اللى انتى طالبة فيها اخلاء الطرف ده فى بوست واطلب من كل الفيميل بلوجرز تقدملك اخلاء طرف بس على الله فى الاخر اعجب ماشى
واللى يرجع فى كلامه يبقى عيل

مصر هى أمى said...

اميرة البلطجية تانى

اولا مفيش مشكلة من السؤال المقرف خلاص حليته
اما السؤال الشخصى
فطبعا انا عارف انك مش انتى اللى حاطاه

حتة فيلا والله ماهيا بتاعتى دى بتاعة عمتى وجوزها الله يرحمه

بالنسبة لقدرات التدميرية ارجعى للبوست تانى
انا قولت تدمرى البلوج او ممكن تنتحرى علشان معملتش التاج بتاعك انا عارف طبعا ان اجاباتى مهمة جدا بالنسبالك
ههههههههههههههه

على فكرة انا كمان هطلب اخلاء طرف من الميل بلوجرز ماشى

مصر هى أمى said...

david

مع السلامة وكاتبهالك بالعربى علشان متعرفش تقراها

مصر هى أمى said...

الزعيمة
شكرا ليكى

وفعلا عمر ما كان الاسلام بالمظهر صحيح المظهر ليه جانب معين لكن مش كل حاجة

بالمناسبة حسن محمود الصديق المشترك اللى بينا راح فين مبقاش يظهر خالص

ان شاء الله ربنا هيكرمنى انا عندى امل فى ربنا كبير


وعقبال ما نفرح بيكى وبايهاب ان شاء الله واياكى متعزمنيش متخافيش مش هاكل كتير اوى

مصر هى أمى said...

رانيا

شكرا ليكى وخلاص محمد عبد الغفار عرف غلطته معلش سماح

مصر هى أمى said...

احمد مغازى


شكرا ليك اوى وهازورك اكيد ان شاء الله

مصر هى أمى said...

فارس
والله انا لسه فى ذمتى اتنين مش عارف ارد عليهم امتى ربنا يعينك

مصر هى أمى said...

احمد سمير

شكرا ليك جدا

ربنا يقدرنا كلنا على التاجات ديه

مصر هى أمى said...

SoRsaRaa

ان شاء الله

مصر هى أمى said...

شهيدة

ليه كده انا شايف ان فى اسئلة عامة كتير حتى الاسئلة اللى عن مصر حوليها للبنان الشقيقة

مستنى الجون بتاعك

مصر هى أمى said...

سهر الليالى


ليه الاحراج ده انا مش طمعان فى اكل البيت بس انا مش بحب يكون فى التلاجة اكل بايت خالص وطبعا بما انه حرام نرمى اكل سليم فا انا اولى بيه اطلعه من التلاجة واسخنة واكله

مصر هى أمى said...

ريرى


شكرا اوى ليكى

مصر هى أمى said...

مايكل

شكرا ليك اوى وانا فعلا بموت فى توم وجيرى

بالنسبة للبوتاجاز والتلاجة انت عارف طبعا السبب

مصر هى أمى said...

الحاج ابو جمال

اكيد هازو العزبة قريب

مصر هى أمى said...

مادو

ان شاء الله هحاول اجى

Amany Y. El-Saeed said...

:)
جامد التاج ده يا محمد
عجبنى أوى موضوع البوتوجاز و التلاجه ده
بس مش ملاحظ إن أسئله التاج ده مهيسه حبتين؟

مصر هى أمى said...

امانى

انا معاكى ان اسئلة التاج فيها شوية حاجات غريبة بس هنعمل ايه انتى عارفة اميرةالبلطجية ممكن تدمر البلوج لو مجاوبتش على التاج بتاعها وخصوصا ديه اول مرة تمررلى تاج

بالنسبة للتلاجة والبوتاجاز
طبعا دول اكتر جهازين مستعملين عندى